OSHILESHWA 10
Ongahelipi to dulu okumona ouwa pokwoongala kwEendombwedi daJehova?
Mbela owa shivilwe nande onale pokwoongala kwEendombwedi daJehova? Ngeenge ino enda nale pokwoongala kwa tya ngaho, otashi dulika u ka kwatwe koumbada, molwaashi osho oshikando shoye shotete. Otashi dulika u lipule kutya: ‘Mbela oshike hashi ningwa pokwoongala kwa tya ngaho? Omolwashike okwoongala oko kwa fimana? Omolwashike ndi na okuya ko?’ Moshitukulwa eshi, oto ke lihonga nghee okwoongala pamwe ta ku dulu oku ku kwafela u ehene popepi naKalunga nou mone ouwa pauhandimwe.
1. Omolwashike Eendombwedi daJehova hadi ongala pamwe?
Didilika nghee omushangi umwe wOmbiibeli a yelifa etomheno la fimana lokwoongala pamwe, a ti: “Ohandi ka hambelela Omwene moiongalele yeongalo.” (Epsalme 26:12) Sha faafana, Eendombwedi daJehova nado ohadi mono ouwa, eshi hadi ongala pamwe kunena. Mounyuni aushe, ohadi ongala pamwe oshivike keshe, opo di hambelele Kalunga, oku mu imbila omaimbilo nokwiilikana. Eendombwedi daJehova ohadi kala yo di na oyoongalele omudo keshe.
2. Oshike to dulu okulihonga pokwoongala kwetu?
Pokwoongala kwetu, ohatu yandje elitulemo kEendjovo daKalunga, ‘hatu di fatulula nawa, opo tu di ude ko.’ (Lesha Nehemia 8:8.) Ngeenge owa kala pokwoongala kwetu, oto ke lihonga kombinga yaJehova nosho yo omaukwatya aye mahokwifa. Eshi to ende to lihongo kutya oku ku hole, otashi ke ku kwafela u ehene popepi naye. Oto ke lihonga yo kutya ota dulu oku ku kwafela u kale u na onghalamwenyo tai ti sha.— Jesaja 48:17, 18.
3. Ongahelipi to dulu okumona ouwa meendafano navamwe pokwoongala?
Jehova okwe tu ladipika tu kale ‘tu na ko nasha navakwetu nokuladipikafana, opo tu kale tu holafane nokulonga oilonga iwa, notuha efe po okwoongala pamwe.’ (Ovaheberi 10:24, 25) Pokwoongala kwetu, oto ka shakena po novanhu ovo ve na ko nasha naave, notave lihongo kombinga yaKalunga ngaashi ove. Ohava twaafana omukumo mokuyandja momatyekosha a kanghamena kOmbiibeli. (Lesha Ovaroma 1:11, 12.) Oto ke lihonga yo kuvamwe ovo tave lididimikile omashongo nomupondo, kutya nee ova hombola, ile hasho. Aa oku li ashike omatomheno amwe, oo taa ulike kutya omolwashike Jehova a hala tu kale hatu ongala pamwe.
KONAKONA MOULE
Shiiva kutya oshike hashi ningwa pokwoongala kwEendombwedi daJehova nosho yo kutya ongahelipi to dulu okumona ouwa pokwoongala kwa tya ngaho.
4. Okwoongala kwEendombwedi daJehova
Ovakriste vomefelemudo lotete, navo ova li hava ongala pamwe opo va longele Jehova. (Ovaroma 16:3-5) Lesha Ovakolossi 3:16, ndele tamu kundafana epulo tali shikula:
Omonghedi ilipi Ovakriste vopefimbo lonale va li hava longele Jehova?
Kunena, Eendombwedi daJehova ohadi ongala pamwe pOlupale lOuhamba. Opo u mone osho hashi ningwa pokwoongala, dana OKAVIDIO, tamu tale efano olo tali ulike osho hashi ningwa pokwoongala, ndele tamu kundafana omapulo taa shikula.
Oinima ilipi wa didilika hai ningwa pOlupale lOuhamba i li metwokumwe naasho wa lesha mOvakolossi 3:16?
Oshike wa didilika mokavidio, ile mefano, hashi ningwa pokwoongala, nowe shi hokwa?
Lesha 2 Ovakorinto 9:7, ndele tamu kundafana epulo tali shikula:
Omolwashike pokwoongala kwEendombwedi daJehova ihapa umbwa ongalo?
Tala pamwe nomuhongi woye, osho tashi ka kundafanwa pokwoongala kwoshivike eshi.
Mbela oshitukulwa shokwoongala shilipi u wete tashi ka kala shihokwifa kwoove?
Owe shi shiiva tuu?
Oto dulu okutala ko jw.org, opo u mone kutya Eendombwedi daJehova ohadi ongala peni nonaini.
Pokwoongala kwetu ohapa yandjwa oipopiwa, hapa ningwa omauliko nohapa ulikwa yo ouvidio. Okwoongala ohaku hovele nohaku xulifwa neimbilo nosho yo eilikano
Moitukulwa imwe yokwoongala, ovakalipo ohava pewa omhito yokuyandja omatyekosha avo
Keshe umwe okwa manguluka okukala po, okudja ngoo kwaavo ve na omaukwaneumbo, ovo inava hombola, ile inava hombolwa, ovakulupe nounona
Okwoongala kwEendombwedi daJehova ohaku ningwa oshali; ihapa pulwa ofuto yasha, ile okuumba ongalo
5. Otashi pula eenghendabala okukala pokwoongala kwa tya ngaho
Pashihopaenenwa, diladila koukwaneumbo wooJesus. Owa li hau ende oshinano sheekilometa 100, tau piti meemhunda okudja kuNasaret wa finda kuJerusalem, opo u ka kale poshivilo shokomudo. Lesha Lukas 2:39-42, ndele tamu kundafana omapulo taa shikula:
Mbela oto diladila kutya olweendo lokuya kuJerusalem ola li la pula eenghendabala di fike peni?
Omolwashike tashi dulika wa pumbwa okuninga eenghendabala, opo u dule okukala pokwoongala?
Eshi wa tala, osha fimana ngoo okukala pokwoongala? Omolwashike to tile ngaho?
Ombiibeli oya popya kutya osha fimana okukala pokwoongala, opo tu dule okulongela Jehova. Lesha Ovaheberi 10:24, 25, ndele tamu kundafana epulo tali shikula:
Omolwashike twa pumbwa okukala hatu ongala pandjikilile?
VAMWE OHAVA TI: “Ino pumbwa okwoongala pamwe novanhu. Osha wana ashike okulesha Ombiibeli yoye keumbo.”
Mbela omushangwa ulipi, ile oshihopaenenwa shopaMbiibeli shilipi tashi ulike osho Jehova a hala tu ninge?
ENGONGO
Okukala pokwoongala otaku dulu oku ku kwafela u lihonge shihapu kombinga yaJehova, u pameke ekwatafano loye naye, nou mu longele pamwe novaitaveli vakweni.
Eendululo
Omolwashike Jehova te tu ladipike tu kale hatu ongala pamwe?
Oshike to dulu okulihonga pokwoongala kwEendombwedi daJehova?
Omeenghedi vali dilipi u wete okwoongala taku dulu oku ku kwafela?
TALA OUYELELE WA WEDWA PO
Ongahelipi ngeenge oho kala u na oumbada okukala pokwoongala? Tala nghee omulumenhu umwe oo a li e na oumbada e lihonga okukala e hole okwoongala.
Katu na fiku tu ka dimbwe nghee ovanhu va li ve tu hambelela nohamu (4:16)
Tala osho omulumenhu umwe omunyasha a ninga po, opo a kale ha tyapula okwoongala.
Shiiva nghee vamwe hava kala ve uditile okukala pokwoongala.
“Omolwashike ndi na okuya kokwoongala kOlupale lOuhamba?” (Oshitukulwa shi li ko jw.org)
Lesha kombinga yanghee onghalamwenyo yomulumenhu umwe, oo a li oshilyo shongudu yovanamapove, ya lunduluka konima eshi a ongala pamwe nEendombwedi daJehova.
“Onda li handi ende alushe nondjebo yange” (Oshungonangelo, 1 Juli 2014)