Mbela ewiliko laKristus oli li lashili kwoove?

OSHA li Etivali, eti-11 laNisan. Konima yomafiku atatu, Jesus Kristus okwa li ta ka dipawa. Eli ola li etalelepo laye laxuuninwa kotembeli. Mefiku olo, Jesus okwa honga eemhunga dovanhu odo da li da ongala nosho yo ovahongwa vaye ehongo la fimanenena. Okwa ti: “Inamu itavela nande mu ifanwe rabbi, osheshi omuhongi weni oumwe, ndele onye omushe ovamwainafana. Ndele inamu ifana nande olyelye wokombada yedu xo, osheshi onye omu na xo umwe aeke, ou womeulu. [Inamu pitika, mu ifanwe ‘omuwiliki,’ osheshi omuwiliki weni umwe aeke oKristus, OB-1986].” (Mateus 23:8-10) Osha yela kutya Jesus Kristus oye Omuwiliki wOvakriste vashili.

2, 3. Okupwilikina kuJehova nokutambula ko Omuwiliki oo a nangeka po oshi na oshidjemo shilipi mokukalamwenyo kwetu?

² Ewiliko laJesus itali etele tuu okukalamwenyo kwaavo tave li tambula ko omauwa! Mokuxunganeka euyo lOmuwiliki ou, Jehova Kalunga okwa popya okupitila momuprofeti Jesaja ta ti: “Akutu, onye amushe ava mwa fya enota, ileni oku komeva. Nanye ava mu he na oimaliwa, ileni, landeni nye mu lye; heeno, landeni hamakasha, mu he na oimaliwa, omaviinyu nomashini. . . . Pwilikinei nge hano, nye mu lye ounyenye, neemwenyo deni nadi hepuluke pomaadi. . . . Tala, Ame onde mu lenga a ninge ondombwedi kovanhu, a ninge [omuwiliki nondjai, OB-1986] koiwana.”—Jesaja 55:1-4.

³ Jesaja okwa longifa oikunguluki oyo ya shiivika apeshe—omeva, omashini nomaviinyu—i li omafaneko opo a ulike nghee okukalamwenyo kwetu taku dulu okunwefwa mo ngeenge otwa pwilikine kuJehova nokulandula Omuwiliki nOndjai oyo e tu pa. Oshidjemo otashi talaleke. Osha fa to nu ehalasha lomeva matalala momutenya. Enota letu molwoshili nouyuki otali kandulwa po. Ngaashi omashini haa nghonopaleke ouhanana noku va kwafela va kule, ‘omashini omeendjovo’ ohae tu nghonopaleke nokuxumifa komesho okukula kwetu pamhepo mekwatafano letu naKalunga. (1 Petrus 2:1-3) Ndele olyelye ta dulu okupatana kutya omaviinyu ihaa wedele ko kehafo poivilo? Panghedi ya faafana, okulongela Kalunga kashili nokulandula moshikoti shOmuwiliki oo a nangeka po, otashi ningi onghalamwenyo i kale ‘inyakula.’ (Deuteronomion 16:15) Onghee hano, osha fimanenena kukeshe umwe womufye kutya nee omunyasha ile omukulunhu, omulumenhu ile omukainhu okuulika kutya ewiliko laKristus oli li lashili kufye. Ndele ongahelipi hatu dulu okuulika monghalamwenyo yetu yakeshe efiku kutya Messias oye Omuwiliki wetu?

Ovanyasha, twikileni ‘okukula mounongo’

4. (a) Oshike sha ningwa po eshi omunamido 12 Jesus a li a talela po Jerusalem pefimbo lOpaasa? (b) Jesus okwa li e na eshiivo li fike peni eshi a li e na ashike omido 12?

⁴ Konakona oshihopaenenwa osho Omuwiliki wetu a tulila po ovanyasha. Nonande kaku shiivike shihapu shi na sha nefimbo laJesus lokounona, oshimoniwa shimwe otashi tu pe ouyelele. Eshi Jesus a li e na omido 12, ovakulunhu vaye okwa li va ya naye ketalelepo lomudo keshe kuJerusalem molwOpaasa. Pomhito oyo okwa li a kufa ombinga meenghundafana dopamishangwa nomolwaasho oukwaneumbo waye owe mu fiya po inau shi shiiva. Konima yomafiku atatu ovakulunhu vaye Josef naMaria ovo va kala tave lipula naye, ove mu hanga motembeli ‘e li omutumba mokati kovalongindjovo noku va pwilikina noku va pula.’ Kakele kaasho, ‘aveshe ovo ve mu uda ova kuminwa eendunge daye nomanyamukulo aye.’ Diladila ashike, pomido ashike 12, Jesus ka li ashike ta dulu okupula omapulo opamhepo taa pendula omadiladilo ndele okwa yandja yo omanyamukulo opandunge. Pe he na omalimbililo, okwa kwafelwa kedeulo lovakulunhu vaye.—Lukas 2:41-50.

5. Ongahelipi omunyasha ta dulu okukonakona oikala yaye i na sha nekonakonombibeli loukwaneumbo?

⁵ Otashi dulika u li omunyasha. Ngeenge ovakulunhu voye ove li ovapiya vaKalunga ve liyandja, osha yela kutya omu na elandulafano lekonakonombibeli loukwaneumbo laalushe meumbo leni. Mbela oikala yoye i na sha nekonakono loukwaneumbo oi li ngahelipi? Omolwashike ito lipula omapulo a tya ngaha: ‘Mbela ohandi yambidida elongekido lekonakonombibeli loukwaneumbo wetu nomutima aushe? Mbela ohandi tu kumwe nalo noihandi ningi oinima yonhumba oyo tai dulu okunyona po elandulafano lekonakono?’ (Ovafilippi 3:16) ‘Mbela ohandi kufa ombinga mekonakono olo nda mana mo? Ngeenge omhito otai shi pitike, mbela ohandi pula omapulo e na ko na sha nouyelele oo hatu konakona nokuyandja eekomenda di na sha nanghee tau dulu okutulwa moilonga? Eshi handi xumu komesho pamhepo, mbela ohandi kulike ehalo lokulya “eendja da pama [daava] va kula”?’—Ovaheberi 5:13, 14.

6, 7. Elandulafano lokulesha Ombibeli keshe efiku otali dulu okukala li na ouwa wa tya ngahelipi kovanyasha?

⁶ Elandulafano lokulesha Ombibeli keshe efiku nalo ola fimanenena. Omupsalme okwa imba ta ti: “Omulumenhu omunelao ou, iha ende pamhangela [yovahenakalunga], . . . ndelenee ha hokwa omhango yOmwene noku i [lesha nondaka yopedu, NW] omutenya noufiku.” (Epsalme 1:1, 2) Omulanduli waMoses, Josua, okwa ‘lesha nondaka yopedu membo lomhango omutenya noufiku.’ Eshi oshe mu ningifa a katuke neendunge nosho yo okupondola mokuwanifa po oshinakuwanifwa shaye osho a pewa kuKalunga. (Josua 1:8, NW) Omuwiliki wetu Jesus Kristus okwa ti: “Okwa shangwa: Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.” (Mateus 4:4) Ngeenge otwa pumbwa eendja dopalutu keshe efiku, inatu pumbwa tuu unene okulipalula alushe neendja dopamhepo!

⁷ Molwaashi Nicole okwa li a shiiva omhumbwe yaye yopamhepo, okwa hovela okukala ha lesha Ombibeli keshe efiku eshi a li e na omido 13.a Paife eshi e na omido 16 okwa mana ko okulesha Ombibeli aishe lumwe noku i li pokati moku i mana ko olutivali. Onghedi yaye oyanafangwa. Okwa ti: “Onda tokola toko okulesha etukulwa limwe ile shi dulife opo, efiku keshe.” Okulesha kwaye Ombibeli keshe efiku okwe mu kwafela ngahelipi? Okwa nyamukula ta ti: “Omanwefemo mai omahapu unene kunena. Keshe efiku ohandi shakeneke omafininiko kofikola nakeshe tuu pamwe, oo haa shongo eitavelo lange. Okulesha Ombibeli keshe efiku ohaku kwafele nge ndi dimbuluke diva eemhango nomafinamhango Ombibeli oo haa ladipike nge ndi kondjife omafininiko oo. Oshidjemo oshosho kutya, ondi udite nda ehena unene popepi naJehova nosho yo naJesus.”

8. Jesus okwa li e na onghedindjikilile ilipi i na sha noshinagoga, nongahelipi ovanyasha tava dulu oku mu hopaenena?

⁸ Jesus okwa li e na onghedindjikilile yokupwilikina nokukufa ombinga mokulesha Omishangwa moshinagoga. (Lukas 4:16; Oilonga 15:21) Kashi na tuu ouwa kovanyasha okulandula oshihopaenenwa osho mokukala pokwoongala kwopaKriste nope he na okufaula, opo hapa leshwa nohapa konakonwa Ombibeli! Mokuulika olupandu omolwokwoongala kwa tya ngaho, omunamido 14 Richard okwa ti: “Okwoongala okwa fimanenena kwaame. Oko handi dimbulukifwa alushe eshi shiwa naashi shii, osho sha koshoka naasho inashi koshoka, osho shi li panghedi yaKristus naasho shi he li ngaho. Inandi pumbwa okulihonga oinima ei monghedi idjuu—okupitila moimoniwa yopaumwene inyikifa oluhodi.” Heeno, “ehepaululo lOmwene oli [shii] okulineekelwa shili, olo hali nongopaleke omalai.” (Epsalme 19:8) Nicole okwa tokola yo toko okukala pokwoongala kweongalo akushe kwopatano oshivike keshe. Oha longifa yo eevili mbali ile nhatu lwaapo mokulilongekidila okwoongala kwa tya ngaho.—Ovaefeso 5:15, 16.

9. Mbela ongahelipi ovanyasha tava dulu ‘okukula mounongo’?

⁹ Ounyasha ou li efimbo liwa lokumona ‘eshiivo lokushiiva Kalunga aeke kashili, naau a tumwa kuYe, Jesus Kristus.’ (Johannes 17:3) Otashi dulika u shii ovanyasha ovo hava longifa efimbo lihapu mokulesha omambo oiyolifa, okutala oTV, okudanauka oudano weevidio ile okukonga omauyelele moInternet. Omolwashike u na okuhopaenena ovanyasha ovo, ngeenge oto dulu okulandula oshihopaenenwa sha wanenena shOmuwiliki wetu? Eshi a li okamatyona, okwa li e na ohokwe yokulihonga kombinga yaJehova. Noshidjemo osha li shike mbela? Omolwohole yaye yokuhola oinima yopamhepo, “Jesus okwa kula mounongo.” (Lukas 2:52) Naave oto dulu okuninga ngaho.

‘Dulikafaneni keshe tuu komukwao’

10. Oshike tashi dulu okukwafela onghalamwenyo youkwaneumbo i kale odjo yombili nelao?

¹⁰ Eumbo otali dulu okukala onhele yombili newaneneno ile onhele yomashilafano neemhata. (Omayeletumbulo 21:19; 26:21) Okutambula ko ewiliko laKristus otaku etele oukwaneumbo ombili nelao. Doshili, oshihopaenenwa shaJesus oshi shii okuhopaenenwa koukwaneumbo mokukalafana kwavo. Omishangwa otadi ti: “[Dulikafaneni] keshe tuu komukwao mokutila Kristus. Ovakainhu, dulikeni kovalumenhu veni ongaashi kOmwene. Osheshi omulumenhu oye omutwe womukainhu, ngaashi Kristus yo Oye omutwe weongalo, Ye Omuxupifi wolutu. . . . Ovalumenhu, holeni ovakainhu veni ngaashi Kristus e hole eongalo, nokwe liyandja molwalo.” (Ovaefeso 5:21-25) Paulus okwa shangela eongalo lomuKolossi ta ti: “Ounona nye, dulikeni kovakulunhu veni moinima aishe, osheshi osho sha wapalela mOmwene.”—Ovakolossi 3:18-20.

11. Ongahelipi omulumenhu ta dulu okuulika kutya ewiliko laKristus oli li lashili kuye?

¹¹ Okulandula omayele aa otashi ti kutya omushamane oku na okukwatela komesho moukwaneumbo, omukainhu waye oku na oku mu yambidida noudiinini, nounona ove na okudulika kovadali vavo. Ndelenee, oukwamutwe womulumenhu otau eta ashike elao ngeenge tau longifwa nawa. Omushamane omunaendunge oku na okulihonga nghee e na okulongifa oukwamutwe mokuhopaenena Omutwe nOmuwiliki waye, Kristus Jesus. (1 Ovakorinto 11:3) Nokuli nande konima yefimbo Jesus okwa ninga “omutwe waaishe keongalo,” eshi e uya kedu, ‘ka li e uya okuyakulwa, ndele okuyakula.’ (Ovaefeso 1:22; Mateus 20:28) Monghedi ya faafana, omushamane Omukriste iha longifa oukwamutwe waye molwokulietela ouwa, ndelenee okufila oshisho onghalonawa yomukainhu waye novana vaye—heeno, oukwaneumbo aushe. (1 Ovakorinto 13:4, 5) Oha lalakanene okuhopaenena omaukwatya opakalunga omutwe waye, Jesus Kristus. Ngaashi Jesus, oku na okukala omunambili nomulininipiki momutima. (Mateus 11:28-30) Ngeenge okwa ningi epuko, kashi fi shidjuu kuye okutya “ombili” ile “ou li mondjila.” Oshihopaenenwa shaye shiwa otashi shi ningi shipu komukainhu a kale “omukwafi,” omunhu oo “e mu wapalela” nosho yo ‘omukwao’ womulumenhu oo, notashi kala shipu okulihonga komulumenhu a tya ngaho nosho yo okulongela kumwe naye.—Genesis 2:20, OB-1986; Malakia 2:14, OB-1954.

12. Oshike tashi dulu okukwafela omukainhu a kale pafinamhango loukwamutwe?

¹² Omukainhu oku na okudulika komushamane waye. Ndelenee, ngeenge okwa nwefwa mo komhepo younyuni, eshi otashi dulu okunyona po etaleko laye li na sha nefinamhango loukwamutwe, nediladilo lokudulika komulumenhu itali ka kala lihokwifi kuye. Omishangwa itadi yandje ediladilo kutya omulumenhu oku na okukala ta pange, ndele otadi pula ovakainhu va dulike kovashamane vavo. (Ovaefeso 5:24) Ombibeli otai pula yo omushamane ile tate a file oshisho oukwaneumbo waye, nongeenge omayele ayo taa tulwa moilonga, eshi ohashi etele oukwaneumbo ombili nelandulafano.—Ovafilippi 2:5.

13. Oshihopaenenwa shokudulika shilipi Jesus a tulila po ounona?

¹³ Ounona ove na okudulika kovadali vavo. Moshinima eshi, Jesus okwa tula po oshihopaenenwa sha denga mbada. Konima yoshiningwanima shomotembeli eshi omunamido 12 Jesus kwa li a fyaala po oule womafiku atatu, “okwa dja mo [novakulunhu vaye], nokwe uya kuNasaret ndele okwa li ha dulika kuvo.” (Lukas 2:51) Okudulika kwounona kovadali vavo ohaku etele oukwaneumbo ombili noukumwe. Ngeenge keshe umwe moukwaneumbo okwa dulika kewiliko laKristus, oshidjemo osho oukwaneumbo u na elao.

14, 15. Oshike tashi tu kwafele tu pondole ngeenge twa taalele eenghalo didjuu meumbo? Yandja oshihopaenenwa.

¹⁴ Nokuli nongeenge eenghalo didjuu oda holoka meumbo, osho tashi etifa omupondo okuhopaenena Jesus nokutambula ko ewiliko laye. Pashihopaenenwa, ohombo yomunamido 35 Jerry naLana, ina yokakadona komido omulongo nasha, oya eta eshongo olo inave li teelela nande. Jerry okwa hokolola ta ti: “Onda shiiva kutya okukala omutwe muwa, ondi na okutula moilonga omafinamhango Ombibeli a faafana naao a ningifa omaukwaneumbo amwe a pondole. Ndelenee diva onda mona kutya ondi na oku a longifa nounongo muhapu nosho yo eendunge dihapu dokuyoolola.” Okamonakadona oko ka dalwa ashike komukulukadi waye, oka li ke mu tala ko e li umwe oo e uya oku ka tongola ko kuina nokwa li ke mu nine onghone. Jerry okwa li a pumbwa eendunge dokuyoolola opo a mone kutya oikala oyo oya nwefa mo omapopyo noilonga yokakadona oko. Mbela okwa ungaunga ngahelipi nonghalo oyo? Jerry okwa nyamukula ta ti: “Fye naLana otwa kundafana opo Lana a fye oshisho shoutekuduliko woku ka tekula oule wefimbo, omanga handi yukifa elitulemo mokukulika ekwatafano liwa nokamonakadona kange oko ka dalwa ashike komukulukadi wange. Mokweendela ko kwefimbo, onghedi ei oya eta oidjemo iwa.”

¹⁵ Ngeenge twa taalelwa keenghalo didjuu meumbo, otwa pumbwa eendunge dokuyoolola opo tu mone kutya omolwashike oilyo youkwaneumbo tai popi nokukatuka monghedi omo tai shi ningi. Otwa pumbwa yo ounongo opo tu tule nawa moilonga omafinamhango opakalunga. Pashihopaenenwa, Jesus okwa yoolola nawa kutya omolwashike omukainhu oo kwa li ta mono oixuna ketiko lohonde e mu kuma nokwa ungaunga naye pandunge nosho yo palukeno. (Leviticus 15:25-27; Markus 5:30-34) Ounongo nosho yo eendunge dokuyoolola oukwatya wOmuwiliki wetu. (Omayeletumbulo 8:12) Ohatu ka kala ovanelao ngeenge ohatu katuka ngaashi ye ngeno e na okukatuka.

“Kongeni tete ouhamba”

16. Oshike shi na okukala ondingandinga yokukalamwenyo kwetu, nongahelipi Jesus e shi ulika okupitila moshihopaenenwa shaye?

¹⁶ Jesus okwa yelifa nawa nope he omalimbililo kutya oshike shi na okukala pondingandinga yokukalamwenyo kwaavo tava tambula ko ewiliko laye. Okwa ti: “Ndelenee kongeni tete ouhamba waKalunga nouyuki waye.” (Mateus 6:33) Nokwe tu ulikila nghee eshi shi na okuningwa noshihopaenenwa shaye. Pexulilo loule womafiku 40 okulidilika oikulya, okudilonga nokwiilikana konima yokuninginifwa kwaye, Jesus okwa shakeneka eyeleko. Satana Ondiaboli oye mu udanekela oku mu pa epangelo a pangele “omauhamba aeshe omounyuni.” Diladila ashike onghalamwenyo oyo Jesus a li ta dulu okukala e na ngeno okwa li a tambula ko eudaneko lOndiaboli! Ndelenee, Kristus okwa li a yukifa elitulemo kokuwanifa po ehalo laXe. Okwa dimina yo kutya onghalamwenyo mounyuni waSatana otai ka kala ixupi. Okwa anya divadiva eudaneko lOndiaboli, ta ti: “Opa shangwa: Omwene Kalunga koye u noku mu twila eengolo, noye aeke u noku mu [longela oshilonga shiyapuki, NW].” Divadiva konima yaasho, Jesus “okwa hovela okuudifa nokutya: Lidilululeni, osheshi ouhamba weulu owa ehena popepi.” (Mateus 4:2, 8-10, 17) Okudja opo onghalamwenyo yaye aishe yokombada yedu, Kristus okwa kala omuudifi wOuhamba waKalunga wefimbo liyadi.

17. Ongahelipi hatu dulu okuulika kutya oinima yOuhamba oi li pondodo yotete mokukalamwenyo kwetu?

¹⁷ Otu na okuhopaenena Omuwiliki wetu ndele katu na okweefa ounyuni waSatana u tu kokele mokuninga oilonga nomaifano taa futu nawa elalakano letu la kula monghalamwenyo. (Markus 1:17-21) Itashi ka kala tuu sha nyika oulai okuya momwiyo wokulalakanena oinima younyuni fiyo osheshi oinima yOuhamba tai ningi ashike yopondodo onhivali! Jesus okwe tu lineekelela oilonga yokuudifa Ouhamba nokuninga ovanhu ovahongwa. (Mateus 24:14; 28:19, 20) Heeno, otashi dulika tu na okufiloshisho oukwaneumbo ile oinakuwanifwa imwe i lili, ndele mbela inatu hafa tuu okukala hatu longifa efimbo lokomatango nomaxuliloshivike okuwanifa po oshilonga shetu shopaKriste shokuudifa nokuhonga? Nokashi fi tuu etwomukumo eshi momukokomoko womudo woilonga 2001, 780 000 lwaapo okwa li a dula okulonga e li ovakalele vefimbo liyadi ile ovakokolindjila!

18. Oshike hashi tu kwafele tu mone ehafo moukalele?

¹⁸ Omahokololo Omavangeli otaa ulike Jesus e li omulumenhu ha katuka eenghatu nosho yo kutya ye omunalukeno. Eshi a shiiva eemhumbwe dopamhepo daavo ve mu dingilila, okwe va fila onghenda nokwe va kwafela nehalo. (Markus 6:31-34) Oukalele wetu otau eta ehafo ngeenge hatu kufa ombinga muo tu na ohole yokuhola vamwe nosho yo ehalo loku va kwafela shili. Ndelenee ongahelipi hatu dulu okukala nehalo la tya ngaho? Omunyasha omumati wedina Jayson okwa ti: “Eshi nda li ndi na omido omulongo nasha, kanda li nda hafela oukalele filufilu.” Oshike she mu kwafela a kulike ohole yokuhola oilonga ei? Jayson okwa nyamukula ta ti: “Moukwaneumbo wetu, ongula yOlomakaya keshe oya li ya nuninwa oilonga yomomapya. Eshi osha li shiwa kwaame omolwaashi mokukala handi i moukalele omo mokukala handi mono ouwa oo hau eta nonda dula oku u hafela unene.” Nafye otu na okukala alushe hatu kufa ombinga noudiinini moukalele.

19. Oshike shi na okukala etokolotoko letu shi na sha newiliko laKristus?

¹⁹ Doshili, oshitalaleki noshi na ondjabi okutambula ko ewiliko laKristus. Ngeenge otwa ningi ngaho, ounyasha otau ka kala efimbo lokukula meshiivo nomounongo. Onghalamwenyo youkwaneumbo otai ka kala odjo yombili nelao, noukalele otau ka kala oilonga tai eta ehafo nembilipalelo. Onghee hano, natu kale twa tokola toko okuulika mokukalamwenyo kwetu kwakeshe efiku nosho yo momatokolo oo hatu ningi kutya ewiliko laKristus oli li lashili kufye. (Ovakolossi 3:23, 24) Ndelenee Jesus Kristus okwa yandja ewiliko okupitila monghedi imwe vali—eongalo lopaKriste. Oshitukulwa tashi landula otashi ka kundafana nghee hatu dulu okumona ouwa okudja mefiloshisho olo.

[Omashangelo opedu]

1. Olyelye aeke e li Omuwiliki wOvakriste vashili?

[Efano pepandja 10]

Ounyasha ou li efimbo liwa lokumona eshiivo lokushiiva Kalunga nosho yo Omuwiliki wetu oo a nangekwa po

[Efano pepandja 11]

Okudulika kewiliko laKristus otaku xumifa komesho elao loukwaneumbo

[Efano pepandja 13]

Jesus okwa konga tete Ouhamba. Mbela naave osho to ningi?

[Efano pepandja 13]

Oto dimbuluka?

• Ongahelipi okulandula Omuwiliki wetu a nangekwa po kuKalunga taku tu etele ouwa?

• Ongahelipi ovanyasha tava dulu okuulika kutya ova hala okulandula ewiliko laJesus?

• Ewiliko laKristus oli na oshidjemo sha tya ngahelipi monghalamwenyo youkwaneumbo waavo tava dulika kulo?

• Ongahelipi oukalele wetu tau dulu okuulika kutya ewiliko laKristus oli li lashili kufye?