“Efimbo la wapala opaife”
“Tala, efimbo la wapala opaife, tala, efiku lexupifo opaife.” — 2 KOR. 6:2.
1. Omolwashike tu na okukala tu shii kutya oshilonga sha fimanenena shilipi tu na okulonga pefimbo lonhumba?
“ASHISHE shi notundi yasho ya pangelwa, noshinima keshe shokoshi yeulu oshi nefimbo lasho.” (Omuud. 3:1) Salomo okwa li ta divilike kutya osha fimana okukala tu shii kutya efimbo lilipi la wapala okulonga oilonga oyo ya fimanenena ngaashi okulonga omapya, okuya molweendo, okungeshefa ile okupopya navamwe. Onghee hano, nafye otwa pumbwa okukala tu shii kutya oshilonga sha fimanenena shilipi tu na okulonga pefimbo lonhumba. Oku shi popya noitya imwe, otu na okukala tu shii nawanawa kutya oshike tu na okupitifa komesho.
2. Otu shi shii ngahelipi kutya eshi Jesus a li ta udifa okwa li a nongela efimbo olo a li e li mulo?
2 Eshi Jesus a li kombada yedu, okwa li e shii nawa kutya oku li pefimbo lilipi nonokutya oshike kwa li a pumbwa okuninga. Molwaashi okwa li e shii nawa kutya oshike e na okupitifa komesho, okwa li a nongela kutya efimbo olo ovanhu va kala va teelela opo omaxunganeko mahapu e na sha naMessias a wanifwe ola fika. (1 Pet. 1:11; Eh. 19:10) Opa li pe na oilonga oyo e na okulonga opo ovanhu va shiive kutya oye naanaa Messias omuudanekwa. Okwa li e na okuyandja oundombwedi nawanawa kombinga yoshili yOuhamba nokwoongela ovo va li tava ka pangela pamwe naye mOuhamba waKalunga monakwiiwa. Jesus okwa li yo e na okutota po eongalo lopaKriste olo la li tali ka wanifa po oshilonga shokuudifa nokuninga ovanhu ovahongwa fiyo kominghulo dedu. — Mark. 1:15.
3. Okunongela kwaJesus efimbo olo a li e li mulo okwa li kwa kuma ngahelipi eenghatu daye?
3 Molwaashi Jesus okwa li a nongela kutya efimbo olo a li e li mulo ola endelela, osha li she mu linyengifa a longe ehalo laXe nouladi. Okwa li a lombwela ovahongwa vaye ta ti: “Eteyo olo olihapu, ndele ovalongi ovo ovanini, ilikaneni hano Omwene weteyo a tume ovateyi meteyo laye.” (Luk. 10:2; Mal. 4:5, 6) Jesus okwa li a hoolola tete ovahongwa 12 opo nee ta hoolola vali 70 movahongwa vaye, nokwe va pa omalombwelo okondadalunde ndele te va tumu va ka udife etumwalaka likumwifi olo kutya: “Ouhamba weulu wa ehena popepi.” Ombibeli oya popya shi na sha naJesus ya ti: “Eshi a mana okulombwela ovalongwa vaye omulongo navavali oipango ei, okwa ehena ko nokulonga nokuudifa moilando yavo.” — Mat. 10:5-7; 11:1; Luk. 10:1.
4. Omonghedi ilipi Paulus a li omuhopaeneni waJesus Kristus?
4 Jesus okwa tulila po ovashikuli vaye aveshe oshihopaenenwa sha wanenena ngeenge tashi uya peliyandjo nosho yo okulonga nouladi. Omuyapostoli Paulus okwa li ta diladila kombinga yoshihopaenenwa osho eshi a li a ladipika ovaitaveli vakwao a ti: “Kaleni ovahopaeleli vange ngaashi aame omuhopaeleli waKristus.” (1 Kor. 11:1) Omonghedi ilipi Paulus a li omuhopaeneni waKristus? Paulus okwa li a pitifa komesho okuudifa onghundana iwa. Monhumwafo oyo Paulus a li a shangela omaongalo, omu na omautumbulilo ngaashi “inamu fya ounye,” “kaleleni Omwene,” “alushe kaleni ovaladi moilonga yOmwene” nosho yo “keshe eshi tamu shi ningi, shi ningeni komitima deni nokulongela Omwene.” (Rom. 12:11; 1 Kor. 15:58; Kol. 3:23) Paulus ka li nande ha dimbwa eshi a li a shakena nOmwene Jesus Kristus fimbo a li ta i kuDamaskus nosho yo eendjovo daJesus odo a li a lombwelwa komuhongwa wedina Ananias, tadi ti: “Oye oshilongifo shange sha hoololwa shokuhumbatela edina lange koiwana yovapaani nokeehamba nokovana vaIsrael.” — Oil. 9:15; Rom. 1:1, 5; Gal. 1:16.
“Efimbo la wapala”
5. Oshike sha li she linyengifa Paulus a wanife po oukalele waye nouladi?
5 Ngeenge otwa lesha embo lOilonga, ohatu ka mona kutya Paulus okwa li e na ondjungu nouladi eshi a li ta wanifa po oukalele waye. (Oil. 13:9, 10; 17:16, 17; 18:5) Paulus okwa li a mona kutya efimbo olo a li mulo ola fimana shi fike peni. Okwa ti: “Tala, efimbo la wapala opaife, tala, efiku lexupifo opaife.” (2 Kor. 6:2) Momudo 537 K.O.P., osha li efimbo ile omhito ya wapala keenghwate odo da li moukwatwa muBabilon opo di alukile koshilongo shado. (Jes. 49:8, 9) Ndele mbela pomhito opo Paulus okwa li ta ulike kushike eshi a popya eendjovo odo? Omatukulwa omo mwa dja eendjovo odo otae tu kwafele tu mone kutya oshike a li e na momadiladilo.
6, 7. Oufembanghenda munene ulipi wa pewa Ovakriste ovavaekwa vokunena, noolyelye tava longo pamwe navo?
6 Fimbo ina popya eendjovo odo, Paulus okwa hangwa a popya nale monhumwafo yaye shi na sha noufembanghenda munene oo ye nOvakriste vakwao ovavaekwa va li va pewa. (Lesha 2 Ovakorinto 5:18-20.) Okwa ti kutya Kalunga okwe va ifana nelalakano lonhumba lokondadalunde, sha hala kutya, va wanife po “oshilongayakulo shehanganifo,” va indile ovanhu ‘va hangane naKalunga.’ Okuhanganifa ovanhu naKalunga osha hala okutya okweetifa ombili ile elongelokumwe pokati kovanhu naKalunga.
7 Okudja pounashibofa womuEden, ovanhu aveshe ova kala va tukuka ko kuJehova. (Rom. 3:10, 23) Okulitukula ko kuKalunga kwa tya ngaho okwa ningifa ovanhu vahapu va ye momilaulu dopamhepo odo tadi etifa okumona oixuna nosho yo efyo. Paulus okwa ti: “Otu shi shii oishitwa aishe ohai keme kumwe ndele oi nefeto lokudala fiyo paife.” (Rom. 8:22) Ndelenee Kalunga okwa katuka eenghatu, ta ‘indile’ ovanhu va alukile kuye ile va hangane naye. Paulus nosho yo Ovakriste vakwao ovavaekwa vopefimbo laye ova li ve lineekelelwa oukalele oo. “Efimbo la wapala” ola li tali dulu okuninga “efiku lexupifo” kwaava tava itavele muJesus. Ovakriste ovavaekwa aveshe nosho yo oovakwao ‘veedi dimwe’ ovo tava longo pamwe navo, otava twikile okushiva ovanhu va mone ouwa ‘mefimbo la wapala.’ — Joh. 10:16, OB-1986.
8. Oshike sha ningifa eshivo lokuhanganifa ovanhu naKalunga lididilikwedi?
8 Eshivo olo lokuhanganifa ovanhu naKalunga olididilikwedi neenghono molwaashi nonande ounashibofa wovanhu muEden oo wa li wa ningifa ovanhu va kale va tukauka ko kuKalunga, Kalunga oye a katuka onghatu tete a hanganife vali ovanhu naye. (1 Joh. 4:10, 19) Mbela Kalunga okwa li a ninga po shike? Paulus okwa nyamukula a ti: “Kalunga okwa kala muKristus nokwa hanganifa ounyuni naye mwene, ndele ine va valulila omatauluko avo, ndele okwe tu pa ondjovo yehanganifo.” — 2 Kor. 5:19; Jes. 55:6.
9. Paulus okwa li a ninga po shike opo a ulike olupandu laye omolwefilonghenda laKalunga?
9 Eshi Jehova a yandja ekuliloyambo, okwe shi ninga tashi shiiva opo aveshe ovo ve na eitavelo tali longo va diminwe po omatauluko avo nova kale vali ve na ekwatafano ile va hangane naye. Shimwe vali, okwa tuma ovakalelipo vaye va ladipike ovanhu mounyuni aushe va pange ombili naye ofimbo pe na omhito yoku shi ninga. (Lesha 1 Timoteus 2:3-6.) Molwaashi Paulus okwa li e shii ehalo laKalunga nokwa nongela efimbo olo a li e li mulo, okwa li a longifa eenghono daye nefimbo lihapu nopehe na olufuwo ‘moshilongayakulo shehanganifo.’ Ehalo laJehova inali lunduluka. Natango, okwa hala ovanhu ovo va tukuka ko kuye va pange vali oukaume naye. Eendjovo daPaulus odo tadi ti kutya “efimbo la wapala opaife” nosho yo odo tadi ti kutya “efiku lexupifo opaife,” otadi wanifwa natango. Osho itashi ulike tuu kutya Jehova Kalunga oku li shili omunefilonghenda nomunahole! — Ex. 34:6, 7.
Inamu dopa ‘okukoneka elalakano lalo’
10. “Efiku lexupifo” otali ti shike kOvakriste ovavaekwa vonale nosho yo vokunena?
10 Ovanhu ovo tava mono tete ouwa mefilonghenda laKalunga inali longelwa ovovo ‘ve li muKristus.’ (2 Kor. 5:17, 18) “Efiku lexupifo” lavo ola hovela pOpentekoste 33 O.P. Okudja opo, ovanhu va tya ngaho ova kala ve lineekelelwa oshilonga shokuudifa “ondjovo yehanganifo.” Kunena, oshixupe shOvakriste ovavaekwa otashi wanifa po natango “oshilongayakulo shehanganifo.” Ova didilika kutya ovaengeli vane ovo omuyapostoli Johannes a li a mona memoniko lopaxunganeko, ‘ova li tava kangheke nokukwata eemhepo nhe dedu, opo pa ha pepe nande omhepo kombada yedu.’ Onghee hano, otu li natango ‘mefiku lexupifo’ nosho yo ‘pefimbo la wapala.’ (Eh. 7:1-3) Omolwetomheno olo, okudja lwopehovelo lefelemudo eti-20, oshixupe shOvakriste ovavaekwa osha kala tashi longo nouladi “oshilongayakulo shehanganifo” fiyo okominghulo dedu.
11, 12. Ongahelipi Ovakriste ovavaekwa va li va ulika kutya ove shii efimbo olo va li ve li mulo lwopehovelo lefelemudo eti-20? (Tala efano pepandja 23.)
11 Pashihopaenenwa, embo Jehovah’s Witnesses — Proclaimers of God’s Kingdom, ola popya kutya lwopehovelo lefelemudo eti-20, “C.T. Russell nosho yo ovo va li hava endafana naye ova li va itavela filufilu kutya ove li mefimbo leteyo novanhu ova pumbwa okuuda oshili oyo tai va mangulula.” Mbela ova li va ninga po shike? Ovamwatate ovo kava li ve wete sha wana ashike okushiva vamwe ve uye okupwilikina kelongelokalunga, molwaashi ova li va didilika kutya ova li pefimbo leteyo, “efimbo la wapala.” Ndelenee ovawiliki vOukwakriste ova kala ashike tava shivi ovanhu komalongelokalunga. Mepingafano naasho, Ovakriste ovavaekwa ova li va hovela okukonakona va tale kutya eenghedi vali dilipi tadi longo odo ve na okulongifa opo va tandavelife onghundana iwa. Natango, ova longifa nawa outeknologi woshinanena opo va xumife komesho oilonga yavo.
12 Opo va tandavelife onghundana iwa yOuhamba, okangudu oko kanini kovakalele ovo ovaladi oka li ka longifa outraktate, oufo, omambo nosho yo oifo. Ova li yo va shanga oipopiwa nosho yo oitukulwa yonhumba, ndele tave i yandje koifokundaneki omayovi i ka pilindwe. Ova li hava ningi eenghundafana dOmbibeli okupitila meeradio domoshitukulwa nosho yo dopaiwana. Ova li va nyanyangida nokulongifa omafano hae linyenge oo haa ulikwa pamwe nomawi a kwatwa moungalo, nokuli fimbo eengeshefa deemuvi inadi nduluka po eemuvi di na omafano tae linyenge pamwe nomawi. Mbela oidjemo ilipi ya li ya etifwa kouladi tau twikile wa tya ngaho? Kunena, ovanhu omamiliyona aheyali lwaapo ova tambula ko oshili nove limbwanga mumwe navo mokuudifa etumwalaka olo tali ti: “Itaveleni mu hanganifwe naKalunga.” Doshili, ovapiya vaJehova ovo vonale ove li oshihopaenenwa shiwa shouladi nonande ova li ve na omangabeko.
13. Elalakano laKalunga lilipi tu na okukaleka momadiladilo?
13 Eendjovo daPaulus odo tadi ti kutya “efimbo la wapala opaife” otadi wanifwa fiyo okunena. Ava twa mona efilonghenda laJehova inali longelwa ohatu pandula omolwomhito oyo twa pewa opo tu ude nokutambula ko etumwalaka olo lehanganifo. Ponhele yokukala tuhe na ko nasha, otu na okutala ko eendjovo daPaulus da kwata moiti, odo tadi ti: “Ohatu mu kumaida yo, efilonghenda laKalunga mu he li tambule oshimha.” (2 Kor. 6:1) Kalunga ota file ovanhu onghenda nelalakano ‘lokuhanganifa ounyuni naye’ okupitila muKristus. — 2 Kor. 5:19.
14. Eemhito dilipi da yeulukila ovanhu moilongo ihapu?
14 Ovanhu vahapu ova twikifwa kuSatana nova tukuka ko natango kuKalunga nokave udite ko kutya elalakano laKalunga loku tu fila onghenda olashike. (2 Kor. 4:3, 4; 1 Joh. 5:19) Ndele eenghalo dounyuni odo tadi ende tadi naipala neenghono oda ningifa ovanhu vahapu va katuke eenghatu eshi va ulikilwa kutya oukolokoshi nokumona oixuna kwovanhu okwe uya po molwaashi ovanhu ova tukauka ko kuKalunga. Nokuli nomoilongo omo ovanhu vahapu va kala ve tonde oilonga yetu yokuudifa, vahapu paife ova tambula ko onghundana iwa notava katuka eenghatu opo va hangane naKalunga. Onghee hano, mbela otwa dimina kutya paife olo efimbo lokulonga nexwamo moukalele nokuladipika ovanhu hatu ti: “Itaveleni mu hanganifwe naKalunga”?
15. Ponhele yokuudifa ashike etumwalaka olo tali ningifa ovanhu va kale ve udite va pepelelwa, otwa hala ovanhu aveshe va shiive shike?
15 Oilonga yetu kai fi ashike okulombwela ovanhu kutya Kalunga ota ka kandula po omaupyakadi avo notava ka kala va pepelelwa ngeenge ova ehene popi naye. Ovanhu vahapu osho hava kala va hala okuningilwa ngaho ngeenge tava i keengeleka, novawiliki vahapu vomalongelokalunga ove lilongekida okuwanifa po omahalo a tya ngaho. (2 Tim. 4:3, 4) Ndele osho hasho elalakano loukalele wetu. Onghundana iwa oyo hatu udifa oyoyo kutya Jehova okwa halelela okudima po omatauluko ovanhu okupitila muKristus omolwohole yaye. Onghee hano, oohandimwe otava dulu okupanga vali oukaume nosho yo okuhanganifwa naKalunga. (Rom. 5:10; 8:32) Ashike “efimbo la wapala” oli li pokuxula po.
“Kaleni mwa xwama momhepo”
16. Oshike sha li sha kwafela Paulus a kale e na omukumo nouladi?
16 Oshike tashi dulu oku tu kwafela tu kulike nokukanyatela ouladi welongelokalunga lashili? Vamwe otashi dulika ve na eehoni paushitwe nokave hole lela okupopya notashi dulika va mone shidjuu okupopya va manguluka ile okweendafana navamwe. Ndele oshiwa okudimbuluka kutya ouladi kau fi ashike oshinima shokuulikwa kombada ile enyaku ashike longaho, noinau likolelela komaukwatya omunhu. Paulus okwa ulika osho tashi dulu oku tu kwafela tu kale ovaladi eshi a li a ladipika Ovakriste vakwao a ti: “Kaleni mwa xwama momhepo.” (Rom. 12:11) Omhepo yaJehova oya kala tai dana onghandangala inene mokukwafela ovayapostoli va udife nouladi nosho yo nelididimiko. Okudja eshi Paulus a ninga Omukriste fiyo osheshi a li a idililwa modolongo muRoma oshikando shaxuuninwa nokufya efyo linyanyalifi, okwa kala omuladi oule womido di dulife po 30 noina tengauka. Paulus okwa kala alushe ha kongo ekwafo kuKalunga, naKalunga okwa li e mu pameka okupitila momhepo yaye iyapuki. Paulus okwa ti: “Aishe ohandi i dulu [omolwaau, NW] ta pameke nge.” (Fil. 4:13) Onghee hano, itatu ka mona tuu omauwa ngeenge otwa hopaenene oshihopaenenwa shaye!
17. Ongahelipi hatu dulu okukala ‘twa xwama momhepo’?
17 Oshitya osho sha tolokwa ‘exwamo’ mOmbibeli otashi ti lelalela “okufuluka.” (Kingdom Interlinear) Opo omeva a kale taa fuluka mokaketifa, owa pumbwa okukala to ehele oikuni efimbo keshe. Sha faafana, opo tu kale ‘twa xwama momhepo,’ otwa pumbwa ekwafo lomhepo yaKalunga efimbo keshe. Ndele opo tu dule okumona ekwafo lomhepo yaKalunga, otu na okukala hatu longifa omafiloshisho aeshe oo Jehova he tu pe nelalakano loku tu pameka pamhepo. Osho otashi ulike kutya otu na okutala ko ekonakono loukwaneumbo nosho yo okwoongala kwa kwata moiti, sha hala okutya, otu na okukala hatu konakona Ombibeli pandjikilile tu li oohandimwe ile oukwaneumbo, nosho yo okukala hatu ilikana nokwoongala pamwe nOvakriste vakwetu pandjikilile. Kungaho otashi ke tu kwafela tu kale twa tema omundilo opo tu dule okukala hatu ‘fuluka,’ naasho otashi ke tu kaleka ‘twa xwama momhepo.’ — Lesha Oilonga 4:20; 18:5.
18. Tu li Ovakriste twe liyapulila Jehova, oshilonga shilipi tu na okuyandja elitulemo kusho?
18 Omunhu oo e liyapulila oshinima shonhumba oha yandje elitulemo alishe kusho noiha efa nande osha shi mu imbe ile shi mu shololife a hange osho ta lalakanene. Tu li Ovakriste twe liyapulila Jehova, elalakano letu olo okuninga keshe osho Jehova a hala tu ninge, ngaashi naanaa Jesus a li a ninga. (Heb. 10:7) Kunena, Jehova okwa hala ovanhu vahapu ngaashi tashi dulika va hanganifwe naye. Onghee hano, natu hopaeneneni Jesus nosho yo Paulus mokulonga noudiinini oshilonga osho sha fimanenena nosha endelela, osho tashi longwa kunena.
Oto dimbuluka?
• “Oshilongayakulo shehanganifo” shilipi osho sha li sha pewa Paulus nosho yo Ovakriste vakwao ovavaekwa?
• Ongahelipi oshixupe shovavaekwa sha kala tashi longifa nawa “efimbo la wapala”?
• Ongahelipi ovaudifi Ovakriste tava dulu okukala va “xwama momhepo”?
[Efano pepandja 20]
Paulus ka li ha dimbwa omhito oyo a shakenene nOmwene Jesus Kristus