Etukulwa etine
Oo ovaprofeti aveshe ve mu hepaulula
1. Oushili u na sha nokukala po kwaJesus fimbo ina ninga omunhu kombada yedu otau ulike shike shi na sha nekwatafano laye naJehova?
“XE E HOLE Omona, ndele te mu ulikile aishe ei Oye mwene te i longo.” (Johannes 5:20) Omona ina hafela tuu ekwatafano lopofingo naXe, Jehova! Ekwatafano olo lopofingo ola tameka pefimbo lokushitwa kwaye, omayovimido mahapuhapu fimbo ina dalwa e li omunhu kombada yedu. Okwa li Omona ewifa laKalunga, oo oye aeke a shitwa kuYe sha yukilila. Keshe shimwe meulu ile kombada yedu osha shitwa okupitila mOmona woshiveli omuholike. (Ovakolossi 1:15, 16) Okwa longa yo e li Ondjovo ile Omupopikalelipo waKalunga, oo okupitila muye ehalo laKalunga la li la shiivifilwa vamwe. Oo, Omona oo Kalunga e hole unene, okwa ninga omunhu Jesus Kristus.—Omayeletumbulo 8:22-30; Johannes 1:14, 18; 12:49, 50.
2. Omaxunganeko Ombibeli okwa ulika kuJesus shi fike peni?
2 Fimbo Omona oshiveli shaKalunga kwa li ina tulwa moshidalelo pashikumwifilonga opo a dalwe e li omunhu, omaxunganeko mahapu a nwefwa mo okwa li a shangwa shi na sha naye. Omuyapostoli Petrus okwa yandja oumbangi kuKornelius a ti: “Oye tuu ou ovaprofeti vonale ve mu hepaulula.” (Oilonga 10:43) Onghandangala yaJesus oya li ya hokololwa nawa mOmbibeli nomolwaasho omweengeli umwe okwa lombwela omuyapostoli Johannes a ti: “Ehepaululo laJesus olo omhepo youprofeti.” (Ehololo 19:10) Omaxunganeko oo okwe mu holola lela kutya oye Messias. Okwa yukifa elitulemo keenghandangala di lili noku lili odo e na okudana mokuwanifa omalalakano aKalunga. Aishe oyo oi na okukala ihokwifa neenghono kufye kunena.
Osho omaxunganeko a holola
3. (a) Mexunganeko olo li li muGenesis 3:15, olyelye e lilwe po keyoka, ‘komwalikadi’ nosho yo ‘koludalo leyoka’? (b) Omolwashike ‘okunyanyaulwa kwomutwe weyoka’ ku li oshinima shihokwifa kovapiya vaJehova?
3 Exunganeko lotete lomaxunganeko oo ola li la popiwa konima younashibofa muEden. Jehova okwa ti keyoka: “Ame ohandi ka tula outondanhu pokati koye nomwalikadi . . . nokoludalo loye nokoludalo laye. Ye ota ka nyanyaula omutwe woye ndele ove oto ke mu twa moshififinwa.” (Genesis 3:15) Exunganeko olo ola li la yukifwa lela kuSatana, oo kwa li e lilwe po keyoka. ‘Omwalikadi’ oye ehangano laJehova lomeulu lidiinini, olo la fa omukainhu omudiinini kuye. ‘Oludalo leyoka’ ola kwatela mo ovaengeli novanhu aveshe ovo tava ulike omhepo yaSatana, ovo ve li omhinge naJehova nosho yo oshiwana shaYe. ‘Okunyanyaulwa kwomutwe weyoka’ otaku ti ehanauno laxuuninwa lomunashibofa Satana, oo a lundila Jehova nokwa etifa oluhodi linene kovanhu. Ndele mbela oshike shi li oshitukulwa sha fimanenena ‘sholudalo’ olo tali ka nyanyaula? Oule womafelemido, osho osha kala ‘oshiholekwa.’—Ovaroma 16:20, 25, 26.
4. Ongahelipi epata laJesus la ulika kutya oye Oludalo la udanekwa?
4 Konima yomido 2 000 lwaapo dondjokonona yovanhu, Jehova okwa yandja ouyelele natango. Okwa holola kutya Oludalo otali ka dja mepata laAbraham. (Genesis 22:15-18) Ndelenee epata omo kwa li tamu ka dja Oludalo kala li tali ka kala le likolelela kokudalwa pambelela, ndele okwaao a hoololwa kuKalunga. Nonande Abraham okwa li e hole omona Ismael, oo a dalwa kuHagar, Jehova okwa ti: “Ehangano lange Ame ohandi ke li ninga naIsak, Sara ote ke mu ku dalela.” (Genesis 17:18-21) Konima yefimbo ehangano olo ola li la shilipalekelwa omona waIsak, Jakob, oo muye mwa dja omapata 12 aIsrael, ndele hamona waye woshiveli, Esau. (Genesis 28:10-14) Konima yefimbo, osha li sha ulikwa kutya Oludalo otali ka dalwa moshiwana shaJuda, mepata laDavid.—Genesis 49:10; 1 Omafimbo 17:3, 4, 11-14.
5. Eshi Jesus a hovela oukalele waye wokombada yedu, oshike she shi ulika kutya oye a li Messias?
5 Omauyelele amwe natango elipi kwa li a yandjwa shi na sha nokudidilika kutya Oludalo olo lyelye? Omido di dule 700 komesho yefimbo, Ombibeli oya tumbula Betlehem shi li onhele omo Oludalo la udanekwa kwa li tali ka dalelwa li li omunhu wokombada yedu. Oya ulika yo kutya Oludalo ola kala po ‘momafimbo onalenale,’ okudja efimbo olo kwa li a shitwa meulu. (Mika 5:2, NW) Efimbo lokondadalunde lokukala po kwaye kombada yedu e li Messias ola li yo la xunganekwa okupitila momuprofeti Daniel. (Daniel 9:24-26) Naashi Jesus kwa li a vaekwa nomhepo iyapuki, a ninga Omuvaekwa washili waJehova, ondaka yaKalunga ya dja meulu oye mu holola sha yela kutya oku li Omona waYe. (Mateus 3:16, 17) Oludalo ola li la hololwa. Kungaha, Filippus okwa li ta dulu okupopya noushili eshi a ti: “Ofye twa mona ou a shangwa kuMoses momhango novaprofeti, Jesus.”—Johannes 1:45.
6. (a) PaLukas 24:27, ovashikuli vaJesus ova mona shike? (b) Olyelye e li oshitukulwa shinene ‘sholudalo lomwalikadi,’ nokunyanyaula omutwe weyoka kwaye osha hala okutya ngahelipi?
6 Konima yaasho, ovashikuli vaJesus ova mona kutya ope na omapopyo opaxunganeko mahapu lela ovenevene e na sha naye e li oshitukulwa shOmishangwa da nwefwa mo. (Lukas 24:27) Osha ka yela mo nawa nokuli kutya Jesus oye oshitukulwa shinene ‘sholudalo lomwalikadi,’ olo tali ka nyanyaula omutwe weyoka, sha hala okutya tali ka hanauna po Satana a ha kale po vali. Okupitila muJesus, omaudaneko aeshe oo Kalunga a udanekela ovanhu, oinima aishe oyo twa djuulukwa neenghono, otai ka wanifwa.—2 Ovakorinto 1:20.
7. Kakele kokudidilika oo a popiwa momaxunganeko, oshike vali shiwa okudidilika?
7 Ongahelipi oku shi shiiva ku na oku tu nwefa mo? Ombibeli otai tu lombwele elenga lOkuetiopia olo kwa li la lesha amwe omomaxunganeko oo e na sha naao te uya e li Omukulili noku li yo Messias. Okwa pula omuudifi wevangeli Filippus nelimbililo a ti: “Olyelye ou ta popiwa komuprofeti?” Ndele elenga olo inali efa oshinima shi xulile opo eshi la mona enyamukulo. Konima yokupwilikina noukeka kokuyelifa kwaFilippus, omulumenhu oo okwa didilika kutya okuuda ko okuwanifwa kwexunganeko olo okwa li taku mu pula a katuke onghatu. Okwa uda ko kutya okwa li a pumbwa okuninginifwa. (Oilonga 8:32-38; Jesaja 53:3-9) Mbela ohatu linyenge sha faafana?
8. (a) Eyeleko laAbraham lokuyamba po Isak ola li tali faneke shike? (b) Omolwashike Jehova a lombwela Abraham kutya oiwana aishe otai ke linangeka noupuna okupitila mOludalo, naasho otashi longo ngahelipi kufye kunena?
8 Diladila yo shi na sha nehokololo tali kumu omutima li na sha neyeleko laAbraham lokuyamba po Isak, omona waye aeke oo a dalwa kuSara. (Genesis 22:1-18) Osho okwa li tashi ulike osho Jehova a li ta ka ninga—okuyamba po Omona waye ewifa, ngaashi taku ti: “Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” (Johannes 3:16) Osho otashi tu pe elineekelo kutya ngaashi ashike Jehova a yandja Omona waye ewifa opo a wanife po elalakano laYe, ote ke ‘tu pa yo aishe.’ (Ovaroma 8:32) Mbela ohatu pulwa tu ninge shike? Ngaashi sha shangwa muGenesis 22:18, Jehova okwa lombwela Abraham kutya oiwana aishe otai ke linangeka noupuna okupitila mOludalo, “osheshi [Abraham a] uda ondaka [yaKalunga].” Nafye otwa pumbwa okupwilikina kuJehova nosho yo kOmona waye, ngaashi taku ti: “Ou ta itavele Omona oye e nomwenyo waalushe; ndelenee ou iha dulika kOmona, ita ka mona omwenyo, ndelenee ehandu laKalunga otali kala kombada yaye.”—Johannes 3:36.
9. Ngeenge otwa pandula eteelelo lomwenyo waalushe oo wa ningwa tau shiiva omolweyambo laJesus, oshike hatu ka ninga?
9 Ngeenge otwa pandula eteelelo lomwenyo waalushe oo wa ningwa tau shiiva omolweyambo laJesus, ohatu ka kala twa hala okuninga oinima oyo Jehova e tu lombwela okupitila muJesus. Omalombwelo oo okwa kwatafana filufilu nohole yetu yokuhola Kalunga nosho yo ovanhu vakwetu. (Mateus 22:37-39) Jesus okwa ulika kutya ohole yetu yokuhola Jehova otai ke tu linyengifa tu honge vamwe “okudiinina aishe ei [Jesus e tu] lombwela.” (Mateus 28:19, 20) Notwa hala okuulikilafana ohole oyo novapiya vaJehova vakwetu ‘mokwoongala pamwe’ navo nope he na okufaula. (Ovaheberi 10:25, OB-1986; Ovagalati 6:10) Natango, mokupwilikina kuKalunga nOmona waye, inatu diladila nande kutya otava pula tu kale twa wanenena. Ovaheberi 4:15 otava ti kutya Jesus e li Omupristeri wetu Omukulunhu, ota dulu ‘okuudila oungone wetu olukeno.’ Osho itashi hekeleke tuu, unene tuu ngeenge hatu ilikana kuKalunga okupitila muKristus opo e tu kwafe tu finde omaunghundi etu!—Mateus 6:12.
Kala u na eitavelo muKristus
10. Omolwashike pe he na exupifo limwe kakele okupitila muJesus Kristus?
10 Konima yokuyelifila omhangu yopombada yOvajuda muJerusalem kutya exunganeko lOmbibeli ola wanifilwa muJesus, omuyapostoli Petrus okwa xulifa neendjovo di na eenghono a ti: “Kaku namukwao, exupifo la kala muye, osheshi kaku nedina limwe lilili koshi yeulu, la yandjelwa ovanhu omo tu nokuxupifilwa mo.” (Oilonga 4:12) Molwaashi oludalo alishe laAdam olilunde, efyo lavo itali dulu okulongifwa li li ekulilo okukulila omunhu nande oumwe. Ndele Jesus okwa li a wanenena nosho yo omwenyo waye owa li u na ongushu yopayambo. (Epsalme 49:7-10; Ovaheberi 2:9) Okwa yandja kuKalunga ekulilo olo la yeleka naanaa pongushu yomwenyo wa wanenena oo wa kanifwa kuAdam. (1 Timoteus 2:5, 6) Osho oshe tu yeululila omhito opo tu mone omwenyo waalushe mounyuni mupe waKalunga.
11. Yelifa nghee eyambo laJesus tali dulu oku tu etela ouwa filufilu.
11 Ekulilo ole tu yeululila yo ondjila tu mone omauwa amwe, nokuli nopaife. Pashihopaenenwa, nonande otu li ovalunde, eyambo laJesus otali shi ningi tashi shiiva tu dule okukala neliudo la yela omolwokudiminwa po omatimba. Osho oshi dule kokule neenghono osho kwa li sha wanifilwa Ovaisrael komayambo oinamwenyo oo kwa li taa pulwa kOmhango yaMoses. (Oilonga 13:38, 39; Ovaheberi 9:13, 14; 10:22) Ndelenee opo tu mone ediminepo olo otu na okudimina paushili kutya otwa pumbwa eyambo laKristus neenghono: “Ndelenee ngenge hatu ti, katu noulunde, ohatu lipukifa fye vene noshili kai mo mufye. Ndele ngenge hatu hepaulula omatimba etu, Ye omudiinini nomuyuki opo te tu kufile po omatimba ndee te tu kosho ouhenouyuki aushe.”—1 Johannes 1:8, 9.
12. Omolwashike okuninginifwa momeva ku li oshinima sha fimana ngeenge omunhu okwa hala okumona eliudo liwa koshipala shaKalunga?
12 Ongahelipi ovalunde tava dulu okuulika kutya ove na eitavelo muKristus nosho yo meyambo laye? Eshi ovanhu mefelemudo lotete va ninga ovaitaveli, ova li ve shi ulika moipafi. Ngahelipi mbela? Ova ninginifwa. Omolwashike mbela? Omolwaashi Jesus okwa popya kutya ovahongwa vaye aveshe ove na okuninginifwa. (Mateus 28:19, 20, NW; Oilonga 8:12, NW; 18:8, NW) Omunhu ita ka ongaonga ngeenge omutima waye owe linyengifwa shili kefiloshisho lopahole olo Jehova a ninga okupitila muJesus. Ota ka ninga omalunduluko keshe a pumbiwa monghalamwenyo yaye, te liyapulile Kalunga meilikano nokuninginifwa momeva shi li edidiliko kutya okwe mu liyapulila. Omokuulika ashike eitavelo monghedi oyo ta dulu “okwiindila kuKalunga eliudo liwa.”—1 Petrus 3:21.
13. Ngeenge otwa dimina kutya otwa ninga epuko, otu na okuninga shike shi na sha nalo, nomolwashike?
13 Doshili, nokuli nokonima yaasho oikala youlunde opo tai ka kala. Ongahelipi nee ngeenge otwa nyono? Omuyapostoli Johannes okwa ti: “Edi ohandi di mu shangele mu ha nyone; ndele ngenge pe na ou ta nyono, tu nomupopili puTate, Jesus Kristus omuyuki. Ndele Oye ekulilo lomatimba etu.” (1 Johannes 2:1, 2) Mbela osho osha hala okutya kashi na nee mbudi kutya ohatu ningi shike, ngeenge otwa ilikana kuKalunga omolwediminepo, ohatu ka diminwa po? Hasho naanaa. Oshipatululo shokudiminwa po osho elivelombedi lashili. Ekwafo otali dulu yo okukala la pumbiwa okudja kwaavo va pyokoka, ovo ve na owino muhapu meongalo lopaKriste. Otu na okudimina epuko laasho twa ninga nokukala tu udite oluhodi lashili opo tu ninge eenghendabala da mana mo tu henuke oku li endulula. (Oilonga 3:19; Jakob 5:13-16) Ngeenge ohatu shi ningi, ohatu dulu okukala noushili kutya ohatu ka mona ekwafo laJesus nohatu ka kala twa hokiwa kuJehova.
14. (a) Yelifa onghedi ya fimana omo eyambo laJesus le tu etela ouwa. (b) Ngeenge otu na eitavelo shili, ohatu ka ninga shike?
14 Eyambo laJesus ole shi ninga tashi shiiva ‘koshiunda shinini’ shi mone omwenyo waalushe meulu, osho shi li oshitukulwa oshitivali sholudalo lomuGenesis 3:15. (Lukas 12:32, OB-1954; Ovagalati 3:26-29) Ola yeululila yo ondjila yokumona omwenyo waalushe moparadisa kombada yedu omamiliyona omayovi makwao ovanhu. (Epsalme 37:29, OB-1986; Ehololo 20:11, 12; 21:3, 4) Omwenyo waalushe oo “oshalinghenda yaKalunga . . . muKristus Jesus, Omwene wetu.” (Ovaroma 6:23; Ovaefeso 2:8-10) Ngeenge otu na eitavelo moshali oyo notwa hafela onghedi omo ya ningwa tai shiiva, ohatu ke shi ulika. Okuuda ko nghee Jehova a longifa Jesus monghedi ikumwifi mokuwanifa po ehalo laYe nonghee sha fimanenena kufyeni atusheni okushikula oshikoti shaJesus filufilu, otashi ka ninga oukalele wopaKriste u li oilonga ya fimanenena monghalamwenyo yetu. Eitavelo letu otali ka kala li liwetikile mokulombwela kwetu ovanhu noushili shi na sha noshali oyo inene ya dja kuKalunga.—Oilonga 20:24.
15. Ongahelipi okwiitavela Jesus Kristus ku na oshidjemo tashi hanganifa?
15 Eitavelo olo kali na tuu oshidjemo shiwa tashi hanganifa! Okupitila mulo, otwa ehenifwa popepi elela naJehova nOmona waye nosho yo kuvakwetu meongalo lopaKriste. (1 Johannes 3:23, 24) Otashi tu hafifa eshi Jehova a yandja palukeno kOmona waye “edina li li kombada yomadina aeshe [kakele kedina laKalunga], opo aveshe ve nokutwa eengolo medina laJesus naava vomeulu novokombada yedu naava vokoshi yedu, nelaka keshe li nokufimaneka Kalunga Xe nokuhepaulula, kutya Jesus Kristus Oye Omwene.”—Ovafilippi 2:9-11.
Eenghundafana dokweendulula
• Eshi Messias a holoka, omolwashike a didilikwa mo noupu kwaavo va itavela shili Eendjovo daKalunga?
• Oinima imwe ilipi oyo tu na okuninga tu ulike olupandu letu lokupandula eyambo laJesus?
• Omeenghedi dilipi eyambo laJesus le tu etela nale ouwa? Osho otashi tu kwafele ngahelipi ngeenge hatu ilikana kuJehova tu diminwe po omatimba?
[Efano pepandja 36]
Jesus okwa lombwela ovashikuli vaye va honge vamwe va diinine oipango yaKalunga