Nghee eongalo la unganekwa

Jehova oKalunga kelandulafano. (1 Ovakorinto 14:33) Onghee otu na okuteelela oshiwana shaye shi kale sha unganekwa nawa. Eongalo lopaKriste ola unganekwa ngahelipi? Ongahelipi hatu dulu oku li yambidida, opo li pondole?

1. Olyelye omutwe weongalo?

‘Kristus oye omutwe weongalo.’ (Ovaefeso 5:23) Ota kwatele komesho oilonga yoshiwana shaJehova mounyuni aushe, okudja meulu. Jesus okwa nangeka po “omupiya omudiinini nomunaendunge,” okangudu kanini kovakulunhuongalo va pyokoka, ovo yo hava ifanwa Olutuwiliki. (Lesha Mateus 24:45-47.) Ngaashi ovayapostoli novakulunhu vomuJerusalem vomefelemudo lotete, Olutuwiliki nalo ohali yandje ewiliko komaongalo mounyuni aushe. (Oilonga 15:2) Ashike ovalumenhu ovo havo ovawiliki vehangano letu. Ohava kongo ewiliko kuJehova nosho yo mEendjovo daye, nohava dulika kuJesus e li omutwe weongalo.

2. Ovakulunhuongalo otava dana onghandangala ilipi?

Ovakulunhuongalo ove li ovalumenhu Ovakriste va pyokoka, ovo hava hongo oshiwana shaJehova okudja mOmishangwa, have shi lifa noku shi twa omukumo. Ihava futwa omolwoilonga yavo. Ndele ponhele yaasho, ohava longo ‘nehalo liwa koshipala shaKalunga; hakukala va hala okulikola, ndele ohave shi ningi tashi di komutima.’ (1 Petrus 5:1, 2) Ovakulunhuongalo ohava kwafelwa kovayakuliongalo, ovo navo mokweendela ko kwefimbo hava ka ninga ovakulunhuongalo.

Olutuwiliki ohali nangeke po ovakulunhuongalo vamwe ve li ovapashukilishikandjo. Ovapashukilishikandjo ohava talele po omaongalo e lili noku lili opo ve a pe ewiliko noku a twa omukumo. Ohava nangeke po ovalumenhu ovo va wanifa po oiteelelwa yopamishangwa va ninge ovakulunhuongalo novayakuliongalo.— 1 Timoteus 3:1-10, 12; Titus 1:5-9.

3. Ondombwedi keshe otai dana onghandangala ilipi?

Aveshe meongalo ohava “tange edina lOmwene” mokukufa ombinga pokwoongala nosho yo moukalele, she likolelela keenghalo davo.— Lesha Epsalme 148:12, 13.

KONAKONA MOULE

4. Jesus omuwiliki omunalukeno

Jesus ote tu shivi pahole. Lesha Mateus 11:28-30, ndele tamu kundafana epulo tali shikula:

• Jesus okwa hala tu kale tu uditile ngahelipi ewiliko laye?

OKAVIDIO: Nghee ovakulunhuongalo va li ve linyenga kekakamo ledu olo la ningwa moNepal (4:56)

Ombiibeli otai hongo nghee ovakulunhuongalo ve na okulonga oilonga yavo.

Lesha Jesaja 32:2 nosho yo 1 Petrus 5:1-3, ndele tamu kundafana omapulo taa shikula:

• Ou udite ngahelipi eshi u shii kutya ovakulunhuongalo navo ohava kendabala okuungaunga navamwe nolukeno ngaashi Jesus?

• Omeenghedi vali dimwe dilipi ovakulunhuongalo hava hopaenene Jesus?

5. Ovakulunhuongalo ohava hongo okupitila moshihopaenenwa shavo

OKAVIDIO: Ovakulunhuongalo ohava kwatele komesho! (7:39)

Jesus okwa tulila po oshihopaenenwa ovo tava kwatele komesho meongalo. Lesha Mateus 23:8-12, ndele tamu kundafana epulo tali shikula:

• Oshike she ku kumwifa shi na sha neyooloko olo li li pokati komifikamhango dOmbiibeli di na sha novakulunhuongalo nosho yo osho wa mona hashi ningwa kovawiliki vomalongelokalunga?

1. Ovakulunhuongalo ohave lipameke pamhepo nosho yo omaukwaneumbo avo

2. Ohava file oshisho aveshe meongalo

3. Ohava udifa pandjikilile

4. Ovakulunhuongalo ove li ovahongi, ndele ohava kwafele yo mokuwapaleka nosho yo moilonga imwe vali

6. Ohatu dulu okulongela kumwe novakulunhuongalo

Ombiibeli oye tu pa etomheno la fimana li na sha nokulongela kumwe novakulunhuongalo. Lesha Ovaheberi 13:17, ndele tamu kundafana omapulo taa shikula:

• Mbela oshi li ngoo pandjele eshi Ombiibeli tai tu ladipike tu dulike nokuliyandja kwaavo tava kwatele komesho? Osho ou shi uditile ngahelipi?

Lesha Lukas 16:10, ndele tamu kundafana epulo tali shikula:

• Omolwashike sha fimana okulongela kumwe novakulunhuongalo nokuli nomoinima oyo tai monika inai fimana?

ENGONGO

Jesus oye omutwe weongalo. Ohatu longele kumwe nehafo novakulunhuongalo, ovo tava longo koshi yewiliko laye, molwaashi ohava ungaunga nafye nolukeno nohave tu hongo okupitila moshihopaenenwa shavo.

Eendululo

• Olyelye omutwe weongalo?

• Ovakulunhuongalo ohava kwafele ngahelipi eongalo?

• Omulongeli waJehova keshe ota dana onghandangala ilipi?

TALA OUYELELE WA WEDWA PO

Tala oumbangi oo tau ulike kutya Olutuwiliki novakulunhuongalo ove na ko nasha nOvakriste kunena.

Okupameka ovamwatate ovo oilonga yavo ya shilikwa (4:22)

Lihonga kombinga yoilonga oyo hai longwa kovapashukilishikandjo.

Onghalamwenyo yomupashukilishikandjo komikunda (4:51)

Lesha shi na sha nonghandangala yovakainhu meongalo.

“Mbela Eendombwedi daJehova odi na ovakainhu ve li ovaudifi?” (Oshungonangelo, 1 Septemba 2012)

Tala nghee ovakulunhuongalo hava longo noudiinini, opo va twe omukumo ovaitaveli vakwao.

“Ovakulunhuongalo ‘ovalongi pamwe nafye omolwehafo letu’ (Oshungonangelo, 15 Januali 2013)