Kalunga oha dulu okuuda nai ongahelipi hatu dulu oku mu hafifa?

Mbela owa li wa udifwa nai fiku limwe ndele to kwena? — a Atusheni ohatu udifwa nai. Ndele omafimbo amwe otashi dulika tu kwene molwaashi otwa udifwa nai. Umwe otashi dulika e tu lundile. Osho otashi dulu oku ku udifa nai, hasho mbela? —  Kalunga naye oha udu nai ngeenge ta lundilwa. Natu ka kundafaneni kombinga yaasho nokutala nghee hatu dulu okuhafifa Kalunga ponhele yoku mu nyemateka.

Ombibeli oya ti kutya ovanhu vamwe ovo va li hava ti ove hole Kalunga ova li ve ‘mu lilifa.’ Heeno, ova li ‘va handukifa’ Kalunga! Kape na omunhu ta dulu okuyahameka olutu laJehova Kalunga, molwaashi ye omunaenghono adishe. Natu ka tale kutya omolwashike Jehova ha udu nai ngeenge inatu ninga osho e tu lombwela.

Ovanhu votete vavali ovo Jehova a shitila kombada yedu ova li ve mu handukifa neenghono. Ovanhu ovo vavali ova li va tulwa mOparadisa kombada yedu hai ifanwa ‘oshikunino shaEden.’ Mbela ou shii kutya ovanhu ovo vavali oolyelye? — Heeno, ooAdam naEva. Natu ka tale kutya oshike osho va li va ninga sha udifa nai Jehova.

Konima eshi Jehova e va tula moshikunino, okwe va lombwela ve shi file oshisho. Okwe va lombwela yo kutya nava dale ounona nokukala pamwe fiyo alushe moshikunino. Ashike fimbo Adam naEva inava mona ounona, opa li pa holoka oupyakadi munene. Mbela ou shii kutya owa shike? —  Omweengeli umwe okwa ningifa Eva naAdam va tukululile Jehova oshibofa. Natu ka tale kutya osha enda ngahelipi.

Omweengeli oo okwa ningifa eyoka li kale la fa tali popi. Eva okwa li a hokwa osho a uda eshi eyoka le mu lombwela kutya ota ka kala “ngaashi Kalunga.” Onghee hano, okwa li a ninga ngaashi eyoka le mu lombwela. Mbela ou shii kutya oshike osho a li a ninga? — 

Eva okwa li a lya komuti oo Jehova a lombwela Adam kutya inava lya kuo. Kalunga okwa li a lombwela Adam ofimbo Eva ina shitwa a ti: “Lya komiti adishe domoshikunino ngaashi wa hala, ndelenee komuti wokushiiva ouwa nowii, ino u lya. Osheshi efiku tuu olo to li kuwo, ove u noku ka fya shili.”

Eva okwa li e shii nawa omhango oyo. Ashike nande ongaho, okwa kala nokutala komuti oo ndele ta mono kutya “omuti ou omuwa nokulya ndee tau hafifa omesho. . . Ndele ye okwa kufa oiimati yao nokwa lya.” Opo nee lwanima okwa pa Adam oshiimati, “ndele ye okwa lya.” Mbela oto diladila kutya omolwashike a ningila ngaho? —  Omolwaashi Adam okwa li e hole Eva unene shi dulife eshi e hole Jehova. Okwa hoolola okuhafifa Eva ponhele yokuhafifa Kalunga. Ashike osha fimanenena okudulika kuJehova ponhele yokudulika kuumwe e lili.

Oto dimbuluka eyoka olo la popya naEva? Ngaashi ashike omunhu ta dulu okuningifa epopifa li kale la fa tali popi, neyoka ope na umwe oo a li e li ningifa li kale la fa tali popi. Ondaka ya lyelye ya li ya popya okupitila meyoka? —  Okwa li ondaka ‘yeyoka likulu, la ifanwa ondiaboli naSatana.’

Mbela ou shii kutya ongahelipi to dulu okuhafifa Jehova? —  Oto dulu okuninga ngaho mokukendabala okukala ho dulika kuye. Satana okwa ti kutya ota dulu okuningifa ovanhu aveshe va longe ehalo laye. Ndele Jehova okwe tu ladipika a ti: ‘Kala u neendunge, omumwange, hafifa omutima wange, opo nee handi dulu okunyamukula ovalundili vange.’ Satana okwa lundila Jehova ile e mu sheka. Okwa ti kutya ota dulu okuningifa ovanhu aveshe vaha longele Jehova. Onghee hano, hafifa Jehova mokukala ho dulika kuye noku mu longela! Mbela oto ka kendabala noudiinini okuninga ngaho?—