‘Kaleni nokushikula nge’
“Osho tuu eshi mwe shi ifanenwa, osheshi naKristus yo okwe mu hepekelwa nokwe mu fiila oshihopaelelwa mu shikule oshikoti shaye [filufilu, NW].”—1 PETRUS 2:21.
JESUS KRISTUS okwa li Omuhongi munene a shiya ko oo a li kombada yedu. Natango, okwa li a wanenena, ina nyona sha monghalamwenyo yaye aishe e li omunhu. (1 Petrus 2:22) Ndele mbela eshi osha hala okutya oshihopaenenwa shaJesus e li omuhongi oshidjuu unene nokuhopaenenwa kufye tu li ovanhu inava wanenena? Hasho nande.
1, 2. Omolwashike oshihopaenenwa shaJesus sha wanenena e li omuhongi shi he fi unene shidjuu nokuhopaenenwa kufye?
2 Ngaashi twa mona moshitukulwa sha tetekela, ekanghameno lokuhonga kwaJesus ola li ohole. Nohole oyo oshinima osho atusheni hatu dulu okukulika. Eendjovo daKalunga luhapu otadi tu ladipike tu kule notu xwepopale mohole yetu yokuhola vamwe. (Ovafilippi 1:9; Ovakolossi 3:14) Jehova iha pula sha nande kovashitwa vaye osho itava dulu okuninga. Doshili, molwaashi “Kalunga Oye ohole” nokwe tu shita oshifeka shaye, otaku dulu okutiwa kutya okwe tu shita tu ulike ohole. (1 Johannes 4:8; Genesis 1:27) Onghee hano ngeenge hatu lesha eendjovo domuyapostoli Petrus odo da shangwa momushangwa wetu woshipalanyole, ohatu dulu okulinyenga nelineekelo. Ohatu dulu okushikula oshikoti shaKristus filufilu. Doshili, ohatu dulu okudulika koshipango shaJesus mwene tashi ti: ‘Kaleni nokushikula nge.’ (Lukas 9:23, yelekanifa NW.) Natu konakoneni nghee hatu dulu okuhopaenena ohole oyo ya ulikwa kuKristus, tete omolwoshili oyo a honga, opo nee ohole yokuhola ovanhu ovo a honga.
Natu ulike ohole yokuhola oshili oyo twe lihonga
3. Omolwashike vamwe hava mono shidjuu okulihonga, ndelenee ekumaido lashike hatu hange mOmayeletumbulo 2:1-5?
3 Opo tu kale tu hole oshili oyo hatu hongo vamwe, otu na okukala tu hole okulihonga oshili oyo fye vene. Mounyuni wonena, ohole yokulihonga ihai uya alushe noupu. Oinima ngaashi ehongo inali wana nosho yo eenghedindjikilile dii odo da kulikwa mounyasha ohai ningifa vahapu va kale ve he na ehalo lokulihonga. Ndelenee osha fimanenena okulihonga okudja kuJehova. Omayeletumbulo 2:1-5 otaa ti: “Omumwange, ove ngenge ho tambula eendjovo dange noipango yange ho i tuvikile muove, opo u pakalekele omatwi oye okupwilikina ounongo nokulemena omutima woye keendunge; heeno, ngenge ho ifana omayele, ho yelulile ondaka yoye keendunge, ngenge to di kongo ngaashi oshisilveri ndee to di shitilile ngaashi omamona a holekwa, opo nee to ka uda ko etilo lokutila Kalunga nokumona eshiivo lokushiiva Kalunga.”
4. Otashi ti ngahelipi ‘okulemena’ omutima, netaleko lilipi tali ke tu kwafela tu shi ninge?
4 Didilika kutya movelishe 1 fiyo 4, ohatu ladipikwa luhapu tu ha ninge eenghendabala ashike ‘dokutambula nokutuvikila’ ndelenee ohatu ladipikwa yo tu ninge ‘dokukonga nodokushitilila.’ Ndelenee mbela oshike shi na oku tu linyengifa tu ninge oinima aishe oyo? Didilika outumbulilo ‘okulemena omutima woye keendunge.’ Embo limwe lomauyelele otali ti kutya ekumaido olo “itali pula ashike elitulemo; otali pula oikala yonhumba: ehalo lolela lokutambula ko omahongo.” Ndele mbela oshike tashi dulu oku tu ningifa tu tambule ko osho Jehova te tu hongo nosho yo okukala nehalo oku shi lihonga? Onghedi oyo hatu tale ko oinima. Otwa pumbwa okutala ko “eshiivo lokushiiva Kalunga” li li ngaashi “oshisilveri” nongaashi “omamona a holekwa.”
5, 6. (a) Oshike tashi dulu okuningwa po mokweendela ko kwefimbo, nongahelipi hatu dulu okukelela osho shi ha ningwe? (b) Omolwashike tu na okutwikila okuweda ko komamona etu eshiivo oo twa mona mOmbibeli?
5 Kashi fi shidjuu okukala netaleko la tya ngaha. Pashihopaenenwa, “eshiivo lokushiiva Kalunga” olo we lihonga otashi dulika la kwatela mo oshili oyo kutya Jehova okwa lalakanena opo ovanhu ovadiinini va ka kale fiyo alushe mOparadisa kombada yedu. (Epsalme 37:28, 29, yelekanifa OB-1986.) Eshi we lihonga tete oshili oyo, nope he na omalimbililo owa li we i tala ko i li emona lashili, eshiivo olo la yadifa omadiladilo nomutima woye neteelelo nosho yo ehafo. Mbela ongahelipi paife? Mbela mokweendela ko kwefimbo olupandu lokupandula emona loye ola shunduka? Onghee hano, kendabala u ninge oinima ivali. Shotete, tungulula olupandu loye, sha hala okutya, pepaleka omadiladilo oye alushe shi na sha netomheno molwaasho wa lenga oshili keshe oyo Jehova e ku honga, nokuli naayo we lihonga nale omido dihapu da pita.
6 Oshitivali, twikila okuweda ko kemona loye. Doshili, ngeenge owa fe emanya li na ondilo, mbela oto ke litula ashike mondjato yoye ndele to i wa wanenwa? Ile mbela oto ka fa natango u tale ngeenge ope na natango sha? Eendjovo daKalunga odi yadi oshili i na ondilo oyo ya fa omamanya, oshisilveri nosho yo omamona a holekwa. Kashi na nee mbudi kutya owa mona oshili i fike peni, oto dulu okumona ihapu natango. (Ovaroma 11:33) Eshi to fe oshitukulwa natango shoshili, lipula ove mwene kutya: ‘Oshike mbela tashi i ningi emona? Mbela otai pe nge eudeko lomoule li na sha noukwatya waJehova nosho yo omalalakano aye? Mbela otai yandje omayele amwe taa longo oo taa dulu okukwafela nge ndi shikule oshikoti shaJesus?’ Okudilonga omapulo a tya ngaho otaku ke ku kwafela u kulike ohole yoye yokuhola oshili oyo wa hongwa kuJehova.
Natu ulike ohole yokuhola oshili oyo hatu hongo
7, 8. Eenghedi dimwe dilipi omo hatu dulu okuulikila vamwe kutya otu hole oshili oyo twe lihonga mOmbibeli? Yandja oshihopaenenwa.
7 Eshi hatu hongo vamwe, ongahelipi hatu dulu okuulika kutya otu hole oshili oyo twe lihonga mEendjovo daKalunga? Mokushikula oshihopaenenwa shaJesus, otwe lineekela unene mOmbibeli mokuudifa nomokuhonga kwetu. Momafimbo opaife, oshiwana shaKalunga mounyuni aushe osha li sha ladipikwa shi longife unene Ombibeli moukalele washo womoipafi. Eshi to tula moilonga eetepo olo, kendabala paenghedi di lili noku lili okushiivifila omuneumbo kutya ove owa lenga osho to tukulilafana naye okudja mOmbibeli.—Mateus 13:52.
8 Pashihopaenenwa, pefimbo olo la landula omaponokelo opaukulo omudo wa ya mOshilando New York, omumwameme umwe Omukriste okwa li ta leshele ovanhu ovo a shakeneka moukalele Epsalme 46:1, 11. Tete okwa pula ovanhu nghee va li ve li po konima yoshiponga. Okwa pwilikina nawa komanyamukulo avo noku a dimina, opo nee ta ti: “Mbela ohai dulu oku mu ulikila omushangwa oo wa hekeleka nge shili pefimbo eli loudjuu?” Ovanhu vanini lela ve shi anya, nokuvahapu opa li oidjemo yeenghundafana diwa. Mokupopya novanyasha, omumwameme oye tuu oo luhapu okwa ti: “Onda kala nokuhonga Ombibeli omido 50 paife, ndele mbela ou shii kutya oshike osho nda mona? Inandi shakeneka nande onale oudjuu umwe oo embo eli itali dulu okuyandja ekwafo loku u kandula po.” Ngeenge ohatu popi novanhu nomutima aushe nosho yo nolouladi, ohatu va ulikile kutya otwa lenga notu hole osho twe lihonga mEendjovo daKalunga.—Epsalme 119:97, 105.
9, 10. Omolwashike sha fimana okulongifa Ombibeli ngeenge hatu nyamukula omapulo e na sha neitavelo letu?
9 Ngeenge ovanhu tave tu pula omapulo kombinga yeitavelo letu, otu na omhito iwa okuulika kutya otu hole Eendjovo daKalunga. Mokushikula oshihopaenenwa shaJesus, ihatu kanghameke ashike omanyamukulo etu komadiladilo etu vene. (Omayeletumbulo 3:5, 6) Ponhele yaasho, ohatu longifa Ombibeli mokunyamukula. Mbela owa tila kutya otashi dulika umwe e ke ku pule epulo olo ito ka dula okunyamukula? Konakona eenghatu mbali diwa odo to dulu okukatuka.
10 Ninga ngaashi to dulu u kale we lilongekida. Omuyapostoli Petrus okwa shanga ta ti: “Yapuleni Omwene Kristus momitima deni, nye mu hangike alushe mu shii kunyamukula keshe tuu ou te mu pula ekanghameno leteelelo eli li li munye, ndelenee shi ningeni [nombili nefimaneko, OB-1986].” (1 Petrus 3:15, 16) Mbela owe lilongekida okupopila eitavelo loye? Pashihopaenenwa, ngeenge umwe okwa hala okushiiva kutya omolwashike iho kufa ombinga meenghedindjikilile ile moilonga yonhumba i he li pamishangwa, ino kala ashike wa hafela okunyamukula kutya: “Otai kondjifa elongelokalunga lange.” Enyamukulo la tya ngaho otali dulu okuyandja ediladilo kutya owa efa vamwe ve ku tokolele nonokutya ou li ashike oshilyo shoshimhanga. Otashi ka kala shi li nawa okutya: “Eendjovo daKalunga, Ombibeli, otadi shi kelele” ile okutya: “Otashi nyematifa Kalunga kange.” Opo nee to yandje efatululo la yela kutya omolwashike.—Ovaroma 12:1.
11. Oilongifo yokukonga omauyelele ilipi tai dulu oku tu kwafela tu kale twe lilongekida okunyamukula omapulo e na sha noshili yEendjovo daKalunga?
11 Ngeenge ou wete kutya ino lilongekida, omolwashike ito longifa efimbo lonhumba u konakone embo Reasoning From the Scriptures ile okambo Oipalanyole yopaMbibeli yeenghundafana?a Hoolola mo oikundafanwa imwe oyo ovanhu tashi dulika tava ka pula nosho yo lihonga oitwa yonhumba yopamishangwa momutwe. Kala u na alushe embo loye Reasoning ile okambo Oipalanyole yopaMbibeli yeenghundafana nosho yo Ombibeli yoye. Ino ongaonga oku a longifa aeshe, to lombwele omupuli kutya ou na oshilongifo shokukonga omauyelele osho u hole okulongifa shi ku kwafele u mone omanyamukulo omapulo Ombibeli.
12. Ohatu dulu okunyamukula ngahelipi ngeenge katu shii enyamukulo kepulo lopaMbibeli?
12 Kendabala u ha kale to lipula unene. Kape na omunhu ina wanenena e na omanyamukulo aeshe. Onghee hano, ngeenge wa pulwa epulo lopaMbibeli olo ito dulu okunyamukula, oto dulu okunyamukula alushe monghedi ei: “Onda pandula eshi wa pula epulo la tya ngaho lihokwifa. Ndelenee paushili, nghi shii enyamukulo kepulo olo, ashike ondi na oushili kutya Ombibeli otai nyamukula oshinima osho. Ondi hole okukonga omauyelele e na sha nOmbibeli, onghee hano ohai ka konakona epulo loye noku ku etela enyamukulo.” Okupopya oshili kwa tya ngaho nokwelininipiko otaku dulu okuyeulula omhito yeenghundafana vali.—Omayeletumbulo 11:2.
Natu ulike ohole yokuhola ovanhu ovo hatu hongo
13. Omolwashike tu na okukaleka po etaleko liwa li na sha naavo hatu udifile?
13 Jesus okwa ulika ohole yokuhola ovanhu ovo a honga. Ongahelipi hatu dulu oku mu hopaenena moshinima eshi? Inatu kulika nande oikala yokuhayavala shi na sha novanhu ovo ve tu dingilila. Doshili, “oita mefiku linene laKalunga omunamapangelo aeshe” otai ehene popepi unene, navahapu mokati kovanhu omamiliyona omayovi otava ka hanaunwa po. (Ehololo 16:14; Jeremia 25:33) Ndelenee katu shii kutya oolyelye tava ka kala nomwenyo nosho yo kutya oolyelye tava ka fya. Etokolo olo otali ka ningwa monakwiiwa notali ka ningwa kuJesus Kristus oo a nangekwa po kuJehova. Fimbo etokolo inali ningwa, ohatu tale ko omunhu keshe kutya ota dulu okuninga omupiya waJehova.—Mateus 19:24-26; 25:31-33; Oilonga 17:31.
14. (a) Ongahelipi hatu dulu okulikonakona fye vene tu tale ngeenge otu na olukeno shi na sha novanhu? (b) Omeenghedi dilipi tadi longo hatu dulu okuulikila vamwe olukeno nosho yo ohokwe yopaumwene?
14 Onghee hano, ngaashi Jesus, otwa hala okukala tu na onghenda novanhu. Ohatu dulu okulipula fye vene kutya: ‘Mbela ondi uditile onghenda ovanhu ovo va pukifwa koipupulu nosho yo komakoto omalongelokalunga, eepolitika nosho yo omalandifilo ounyuni ou? Ngeenge otava monika ve he na ko nasha netumwalaka olo hatu va twaalele, mbela ohandi kendabala ndi ude ko kutya omolwashike ve udite ngaho? Mbela onda dimina kutya ame ile vamwe ovo tava longele Jehova paife noudiinini, opa li efimbo limwe olo kwa li tu udite sha faafana? Mbela onda lundulula onghedi yange yokuudifa she likolelela kediladilo olo? Ile mbela ohandi ekeleshi ovanhu va tya ngaho va fa itava dulu nande okulunduluka?’ (Ehololo 12:9) Ngeenge ovanhu tava mono olukeno letu lashili, otashi dulika ve linyenge ketumwalaka letu. (1 Petrus 3:8) Olukeno otali dulu yo oku tu linyengifa tu ulike ohokwe inene movanhu ovo hatu shakeneke moukalele wetu. Ohatu dulu okushanga omapulo nosho yo omalipulo avo. Ngeenge hatu shuna ko, ohatu dulu oku va ulikila kutya otwa kala hatu diladila kombinga yomapopyo avo eshi twa li twe va talela po oshikando sha pita. Ngeenge ove na omhumbwe yonhumba ya endelela pefimbo opo, ohatu dulu oku va pa ekwafo tali longo ngeenge otashi shiiva.
15. Omolwashike tu na okukonga ouwa movanhu, nongahelipi hatu dulu oku shi ninga?
15 Ngaashi Jesus, ohatu kongo osho shiwa movanhu. Otashi dulika omudali e he na kaume kopahombo ta ningi eenghendabala da denga mbada a tekule ounona vaye. Otashi dulika omulumenhu ta ningi eenghendabala a yambidide oukwaneumbo waye. Otashi dulika omukulupe ta ulike ohokwe moinima yopamhepo. Mbela ohatu didilike omaukwatya a tya ngaho movanhu ovo hatu shakeneke noku e va pandulila? Ngeenge ohatu shi ningi, ohatu divilike eudafano pokati ketu navo naashi otashi dulu okuyeulula ondjila yokuyandja oundombwedi kombinga yOuhamba.—Oilonga 26:2, 3.
Elininipiko ola fimanenena mokuulika ohole
16. Omolwashike sha fimana okukala nomhepo yombili nosho yo yefimaneko lokufimaneka ovanhu ovo hatu udifile?
16 Ohole yokuhola ovanhu ovo hatu hongo otai ke tu linyengifa tu pwilikine kelondwelo lOmbibeli lopandunge tali ti: “Okushiiva otaku nenepekifa, ndele ohole otai tungu.” (1 Ovakorinto 8:1) Jesus okwa li e na eshiivo lihapu, ndelenee ka li nande e na ounhwa. Onghee hano, ngeenge to tukulilafana navamwe eitavelo loye, henuka okutwa eemhata ile omhepo yokukala u wete wa fimana unene. Elalakano letu olo okuhanga omitima dovanhu noku va nanena koshili oyo tu hole neenghono adishe. (Ovakolossi 4:6) Dimbuluka kutya, eshi Petrus a pukulula Ovakriste va kale ve lilongekida okunyamukula, okwa kwatela mo edimbulukifo kutya otu na oku shi ninga “nombili nefimaneko.” (1 Petrus 3:16, OB-1986) Ngeenge otu na omhepo yombili nosho yo yefimaneko lokufimaneka vamwe, otashi dulika tu nanene ovanhu kuKalunga oo hatu longele.
17, 18. (a) Otu na okulinyenga ngahelipi koikala yokukembaula shi na sha nokuwana kwetu tu li ovakalele? (b) Omolwashike eshiivo lokushiiva omalaka onale opaMbibeli inali fimanenena kovakonakoni vOmbibeli?
17 Inatu pumbwa okukumwifa ovanhu neshiivo letu ile nehongo letu. Ngeenge vamwe moshitukulwa sheni otava anye okupwilikina kukeshe oo e he na ondodo yonhumba ile edina lonhumba lopaunivesti, ino efa oikala yavo i ku teye omukumo. Jesus ka li e na ko nasha nomapopyo oo taa ti kutya ina ya keefikola da fimana doshirabbi dopefimbo laye, noine liyandja kokatongotongo oko ka li apeshe mokukendabala okukumwifa ovanhu neshiivo laye lihapu.—Johannes 7:15.
18 Elininipiko nosho yo ohole oya fimanenena unene kovakalele Ovakriste shi dulife ouhapu wehongo keshe lomounyuni. Omuhongi Munenenene, Jehova, okwe tu ninga tu kale twa wana omolwoukalele. (2 Ovakorinto 3:5, 6) Kutya nee ovawiliki vopamhepo vOukwakriste vamwe otava ti shike, inatu pumbwa okulihonga omalaka onale opaMbibeli opo tu ninge ovahongi vEendjovo daKalunga. Jehova okwa nwefa mo Ombibeli i shangwe neendjovo da yela nodokondadalunde oyo aishe keshe umwe ta dulu okuuda ko oshili yayo ya fimana. Oshili oyo itai lunduluka nokuli nande oi tolokelwe momalaka omafele nomafele. Onghee hano, eshiivo lokushiiva omalaka onale nonande omafimbo amwe oli na oshilonga, inali fimanenena. Natango, ounhwa omolwounghulungu wokukala u shii omalaka ohau dulu okuningifa omunhu a kanife oukwatya oo wa fimanenena kOvakriste vashili—okukala u shii okuhongwa.—1 Timoteus 6:4.
19. Omonghedi ilipi oukalele wetu wopaKriste u li oilonga yokuyakula?
19 Itapa ka kala omalimbililo kutya oukalele wetu wopaKriste oo oilonga oyo tai pula oikala yelininipiko. Ohatu litula alushe meenghalo omo hatu dulu okushakeneka omapataneko, okuhenakonasha nomahepeko nokuli. (Johannes 15:20) Ndelenee, mokutwikila noudiinini noukalele wetu, ohatu wanifa po oshilonga sha fimana unene. Ngeenge ohatu twikile okukala ovalininipiki mokuyakula vamwe moilonga ei, ohatu hopaenene ohole yaJesus Kristus oyo a ulikila ovanhu. Diladila kepulo eli: Ngeenge otu na okuudifila omayovi ovanhu ve he na ko nasha ile ve li ovapataneki opo tu hange omunhu umwe oo a fa odi, mbela eshi itashi ka kala eenghendabala tadi ti sha? Heeno osho! Onghee hano, mokutwikila noilonga oyo nope he na okusholola, ohatu yakula noudiinini ovanhu ovo va fa eedi ovo tu na okufika kuvo natango. Pe he na omalimbililo, Jehova naJesus otava ka shilipaleka kutya oohandimwe vahapu ve na ondilo va tya ngaho otava ka hangika notava ka kwafelwa fimbo exulilo inali uya.—Haggai 2:7.
20. Dimwe domeenghedi omo hatu dulu okuhonga okupitila moshihopaenenwa shetu odilipi?
20 Okuhonga okupitila moshihopaenenwa shetu oyo onghedi imwe hatu ulike ehalo letu lokuyakula vamwe. Pashihopaenenwa, otwa hala okuhonga ovanhu kutya okulongela Jehova, ‘Kalunga omunelao’ oyo onghedi ya denga mbada notai mbilipaleke monghalamwenyo inaku shiya vali. (1 Timoteus 1:11, OB-1954) Eshi tava tale elihumbato letu nosho yo okuungaunga kwetu novashiinda shetu, novanafikola vakwetu nosho yo novanailonga vakwetu, mbela otava dulu ngoo okumona kutya otu na elao notwa mbilipalelwa? Sha faafana, ohatu hongo ovakonakonimbibeli kutya eongalo lopaKriste olo onhele yombili mounyuni ou u he na ohole nou na onyanya. Mbela ovo hatu konakona navo otava dulu okumona kutya otu hole aveshe meongalo nohatu longo noudiinini mokukaleka po ombili nakeshe umwe?—1 Petrus 4:8.
21, 22. (a) Okulikonakona fye vene shi na sha noukalele wetu otaku dulu oku tu ningifa tu kufe eemhito dilipi? (b) Oshike tashi ka kundafanwa moitukulwa tai landula?
21 Oikala yehalo liwa i na sha noukalele wetu omafimbo amwe otai dulu oku tu linyengifa tu likonakone vali fye vene. Moku shi ninga noushili, vahapu ova mona kutya ova pumbwa okutamununa mo oukalele wavo mokuya moukalele wefimbo liyadi ile moku ka longa opo pe na omhumbwe inene. Vamwe ova tokola okulihonga elaka loshinailongo opo va longe momudingonoko oo u li moshitukulwa shavo u na ovatembukilimo tava hapupala. Ngeenge omahoololo oo okwe ku yeulukila, diladila kuo noukeka pamwe neilikano. Onghalamwenyo yokuyakula vamwe otai eta ehafo linene, embilipalelwo nosho yo ombili yopamadiladilo.—Omuudifi 5:11.
22 Doshili, natu twikile okuhopaenena Jesus Kristus mokukulika ohole yetu yokuhola oshili oyo hatu hongo nosho yo ohole yokuhola ovanhu ovo hatu hongo. Okukulika nokuulika ohole moinima oyo ivali otashi ke tu kwafela tu dike po ekanghameno liwa lokukala ovahongi ngaashi Kristus. Ndelenee ongahelipi hatu dulu okutungila kekanghameno olo? Oitukulwa tai shikula otai ka kundafana dimwe domeenghedi dokuhonga dokondadalunde odo Jesus a longifa.
[Omashangelo opedu]
a A nyanyangidwa kEendombwedi daJehova.
[Efano pepandja 12]
Ninga ngaashi to dulu u kale we lilongekida
[Efano pepandja 13]
Ngeenge owa fimaneka “eshiivo lokushiiva Kalunga,” oto dulu okulongifa Ombibeli nomupondo
[Efano pepandja 14]
Ohatu ulike ohole yokuhola ovanhu mokutukulilafana navo onghundana iwa
[Efano pepandja 16]
Oto nyamukula ngahelipi?
• Eshilipaleko lilipi tu na kutya oshihopaenenwa shaJesus e li omuhongi kashi fi shidjuu unene nokuhopaenenwa kufye?
• Ongahelipi hatu dulu okuulika kutya otu hole oshili oyo twe lihonga mOmbibeli?
• Omolwashike sha fimana tu kale ovalininipiki eshi eshiivo letu tali hapupala?
• Omeenghedi dimwe dilipi hatu dulu okuulika ohole yokuhola ovanhu ovo hatu kendabala okuhonga?