Jesus ta ilikana a nyika oluhodi

Jesus okwa hangwa a mana okwiilikana pamwe novayapostoli vaye ovadiinini. Konima “eshi va imba omaimbilohambelelo, ova dja mo ndele tava i kOmhunda yEemono.” (Markus 14:26) Ova li va ya koushilo koshikunino hashi ifanwa Getsemane, oko Jesus a kala ha i shito.

Eshi va fika ponhele opo pa li omiti domalumono, Jesus okwa li a fiya po ovayapostoli vaye vahetatu. Otashi dulika va li va fyaala popepi nomuvelo woshikunino, ndele te va lombwele ta ti: “Kaleni omutumba apa fimbo handi i kwinya ndi ka ilikane.” Jesus okwa li a ya kokule moshikunino pamwe novayapostoli vaye vatatu, Petrus, Jakob naJohannes. Okwa li a nyika oluhodi neenghono, ndele ta lombwele ovayapostoli ovo vatatu, ta ti: “Onda nyika oluhodi neenghono, nokuli fiyo okufya. Kaleni apa, nokukala oupafi pamwe naame.” — Mateus 26:36-38.

Jesus okwa li a dja po puvo ndele ta ehene komesho kanini, “te linyongamene pedu, ndele ta ilikana.” Okwa li ta ilikana kombinga yashike eshi a li a nyika oluhodi? Okwa ilikana a ti: “Tate, kwoove oinima aishe otai shiiva; kufe nge eholo eli. Ashike hangaashi ame nda hala, ndele ongaashi ove wa hala.” (Markus 14:35, 36) Okwa li a hala okutya shike? Mbela ka li a hala vali okuyandja Ekuliloyambo? Hasho nandenande!

Ofimbo Jesus a li meulu, okwa li a mona nghee ovo va li va dipawa kOvaroma va li va tava hepekwa nonyanya. E li omunhu wopambelela, oo e na omaliudo noha ehama, ka li a teelela nodjuulufi osho a li ta ka ningilwa. Kakele kaasho, okwa li a nyika oluhodi molwaashi okwa li e udite kutya ota ka fya a fa omukolokoshi notashi dulika shi ka shekife edina laXe. Moule wefimbo linini, okwa li ta ka endjelelifwa komuti a fa omusheki Kalunga.

Konima eshi a ilikana, okwa li a shuna kovayapostoli vaye vatatu nokwa hanga va kofa. Okwa tya kuPetrus: “Hano itamu dulu okukala oupafi nande ovili imwe pamwe naame? Kaleni oupafi nokukala tamu ilikana opo muha ye momayeleko.” Jesus okwa li a mona kutya okwa toka, novayapostoli ova li va nyika oluhodi. Okwa weda ko a ti: “Oshoshili kutya omhepo oya halelela, ndele ombelela oi na ounghundi.” — Mateus 26:40, 41.

Jesus okwa li a ilikana vali oshikando oshitivali nokupula Kalunga e mu kufe “eholo eli.” Eshi a shuna vali, okwa hanga ovayapostoli vaye vatatu va kofa, ofimbo va li ve na okukala tava ilikana opo vaha ye momayeleko. Okwa li a popya navo, ndele “kava li ve shii kutya nava tye shike.” (Markus 14:40) Okwa li a ya vali oshikando oshititatu, ndele ta tu eengolo nokwiilikana.

Jesus okwa li te lipula unene kutya ota ka fya a fa omukolokoshi naasho otashi ka shekifa edina laXe. Jehova okwa li ta pwilikine komailikano Omona waye, nopomhito imwe okwa li a tuma omweengeli e mu pameke. Ashike nande ongaho, Jesus ina efa okupula ekwafo kuXe ndele okwa twikila ‘nokwiilikana a mana mo.’ Okwa li a nyika oluhodi neenghono nokwa djuupalelwa. Omwenyo waye waalushe nowovanhu ovo ve na eitavelo muye owa li monghuwo i na onghambe. Ndele nande ongaho, oshinhwi “shaye osha li sha fa ohonde tai ndodele pedu.” — Lukas 22:44.

Eshi Jesus a aluka oshikando oshititatu, natango okwe va hanga va kofa. Okwa ti: “Eli halo efimbo lokukofa nokufuda po! Taleni! Efimbo ola fika Omona womunhu a yandjwe momake ovalunde. Fikameni tu yeni. Taleni! Ou ta kengelele nge oku li popepi.” — Mateus 26:45, 46.