Oshiwa “okweehena popepi naKalunga”

1-2. (a) Oshike twa pumbwa okuninga, opo tu pange oukaume wopofingo naumwe? (b) Oshike hatu ka kundafana moshitukulwa eshi?

MBELA ou na kaume kopofingo? Owa ninga po shike, opo u dule okupanga oukaume naye? Otashi dulika ho kala pamwe naye efimbo, u shii omashongo oo ta piti muo, nou shii osho e hole naasho e tonde. Owa mona yo kutya oku na omaukwatya mawa oo wa hala okuhopaenena. Naasho osho oshe ku ningifa u kale u mu hole.

² Okupanga oukaume naumwe, ohashi pula efimbo neenghendabala. Sha faafana, otwa pumbwa okukonga efimbo, opo tu shiive nawa Jehova Kalunga, nokukala tu mu hole. Oshitukulwa eshi otashi ka kundafana nghee hatu dulu okweehena popepi naKalunga nosho yo ouwa oo hau di mokuninga ngaho. Tete, natu ka tale kutya omolwashike shiwa okweehena popepi naKaume ketu kopofingo, Jehova.

3. Omolwashike twa pumbwa okudilonga kombinga youwa, oo hau di mokweehena popepi naJehova? Shi yelifa.

³ Nopehe na omalimbililo, oto dimine kutya oshiwa okweehena popepi naJehova. Ashike ngeenge otwa kala hatu dilonga kouwa oo hau di mokukala nekwatafano lopofingo naJehova, otashi ke tu linyengifa tu twikile okweehena popepi naye. (Eps. 63:​6-8) Pashihopaenenwa, otu shi shii kutya ngeenge otwa li oikulya oyo i na oitungifi, hatu ningi omadeo, hatu fuda po sha wana nohatu nu omeva a wana, otashi ke tu etela ouwa. Ndele nande ongaho, ovanhu vahapu ihava diladila kouwa oo hau di mokuninga oinima oyo, nokungaho, ihava file oshisho oukolele wavo. Ashike ngeenge otwa kala hatu diladila kouwa oo hau di mokuninga ngaho, otashi ke tu linyengifa tu kale hatu i ningi. Sha faafana, otashi dulika tu kale tu shii kutya okweehena popepi naJehova oshiwa kufye, ndele ngeenge otwa kala hatu dilonga kouwa oo hau di mokuninga ngaho, otashi ke tu linyengifa tu twikile okweehena popepi elela naYe. — Eps. 119:​27-30.

4. Omushangi wEpsalme 73:28 okwa shanga kombinga yashike?

⁴ Lesha Epsalme 73:28. Omushangi Epsalme 73 okwa li Omulevi, nokwa li a nangekwa po e li omwiimbi kotembeli yaJehova. Otashi dulika a li a longela Jehova noudiinini oule womido dihapu. Ashike okwa li e wete kutya osha fimana opo e lidimbulukife nokudimbulukife yo vamwe kutya oshiwa “okweehena popepi naKalunga.” Omauwa amwe elipi haa di mokuninga ngaho?

“OKWEEHENA POPEPI NAKALUNGA” OHAKU ETA EHAFO

5. (a) Omolwashike okweehena popepi elela naJehova haku tu etele ehafo? (b) Ngaashi sha popiwa mOmayeletumbulo 2:​6-16, ongahelipi ounongo oo hau di kuJehova hau tu kwafele noku tu amena?

⁵ Ngeenge otwa ehene popepi elela naJehova, ohatu ka kala twa hafa. (Eps. 65:4) Ope na omatomheno mahapu kutya omolwashike hatu ka kala twa hafa. Pashihopaenenwa, ngeenge otwa lesha kombinga yaasho Jehova te tu lombwele mEendjovo daye, Ombiibeli, nokudulika kuye, ohatu ka kala ovanaendunge. Osho Jehova te tu hongo ohashi tu amene komanwefemo mai, notuha ninge omapuko a kwata moiti. (Lesha Omayeletumbulo 2:​6-16.) Nomolwaasho osha yeleka, eshi Ombiibeli ya ti: “Omunhu oo ta kala a hafa oye oo ha mono ounongo nomunhu oo e na eendunge dokuyoolola.” — Omayel. 3:13.

6. Oshike sha li sha ningifa omupsalme a kanife ehafo laye?

⁶ Omafimbo amwe, ookaume kaJehova navo ohava kala va nyika oluhodi. Omushangi wEpsalme 73 okwa li a kanifa ehafo, eshi a li ta diladila kombinga yoinima oyo a li e wete ihe li pauyuki. Okwa li a hovela okudiladila kutya ovakolokoshi otava hafele onghalamwenyo nonande ihava dulika kuKalunga, naasho osha li she mu ningifa a kale a handuka nokwe va twila ondubo. Okwa li ta diladila kutya ovakolokoshi nosho yo ovo ve na ounhwa, ova punapala, ve na oukolele noihava mono oixuna. (Eps. 73:​3-7, 12) Pomhito imwe, omupsalme oo okwa li nokuli ta diladila kutya eenghendabala odo a ninga, opo a longele Jehova odongaho. Okwa popya a nyika oluhodi, a ti: “Onde lihepeka shili epwanga, eshi nda kala omuyuki momutima, nonda kosha omake ange ndi ulike kutya nghi na etimba.” — Eps. 73:13.

7. Oshike hatu dulu okuninga po, ngeenge otwa nyika oluhodi? (Tala yo kombada yoshifo.)

⁷ Omupsalme oo ka li a efa a kale a wililwa po koluhodi. Okwa li a katuka onghatu. Okwa li a ya “monhele iyapuki inene yaKalunga,” na Jehova okwa li a pukulula onghedi yaye yokudiladila. (Eps. 73:​17-19) Kaume ketu kopofingo, Jehova, oha kala e tu wete, ngeenge twa nyika oluhodi. Ngeenge otwa ilikana e tu pe ewiliko, nokutambula ko ekwafo olo he tu pe okupitila mEendjovo daye nosho yo meongalo, otashi ke tu kwafela tu twikile oku mu longela nokuli nonande otwa nyika oluhodi. Ngeenge twa wililwa po koisho, Jehova ote ke tu hekeleka. — Eps. 94:19.a

‘OKWEEHENA POPEPI NAKALUNGA’ OTAKU TU KWAFELE TU HAFELE ONGHALAMWENYO NOTAKU TU PE ETEELELO

8. Omauwa elipi vali hatu ka mona, ngeenge otwa ehene popepi naKalunga?

⁸ Ngeenge otwa ehene popepi naKalunga, ohatu ka mona yo ouwa meenghedi dopavali. Yotete, ohatu ka hafela onghalamwenyo. Onhivali, ohatu ka kala tu na eteelelo la twa li na sha nonakwiiwa. (Jer. 29:11) Natu ka konakoneni omauwa oo moule.

9. Ongahelipi okweehena popepi naJehova haku tu kwafele tu kale twa hafa?

⁹ Ohatu dulu okuhafela onghalamwenyo ngeenge otu na ekwatafano lopofingo naJehova. Ovanhu vahapu kunena inava itavela kutya Kalunga oko e li. Onghee kave shii kutya omolwashike ovanhu ve li kombada yedu, nova itavela kutya monakwiiwa kombada yedu itaku ka kala vali ovanhu. Ashike eshi twa konakona Eendjovo daKalunga, otwa tomhwa kutya Kalunga “oha yandje ondjabi kwaavo tave mu kongo va mana mo.” (Heb. 11:6) Nokunena, ohatu hafele onghalamwenyo eshi hatu longele Jehova, molwaashi okwe tu shita tu kale hatu mu longele. — Deut. 10:​12, 13.

10. Ngaashi sha popiwa mEpsalme 37:​29, Jehova okwa udanekela shike ovo ve lineekela muye?

¹⁰ Ovanhu vahapu kave na eteelelo li na sha nonakwiiwa. Ohava i ashike koilonga, tava hombola, tava mono ounona nokutuvikila oimaliwa, opo ve ke i longife, ngeenge ova pendjelwa. Kave shi shii osho Kalunga a udaneka shi na sha nonakwiiwa. Ndele mepingafano novanhu ovo, ovapiya vaJehova ove lineekela muye. (Eps. 25:​3-5; 1 Tim. 6:17) Otwe lineekela Kalunga, oo e li kaume ketu, notu shi shii kutya ota ka wanifa po osho e tu udanekela. Otwa teelela nodjuulufi oku ka ninga oinima ihapu monakwiiwa, mwa kwatelwa oku ke mu longela mOparadisa. — Lesha Epsalme 37:29.

11. Okweehena popepi naKalunga ohashi tu kumu ngahelipi, noha kala e shi uditile ngahelipi?

¹¹ Okweehena popepi naKalunga ohashi tu etele vali omauwa mahapu amwe. Pashihopaenenwa, Jehova okwa udaneka kutya ota ka dima po omatimba aavo ve livela ombedi. (Jes. 1:18) Onghee itatu ka kala hatu lipula kombinga yomanyono oo twa nyona monakudiwa. (Eps. 32:​1-5) Jehova oha kala a hafa, ngeenge hatu longo osho sha yuka. (Omayel. 23:15) Ngeenge otu na ekwatafano lopofingo naKalunga, ohatu mono shili omauwa mahapu. Ndele mbela ongahelipi hatu dulu okutwikila okweehena popepi naKalunga?

NGHEE HATU DULU OKUTWIKILA “OKWEEHENA POPEPI NAKALUNGA”

12. Eenghatu dilipi wa katuka, opo u ehene popepi naKalunga?

¹² Ofimbo inatu ninginifwa tu li Eendombwedi daJehova, otwa ninga omalunduluko mahapu, opo tu dule okweehena popepi naJehova. Otwe lihonga oshili kombinga yaJehova Kalunga nosho yo yaKristus Jesus, twe lidilulula, twa ulika kutya otu na elineekelo muKalunga, notwa ninga ngaashi hatu dulu, opo tu dulike kuye. Ndele opo tu ehene popepi elela naKalunga, otwa pumbwa okutwikila okuninga oinima oyo. — Kol. 2:6.

13. Oinima itatu ilipi tai dulu oku tu kwafela tu twikile okweehena popepi elela naJehova?

¹³ Oshike tashi ke tu kwafela tu twikile okweehena popepi elela naJehova? (1) Otwa pumbwa okutwikila okulesha nokukonakona Ombiibeli. Ngeenge hatu lesha Ombiibeli, otwa pumbwa okuninga shihapu shihe fi ashike okulihonga kombinga yaKalunga. Otwa pumbwa okukendabala okuuda ko onghedi yaKalunga yokudiladila nosho yo osho a hala tu ninge, notwa pumbwa okutula moilonga omafinamhango aye. (Ef. 5:​15-17) (2) Otwa pumbwa okupameka eitavelo letu mokudilonga kombinga yanghee Jehova e tu ulikila ohole pauhandimwe. (3) Otwa pumbwa okutwikila okukala tu tonde oinima oyo Jehova e tonde, notu na okuhenuka okupanga oukaume novanhu ovo hava longo oilonga oyo Jehova e tonde. — Eps. 1:1; 101:3.

14. Metwokumwe no 1 Ovakorinto 10:​31, oshike twa pumbwa okuninga, opo tu hafife Jehova efiku keshe? (Tala yo omafano.)

¹⁴ Lesha 1 Ovakorinto 10:31. Osha fimanenena okulonga oilonga oyo tai hafifa Jehova. Ashike otwa pumbwa okuninga shihapu shihe fi ashike okuudifa nokuya kokwoongala. Otwa pumbwa okuhafifa Jehova mukeshe shimwe osho hatu ningi efiku keshe. Pashihopaenenwa, ohatu hafifa Jehova mokukala tu li ovanashili moinima aishe, nokukala hatu yandje. (2 Kor. 8:21; 9:7) Jehova okwa hala yo tu ulike olupandu li na sha noshali yomwenyo. Onghee ohatu li nokunwa pandjele, nohatu ningi vali oinima imwe oyo hai tu kwafele, opo tu kale tu na oukolele. Ngeenge Jehova e wete hatu kendabala oku mu hafifa mukeshe osho hatu ningi, oha kala e tu hole unene. — Luk. 16:10.

15. Jehova okwa hala tu kale hatu ungaunga novanhu ngahelipi?

¹⁵ Jehova oha ungaunga novanhu aveshe nonghenda, kashi na nee mbudi kutya otave mu longele, ile hasho. (Mat. 5:45) Okwa hala nafye tu kale hatu ungaunga novanhu aveshe nonghenda. Pashihopaenenwa, katu na okukala hatu ‘popile vamwe mowii, nokukala hatu tanguna, ndele otu na okukala tu na omwenyo muwa eshi hatu ungaunga novanhu aveshe.’ (Tit. 3:2) Onghee, nokuli nonande ovanhu inava itavela muJehova, ihatu kala tu udite kutya otu li xwepo tu va dule. (2 Tim. 2:​23-25) Ohatu ehene popepi elela naJehova mokukala hatu ungaunga alushe novanhu aveshe nonghenda.

OHATU DULU “OKWEEHENA POPEPI NAKALUNGA” NOKULI NONANDE OTWA NINGA OMAPUKO

16. Omushangi wEpsalme 73 okwa li e udite ngahelipi konima eshi a kala nokulongela Jehova oule wefimbo?

¹⁶ Omafimbo amwe, otashi dulika tu kale tu udite kutya Jehova ke li popepi nafye, omolwomapuko oo twa ninga. Ashike dimbuluka oshihopaenenwa shomushangi wEpsalme 73. Okwa ti: “Eemhadi dange hanga da kanduka mo mondjila; hanga da ya omufenu, eshi handi katuka.” (Eps. 73:2) Okwa li a dimina kutya okwa “nyemata” ‘noka li ha diladila,’ ‘a fa oshinamwenyo shihe na eendunge’ koshipala shaJehova. (Eps. 73:​21, 22) Mbela okwa li e udite kutya Jehova ke mu hole vali, noite ke mu dimina po omolwomapuko aye?

17. (a) Omupsalme okwa li a ninga po shike, nokuli naashi a li a nyika oluhodi neenghono? (b) Oshike hatu dulu okulihonga koshihopaenenwa shaye? (Tala yo omafano.)

¹⁷ Ngeenge omupsalme okwa li e udite a ekelwashi kuJehova, otashi dulika a li e udite ashike ngaho oule wokafimbo. Nokuli naashi a li a nyika oluhodi neenghono, okwa li e shi shii kutya okwa pumbwa okweehena popepi elela naKalunga. Okwa ti: “Ashike paife ohandi twikile okukala pamwe naave [Jehova]; Owa kwata nge keke lange lokolulyo. Oho wilike nge nomayele oye, nolwanima, oto ka fila nge onghenda.” (Eps. 73:​23, 24) Nafye otwa pumbwa okupula Jehova e tu pameke, ngeenge tu wete eitavelo letu tali ende tali nghundipala, ile ngeenge twa teka omukumo neenghono omolwomanyono etu. (Eps. 73:26; 94:18) Nokuli nongeenge otwa nyona sha kwata moiti, ohatu dulu okwaalukila kuJehova, tu shi shii kutya okwe ‘lilongekida oku tu dimina po.’ (Eps. 86:5) Otwa pumbwa okweehena popepi elela naKalunga, unene tuu ngeenge twa nyika oluhodi neenghono. — Eps. 103:​13, 14.

‘EHENA POPEPI NAKALUNGA’ FIYO ALUSHE

18. Omolwashike twa pumbwa okutwikila okweehena popepi naJehova fiyo alushe?

¹⁸ Ohatu dulu okutwikila okweehena popepi naJehova nosho yo okulihonga kombinga yaye fiyo alushe. Ombiibeli oya popya kutya ‘kape na oo ta dulu okuuda ko,’ eendjila daye, ounongo nosho yo eshiivo laye. — Rom. 11:33.

19. Epsalme otali tu shilipaleke kombinga yashike?

¹⁹ Epsalme 79:​13, ola ti: “Fye, ovanhu voye nosho yo oufita womoulifilo woye, ohatu ke ku pandula fiyo alushe; nohatu ka shiivifa efimano loye okudja kepupi fiyo okepupi.” Eshi to ende to ehene popepi naKalunga, naave oto ka kala wa shilipalekwa kutya oto ka mona omanangeko noupuna fiyo alushe, noto ka dula okupopya nouladi to ti: “Kalunga oye emanya lomutima wange noshitukulwa shange fiyo alushe.” — Eps. 73:26.