Natu lalakaneni ombili!

“Tu lalakaneni hano eshi tashi hapupalifa ombili.” — ROM. 14:19.

1, 2. Omolwashike Eendombwedi daJehova di na ombili mokati kado?

OMBILI yashili oya pumba mounyuni kunena. Nokuli novanhu vomoshiwana shimwe nohava popi elaka limwe luhapu oto hange va tukaulwa koinima ngaashi omalongelokalunga, opolitika, ouhongelwe nosho yo oiniwe. Ndele nande ongaho, oshiwana shaJehova osha hangana nonande osha dja ‘moiwana aishe nomomaludi aeshe nomovanhu aveshe nomomalaka aeshe.’ — Eh. 7:9.

² Ope na omatomheno mawa kutya omolwashike tu na ombili mokati ketu. Etomheno limwe la fimanenena ololo kutya “otu nombili naKalunga” notwa itavela Omona waye oo ohonde yaye ya tika opo tu diminwe po omatimba etu. (Rom. 5:1; Ef. 1:7) Shimwe vali, Kalunga kashili oha pe ovapiya vaye ovadiinini omhepo yaye iyapuki oyo hai imike muvo oiimati yayo, mwa kwatelwa ombili. (Gal. 5:22) Etomheno limwe vali molwaashi tu na ombili noukumwe mokati ketu ololo kutya fye katu “fi oshitukulwa shounyuni.” (Joh. 15:19, NW) Oshiwana shaJehova ihashi kufa nandenande ombinga moinima yopapolitika. Osha ‘hambula omaonga asho oikashulifo,’ nomolwaasho ihashi kufa ombinga moita yopamihoko ile yopaiwana. — Jes. 2:4.

3. Ombili oyo i li mokati ketu oya ningifa shike tashi shiiva, noshike hatu ka kundafana moshitukulwa eshi?

³ Ombili oyo i li mokati ketu ohai tu linyengifa tu ninge shihapu shihe fi ashike okuhenuka okweehameka ovamwatate. Nonande momaongalo Eendombwedi daJehova otu li mo twa dja momaputuko nomomihoko di lili noku lili, otu li mo tu “holafane.” (Joh. 15:17) Ombili oyo ohai tu linyengifa ‘tu ningile aveshe ouwa, ndelenee unene tuu ovo oovakwetu vomeitavelo.’ (Gal. 6:10) Otu na yo okukala twa lenga neenghono oparadisa yetu yopamhepo nokatu na okweefa nande osha shi i nyone po. Onghee hano, natu ka taleni nghee hatu dulu okulalakanena ombili meongalo.

Ngeenge pa holoka okuhaudafana pokati ketu navamwe

4. Oshike hatu dulu okuninga po opo tu kaleke po ombili ngeenge twa udifa umwe nai?

⁴ Omuhongwa Jakob okwa ti: “Atushe ohatu puka luhapu. Ngenge ope na ou iha puka meendjovo, oye omulumenhu a wanenena.” (Jak. 3:2) Onghee hano, otashi dulika pa kale hapa holoka luhapu eenhamanana nokuhaudafana pokati ketu novaitaveli vakwetu. (Fil. 4:2, 3) Ndele nande ongaho, ngeenge okuhaudafana okwa holoka pokati koohandimwe meongalo otava dulu oku ku kandula po nopehe na okunyona po ombili yeongalo. Pashihopaenenwa, natu ka taleni komayele oo tu na okutula moilonga ngeenge otwa mono kutya otwa udifa umwe nai. — Lesha Mateus 5:23, 24.

5. Ongahelipi hatu dulu okulalakanena ombili ngeenge umwe e tu ninga nai?

⁵ Ongahelipi ngeenge umwe okwe tu ningi oshinima shii ndele inashi kwata moiti? Mbela otu na okukala twa teelela oo e tu ninga nai oye e uye e tu pe ombili? Ovakorinto votete 13:5 ova ti: “[Ohole] ihai dimbulukwa owii ye u ningilwa.” Ngeenge otwa ningwa nai kuumwe, otu na okulalakanena ombili moku mu dimina po nokudimbwa oshinima osho, sha hala okutya, tuha ‘dimbulukwe owii oo twa ningilwa.’ (Lesha Ovakolossi 3:13.) Oshiwa okuungaunga nomaupyakadi oo inaa kwata moiti monghedi ya tya ngaho, molwaashi osho otashi ka xumifa komesho ombili pokati ketu novalongelikalunga vakwetu notashi ke tu etela ombili yopamadiladilo. Eyeletumbulo limwe ola ti: ‘Efimano loye olo okudima po etauluko.’ — Omayel. 19:11.

6. Oshike tu na okuninga ngeenge umwe e tu ninga oshinima osho itatu dulu okudimbwa noupu?

⁶ Ongahelipi ngeenge umwe okwe tu ninga oshinima osho itatu dulu okudimbwa noupu? Itashi ka kala pandunge okutandavelifa osho umwe e ku ninga molwaashi olwaambo la tya ngaho otali ka nyona po ashike ombili yeongalo. Ndele mbela oshike tu na okuninga opo tu pongolole po okuhaudafana kwa tya ngaho nombili? Mateus 18:15 okwa ti: “Omumwanyoko ngenge ta nyono kuove, inda u ke mu pukulule mu li po amuke vavali, ndele ngenge te ku udu, opo nee ove wa likola omumwanyoko.” Nonande Mateus 18:15-17 ota popi unene shi na sha nomanyono oo a kwata moiti, ohatu dulu yo okutula moilonga efinamhango olo li li movelishe 15 ngeenge hatu ungaunga naavo ve tu ninga oinima oyo itatu dulu okudimbwa noupu, mokuya kuvo tu ka pongolole po okuhaudafana tu li po ofye atuke vavali opo tu kale vali tu na ekwatafano liwa navo.a

7. Omolwashike tu na okukandula po diva okuhaudafana pokati ketu navamwe?

⁷ Omuyapostoli Paulus okwa ti: “Handukeni, ndelenee inamu nyona. Inamu efa etango li ningine mu nehandu. Ndele inamu pa Satana onhele.” (Ef. 4:26, 27) Jesus okwe tu ladipika a ti: ‘Pafaneni diva ombili nomutamaneki woye.’ (Mat. 5:25) Onghee hano, otu na okulalakanena ombili mokukala hatu pongolola po diva okuhaudafana pokati ketu navamwe. Omolwashike mbela? Omolwaashi ngeenge inatu kandula po okuhaudafana oko kwa holoka pokati ketu meendelelo, onghalo otai ka naipala ngaashi ashike oshipute hashi naipala ngeenge inashi hakulwa diva. Hano inatu efa nande ounhwa, efupandubo ile oinima yopamaliko i kale hai tu imbi tu pongolole po diva okuhaudafana oko haku holoka pokati ketu novamwatate. — Jak. 4:1-6.

Ngeenge okuhaudafana okwa kwatela mo ovanhu vahapu

8, 9. (a) Okuhaudafana kulipi kwa li kwa holoka po meongalo lokuRoma lomefelemudo lotete? (b) Omayele elipi Paulus a li a pa Ovakriste vokuRoma shi na sha nokuhaudafana oko kwa li pokati kavo?

⁸ Omafimbo amwe okuhaudafana oko haku holoka po meongalo ohaku kala kwa kwatela mo ovanhu vahapu. Pashihopaenenwa, meongalo lokuRoma omwa li mwa holoka okuhaudafana pokati kOvajuda novanhu vomoiwana imwe ovo va li va ninga Ovakriste, nomolwaasho omuyapostoli Paulus okwa li a nwefwa mo a shangele eongalo olo onhumwafo. Vamwe meongalo olo ova li va dina vakwao ovo eliudo lavo la li itali va pitike va ninge oinima yonhumba nonande Omishangwa inadi tya oya puka. Oohandimwe va tya ngaho ova li va tokola vakwao shihe li pauyuki moinima oyo keshe omunhu e na okuninga ehoololo kuye mwene. Ndele mbela omayele elipi Paulus a li a yandja keongalo olo? — Rom. 14:1-6.

⁹ Paulus okwa li a yandja omayele keengudu adishe dopavali odo da li itadi tu kumwe. Okwa li a lombwela ovo va li ve udite ko kutya kave li vali koshi yOmhango yaMoses vaha kale va dina ovamwaxe. (Rom. 14:2, 10) Oikala ya tya ngaho oya li tai dulu okupundukifa vamwe ovo eliudo lavo la li itali va pitike natango va lye oikulya oyo ya li ya dilikwa koshi yOmhango. Paulus okwa li e va kumaida a ti: “Ino hanauna po oshilonga shaKalunga molwoikulya. . . . Oshiwa okukala iho li ombelela noiho nu omaviinyu, ndele ho lidilike keshe eshi tashi tondifa omumwaxo.” (Rom. 14:14, 15, 20, 21) Paulus okwa li yo a kumaida Ovakriste ovo eliudo lavo la li itali va pitike va ninge oinima yonhumba vaha tokole ovo ve na etaleko la mbwalangadja. (Rom. 14:13) Okwa li e va kumaida a ti: “Keshe umwe mokati keni mu he lidiladilile kombada yaashi she mu yeleka.” (Rom. 12:3) Opo nee, okwa li a ladipika Ovakriste aveshe meongalo olo a ti: “Tu lalakaneni hano eshi tashi hapupalifa ombili netungafano.” — Rom. 14:19.

10. Ngaashi ashike eongalo lokuRoma lomefelemudo lotete, oshike tu na okuninga kunena opo tu kandule po okuhaudafana pokati ketu?

¹⁰ Ohatu dulu okukala noushili kutya eongalo lokuRoma ola li la tambula ko omayele aPaulus nokuninga omalunduluko oo a li a pumbiwa. Mbela nafye katu na okukala hatu kandula po nombili okuhaudafana oko haku holoka pokati ketu nOvakriste vakwetu mokukonga omayele opamishangwa noku a tula moilonga nelininipiko? Ngaashi ashike eongalo lokuRoma shonale, ngeenge meongalo lopaKriste lokunena omwa holoka okuhaudafana, keshe oo a kwatelwa mo oku na okuninga omalunduluko oo a pumbiwa opo tu kale tu ‘nombili mokati ketu.’ — Mark. 9:50.

Nghee ovakulunhuongalo tava dulu okuyandja ekwafo

11. Omukulunhuongalo oku na oku lungamena shike ngeenge Omukriste wonhumba a hala okupopya naye kombinga yokuhaudafana oko ku li pokati kaye nOmukriste mukwao?

¹¹ Ongahelipi ngeenge Omukriste okwa hala oku ka popya nomukulunhuongalo wonhumba kombinga youpyakadi oo e na nomupambele waye ile nomwiitaveli mukwao? Omayeletumbulo 21:13 okwa ti: “Ou ta fitikile onghuwo yohepele okutwi kwaye, oye mwene yo ota ka kuwa onghuwo, ndele ita ka mona epopilo.” Onghee hano, omukulunhuongalo ke na nande ‘okufitika okutwi kwaye.’ Ashike eyeletumbulo limwe vali ola londwela la ti: “Nakutulifa mo oshibofa oha monika a fa oye e li mondjila fiyo osheshi omuhokololifi waye a yandja oumbangi waye.” (Omayel. 18:17, pa-New English Translation) Omukulunhuongalo oku na okupwilikina nonghenda, ndele oku na yo okulungama aha ame omunhu oo e uya oku mu lopotela oupyakadi wonhumba. Konima eshi a hokololelwa osho sha ningwa po, na pule omunhu oo ngeenge okwa popya ngoo naao e mu ninga nai. Omukulunhuongalo ota dulu yo okukundafana omayele opamishangwa nomunhu oo opo e mu kwafele a mone kutya oshike e na okuninga po opo a lalakanene ombili.

12. Tumbula oihopaenenwa oyo tai ulike kutya osha nyika oshiponga okukatuka eenghatu meendelelo konima eshi umwe e tu hokololela oupyakadi wonhumba.

¹² MOmbibeli omu na oihopaenenwa itatu oyo tai ulike kutya osha nyika oshiponga okutokola umwe diva fimbo ino uda eembinga adishe mbali. Pashihopaenenwa, Potifar okwa li a itavela omukulukadi waye eshi a li e mu lombwela kutya Josef okwa li ta kendabala oku mu kwata onghonga. Potifar okwa li a tulifa Josef modolongo nonande ehandu laye kala li pauyuki. (Gen. 39:19, 20) Ohamba David oya li ya itavela Siba eshi ya li ya lombwelwa kuSiba kutya omwene waye Mefiboset okwa li ta yambidida ovatondi vayo. Ohamba oyo oya li ya katuka eenghatu meendelelo mokulombwela Siba ya ti: “Tala, ashishe shaMefiboset tashi ningi shoye.” (2 Sam. 16:4; 19:25-27) Ohamba Artasasta nayo oya li ya katuka eenghatu meendelelo eshi ya li ya lombwelwa kutya Ovajuda otava tungulula ekuma laJerusalem nova li va hala okutwa ondubo nouhamba waPersia. Ohamba oyo oya li ya itavela ehokololo olo loipupulu noya li ya lombwela Ovajuda va xulife po oilonga aishe yokutungulula oyo ya li tai longwa muJerusalem. Onghee hano, Ovajuda ova li yo va xulifa po oilonga yokutunga otembeli yaKalunga. (Esra 4:11-13, 23, 24) Ovakulunhuongalo Ovakriste navo ove na okudulika komayele aPaulus oo a li a pa Timoteus e na sha nokuhenuka okuninga omatokolo meendelelo. — Lesha 1 Timoteus 5:21.

13, 14. (a) Oshike osho tu na okudimbuluka ngeenge pa holoka okuhaudafana pokati kovanhu vonhumba? (b) Oshike tashi dulu okukwafela ovakulunhuongalo va dule okutokola ovaitaveli vakwao pauyuki?

¹³ Nokuli nokonima eshi eembinga adishe mbali da hokolola kutya oshike sha etifa po okuhaudafana, natango osha fimana okudimbuluka kutya “ngenge umwe e shii a shiiva sha, ina shiiva natango ngaashi e nokushiiva.” (1 Kor. 8:2) Onghee hano, osha fimana okulipula kutya: Mbela otu shii ngoo ashishe osho sha kwatelwa mo osho tashi dulika sha etifa po okuhaudafana? Otu shii ngoo nawanawa onakudiwa yovanhu ovo va kwatelwa moshinima osho? Ovakulunhuongalo ove na okulungama vaha itavelifwe oipupulu ile omitotolombo ile okweendwa medu ngeenge tava ungaunga noikoya yopamhangu ya tya ngaho. Kakele kaasho, kave na okwiitavela osho umwe ta popi molwaashi ashike oshipuna. Kalunga okwa nangeka po Omutokoli, Jesus Kristus, oo ta ka tokola pauyuki. Jesus ita ka “tokola ngaashi omesho taa tale noita yukifa ngaashi omatwi aye taa udu.” (Jes. 11:3, 4) Ponhele yaasho, Jesus oha wilikwa komhepo yaJehova. Ovakulunhuongalo Ovakriste navo otava dulu okupula Kalunga e va pe omhepo yaye iyapuki i va wilike.

¹⁴ Fimbo ovakulunhuongalo inava tokola omwiitaveli mukwao, ove na tete okupula ekwafo lomhepo yaJehova nokweefa va wilikwe kuyo mokutala omayele oo e li mEendjovo daKalunga nosho yo moishangomwa oyo ya nyanyangidwa kongudu yomupiya omudiinini nomunaendunge. — Mat. 24:45.

Osha fimana okulonga ouyuki shi dulife okukaleka po ombili naumwe

15. Onaini tu na okulopota enyono la kwata moiti lOmukriste mukwetu?

¹⁵ Ovakriste otava ladipikwa va kale hava lalakanene ombili. Ndele nande ongaho, Ombibeli oya ti: ‘Ounongo ou hau di kombada, tete owa yela nopo nee u nombili.’ (Jak. 3:17) Oukoshoki oo wa fimana u dule okukala omunambili, sha hala kutya, osha fimana okukala metwokumwe nomifikamhango daKalunga dopaenghedi nokuwanifa po oiteelelwa yaye youyuki. Ngeenge Omukriste okwa shiiva kutya Omukriste mukwao okwa nyona enyono la kwata moiti, oku na oku mu ladipika a ka lombwele ovakulunhuongalo shi na sha nenyono laye. (1 Kor. 6:9, 10; Jak. 5:14-16) Ndele ngeenge nakunyona ina hala oku ka hepaululila ovakulunhuongalo enyono laye, Omukriste oo a shiiva enyono olo oku na oshinakuwanifwa shoku ke va lombwela. Osha puka okukendabala okuholeka enyono laumwe molwaashi kungaho naave oto yambidida enyono olo, nonande otashi dulika we shi ninga to diladila kutya oto kaleke po ombili yeni nomunyoni. — Lev. 5:1; lesha Omayeletumbulo 29:24.

16. Oshike hatu dulu okulihonga moshihopaenenwa shaJehu shi na nanghee a li a ungaunga nohamba Joram?

¹⁶ Ehokololo limwe lOmbibeli li na sha naJehu otali tu kwafele tu mone kutya osha fimanenena okulonga ouyuki waKalunga shi dulife okukaleka po ombili pokati ketu naumwe. Kalunga okwa li a tuma Jehu a ka katukile oukwaneumbo wohamba Ahab onghatu. Ndele fimbo Jehu a li mondjila, ohamba ikolokoshi Joram, omona waAhab naIsabel, oya li ye uya oku mu shakeneka netemba layo, ndele tai ti kuye: “Ombili tuu Jehu?” Ndele mbela Jehu okwa li a nyamukula ngahelipi? Okwa ti: “Oshike? Ombili yashike, fimbo okuhaelwa kwanyoko Isebel [noundudu] waye u li po uhapu?” (2 Eeh. 9:22) Opo nee, Jehu okwa li a kufa outa waye ndele ta yashe Joram pomutima. Ngaashi ashike Jehu a li a katuka eenghatu, ovakulunhuongalo navo kave na okulipwililikila ovo tava nyonene owina noihave livele ombedi opo ngeno va kaleke po ombili. Ove na okukonda mo meongalo ovanyoni ovo inava hala okulivela ombedi opo eongalo li dule okutwikila okukala li na ombili naKalunga. — 1 Kor. 5:1, 2, 11-13.

17. Ovakriste aveshe otava dana onghandangala ilipi ngeenge tashi uya pokulalakanena ombili?

¹⁷ Luhapu okuhaudafana oko haku holoka pokati kovamwatate ihaku kala kwa kwatela mo omanyono a kwata moiti oo a pumbwa okuungaungwa nao pamhangu. Onghee hano, oshiwa okukala hatu dimine po vamwe pahole ngeenge va ninga omapuko a tya ngaho. Eendjovo daKalunga oda ti: “Ou ta tuvike etauluko, ota kongo ohole, ndelenee ou ta tongolola vali eendjovo, ta tukaula ookaume.” (Omayel. 17:9) Onghee hano, atusheni ohatu ka kaleka po ombili meongalo nosho yo ekwatafano letu naJehova ngeenge otwa dulika keendjovo odo. — Mat. 6:14, 15.

Okulalakanena ombili ohaku eta omanangeko noupuna

18, 19. Omauwa elipi haa di mokulalakanena ombili?

¹⁸ Ohatu ka mona omanangeko noupuna mahapu ngeenge otwa lalakanene “eshi tashi hapupalifa ombili.” Ohatu ka kala yo tu na ekwatafano lopofingo naJehova eshi hatu ende meendjila daye nohatu ka kaleka po ombili noukumwe moparadisa yetu yopamhepo. Ngeenge otwa kala hatu lalakanene ombili meongalo otashi ke tu kwafela yo tu mone kutya omeenghedi dilipi hatu dulu okulalakanena ombili naavo hatu udifile ‘evangeli lombili.’ (Ef. 6:15) Kungaho, ohatu ka kala twe lilongekida ‘okukala tu nonheni naaveshe, nokulididimikila owii.’ — 2 Tim. 2:24.

¹⁹ Dimbuluka yo kutya “otaku ka kala enyumuko lovayuki nolovalunde.” (Oil. 24:15) Eshi exunganeko olo tali ka wanifwa oku kombada yedu, osha yela kutya otapa ka nyumunwa ovanhu omamiliyona va dja momaputuko a yoolokafana, va li ko pomafimbo a yoolokafana nove na omaukwatya a yoolokafana, nokuli naavo va li ko ‘pehovelo lounyuni.’ (Luk. 11:50, 51) Itashi ka kala tuu shi li oufembanghenda munene okuhonga ovanyumunwa ovo shi na sha nanghee ve na okulalakanena ombili! Onghee hano, edeulo olo hatu mono kunena li na sha nokukala ovanambili otali ke tu etela ouwa muhapu pefimbo olo.

[Eshangelo lopedu]

Owe lihonga shike?

• Ongahelipi hatu dulu okulalakanena ombili ngeenge otwa ningi umwe nai?

• Oshike tu na okuninga opo tu lalakanene ombili ngeenge umwe e tu ninga nai?

• Omolwashike shihe li pandunge okwaama ombinga ngeenge pe na okuhaudafana pokati kavamwe?

• Yelifa kutya omolwashike sha fimanenena okulonga ouyuki shi dulife okulalakanena ombili.

[Omafano pepandja 29]

Jehova oku hole ovo hava dimine po vamwe nehalo liwa