Twikila okulihumbata ngaashi omupangelwa wOuhamba!

‘Kaleni nokweenda okuwapalela evangeli.’ — FIL. 1:27.

OTO NYAMUKULA NGAHELIPI?

Oolyelye tava dulu okukala ovapangelwa vOuhamba?

Otu na okuninga po shike shi na sha nelaka lOuhamba, ondjokonona nosho yo eemhango dao?

Ovapangelwa vOuhamba ohava ulike ngahelipi kutya ove hole omifikamhango daKalunga?

1, 2. Omolwashike omayele oo Paulus a li apa eongalo lokuFilippi a li e na eityo le likalekelwa?

OMUYAPOSTOLI Paulus okwa li a ladipika eongalo lokuFilippi li ‘kale nokweenda okuwapalela evangeli.’ (Lesha Ovafilippi 1:27.) Oshitya shOshigreka osho Paulus a longifa osho sha tolokwa ‘okweenda’ otashi dulu yo okutolokwa ‘kaleni ngaashi ovapangelwa.’ Oshitya osho osha li shi na eityo le likalekelwa keongalo lokuFilippi. Omolwashike mbela? Omolwaashi osha fa shi li ngaha kutya Filippi osha li shimwe shomoilando oyo ovakalimo vamo va li va pewa oukwashiwana waRoma. Ovakwashiwana vaRoma ovo va li muFilippi nosho yo mouhamba aushe waRoma ova li hava kala ve udite etumba omolwoukwashiwana wavo nova li hava kala va amenwa koshi yomhango yaRoma.

² Ovakriste vokuFilippi ova li ve na etomheno la kola lokukala ve udite etumba. Paulus okwa li e va dimbulukifa kutya ve li Ovakriste ovavaekwa, oukwashiwana wavo ‘owomeulu.’ (Fil. 3:20) Kava li ovakwashiwana vouhamba wopanhu, ndele ovOuhamba waKalunga. Ouhamba waKalunga owa li we va amena nova li va mona ouwa oo pehe na nande epangelo limwe tali dulu oku u va pa. — Ef. 2:19-22.

3. (a) Oolyelye ve na omhito yokukala ovapangelwa vOuhamba? (b) Oshike hatu ka konakona moshitukulwa eshi?

³ Eladipiko laPaulus olo kutya ‘kaleni nokweenda okuwapalela evangeli,’ ile tu tye ‘kaleni ngaashi ovapangelwa’ ola li la yukifwa unene kwaavo tava ka pangela pamwe naKristus meulu. (Fil. 3:20) Ndele otali dulu yo okuyukifwa kwaavo tava ka kala ovapangelwa vOuhamba waKalunga kombada yedu. Omolwashike mbela? Omolwaashi Ovakriste aveshe vashili otava longele Ohamba imwe, Jehova, nove na okukala metwokumwe nomifikamhango da faafana. (Ef. 4:4-6) Kunena, ovanhu ohava longo noudiinini opo va dule okumona oukwashiwana woshilongo shonhumba osho sha punapala. Katu na tuu okukala twa lenga neenghono omhito oyo tu na yokukala ovapangelwa vOuhamba! Opo tu ude ko nawa kutya omhito oyo tu na oya denga mbada shi fike peni, natu ka taleni omafaafano amwe oo e li pokati koiteelelwa yokukala omukwashiwana wepangelo lopanhu nosho yo lOuhamba waKalunga. Opo nee ohatu ka konakona oinima itatu oyo tu na okuninga ngeenge otwa hala okutwikila okukala ovapangelwa vOuhamba.

OITEELELWA YOUKWASHIWANA

4. Elaka la koshoka oshike, notu na oku li popya ngahelipi?

⁴ Okulihonga elaka. Omapangelo amwe opanhu ohaa pula ovanhu ovo va hala oukwashiwana woilongo yao ve lihonge omalaka oo haa popiwa unene moilongo oyo. Nokuli nokonima eshi omunhu a pewa oukwashiwana, oku na okukendabala oule womido opo a shiive nawa elaka olo lipe. Otashi dulika a shiive diva eemhango delaka ndele otashi dulika tashi mu pula efimbo opo a shiive okutumbula nawa oitya. Sha faafana, opo u kale omukwashiwana wOuhamba waKalunga ou na okulihonga osho Ombibeli tai shi ifana “elaka la koshoka.” (Lesha Sefanja 3:9. a) Elaka la koshoka oshike? Olo oshili oyo Ombibeli tai hongo kombinga yaKalunga nosho yo omalalakano aye. Okupopya elaka la koshoka otashi ti okudulika keemhango daKalunga nokomafinamhango aye. Ovakwashiwana vOuhamba waKalunga otashi dulika va shiive diva omahongo opehovelo Ombibeli nokuninginifwa. Ndele nokuli nokonima eshi va ninginifwa, ove na okuninga eenghendabala da mana mo opo va xwepopale mokupopya elaka la koshoka. Ongahelipi tava dulu okuninga ngaho? Keshe umwe womufye oku na okutwikila okuninga eenghendabala opo a tule moilonga osho te lihongo mOmbibeli.

5. Omolwashike tu na okulihonga shihapu shi na sha nondjokonona yehangano laJehova?

⁵ Okulihonga ondjokonona. Omunhu oo a hala oukwashiwana woshilongo shonhumba otashi dulika e na okulihonga sha kombinga yondjokonona yepangelo lasho. Sha faafana, ovo va hala okuninga ovapangelwa vOuhamba ove na okulihonga shihapu kombinga yOuhamba waKalunga. Natu ka taleni koshihopaenenwa osho sha tulwa po kovanamati vaKorah ovo va li hava yakula muIsrael shonale. Ova li ve hole Jerusalem nosho yo nonhele yasho yelongelokalunga nova li ve hole okupopya kombinga yondjokonona yoshilando osho. Kava li ashike ve hole oshilando osho molwoshinge shasho, ndele omolwaashi yo sha li “oshilando shohamba inene,” Jehova, nosha li ondingandinga yelongelokalunga la koshoka. Moshilando osho omo mwa li hamu hongelwa Omhango yaJehova. Ovo va li hava pangelwa keehamba domuJerusalem ova li va hokiwa nove holike kuJehova. (Lesha Epsalme 48:2, 3, 10, 13, 14.) Ngaashi ovanamati vaKorah, mbela naave ou na ngoo ehalo okulihonga nokupopya kombinga yondjokonona yoshitukulwa shokombada yedu shehangano laJehova? Apa ngoo pe fike to lihongo kombinga yehangano laJehova nosho yo nghee ta yambidida oshiwana shaye, opo ngoo pe fike Ouhamba waKalunga tau kala wolela kwoove. Osho otashi ke ku linyengifa u kale wa halelela okuudifa onghundana iwa yOuhamba. — Jer. 9:24; Luk. 4:43.

6. Omolwashike shi shii okuudiwa ko eshi Jehova a hala tu lihonge nokudulika keemhango nokomafinamhango aye?

⁶ Okushiiva eemhango. Omapangelo opanhu ohaa teelele ovapangelwa vao ve lihonge nova kale hava dulika keemhango doshilongo. Onghee hano, oshi shii okuudiwa ko eshi Jehova a teelela tu lihonge notu dulike keemhango nokomafinamhango oo taa wilike ovapangelwa aveshe vOuhamba. (Jes. 2:3; Joh. 15:10; 1 Joh. 5:3) Eemhango dopanhu inadi wanenena notadi dulu okukala dihe li pauyuki. Mepingafano naasho, “Omhango yOmwene oya wanenena.” (Eps. 19:8) Mbela ohatu hafele ngoo omhango yaKalunga nokulesha Eendjovo daye efiku keshe? (Eps. 1:1, 2) Keshe umwe womufye oku na okuninga eenghendabala a konakone omhango yaKalunga. Kape na oo ta dulu okukonakona omhango yaKalunga ponhele yoye.

OVAPANGELWA VOUHAMBA OVE HOLE OMIFIKAMHANGO DAKALUNGA

7. Omolwashike ovapangelwa vOuhamba hava kala metwokumwe nomifikamhango da denga mbada?

⁷ Opo tu twikile okukala ovapangelwa vOuhamba, katu na ashike okushiiva omifikamhango daKalunga ndele otu na yo okukala tu di hole. Ovapangelwa vahapu vomapangelo opanhu ohava ti kutya otava dulika keemhango nosho yo komilandu doshilongo shavo. Ndele ngeenge ove wete kutya omhango yonhumba itai va wapalele nove shii kutya kape na oo e va wete, ohava tauluka omhango ya tya ngaho. Ovanhu va tya ngaho luhapu ohava dulika keemhango opo va ‘hokiwe’ kuvamwe. (Kol. 3:22) Ovapangelwa vOuhamba ohava kala metwokumwe nomifikamhango da denga mbada. Ohatu dulika nehafo keemhango daKalunga, nokuli nonande kape na oo e tu wete. Omolwashike? Omolwaashi otu hole Omukwatelikomesho wetu ile tu tye Omuyandjimhango. — Jes. 33:22; lesha Lukas 10:27.

8, 9. Ongahelipi to dulu okumona kutya ou hole shili eemhango daKalunga?

⁸ Ongahelipi to dulu okumona kutya ou hole shili eemhango daKalunga? Konakona onghedi omo ho linyenge ngeenge to pewa omayele kombinga yoinima oyo u udite kutya oyopaumwene, ngaashi ngeenge tashi uya pokudjala nokuliwapeka. Fimbo ino ninga omupangelwa wOuhamba, otashi dulika wa li ho djala omuxwanaxwanena ile monghedi tai pendula omahalo omilele. Ndele eshi ohole yoye yokuhola Kalunga ya enda tai kulu, owe lihonga okudjala monghedi oyo tai mu fimanekifa. (1 Tim. 2:9, 10; 1 Pet. 3:3, 4) Otashi dulika paife u udite kutya oho djala monghedi i shii okufimanekwa. Ndele mbela ongahelipi ngeenge omukulunhuongalo umwe okwe ku lombwele kutya onghedi yoye yokudjala otai pundukifa ovaudifi vahapu meongalo? Oto ke linyenga ngahelipi? Mbela oto ka ninga omalipopilo nokuhanduka ile u kukutike omutwe? Omhango imwe ya fimanenena oyo ovapangelwa vOuhamba waKalunga aveshe ve na okudulika kuyo oyo okuhopaenena Kristus. (1 Pet. 2:21) Omuyapostoli Paulus okwa popya shi na sha noshihopaenenwa shaJesus a ti: “Keshe womufye na wapalele mukwao oku mu yakula mouwa opo a tungwe. Osheshi naKristus yo ine liwapalela Ye mwene.” (Rom. 15:2, 3) Omukriste oo a pyokoka oha henuka alushe okuninga oinima oyo tai pundukifa vamwe, opo a kaleke po ombili meongalo. — Rom. 14:19-21.

⁹ Natu ka konakoneni oinima ivali ya fimanenena: etaleko letu li na sha nomilele nosho yo li na sha nohombo. Ovo inava ninga natango ovapangelwa vOuhamba waKalunga otashi dulika ve wete kutya oushenge inau puka, okutala omafano oipala inaku nyika oshiponga nosho yo kutya enyonohombo neteyohombo oinima yopaumwene. Ndele ovapangelwa vOuhamba ohava diladila koilanduliko yeenghatu davo nonokutya otadi ka kuma ngahelipi vamwe. Nonande Ovakriste vahapu ova li ve na onghedi yokukalamwenyo inai koshoka paenghedi, paife ova tala ko kutya omilele nosho yo ohombo eeshali da dja kuKalunga. Ova lenga omifikamhango daJehova da denga mbada nova dimina nomutima aushe kutya ovo inava hala okudulika kudo ngeenge tashi uya pomilele nosho yo ohombo inava wana okukala ovapangelwa vOuhamba. (1 Kor. 6:9-11) Ashike ova dimina yo kutya omutima ou na omakoto. (Jer. 17:9) Onghee hano, ohava pandula eshi hava pewa omalondwelo okondadalunde oo hae va kwafele va twikile okudulika komifikamhango dopaenghedi da denga mbada.

OVAPANGELWA VOUHAMBA OHAVA DULIKA KOMALONDWELO

10, 11. Ouhamba waKalunga ohau yandje omalondwelo e li pefimbo elipi, nou uditile ngahelipi omalondwelo a tya ngaho?

¹⁰ Omapangelo opanhu ohaa dulu okulondwela ovapangelwa vao kombinga yoikulya ile omiti odo da nyika oshiponga. Osha yela kutya haikulya aishe nomiti da nyika oshiponga. Ndele ngeenge ope na oshinima shonhumba kondadalunde sha nyika oshiponga, epangelo otashi dulika li londwele ovapangelwa valo opo li va amene. Ngeenge epangelo ola dopa okuninga ngaho, otali ka kala li na ondjo. Sha faafana, Ouhamba waKalunga ohau tu pe omalondwelo e li pefimbo e na sha noinima yokondadalunde oyo tai dulu okunyona po eenghedi nosho yo oupamhepo wetu. Pashihopaenenwa, ovanhu vahapu ohava longifa ointaneta opo va kwatafane navamwe, ve lihonge nove lihafife. Ehangano laKalunga ohali longifa ointaneta nola pondola shihapu okupitila muyo. Ndele nande ongaho, eenhele dihapu dokointaneta otadi dulu okunyona po eenghedi nosho yo oupamhepo wetu. Eenhele oko haku ulikwa omafano oipala otadi dulu okutula moshiponga filufilu oupamhepo wovapangelwa vOuhamba. Oule womido omilongo, ongudu yomupiya omudiinini oya kala tai tu londwele shi na sha neenhele da tya ngaho. Inatu pandula tuu omolwomalondwelo oo!

¹¹ Paife ope na vali onhele imwe yokointaneta oyo hai longifwa kovanhu vahapu, notai dulu oku tu etela ouwa ngeenge otwe i longifa nawa. Ndele eenhele dokointaneta odo hadi ifanwa social networking otadi dulu yo okukala da nyika oshiponga neenghono. Otadi dulu okuningifa omunhu a kale ta kwatafana novanhu ovo ve li ookaume vai. (1 Kor. 15:33) Nomolwaasho ehangano laKalunga hali tu londwele opo tu kale twa lungama ngeenge hatu longifa eenhele odo. Mbela oho lesha ngoo ouyelele oo opo wa piti oo wa nyanyangidwa komupiya omudiinini u na sha nokulongifa o-social networking? Oshi li pandunge okulesha tete ouyelele oo ofimbo ino ya keenhele oko.b Ngeenge owa dopa okuninga ngaho, owa fa ashike omunhu ta nu omuti u na eenghono nopehe na okulesha omalondwelo oo e li kokakende.

12. Omolwashike shihe li pandunge okulipwililikila omalondwelo?

¹² Ovo have lipwililikile omalondwelo oo taa yandjwa komupiya omudiinini otave litula owina moshiponga nosho yo ovaholike vavo. Vamwe ova pikwa kokutala omafano oipala ile hava i moluhaelo nokudiladila kutya Jehova ke wete osho tava ningi. Inashi nyika tuu oulai okudiladila kutya ohatu dulu okuholeka Jehova elihumbato letu! (Omayel. 15:3; lesha Ovaheberi 4:13.) Kalunga okwa hala okukwafela ovanhu va tya ngaho noha longifa diva ovakalelipo vaye vokombada yedu ve va kwafele. (Gal. 6:1) Ndele ngaashi ashike ovapangeli vopanhu hava kufulula oukwashiwana ovo va ninga oinima yonhumba ii, Jehova naye ota ka kufa oukwashiwana ovo tava nyono omifikamhango daye nopehe na okulivela ombedi.c (1 Kor. 5:11-13) Ashike Jehova omunanghenda. Ovo ve livela ombedi nova lundulula elihumbato lavo otava dulu vali okukala nekwatafano liwa naJehova nokukala ovapangelwa vOuhamba. (2 Kor. 2:5-8) Kashi fi tuu oufembanghenda munene okulongela Ohamba ya tya ngaho inahole!

OVAPANGELWA VOUHAMBA OVA LENGA EHONGO

13. Ovapangelwa vOuhamba ohava ulike ngahelipi kutya ova lenga ehongo?

¹³ Omapangelo mahapu opanhu ohaa longo noudiinini opo a honge ovapangelwa vao. Ohaa tungu eefikola opo ovanhu va dule okuhongwa nova kale ve na owino wokulonga oilonga. Ovapangelwa vOuhamba ohava pandula eefikola odo nohave lihongo noudiinini okulesha nokushanga opo va dule okulifila oshisho palutu. Ndele ova lenga neenghono ehongo olo hava pewa ve li ovapangelwa vOuhamba waKalunga. Jehova ohe va hongo okupitila meongalo lopaKriste. Ovadali ohava ladipikwa opo va kale hava leshele ounona vavo. Omupiya omudiinini oha nyanyangida omwedi keshe oileshomwa ya kanghamena kOmbibeli. Ngeenge owa kala ho lesha omapandja onhumba efiku keshe, kungaho oto twikile okumona ouwa mehongo olo Jehova he tu pe.

14. (a) Ohatu mono edeulo lilipi? (b) Owa hafela okutula moilonga omaetepo elipi e na sha nElongelokalunga lOukwaneumbo?

¹⁴ Oshivike keshe, ovapangelwa vOuhamba ohava deulwa pokwoongala kwavo. Pashihopaenenwa, Ofikola yOkudeula Ovaudifi oya kala tai kwafele ovanafikola oule womido di dulife po 60 va kale ovahongi vEendjovo daKalunga hava pondola. Mbela owe lishangifa mofikola oyo? Omupiya omudiinini okwa kala ta divilike efimano lokuninga Elongelokalunga lOukwaneumbo oshivike keshe. Elongekido olo ohali kwafele omaukwaneumbo a kale a hangana shi dulife nale. Mbela oho tula ngoo moilonga omaetepo oo e li moileshomwa yetu?d

15. Otu na oufembanghenda munenenene ulipi?

¹⁵ Ovapangelwa vomapangelo opanhu ohava kendabala okuningifa vamwe va yambidide eengudu davo dopapolotika, hava i nokuli eumbo neumbo. Ovapangelwa vOuhamba mounyuni aushe ohava yambidida nouladi Ouhamba waKalunga mokuudifila ovanhu momapandavanda nosho yo eumbo neumbo. Ngaashi sha tumbulwa moshitukulwa sha tetekela, Oshungonangelo, oyo tai shiivifa Ouhamba waJehova, oyo oshifo osho hashi tandavelifwa neenghono mounyuni aushe. Oshi li oufembanghenda munenenene okulombwela vamwe kombinga yOuhamba waKalunga. Oho kufa ngoo ombinga nouladi moilonga yokuudifa? — Mat. 28:19, 20.

16. Ongahelipi to dulu okuulika kutya ou li omupangelwa muwa wOuhamba waKalunga?

¹⁶ Mafiku Ouhamba waKalunga oo ashike tau ka pangela edu alishe. Otau ka wilika ovanhu moinima aishe. Mbela oto ka kala ngoo omupangelwa muwa wOuhamba waKalunga pefimbo opo? Paife olo efimbo lokuulika kutya oto ka kala omupangelwa muwa. Omatokolo aeshe oo to ningi efiku keshe naa kale taa fimanekifa Jehova, nokungaho oto ulike kutya oto twikile u li omupangelwa muwa wOuhamba waKalunga. — 1 Kor. 10:31.

[Omashangelo opedu]

[Ouyelele u li pepandja 14]

Oho dulika ngoo komalondwelo a kanghamena kOmbibeli e na sha nointaneta?

[Efano pepandja 12]

Ngaashi ovanamati vaKorah, mbela ou hole ngoo elongelokalunga la koshoka nosho yo ondjokonona yalo?

[Efano pepandja 15]

Elongelokalunga lOukwaneumbo otali ke ku kwafela nosho yo ovaholike voye mu kale ovapangelwa vOuhamba vawa