Ovanhu ohava ninginifwa medina lalyelye nolashike?

‘Indeni hano ka ningeni ovanhu ovahongwa, noku va ninginifa medina laXe nolOmona nolomhepo iyapuki.’ — MAT. 28:19, yelekanifa no-NW.

1, 2. (a) Oshike sha li sha ningwa muJerusalem pOpentekoste 33 O.P.? (b) Omolwashike ovanhu vahapu ovo va li poshivilo ve linyengifwa va ninginifwe?

MUJERUSALEM omwa li mu yadi ovanhu va dja koilando ihapu, va li ve uya okudana oshivilo sha fimana shOpentekoste 33 O.P. Ndele opa li pa ningwa oshinima shikumwifi, osho konima yasho omuyapostoli Petrus a yandja oshipopiwa shitunhula nosha li sha etifa oidjemo iwa. Ovajuda 3 000 lwaapo nosho yo ovanhu ovo ve lidilululifwa ndele ta ningi veitavelo lOshijuda ova li va kumwa keendjovo daPetrus ndele tave lidilulula nokuninginifwa momeva. Kungaho, ovanhu ovo ova li va wedwa meongalo lopaKriste olo la li opo la totwa po. (Oil. 2:41) Okuninginifwa kwovanhu vahapu meendama ile momatale muJerusalem okwa li kwa etifa po omingafano neenghono.

² Oshike sha li sha ningifa ovanhu vahapu neenghono va ninginifwe? Efiku olo tuu olo fimbo ovanhu inava ninginifwa, ‘meulu omwa li mwa dja oshihomo ngaashi oshikungulu shinene tashi ende.’ Ovahongwa vaJesus 120 lwaapo ovo va li monduda yopombada ova li va tililwa omhepo iyapuki. Konima yaasho, ovalumenhu novakainhu ovatilikalunga ova li va ongala nova li va tunhukwa okuuda ovahongwa tava ‘popi omalaka amwe e lili.’ Ovanhu vahapu ova li va ‘tuwa komitima’ eshi va li va uda eendjovo daPetrus, mwa kwatelwa odo di na sha nefyo laJesus. Ovanhu ovo ova li ve na okuninga po shike? Petrus okwa nyamukula a ti: ‘Lidilululeni, nakeshe ou na ninginifwe medina laJesus Kristus, ndele nye otamu ka pewa oshiyandjwa shomhepo iyapuki.’ — Oil. 2:1-4, 36-38, yelekanifa NW.

3. Ovajuda ovo va li ve lidilulula nosho yo ovo va li ve lidilululifwa ndele tava ningi veitavelo lOshijuda ova li va pumbwa okuninga po shike mefiku lOpentekoste?

³ Diladila konghalo yopalongelokalunga yOvajuda nosho yo ovo ve lidilululifwa ndele tava ningi veitavelo lOshijuda ovo va li va uda oshipopiwa shaPetrus. Ova li nale va dimina kutya Jehova oye Kalunga kavo. Ova li yo ve lihonga okudja mOmishangwa dOshiheberi kombinga yomhepo iyapuki, sha hala okutya, eenghono daKalunga tadi longo odo a longifa peshito nosho yo konima yaasho. (Gen. 1:2; Ovatok. 14:5, 6; 1 Sam. 10:6; Eps. 33:6) Ndele nande ongaho, ova li va pumbwa okuninga oshinima shimwe vali. Ova li va pumbwa okushiiva Messias, Jesus, noku mu tambula ko, oo Kalunga ta ka xupifa ovanhu okupitila muye. Onghee hano, Petrus okwa li a divilika kutya ova pumbwa ‘okuninginifwa medina laJesus Kristus.’ Omafiku manini komesho yaasho, omunyumunwa Jesus okwa li a lombwela Petrus nosho yo vamwe va ninginife ovanhu “medina laXe nolOmona nolOmhepo Iyapuki.” (Mat. 28:19, 20) Okuninginifwa medina laXe nolOmona nolomhepo iyapuki okwa li taku ti sha neenghono mefelemudo lotete, notaku ti sha yo kunena. Ndele mbela okuninginifwa medina laXe nolOmona nolomhepo iyapuki osha hala okutya shike?

Okuninginifwa medina laXe

4. Elunduluko lilipi la li la ningwa po li na sha novanhu ovo va li ve na ekwatafano naJehova?

⁴ Ngaashi twa mona nale, ovo va li ve linyengifwa koshipopiwa shaPetrus ova hangwa nale tava longele Jehova nove na ekwatafano naye. Ova kala tava kendabala okulandula Omhango yaJehova, nomolwaasho ovo va dja koilando imwe va li ve uya kuJerusalem. (Oil. 2:5-11) Ndele Kalunga okwa li a ninga po omalunduluko a didilikwedi e na sha nonghedi omo a li ta ka ungaunga novanhu. Okwa li a ekelashi Ovajuda vaha kale vali oshiwana shaye she likalekelwa, nomolwaasho okudiinina kwavo Omhango ka kwa li vali taku ke va ningifa va kale va hokiwa kuye. (Mat. 21:43; Kol. 2:14) Ovo va li tava pwilikine koshipopiwa shaPetrus ova li va pumbwa okuninga oshinima shonhumba opo va kale ve na ekwatafano tali kalelele naJehova.

5, 6. Ovajuda vahapu vomefelemudo lotete nosho yo ovo ve lidilululifwa ndele tava ningi veitavelo lOshijuda ova li va ninga po shike opo va kale ve na ekwatafano naKalunga?

⁵ Ovanhu kava li ve na okweefa po Jehova, Omuyandjimwenyo wavo. (Oil. 4:24) Ovo va li va tambula ko oshipopiwa shaPetrus ova li va mona shi dulife nale kutya Jehova oye Xe omunahole. Jehova okwa li a tuma Messias e va xupife nokwa li a hala okudimina po nokuli novanhu ovo Petrus a popya shi na sha navo a ti: “Eumbo alishe laIsrael nali shiive shili, Jesus tuu ou, mwe mu valela [komuti womahepeko, NW], Kalunga okwe mu ninga Omwene naKristus.” Ovo va li va tula moilonga eendjovo daPetrus ova li nokuli ve na omatomheno mahapu okupandula shi na sha naasho Kalunga a ningila ovanhu aveshe ovo va hala okukala ve na ekwatafano naye. — Lesha Oilonga 2:30-36.

⁶ Ovajuda nosho yo ovanhu ovo ve lidilululifwa ndele tava ningi veitavelo lOshijuda ova li va didilika kutya okukala nekwatafano naJehova okwa kwatela mo okudimina kutya oye ta xupifa ovanhu okupitila muJesus. Onghee hano, oto dulu okuuda ko kutya omolwashike va li ve lidilulula komatimba avo, mwa kwatelwa etimba olo kutya ovo va dipaa Jesus, kutya nee ova li ve shi shii ile kave shi shii. Oshi shii yo okuudiwa ko eshi momukokomoko womafiku oo a ka landula ko ‘va li va diinina okukala melongo lovayapostoli.’ (Oil. 2:42) Ova li tava dulu ‘okuya kolukalwa lefilonghenda ve na eyombamo, va talwe nonghenda.’ — Heb. 4:16.

7. Ongahelipi ovanhu vahapu kunena va lundulula etaleko lavo li na sha naKalunga nokuninginifwa medina laXe?

⁷ Kunena, ovanhu omamiliyona va dja momaputuko e lili noku lili ove lihonga oshili kombinga yaJehova okudja mOmbibeli. (Jes. 2:2, 3) Vamwe ovo va li nale va itavela kutya Kalunga ke ko ile kutya oko e li ndele ke na ko nasha novanhu ova tomwa va itavele kutya Omushiti oko e li notava dulu okukala ve na ekwatafano lopofingo naye. Ovanhu vamwe ova li hava longele oikalunga i lili noku lili ile kalunga omukwatatu. Paife ove lihonga kutya Jehova oye aeke Kalunga omunaenghono adishe, nohava popi naye tava longifa edina laye. Osho oshi li metwokumwe noushili oo Jesus a popya kutya ovahongwa vaye ove na okuninginifwa medina laXe.

8. Ovanhu ovo va li vehe shii kombinga youlunde oo twa fyuulula kuAdam ova li va pumbwa okudimina shike shi na sha naJehova?

⁸ Ovanhu ova li yo ve lihonga kutya ova fyuulula oulunde kuAdam. (Rom. 5:12) Osho osha li oshinima shipe osho ve na okutambula ko. Ovanhu va tya ngaho otava dulu okufaafanifwa nomunhu oo ta ehama ndele ke shii kutya ota vele omukifi ulipi. Otashi dulika a li e na omadidiliko onhumba, ngaashi okuyahama omafimbo nomafimbo. Ndele molwaashi ina monika omukifi wokondadalunde, otashi dulika a diladile kutya oku na oukolele muwa. Ndele paulelalela hasho shi li ngaho. (Yelekanifa no 1 Ovakorinto 4:4.) Ongahelipi ngeenge okwa konakonwa ndele ta monika kutya oku na omukifi wonhumba? Mbela itashi ka kala pandunge okukonga nokutambula ko ouhaku oo wa shiivika nawa nowa kolekwa kutya owoshili nohau velula? Sha faafana, ovanhu vahapu eshi ve lihonga oshili i na sha noufyuululwalunde, ova dimina kutya ove na omukifi oo wa popiwa mOmbibeli nova uda ko kutya Kalunga ota yandje evelulo. Aveshe ovo va tukuka ko kuKalunga ova pumbwa shili okwaalukila kwaao ta dulu oku va velula. — Ef. 4:17-19.

9. Jehova okwa ninga po shike opo ovanhu va dule okukala ve na ekwatafano naye?

⁹ Ngeenge owe liyapulila nale Jehova Kalunga nou li Omukriste a ninginifwa, ou shii kutya oshi li oufembanghenda okukala u na ekwatafano naJehova. Paife ou udite ko kutya Xo Jehova omunahole. (Lesha Ovaroma 5:8.) Nonande Adam naEva ova nyona kuKalunga, Kalunga okwa katuka eenghatu opo oludalo lavo, nafye twa kwatelwa mo, li dule okukala li na ekwatafano liwa naye. Ndele mokuninga ngaho, Kalunga okwa li a yahama okutala Omona waye omuholike ta mono oixuna nokufya. Mbela okushiiva oushili oo itashi tu kwafele tu dimine eenghonopangelo daKalunga nokudulika koipango yaye, hatu shi ningi omolwohole? Ngeenge ino liyapulila Kalunga natango, ou na omatomheno oku shi ninga nokuninginifwa.

Okuninginifwa medina lOmona

10, 11. (a) Otu na ongunga yaJesus yashike? (b) Ou udite ngahelipi eshi Jesus a li e na okufya e li ekulilo?

¹⁰ Diladila natango kombinga yaasho Petrus a li a lombwela eemhunga dovanhu. Okwa li a divilika efimano lokutambula ko Jesus, naasho osha pambafana filufilu nokuninginifwa ‘medina lOmona.’ Omolwashike okutambula ko Jesus nokuninginifwa medina laye kwa li kwa fimanenena nale, nomolwashike kwa fimanenena kunena? Okutambula ko Jesus nokuninginifwa medina laye osha hala okutya otwa dimina onghandangala oyo ta dana mekwatafano letu nOmushiti. Jesus okwa li e na okweendjelelifwa komuti womahepeko opo a kufe po efingo lOmhango kOvajuda, ashike efyo laye ola etifa omauwa mahapu. (Gal. 3:13) Okwa yandja ekuliloyambo olo ovanhu aveshe va pumbwa. (Ef. 2:15, 16; Kol. 1:20; 1 Joh. 2:1, 2) Opo osho shi ningwe, Jesus okwa li e lididimikila okuhenouyuki, okushekwa, omahepeko, nohauxuuninwa efyo. Mbela ino pandula eyambo laye? Natu tye nee ngeno ou li okamati komido 12 u li molweendo loshikepa yedina Titanic, oyo ye ke lidenga mekuma loikangwameva ndele tai ningine mefuta mo 1912. Owa li to kendabala okunhukila mokawato kokuxupifa ovanhu, ndele oke yadi. Opo nee omulumenhu umwe e li mokawato oko okwa xupita omukulukadi waye, ndele ta nukile moshikepa oyo ya li tai ningine, noku ku kufa mo e ku tule mokawato kokuxupifa ovanhu ponhele yaye. Mbela oto kala u udite ngahelipi? Oto ke mu pandula neenghono. Hano paife oto dulu okuuda ko kutya okamati kamwe oko ka li shili moshiningwanima sha tya ngaho oka li ke udite ngahelipi.a Ashike Jesus okwe ku ningila shihapu neenghono, e ku fila opo u dule oku ka mona omwenyo waalushe, ndele hakukala ashike nomwenyo oule womido dinini.

¹¹ Ou udite ngahelipi eshi we lihonga kombinga yaasho Omona waKalunga e ku ningila? (Lesha 2 Ovakorinto 5:14, 15.) Osha yela kutya owa pandula neenghono. Osho oshe ku kwafela u liyapulile Kalunga ‘nou he likalele vali ove mwene, ndelenee Oye tuu ou e ku fila.’ Okuninginifwa medina lOmona otashi ti okudimina osho Jesus e ku ningila nokutambula ko eenghonopangelo daye e li “Omwene womwenyo.” (Oil. 3:15; 5:31) Nale kwa li u na ekwatafano nOmushiti nokwa li u na eteelelo lashili. Ndele eshi wa ulika eitavelo tali longo mohonde yaJesus Kristus ya tika nokuninginifwa, paife ou na ekwatafano naKalunga. (Ef. 2:12, 13) Omuyapostoli Paulus okwa ti: “Nanye yo ava mwa li nale ovaliteeki novatondadi vaye momadilongo eni molwoilonga ii, [Kalunga] e mu hanganifa paife molutu lombelela [yaJesus] omolwefyo laye, opo e mu tule koshipala shaye ovayapuki, mu he noshipo nomu he noushima.” — Kol. 1:21, 22.

12, 13. (a) Okuninginifwa kwoye medina lOmona oku na okukuma ngahelipi onghedi omo ho linyenge ngeenge umwe e ku nyemateka? (b) U li Omukriste a ninginifwa medina laJesus, ou na oshinakuwanifwa shashike?

¹² Nonande owa ninginifwa medina lOmona, ou shii nawa kutya ou na eamo loulunde. Okukala tu shii oushili oo ohaku tu kwafele efiku keshe. Pashihopaenenwa, ngeenge umwe okwe ku nyemateke, mbela oho dimbuluka ngoo kutya amushe omu li ovalunde? Amushe omwa pumbwa ediminepo, nomu na okukala hamu dimine po vamwe. (Mark. 11:25) Jesus okwa li a longifa efaneko li na sha nomwene oo a li a dimina po omupiya waye eengunga oitalenti omayovi omulongo (eendenari omamiliyona 60) opo a divilike omhumbwe oyo. Konima yefimbo, omupiya oo a diminwa po ka li a dimina po omupiya mukwao oo a li e na eengunga daye eendenari 100. Jesus okwa yelifa oshitwa osho a ti kutya Jehova ita ka dimina po omunhu oo iha dimine po ovamwaxe. (Mat. 18:23-35) Okuninginifwa medina lOmona otashi ti okudimina eenghonopangelo daJesus nokukendabala okulandula oshihopaenenwa nomahongo aye, mwa kwatelwa okukala twa hala okudimina po vamwe. — 1 Pet. 2:21; 1 Joh. 2:6.

¹³ Ito dulu okuhopaenena Jesus filufilu molwaashi ino wanenena. Ndele nande ongaho, oto ka kendabala okuhopaenena Jesus ngaashi to dulu opo u kale metwokumwe nokuliyapulila kwoye Kalunga. Osho osha kwatela mo okutwikila okulidula ounhu mukulu nokudjala ounhu mupe. (Lesha Ovaefeso 4:20-24.) Ngeenge omunhu okwa lenga kaume kaye wonhumba, osha yela kutya oha kendabala okuhopaenena omaukwatya aye mawa nosho yo oshihopaenenwa shaye. Sha faafana, ngeenge owa lenga Kristus, oto ka kala wa hala okulihonga kuye noku mu hopaenena.

14. Ongahelipi to dulu okuulika kutya owa dimina eenghonopangelo daJesus e li Ohamba yomeulu?

¹⁴ Ope na natango onghedi imwe omo to dulu okuulika kutya ou udite ko osho sha kwatelwa mokuninginifwa medina lOmona. Kalunga ‘okwa tula aishe koshi yeemhadi [daJesus], ndele okwe mu pa a kale omutwe waaishe keongalo.’ (Ef. 1:22) Onghee hano, owa pumbwa okufimaneka onghedi omo Jesus ta wilike ovo ve liyapulila Jehova. Kristus ota longifa ovanhu inava wanenena meongalo, unene tuu ovalumenhu va pyokoka pamhepo, ovo ve li ovakulunhuongalo va nangekwa po. Ovalumenhu ovo ova nangekwa po nelalakano ‘lokulongekida ovayapuki okutunga olutu laKristus.’ (Ef. 4:11, 12) Nokuli nonande omunhu wonhumba ina wanenena okwa ningi epuko, Jesus e li Ohamba yOuhamba womeulu ota ka ungaunga nepuko olo peufwafimbo laye nosho yo monghedi oyo ya yuka. Mbela owa itavela ngoo oshinima sha tya ngaho?

15. Ngeenge ino ninginifwa natango, omanangeko noupuna elipi wa teelela oku ka mona ngeenge owa ninginifwa?

¹⁵ Ovanhu vamwe inave liyapulila Jehova natango nokuninginifwa. Ngeenge ino ninga ngaho natango, mbela ino didilika okudja mwaasho sha kundafanwa metetekelo kutya okutambula ko Omona oku li oshinima shopandunge notaku ulike kutya ou na olupandu? Okuninginifwa medina lOmona otaku ku kwafele u mone omanangeko noupuna manene. — Lesha Johannes 10:9-11.

Okuninginifwa medina lomhepo iyapuki

16, 17. Okuninginifwa medina lomhepo iyapuki otashi ti shike kwoove?

¹⁶ Okuninginifwa medina lomhepo iyapuki otashi ti shike? Ngaashi twa mona metetekelo, ovo va li va uda oshipopiwa shaPetrus pOpentekoste ova li ve shii kombinga yomhepo iyapuki. Ova li ve wete oumbangi oo tau ulike kutya Kalunga ota longifa natango omhepo iyapuki. Petrus oumwe womwaavo va li ‘va yadifwa omhepo iyapuki, ndele tava hovele okupopya omalaka amwe e lili.’ (Oil. 2:4, 8) Outumbulilo “medina la” itau ti alushe kutya oshinima shonhumba otashi ningwa medina lomunhu. Kunena, oinima ihapu ohai ningwa “medina” lepangelo, ndele epangelo kali fi omunhu. Osho otashi ulike kutya oshinima shonhumba otashi ningwa kwaavo ve lile po epangelo. Sha faafana, omunhu oo a ninginifwa medina lomhepo iyapuki okwa dimina kutya omhepo iyapuki kai fi omunhu, ndele eenghono daJehova tadi longo. Okuninginifwa medina lomhepo iyapuki otashi ti kutya omunhu okwa dimina onghandangala oyo omhepo iyapuki tai dana melalakano laKalunga.

¹⁷ Mbela ino lihonga kutya omhepo iyapuki oshike eshi wa konakona Ombibeli? Pashihopaenenwa, owa shiiva kutya Omishangwa oda nwefwa mo komhepo iyapuki. (2 Tim. 3:16) Eshi wa ninga exumokomesho lopamhepo, nopehe na omalimbililo, owa uda ko filufilu oushili oo kutya ‘Tate yetu yomeulu oha yandje omhepo iyapuki kwaavo tave mu indile,’ naave wa kwatelwa mo. (Luk. 11:13) Otashi dulika yo wa mona nghee omhepo iyapuki tai longo monghalamwenyo yoye. Mepingafano naasho, ngeenge ino ninginifwa natango medina lomhepo iyapuki, eshilipaleko laJesus olo kutya Xe oha yandje omhepo iyapuki otali ulike kutya owa teelela oku ka mona omanangeko noupuna ngeenge wa pewa omhepo iyapuki.

18. Ovo va ninginifwa medina lomhepo iyapuki ohava mono omanangeko noupuna elipi?

¹⁸ Kunena, ope na yo oumbangi oo tau ulike kutya Jehova oha wilike eongalo lopaKriste okupitila momhepo yaye. Omhepo ya tya ngaho ohai tu kwafele yo pauhandimwe momalipyakidilo etu akeshe efiku. Okuninginifwa kwetu medina lomhepo iyapuki okwa kwatela mo okudimina onghandangala oyo tai dana monghalamwenyo yetu nokukala hatu longele kumwe nayo nehalo liwa. Ndele vamwe otashi dulika ve lipule kutya ongahelipi hatu dulu okukala metwokumwe nokuliyapulila kwetu Jehova nonokutya omhepo iyapuki oya kwatelwa mo ngahelipi mwaasho. Ohatu ka kundafana oshinima osho moshitukulwa tashi landula.

[Eshangelo lopedu]

Oto dimbuluka?

• Okuninginifwa medina laXe otashi ti shike kwoove?

• Okuninginifwa medina lOmona otashi ti shike?

• Ongahelipi to dulu okuulika kutya ou udite ko eityo lokuninginifwa medina laXe nolOmona?

• Okuninginifwa medina lomhepo iyapuki otashi ti shike?

[Omafano pepandja 12]

Ovahongwa vape ova li va hovela okukala ve na ekwatafano la tya ngahelipi naKalunga konima yOpentekoste 33 O.P.?

[Odjo yefano]

By permission of the Israel Museum, Jerusalem