‘Omhepo otai konakona oinima yomoule yaKalunga’

“Omhepo otai konakona oinima aishe, mwa kwatelwa oinima yomoule yaKalunga.” — 1 KOR. 2:10, NW.

1. PaVakorinto votete 2:10, Paulus okwa divilika onghandangala ilipi oyo tai danwa komhepo iyapuki, naasho osha etifa po omapulo elipi?

INATU hafela tuu onghandangala oyo tai danwa komhepo iyapuki yaJehova! Omishangwa oda ti kutya omhepo iyapuki oi li omupopili, oshiyandjwa, omuhepaululi nohai tu ilikanene. (Joh. 14:16; Oil. 2:38; Rom. 8:16, 26, 27) Omuyapostoli Paulus okwa divilika onghandangala vali imwe ya fimanenena oyo tai danwa komhepo iyapuki, a ti: “Omhepo otai konakona oinima aishe, mwa kwatelwa oinima yomoule yaKalunga.” (1 Kor. 2:10, NW) Heeno, Jehova oha longifa omhepo yaye iyapuki opo a holole eeshili domoule doinima yopamhepo. Ngeno kapa li ekwafo la tya ngaho, mbela ngeno otu na eudeko li fike peni li na sha nomalalakano aJehova? (Lesha 1 Ovakorinto 2:9-12.) Ndele opa holoka omapulo mahapu ngaashi: Omhepo ohai konakona ngahelipi “oinima yomoule yaKalunga”? Mbela Jehova okwa li a holola oinima yomoule mefelemudo lotete O.P. okupitila moolyelye? Omhepo iyapuki ohai konakona ngahelipi oinima yomoule kunena, nokupitila moolyelye?

2. Omhepo iyapuki oya li tai ka dana onghandangala meenghedi dopavali dilipi?

² Jesus okwa ti kutya omhepo iyapuki oya li tai ka dana onghandangala meenghedi dopavali. Okafimbo kaxupi fimbo ina fya, okwa li a lombwela ovayapostoli vaye a ti: “Omupopili [omukwafi, NW], Omhepo Iyapuki, Oye Tate te ke i tuma medina lange, otai mu longo ashishe ndee tai mu dimbulukifa ashishe nde shi mu lombwela.” (Joh. 14:26) Kungaho, omhepo iyapuki oya li tai ka kala onga omuhongi nomudimbulukifi. Oya li tai ka kala onga omuhongi opo i kwafele Ovakriste va dule okuuda ko oinima oyo va li inava uda ko nawa. Oya li yo tai ka kala onga omudimbulukifi, tai va kwafele va dimbuluke oinima oyo va yelifilwa nale nove i tule moilonga monghedi ya yuka.

Onghandangala oyo ya li ya danwa komhepo iyapuki mefelemudo lotete

3. Eendjovo daJesus dilipi tadi ulike kutya “oinima yomoule yaKalunga” oya li tai ka hololwa kanini nakanini?

³ Jesus okwa li a honga ovahongwa vaye eeshili dihapu odo da li dipe kuvo. Ndele nande ongaho, opa li pe na oinima ihapu natango oyo ve na okulihonga. Jesus okwa li a lombwela ovayapostoli vaye a ti: “Ondi noinima ihapu natango oku mu lombwela, ndelenee paife itamu dulu oku i humbata. Ndele winya ngenge te uya, Omhepo yoshili, Oyo tai mu twala moshili aishe.” (Joh. 16:12, 13) Kungaho, Jesus okwa li a ulika kutya oinima yomoule yopamhepo oya li tai ka hololwa kanini nakanini okupitila momhepo iyapuki.

4. Omhepo iyapuki oya li ya honga nokudimbulukifa ovanhu shike mefiku lOpentekoste 33 O.P.?

⁴ Mefiku lOpentekoste 33 O.P., “omhepo yoshili” oya li ye uya, ya li ya tililwa Ovakriste 120 lwaapo ovo va li va ongala muJerusalem. Opa li oumbangi wa monika nowa udika oo tau ulike oushili woshiningwanima osho. (Oil. 1:4, 5, 15; 2:1-4) Ovahongwa ova li va popya omalaka e lili noku lili, ‘tava popi oilonga inene yaKalunga.’ (Oil. 2:5-11) Efimbo lokuholola oshinima shimwe shipe ola li la fika. Omuprofeti Joel okwa li a xunganeka kombinga yokutililwa omhepo iyapuki kwa tya ngaho. (Joel 2:28-32) Ovamoninomesho ova li va mona ewanifo lexunganeko olo monghedi oyo va li inava teelela, nomuyapostoli Petrus okwa li a yelifa ewanifo lexunganeko olo. (Lesha Oilonga 2:14-18.) Kungaho, omhepo iyapuki oya li ngaashi omuhongi eshi ya li ya yelifila nawa Petrus kutya osho ovahongwa va mona osha li ewanifo lexunganeko lonale. Omhepo iyapuki oya li yo ye va dimbulukifa molwaashi Petrus ka li ashike a tofa muJoel ndele okwa li yo a tofa momapsalme avali aDavid. (Eps. 16:8-11; 110:1; Oil. 2:25-28, 34, 35) Aveshe ovo va li va ongala ova li shili va mona nova uda oinima yomoule yaKalunga.

5, 6. (a) Omapulo a fimana e na sha nehangano lipe elipi a li a pumbwa okunyamukulwa konima yOpentekoste 33 O.P.? (b) Oinima oyo ya li ya pumbwa okukundafanwa oya li ya etwa po koolyelye, nokwa li kwa ningwa etokolo ngahelipi?

⁵ Ovakriste vomefelemudo lotete ova li natango va pumbwa okuyelifilwa oinima ihapu. Pashihopaenenwa, opa li omapulo e na sha nehangano lipe olo la li la hovela okulonga okudja mefiku lOpentekoste. Mbela ehangano olo lipe ola li ashike la kwatela mo Ovajuda nosho yo ovanhu ovo va li ve lidilululifwa ndele tava ningi veitavelo lOshijuda? Mbela ovanhu ovo vehe fi Ovajuda navo ova li tava dulu okuya mehangano olo nokuvaekwa nomhepo iyapuki? (Oil. 10:45) Mbela ovalumenhu ovo vehe fi Ovajuda ova li va pumbwa okupita etanda tete nokudulika kOmhango yaMoses? (Oil. 15:1, 5) Omapulo oo okwa li a fimanenena. Omhepo iyapuki yaJehova oya li ya pumbwa okukonakona oinima yomoule ya tya ngaho. Ndele mbela oya li tai ke shi ninga ngahelipi nokupitila moolyelye?

⁶ Ovamwatate ovo ve na oinakuwanifwa ovo va li va eta po oinima aishe oyo ya li ya pumbwa okukundafanwa. Petrus, Paulus naBarnabas ova li pokwoongala kwolutuwiliki ndele tava yelifa nghee Jehova a li a ungaunga novanhu ovo vehe fi Ovajuda ovo inava pita etanda. (Oil. 15:7-12) Olutuwiliki ola li la ninga etokolo konima eshi la kundafana oshinima osho metwokumwe naasho sha tongwa mOmishangwa dOshiheberi nosho yo kekwafo lomhepo iyapuki. Opo nee ola li la shiivifila omaongalo okupitila meenhumwafo kombinga yaasho la li la tokola. — Lesha Oilonga 15:25-30; 16:4, 5; Ef. 3:5, 6.

7. Eeshili domoule oda li da hololwa okupitila mushike?

⁷ Oinima ikwao ihapu oya li ya yelifwa okupitila momishangwa da nwefwa mo daJohannes, Petrus, Jakob naPaulus. Ndele konima eshi Omishangwa dopaKriste da li da pwa okushangwa, eeshali dokuxunganeka nokuhololelwa oinima pashikumwifilonga oda li da xula po. (1 Kor. 13:8) Mbela omhepo iyapuki oya li ngoo tai ka twikila okukala onga omuhongi nosho yo omudimbulukifi? Mbela oya li ngoo tai ka twikila okukwafela Ovakriste va konakone oinima yomoule yaKalunga? Omaxunganeko okwa ulika kutya omhepo iyapuki osho ya li tai ka ninga ngaho.

Onghandangala oyo omhepo iyapuki tai dana pefimbo lexulilo

8, 9. Oolyelye va li tava ka kala ovanaendunge pamhepo notava “vilima” pefimbo lexulilo?

⁸ Omweengeli umwe okwa li a xunganeka kombinga yefimbo lexulilo a ti: “Ovanaendunge otava ka vilima ngaashi evalelwa leulu, naava tava twala vahapu kouyuki, ngaashi eenyofi alushe fiyo alushe. . . . Neendunge tadi ka hapupala.” (Dan. 12:3, 4) Oolyelye va li tava ka kala ovanaendunge notava vilima? Jesus okwa li a yandja enyamukulo mefaneko laye li na sha noilya neu. Okwa li a popya kombinga ‘yexulilo lefimbo lounyuni,’ a ti: “Ovayuki otava ka vilima ngaashi etango mouhamba waXe.” (Mat. 13:39, 43) Opo nee Jesus okwa li a yelifa kutya “ovayuki” ovo “ovana vouhamba,” Ovakriste ovavaekwa. — Mat. 13:38, yelekanifa OB-1986.

⁹ Mbela Ovakriste ovavaekwa aveshe ova li tava ka “vilima”? Heeno, molwaashi Ovakriste aveshe ove na okukufa ombinga moilonga yokuudifa, okuninga ovanhu ovahongwa nosho yo okutungafana pokwoongala. Ndele ovavaekwa ove na okutula po oshihopaenenwa. (Sak. 8:23) Kakele kaasho, oinima yomoule oya li tai ka hololwa pefimbo lexulilo. Exunganeko laDaniel ola li li na ‘okuhakwa noshihakifo’ fiyo opefimbo lexulilo. (Dan. 12:9) Mbela omhepo iyapuki oya li tai ka konakona ngahelipi oinima yomoule ya tya ngaho nokupitila moolyelye?

10. (a) Omhepo iyapuki ohai holola eeshili domoule okupitila moolyelye pefimbo lexulilo? (b) Yelifa kutya oshili i na sha notembeli inene yaJehova yopamhepo oya li ya yelifwa ngahelipi.

¹⁰ Ngeenge oinima yopamhepo yonhumba ya pumbwa okuyelifwa kunena, omhepo iyapuki ohai kwafele ovakalelipo ‘vomupiya omudiinini nomunaendunge’ ovo ve li kombelewa ya kula yEendombwedi daJehova va ude ko eeshili domoule odo da li inadi udiwa ko nale. (Mat. 24:45; 1 Kor. 2:13) Olutuwiliki alishe ohali kundafana li tale ngeenge ope na omauyelele onhumba a pumbwa okupepalekwa. (Oil. 15:6) Opo nee, ngeenge la fiki pexulifodiladilo, nongeenge oli wete sha pumbiwa, ohali nyanyangida ouyelele oo wa pepalekwa opo aveshe va dule okumona ouwa. (Mat. 10:27) Ndele mokweendela ko kwefimbo, otashi dulika pa ka kale pa pumbwa eyelifo limwe vali, naasho ohashi yelifwa paushili. — Tala oshimhungu: “Omhepo iyapuki oya holola kutya otembeli yopamhepo otai faneke shike.”

Mona ouwa monghandangala oyo omhepo iyapuki tai dana kunena

11. Ovakriste aveshe kunena ohava mono ouwa ngahelipi monghandangala oyo omhepo iyapuki tai dana mokuholola oinima yomoule yaKalunga?

¹¹ Ovakriste aveshe ovadiinini ohava mono ouwa monghandangala oyo tai danwa komhepo iyapuki eshi tai holola oinima yomoule yaKalunga. Ngaashi Ovakriste vomefelemudo lotete, nafye kunena ohatu konakona nokonima yefimbo ohatu ka dimbuluka nokutula moilonga ouyelele oo twa uda ko kekwafo lomhepo iyapuki. (Luk. 12:11, 12) Inatu pumbwa ngeno ehongo lopombada opo tu dule okuuda ko eeshili domoule dopamhepo odo da nyanyangidwa. (Oil. 4:13) Ndele mbela ongahelipi hatu dulu okuxwepopaleka eudeko letu li na sha noinima yomoule yaKalunga? Natu ka kundafaneni omaetepo amwe.

12. Otu na okwiilikana naini opo tu pewe omhepo iyapuki?

¹² Ilikana u pewe omhepo iyapuki. Fimbo inatu konakona ouyelele wonhumba we likolelela kOmishangwa, otu na tete okwiilikana opo tu pewe omhepo iyapuki i tu wilike. Otu na yo okwiilikana nonande otu li ofye atuke ile kutya nee pamwe efimbo olo tu na olinini. Omaindilo a tya ngaho taa ilikanwa nelininipiko, otaa ka hafifa omutima waTate yetu womeulu. Ngaashi Jesus a popya, Jehova ote ke tu pa omhepo yaye iyapuki ngeenge ohatu mu indile nomutima aushe. — Luk. 11:13.

13, 14. Okulilongekidila okwoongala otaku dana onghandangala ilipi mokuuda ko oinima yomoule yaKalunga?

¹³ Kala ho lilongekidile okwoongala. Ohatu pewa ‘oikulya pefimbo layo’ okupitila mongudu yomupiya. “Omupiya” oha wanifa po oshinakuwanifwa shaye moku tu pa ouyelele we likolelela kOmishangwa noha unganeke ouyelele wokukonakonwa nosho yo okwoongala. Ope na omatomheno a konakonwa noukeka kutya omolwashike “oukumwe aushe wovamwatate” hau pulwa u konakone ouyelele wonhumba. (1 Pet. 2:17, NW; Kol. 4:16; Jud. 3) Ohatu ka longela kumwe nomhepo iyapuki ngeenge otwa kendabala ngaashi hatu dulu tu landule omaetepo oo twa pewa. — Eh. 2:29.

¹⁴ Ngeenge hatu lilongekidile okwoongala kwopaKriste, otu na okulesha omishangwa odo da etwa mo ndele inadi tofwa mo nokukendabala okutala kutya otadi longo ngahelipi kombinga yoshinima osho tashi kundafanwa. Ngeenge otwa kala hatu ningi ngaho, eudeko letu lOmbibeli otali ka enda tali xwepopala. (Oil. 17:11, 12) Omhepo iyapuki otai ke tu kwafela tu kale hatu dimbuluka osho Omishangwa donhumba tadi ti ngeenge otwa kala hatu lesha Ombibeli notashi ke tu kwafela yo tu koneke kutya oda ama peni mOmbibeli.

15. Omolwashike tu na okukala hatu lesha oileshomwa yehangano alushe shimha ya piti, nongahelipi hatu dulu okupondola okuninga ngaho?

¹⁵ Kala ho lesha oileshomwa yehangano alushe shimha ya piti. Oishangomwa imwe ihai konakonwa pokwoongala, ndele oya nuninwa oku tu etela ouwa. Nokuli noishangomwa oyo ya shangelwa ovaleshi vomomapya oya nuninwa yo oku tu kwafela. Mounyuni omu mu na omalipyakidilo mahapu, luhapu ohatu kala poima twa teelela omunhu wonhumba ile oshinima shonhumba. Ngeenge otwa kala hatu humbata oishangomwa yetu oyo inatu lesha ile inatu mana ko, ohatu dulu okulongifa eemhito da tya ngaho tu i leshe. Vamwe ohava pwilikine koungalo voishangomwa ipe fimbo tava ende ile ve li moyeendifo. Oishangomwa aishe oyo ohai kala i na omauyelele a konakonwa noukeka noya shangwa monghedi oyo tai dulu okuhafelwa kovaleshi vahapu, onghee hano, otai dulu okuhapupalifa eudeko letu li na sha noinima yopamhepo. — Hab. 2:2.

16. Ohatu ka mona ouwa ulipi ngeenge otwa kala hatu shange omapulo noku ke a konakona nawa konima yefimbo?

¹⁶ Kala ho dilonga. Kala ho dilonga ngeenge to lesha Ombibeli ile oishangomwa ye likolelela kOmbibeli. Eshi to lesha noukeka, otashi dulika u kale u na omapulo onhumba. Oto dulu okushanga omapulo oo opo u ke a konakone nawa konima yefimbo. Luhapu oinima oyo hatu kala twa halelela okuuda ko nawa oyo hai tu ningifa tu konakone moule. Eudeko olo hatu mono ohali ningi emona letu lopaumwene olo hatu dulu okulongifa ngeenge sha pumbiwa. — Mat. 13:52.

17. Ohamu kundafana shike pekonakono loukwaneumbo weni ile lopaumwene?

¹⁷ Tula po efimbo lokuninga ekonakono loukwaneumbo. Olutuwiliki ole tu ladipika atusheni tu litulile po efiku lonhumba oshivike keshe opo tu kale hatu ningi ekonakono lopaumwene ile loukwaneumbo. Eshi elandulafano lokwoongala kwetu la lunduluka, oshe tu yeululila omhito yokutula moilonga omayele oo. Ohamu konakona shike pEkonakono lOukwaneumbo weni? Vamwe ohava lesha Ombibeli, tava ningi omalafululo e na sha nomapulo oo a holoka po nokuninga omadidilikoshango maxupi mEembibeli davo. Omaukwaneumbo mahapu ohaa longifa efimbo opo a tale kutya ongahelipi taa dulu okutula moilonga ouyelele oo va konakona. Omitwe domaukwaneumbo dimwe ohadi hoolola ouyelele oo di wete kutya owa pumbwa okukonakonwa koukwaneumbo ile oo tau ungaunga noshinima ile epulo lonhumba olo oukwaneumbo wa pula u konakone. Nopehe na omalimbililo, otamu ka diladila po oshikundafanwa shimwe vali osho mwa hala okukonakona mokweendela ko kwefimbo.a

18. Omolwashike tuhe na okweefa okukonakona eeshili domoule dEendjovo daKalunga?

¹⁸ Jesus okwa ti kutya omhepo iyapuki otai ka kala onga omukwafi. Onghee hano, inatu efa po okukonakona eeshili domoule dEendjovo daKalunga. Eeshili da tya ngaho odi li oshitukulwa ‘sheshiivo lokushiiva Kalunga’ li na ondilo, notwa ladipikwa tu di konakone. (Lesha Omayeletumbulo 2:1-5.) Ohadi holola shihapu kombinga yoinima oyo ‘Kalunga a longekidila ava ve mu hole.’ Ngeenge otwa ningi eenghendabala tu lihonge kombinga yEendjovo daJehova, omhepo iyapuki otai ke tu kwafela molwaashi “omhepo otai konakona oinima aishe, mwa kwatelwa oinima yomoule yaKalunga.” — 1 Kor. 2:9, 10, NW.

[Eshangelo lopedu]

Oto nyamukula ngahelipi?

• Omeenghedi mbali dilipi omhepo iyapuki hai tu kwafele tu konakone “oinima yomoule yaKalunga”?

• Omhepo iyapuki oya li ya holola eeshili domoule okupitila moolyelye mefelemudo lotete?

• Omhepo iyapuki ohai yelifa ngahelipi oinima kunena?

• Ou na okuninga po shike opo u mone ouwa monghandangala oyo tai danwa komhepo iyapuki?

[Oshimhungu pepandja 30]

Omhepo iyapuki oya holola kutya otembeli yopamhepo otai faneke shike

Shimwe ‘shoinima yomoule yaKalunga’ oyo ya li ya hololwa mefelemudo lotete oshosho kutya etwali nosho yo otembeli oya li tai faneke oinima inene yopamhepo. Paulus okwa ti kutya oinima oyo inene oyo ‘etwali lashili, la tungwa kOmwene, hakomunhu.’ (Heb. 8:2) Oya li otembeli inene yopamhepo, elongekido lokupopya naKalunga olo la ningwa tali shiiva omolweyambo laJesus Kristus nosho yo oupristeri waye.

‘Etwali lashili’ ola dikwa po mo 29 O.P. eshi Jesus a ninginifwa, ndele Jehova te mu tambula ko e li eyambo la wanenena. (Heb. 10:5-10) Jesus okwa ya mOuyapukielela wotembeli yopamhepo nokwa li a yandja ongushu yeyambo laye “koshipala shaKalunga” konima yefyo nenyumuko laye. — Heb. 9:11, 12, 24.

Omuyapostoli Paulus okwa li a shanga monhumwafo imwe vali kombinga yOvakriste ovavaekwa a ti kutya ‘otava ningi otembeli iyapuki omOmwene.’ (Ef. 2:20-22) Mbela otembeli ya tya ngaho oya faafana ‘netwali lashili’ olo a ka popya konima yefimbo monhumwafo yaye oyo a li a shangela Ovaheberi? Oule womido omilongo, ovapiya vaJehova ova li va diladila kutya osho shi li ngaho. Osha li sha fa kutya Ovakriste ovavaekwa ova li tava longekidwa kombada yedu va ka ninge “omamanya” otembeli yaJehova yomeulu. — 1 Pet. 2:5.

Ndele mo 1971 lwaapo, oilyo yongudu yomupiya oyo i na oinakuwanifwa oya li ya hovela okuuda ko kutya otembeli oyo ya popiwa kuPaulus mOvaefeso kai fi otembeli inene yaJehova yopamhepo. Ngeno ‘etwali lashili’ ola li la fikama po mOvakriste ovavaekwa ovo va nyumunwa, ngeno etwali olo ola dikwa po konima eshi okunyumunwa kwavo kwa hovela pefimbo ‘lokukala po kwOmwene.’ (1 Tes. 4:15-17, NW) Ndele Paulus okwa popya kombinga yetwali a ti: ‘Eshi osho efaneko tali faneke efimbo lopaife.’ — Heb. 9:9.

Mokuyelekanifa omishangwa odo nosho yo dimwe vali noukeka, osha yela nawa kutya otembeli yopamhepo kai li metifa lokutungwa nonokutya Ovakriste ovavaekwa kave fi “omamanya” a hongwa okudja kombada yedu opo a ka tungilwe kotembeli oyo. Ponhele yaasho, Ovakriste ovavaekwa otava longo moshihale nomOuyapuki wotembeli yopamhepo, tava yandje “omahambeleloyambo” kuKalunga efiku keshe. — Heb. 13:15.

[Efano pepandja 31]

Ongahelipi hatu dulu okuxwepopaleka eudeko letu li na sha ‘noinima yomoule yaKalunga’?