Katu li ofye atuke

1-2. (a) Omolwashike hatu dulu okukala noushili kutya katu li ofye atuke, ngeenge twa taalela omaupyakadi? (b) Oshike hatu ka kundafana moshitukulwa eshi?

NGEENGE twa taalela omaupyakadi, ohatu kala tu udite twa fa tu li ofye atuke mofuka ya fita, noka tu shii kutya natu dje mo ngahelipi. Ashike ihatu kala twa taalela omaupyakadi ofye atuke. Tate yetu womeulu omunahole iha kala ashike e wete omaupyakadi omo hatu piti, ndele okwe tu udanekela yo oku tu kwafela. Jehova okwa shilipaleka ovapiya vaye ovadiinini a ti: ‘Ohandi ke mu kwafela.’ — Jes. 41:​10, KB-13.

² Moshitukulwa eshi, ohatu ka kundafana nghee Jehova he tu kwafele (1) moku tu wilika, (2) mokufila oshisho eemhumbwe detu, (3) moku tu amena nosho yo (4) moku tu hekeleka. Jehova okwe tu shilipaleka kutya kashi na nee mbudi kutya ohatu shakeneke omashongo a tya ngahelipi monghalamwenyo, ke na efiku e tu dimbwe noku tu fiya po. Onghee katu li ofye atuke.

JEHOVA OHE TU WILIKE

3-4. Jehova ohe tu wilike ngahelipi? (Epsalme 48:14)

³ Lesha Epsalme 48:14. Jehova ina teelela tu liwilike fye vene. Ongahelipi ha wilike ovapiya vaye ovadiinini kunena? Ohe shi ningi okupitila mOmbiibeli. (Eps. 119:105) Jehova oha longifa Ombiibeli, opo e tu kwafele tu ninge omatokolo opandunge, notu kulike omaukwatya oo tae tu kwafele tu kale twa hafa paife nosho yo monakwiiwa.a Pashihopaenenwa, okwe tu honga tu dimine po vamwe, tu kale ovanashili mwaashishe osho hatu ningi nosho yo okukala tu hole vamwe tashi di komutima. (Eps. 37:8; Heb. 13:18; 1 Pet. 1:22) Ngeenge otwa kulike omaukwatya a tya ngaho, ohatu ka kala ovadali, ookaume kopahombo nosho yo ookaume vawa.

⁴ Jehova okwe tu lombwela mOmbiibeli shi na sha noimoniwa yovanhu, ovo va li ko shili, ovo va li va shakeneka omashongo, nove na omaliudo a fa etu. (1 Kor. 10:13; Jak. 5:17) Ngeenge hatu lesha oimoniwa yavo nokutula moilonga oilihongomwa oyo hatu lihongo, ohashi tu etele ouwa meenghedi dopavali. Yotete, ohatu mono kutya hafye atuke hatu shakeneke omashongo monghalamwenyo. Vamwe ova pita momashongo a faafana naao etu, nova li va dula oku e lididimikila kekwafo laJehova. (1 Pet. 5:9) Onhivali, ohatu lihongo nghee hatu dulu okuungaunga nomaupyakadi etu. — Rom. 15:4.

5. Jehova oha longifa oolyelye, opo e tu wilike?

⁵ Jehova oha longifa yo ovamwatate novamwameme, opo e tu wilike.b Pashihopaenenwa, ovapashukilishikandjo ohava talele po omaongalo pandjikilile, opo ve tu twe omukumo. Oipopiwa yavo ohai pameke eitavelo letu, nohai tu kwafele tu kaleke po oukumwe wetu. (Oil. 15:40–16:5) Ovakulunhuongalo ohava longo noudiinini, opo va kwafele keshe umwe womufye a kale e na ekwatafano la kola naJehova. (1 Pet. 5:​2, 3) Ovadali ohava hongo yo ovana vavo va kale ve hole Jehova, noku va kwafela va ninge omatokolo opandunge, nokukala ve na eenghedi diwa. (Omayel. 22:6) Ovakainhu va pyokoka Ovakriste ohava kwafele ovamwameme ovanyasha moku va tulila po oshihopaenenwa shiwa, oku va pa omayele nosho yo oku va twa omukumo. — Tit. 2:​3-5.

6. Oshike tu na okuninga, opo tu mone ouwa mewiliko laJehova?

⁶ Jehova okwa ninga ngaashi ta dulu, opo e tu pe ewiliko olo twa pumbwa. Ongahelipi hatu dulu okuulika kutya otwa pandula osho e tu ningila? Omayeletumbulo 3:​5, 6 okwa ti: “Lineekela muJehova nomutima woye aushe, ino lineekela meendunge doye mwene.” Ngeenge otwa ningi ngaho, ‘ota ka yukililifa omalila etu,’ osho osha hala okutya ote ke tu kwafela tu henuke omaupyakadi mahapu, nohatu ka kala twa hafa monghalamwenyo. Inatu pandula tuu eshi Jehova e tu pa omayele opahole! — Eps. 32:8.

JEHOVA OHA FILE OSHISHO EEMHUMBWE DETU

7. Omeenghedi dimwe dilipi Jehova he tu file oshisho? (Ovafilippi 4:19)

⁷ Lesha Ovafilippi 4:19. Kakele ashike koku tu wilika, Jehova oha nangeke yo noupuna eenghendabala detu dokuninga ngaashi hatu dulu, opo tu mone oikulya, oikutu nosho yo onhele yokukala. (Mat. 6:33; 2 Tes. 3:12) Nonande oshi li paushitwe okukala hatu lipula shi na sha neemhumbwe detu dopalutu, Jehova ote tu ladipike tuha kale unene tu na oshisho shapitilila shi na sha noinima oyo. (Mat. 6:25) Omolwashike? Omolwaashi Tate yetu ke na efiku a efe ovalongeli vaye ovadiinini. (Mat. 6:8; Heb. 13:5) Ohatu dulu okukala twe lineekela filufilu muye eshi a popya kutya ote ke tu fila oshisho.

8. Oshike osho Jehova a li a ningila David?

⁸ Natu ka taleni nghee Jehova a li a kwafela David. Eshi David a li ta i onhapo ohamba Saul, Jehova okwa li a pa David nosho yo ovakwaita vaye osho va li va pumbwa, opo va xupe. Eshi David a diladila kunghee Jehova a li e mu fila oshisho oule womido, okwa shanga a ti: “Onda li omunyasha, ndele paife onda kulupa, ashike inandi mona nande omuyuki umwe a efiwa, ile oludalo laye tali ehela omungome.” (Eps. 37:25) Ngaashi David, naave otashi dulika wa mona nghee Jehova a fila oshisho ovapiya vaye pefimbo loudjuu.

9. Ongahelipi Jehova ha kwafele oshiwana shaye kunena, pefimbo loshiponga? (Tala yo omafano.)

⁹ Jehova oha file yo oshisho oshiwana shaye pefimbo loiponga. Pashihopaenenwa, pefimbo lovayapostoli eshi muJerusalem mwa li mwa holoka ondjala, ovamwatate va dja keenhele di lili noku lili ova li va tumina ovamwatate vaako oinima oyo va li va pumbwa. (Oil. 11:​27-30; Rom. 15:​25, 26) Nokunena ovamwatate novamwameme ohava yandje oikwafa kwaavo ve li momhumbwe. Ngeenge pa holoka oshiponga, Jehova ohe linyengifa oshiwana shaye, opo shi yandje oipumbiwa ngaashi oikulya, omeva, oikutu nosho yo omiti kwaavo va hangwa koshiponga. Oshikondo shokutunga ohashi wapekulula omaumbo nosho yo Omalupale Ouhamba. Ovapiya vaJehova ohava endelele okuhekeleka nokutwa omukumo ovo va kanifa omaumbo avo, ile ovo va filwa.c

10-11. Oshike we lihonga moshimoniwa shaBorys?

¹⁰ Jehova oha file oshisho yo ovo ihave mu longele natango. Sha faafana, nafye ohatu kongo eemhito, opo tu ungaunge nonghenda naavo ihava longele Jehova. (Gal. 6:10) Luhapu osho ohashi yandje oundombwedi. Natu ka taleni koshimoniwa shaBorys, omukulunhufikola oo ha di moUkraine. Nonande Borys ka li umwe womEendombwedi daJehova, okwa kala alushe ha ungaunga nonghenda novanafikola vEendombwedi, nokwa li a fimaneka eitavelo lavo. Omolwoita, Borys okwa li a tokola okufiya po omukunda wavo nokukala ha di konhele oko kwa amenwa, novamwatate ova li ve mu kwafela. Lwanima, Borys okwa ka kala pEdimbuluko lefyo laKristus. Eshi Borys a diladila kwaashishe osho a li a ningilwa kovamwatate, okwa ti: “Eendombwedi oda li da ungaunga naame nonghenda noda li da fila nge oshisho. Ohandi pandula neenghono Eendombwedi daJehova.”

¹¹ Nafye ohatu dulu okuhopaenena Tate yetu womeulu omunanghenda, mokuulikila ovo ve li momhumbwe ohole, kashi na nee mbudi kutya ohava longele Jehova, ile hasho. (Luk. 6:​31, 36) Otu na elineekelo kutya ohole oyo twe va ulikila otai ke ve linyengifa va kale va hala okulihonga shihapu kombinga yaJehova, nova hovele oku mu longela pamwe nafye. (1 Pet. 2:12) Kashi na nee mbudi kutya otave ke linyenga ngahelipi, ohatu ka mona ehafo olo hali di mokuyandja. — Oil. 20:35.

JEHOVA OHE TU AMENE

12. Jehova okwa udaneka kutya ota ka amena ngahelipi oshiwana shaye shi li ongudu? (Epsalme 91:​1, 2, 14)

¹² Lesha Epsalme 91:​1, 2, 14. Kunena, Jehova okwa udaneka oku tu amena kukeshe shimwe osho tashi dulu okunyona po ekwatafano letu naye. Ita ka efa Satana a ningife ovanhu ve mu longele monghedi oyo Ina hokwa. (Joh. 17:15) Pefimbo ‘loudjuu munene,’ ohatu ka kala tu na elineekelo filufilu kutya Jehova ota ka wanifa po eudaneko laye loku tu kwafela tu kale tu na eitavelo la kola noku tu amena palutu. — Eh. 7:​9, 14.

13. Omeenghedi dilipi Jehova he tu amene pauhandimwe?

¹³ Ongahelipi Jehova he tu amene pauhandimwe? Jehova ohe tu kwafele okupitila mOmbiibeli tu shiive osho shi li mondjila naasho sha puka. (Heb. 5:14) Ngeenge otwa tula moilonga osho hatu lihongo mOmbiibeli, ohatu ka amena ekwatafano letu naye, nohatu ka ninga omatokolo opandunge oo tae ke tu kwafela tu kale twa hafa notu kale tu na onghalamwenyo ya koshoka. (Eps. 91:4) Shikwao vali, Jehova ohe tu amene okupitila pokwoongala oko haku tu kwafele tu kale tu na eitavelo la kola. (Jes. 32:​1, 2) Ovamwatate novamwameme meongalo ove hole Jehova nohava dulika kuye. Ngeenge otwa kala efimbo pamwe navo pokwoongala, moukalele nosho yo pefimbo lomalihafifo, otave ke tu twa omukumo noku tu kwafela tu henuke okulonga osho shii. — Omayel. 13:20.

14. (a) Omolwashike Kalunga ihe tu amene alushe komaupyakadi oo hae tu hange? (b) Epsalme 9:10 ole tu shilipaleka shike? (Tala yo eshangelo lopedu.)

¹⁴ Monakudiwa, Jehova okwa li ha amene ovapiya vaye omafimbo amwe, opo vaha mone oiponga, ile vaha dipawe. Ashike haalushe a li ha ningi ngaho. Ombiibeli oya popya kutya keshe umwe womufye ota dulu okuhangwa ‘koiningwanima yombadilila.’ (Omuud. 9:11) Natango, Jehova okwa li a pitika ovapiya vaye va hepekwe, nokuli nokudipawa, opo a ulike kutya Satana omunaipupulu. (Job 2:​4-6; Mat. 23:34) Ngaashi ashike oinima oyo ya li ya ningilwa ovapiya vaJehova monakudiwa, nafye otai dulu yo oku tu ningilwa kunena. Nonande otashi dulika Jehova aha kufe po omaupyakadi etu, ohatu dulu okukala noushili kutya ke na fiku a efe po ovo ve mu hole.d — Eps. 9:10.

JEHOVA OHE TU HEKELEKE

15. Ongahelipi eilikano, Eendjovo daKalunga nosho yo Ovakriste vakwetu hai tu hekeleke? (2 Ovakorinto 1:​3, 4)

¹⁵ Lesha 2 Ovakorinto 1:​3, 4. Omafimbo amwe, ohatu kala twa nyika oluhodi, tu na oshisho, ile twa wililwa po. Otashi dulika to piti monghalo inyikifa oluhodi oyo tashi dulika i ku ningife u kale u udite u li oove auke. Mbela ope na ngoo oo e udite ko omaliudo oye? Jehova oku a udite ko. Iha kala ashike e tu uditile oukwao wananghali, ndele ohe tu “hekeleke momaudjuu etu aeshe.” Ngahelipi mbela? Ngeenge otwa mbubulile Jehova omitima detu okupitila meilikano, ote ke tu pa “ombili yaKalunga oyo i dule eendunge adishe.” (Fil. 4:​6, 7) Ohatu hekelekwa yo ngeenge hatu lesha osho Jehova te tu lombwele mOmbiibeli. Okwe tu lombwela kutya oku tu hole shi fike peni, e tu honga nghee hatu dulu okukala ovanaendunge nokwe tu pa eteelelo. Ohatu mono yo ehekeleko okupitila pokwoongala opo hatu lihongo oinima tai tu omukumo okudja mOmbiibeli, nohatu kala pamwe novamwatate novamwameme ovo ve tu hole.

16. Oshike we lihonga moshimoniwa shaNathan naPriscilla?

¹⁶ Opo tu mone nghee Jehova ha yandje ehekeleko nosho yo etwomukumo okupitila mOmbiibeli, natu ka taleni koshimoniwa shaNathan naPriscilla ovo hava di moUnited States. Omido donhumba da ka lupuka, ova li va tokola okutembukila koshitukulwa oko kwa li ku na omhumbwe inene yovaudifi vOuhamba. Nathan okwa ti: “Otwa li tu na elineekelo kutya Jehova ota ka nangeka noupuna eenghendabala detu.” Ashike eshi va fika koshitukulwa osho, ova li va kwatwa kounghundi, nouxupilo owa li tau kande omapunya. Opo nee, ova li va shuna keumbo, oko natango ouxupilo wa li tau kande omapunya. Nathan okwa ti: “Onda li handi lipula kutya omolwashike Kalunga ine tu kwafela monghedi oyo twa li twa teelela e tu kwafele. Onda li nokuli nda hovela okudiladila kutya pamwe onda ninga sha shapuka.” Ashike mokweendela ko kwefimbo, Nathan naPriscilla ova li va mona kutya Jehova ka li e va efa pefimbo loudjuu. Nathan okwa ti: “Pefimbo olo la li lidjuu neenghono, Ombiibeli oya kala ya fa kaume oo he tu tu omukumo noku tu wilika. Eshi twa yandja elitulemo kunghee Jehova e tu kwafela tu lididimikile eshongo olo, ponhele yokuyandja elitulemo kulo, osha li she tu kwafela tu lilongekidile okutaalela omashongo omonakwiiwa tu na eitavelo.”

17. Omumwameme Helga okwa li a hekelekwa ngahelipi? (Tala yo efano.)

¹⁷ Ovamwatate novamwameme otava dulu yo oku tu hekeleka. Ngahelipi mbela? Natu ka taleni koshihopaenenwa shaHelga, oo ha di moHungary. Oule womido dihapu, okwa kala nokuungaunga nomashongo mahapu oo a li e mu ningifa a kale e na oshisho noku udite ehe na oshilonga. Eshi Helga a diladila keenghalo odo a pita mudo, okwa li a mona nghee Jehova e mu hekeleka okupitila meongalo. Okwa shanga a ti: “Jehova okwa kala alushe nokukwafela nge eshi a mona kutya onda wililwa po koilonga yokulikongela omboloto, eshi nda li handi file oshisho okaana kange oko ka li taka ehama nosho yo eshi nda li handi piti momashongo amwe vali. Momukokomoko womido 30 da pita, inapa pita nande efiku limwe Jehova ina hekeleka nge. Oha pameke nge lwoikando okupitila meendjovo davamwe tadi tu omukumo. Luhapu onda li handi tuminwa omatumwalaka, oukalata nosho yo eendjovo detwomukumo pefimbo la wapala.”

18. Ongahelipi hatu dulu okuhekeleka vamwe?

¹⁸ Ohatu dulu okuhopaenena Kalunga ketu mokuhekeleka vamwe. Ongahelipi hatu dulu okuninga ngaho? Ohatu dulu okupwilikina kuvo nelitulemo, hatu popi navo nonghenda nosho yo oku va kwafela meenghedi dimwe vali. (Omayel. 3:27) Otwa tokola toko okuhekeleka aveshe ovo tava mono oixuna mwa kwatelwa ovo ihava longele Kalunga. Ngeenge ovashiinda shetu va nyika oluhodi, tava ehama, ile ve na oisho, ohatu va talele po, hatu pwilikine kuvo noku va leshela omishangwa tadi tu omukumo okudja mOmbiibeli. Ngeenge otwa hopaenene Jehova, ‘Kalunga kehekeleko alishe,’ itatu ka kwafela ashike ovaitaveli vakwetu, ndele otashi dulika yo tu ka kwafele ovo ihava longele Kalunga ve lihonge kombinga yaye. — Mat. 5:16.

JEHOVA OTA KA KALA ALUSHE NOKU TU KWAFELA

19. Jehova okwe tu ningila shike, nongahelipi hatu dulu oku mu hopaenena?

¹⁹ Jehova oku na ko nasha naaveshe ovo ve mu hole. Ihe tu fiye po, ngeenge tu li momaupyakadi. Ngaashi ashike omudali omunahole ha file oshisho okaana kaye, Jehova oha file oshisho ovalongeli vaye ovadiinini. Ohe tu wilike, ha file oshisho eemhumbwe detu, he tu amene noku tu hekeleka. Ohatu hopaenene Tate yetu womeulu omunahole mokuyambidida nokutwa omukumo vamwe ngeenge ve li momayeleko. Nonande ohatu shakeneke omashongo notwa nyika oluhodi, otu na elineekelo kutya Jehova oku li pamwe nafye. Okwe tu udanekela a ti: “Ino tila, osheshi Ame ondi li pamwe naave.” (Jes. 41:​10, KB-13) Eudaneko olo otali tu shilipaleke kutya katu na efiku tu kale ofye atuke.