Jehova ohe tu amene opo tu ka xupifwe
“Ofye ava hatu amenwa keenghono daKalunga molweitavelo, [tu] mone exupifo eli la longekidwa li hololwe mefimbo laxuuninwa.” — 1 PET. 1:4, 5.
OTO NYAMUKULA NGAHELIPI?
Jehova ohe tu nanene ngahelipi kelongelokalunga lashili?
Ongahelipi hatu dulu okweefa Jehova e tu wilike nomayele aye?
Jehova ohe tu tu omukumo okupitila mushike?
1, 2. (a) Oushili ulipi tu na oo tau ulike kutya Kalunga ote ke tu kwafela tu kanyatele oudiinini wetu? (b) Jehova oku shii keshe umwe womufye shi fike peni?
JESUS okwa ti: “Ou te lididimike fiyo exulilo, oye ta xupifwa.” (Mat. 24:13) Eendjovo odo otadi ulike nawa kutya otu na okukanyatela oudiinini wetu fiyo okexulilo opo tu ka xupifwe eshi Kalunga ta ka tokola ounyuni ou waSatana. Ashike osho inashi hala okutya Jehova okwa teelela tu lididimike she likolelela keenghono detu vene ile kounongo wetu vene. Ombibeli oye tu shilipaleka tai ti: “Kalunga Oye omudiinini, ite mu efa mu yelekwe nomayeleko e dule eenghono deni, ndele mumwe neyeleko ota longele yo omhito yokupita mo, opo mu dule oku li humbata.” (1 Kor. 10:13) Ndele mbela eendjovo odo oda hala naanaa okutya shike?
2 Jehova oha shilipaleke kutya itatu hangwa komayeleko e dule eenghono detu. Osho oha dulu oku shi ninga molwaashi oku shii keshe shimwe kombinga yetu, mwa kwatelwa omashongo oo twa taalela, oshitwe yetu nosho yo kutya ohatu dulu okulididimikila omayeleko e fike peni. Ndele mbela Kalunga oku tu shii ngoo shili nawa ngaho? Heeno. Omishangwa otadi ulike kutya Jehova oku shii keshe umwe womufye nawanawa. Oku shii yo omalipyakidilo etu akeshe efiku, eenghedindjikilile detu noha dulu nokuli okukonakona omadiladilo nomadilongo omitima detu. — Lesha Epsalme 139:1-6.
3, 4. (a) Oshimoniwa shaDavid otashi ulike ngahelipi kutya Jehova oku na ohokwe mufye pauhandimwe? (b) Jehova ota wanifa po oshilonga shididilikwedi shilipi kunena?
3 Mbela oshidjuu kwoove okwiitavela kutya Kalunga oku na ohokwe mufye tu li ovanhu vongaho? Omupsalme David naye okwa li a pula Jehova pomhito imwe a ti: “Ngenge handi tale keulu, koshilongwa shominwe doye, kohani nokeenyofi, edi wa shita, omunhu omushike, eshi ho mu dimbulukwa?” (Eps. 8:4, 5) David otashi dulika a li a pula Jehova epulo olo omolwouwa aushe oo a li e mu ningila. Fimbo omonamati waIsai oo wonghelo a li okamatyona, Jehova okwa li e mu tala ko e li ‘omulumenhu oo a hokiwa komutima waye’ nokwe mu kufa ‘moufita wokulifa eedi a ninge omukomesho’ woshiwana shaIsrael. (1 Sam. 13:14; 2 Sam. 7:8) Diladila ashike kunghee David a li e udite eshi a mona kutya Omushiti weshito alishe oku na ohokwe momadiladilo nomadilongo aye nonande ye okwa li ashike omufita woimuna!
4 Nafye onghedi omo Jehova he tu ulikile ohokwe kunena oikumwifi. Ota ongele “omamona oiwana aishe” melongelokalunga lashili noha kwafele ovapiya vaye va kanyatele oudiinini wavo. (Hag. 2:7) Opo tu ude ko nawa kutya Jehova ohe tu kwafele ngahelipi tu kanyatele oudiinini wetu, tete natu ka konakoneni nghee ha nanene ovanhu kelongelokalunga lashili.
KALUNGA OYE HE TU NANENE KUYE
5. Jehova oha nanene ngahelipi ovanhu kOmona waye? Shi yelifa.
5 Jesus okwa ti: “Kape na ou ta dulu okuuya kuame okuninga Tate, ou a tuma nge, te mu shili.” (Joh. 6:44) Eendjovo odo otadi ulike kutya opo u ninge omuhongwa waKristus owa pumbwa ekwafo laKalunga. Ndele mbela ongahelipi Jehova ha nanene ovo va fa eedi kOmona waye? Ohe shi ningi okupitila moilonga yokuudifa onghundana iwa nosho yo momhepo yaye iyapuki. Pashihopaenenwa, eshi omuyapostoli Paulus novatumwa vakwao va li muFilippi, ova li va shakeneka omukainhu wedina Lidia nova li ve mu udifila onghundana iwa. Omishangwa da nwefwa mo oda ti: “Omwene okwa yeulula omutima waye okutambula odo da tongwa kuPaulus.” Kalunga okwa li a longifa omhepo yaye iyapuki a kwafele Lidia a ude ko etumwalaka lOuhamba, noshidjemo, okwa li a ninginifwa pamwe noukwaneumbo wavo. — Oil. 16:13-15.
6. Kalunga ohe tu nanene ngahelipi kelongelokalunga lashili?
6 Mbela Lidia oye aeke a li a ningilwa oshinima sha tya ngaho? Hasho nandenande! Ngeenge ou li Omukriste e liyapulila Jehova, naave oye e ku nanena kelongelokalunga lashili. Ngaashi ashike Tate yetu womeulu a li a mona sha shiwa momutima waLidia, nomwoove okwa mona mo sha shiwa. Eshi wa li wa udifilwa oshikando shotete, Jehova oye a li e ku kwafela okupitila momhepo yaye u ude ko onghundana iwa. (1 Kor. 2:11, 12) Jehova okwa li e ku nangeka noupuna eshi wa li to kendabala okutula moilonga osho to lihongo nokulonga ehalo laye. Okwa li yo a hafa eshi we mu liyapulila. Jehova okwa kala te ku yambidida okudja ngoo eshi wa hovela okweenda mondjila oyo tai twala komwenyo fiyo opaife.
7. Otu shi shii ngahelipi kutya Kalunga ote ke tu kwafela tu twikile okukala ovadiinini?
7 Molwaashi Jehova oye e tu kwafela tu hovele okweenda pamwe naye, ohatu dulu okukala noushili kutya ota ka twikila oku tu kwafela tu kale ovadiinini kuye. Oku shii kutya inatu uya moshili kufye vene, onghee hano, ina teelela tu twikile okukala moshili kufye vene. Omuyapostoli Petrus okwa li a lombwela Ovakriste vakwao ovavaekwa, a ti: “Ofye ava hatu amenwa keenghono daKalunga molweitavelo, [tu] mone exupifo eli la longekidwa li hololwe mefimbo laxuuninwa.” (1 Pet. 1:4, 5) Efinamhango olo li li momushangwa oo otali longo yo kOvakriste aveshe kunena. Omolwashike mbela? Omolwaashi atusheni otwa pumbwa ekwafo laKalunga opo tu kale ovadiinini kuye.
KALUNGA OTE KE TU KWAFELA TU KATUKE PANDUNGE
8. Omolwashike twa pumbwa okulungama tuha katuke eenghatu dihe li pandunge?
8 Oisho yonghalamwenyo nosho yo okuhawanenena kwetu otaku dulu oku tu ningifa tuha yandje vali elitulemo koinima yopamhepo notaku ke tu ningifa tu katuke eenghatu dihe li pandunge nokuli nonande inatu shi didilika mo. (Lesha Ovagalati 6:1.) David naye okwa li a ningilwa oshinima sha tya ngaho mokukalamwenyo kwaye.
9, 10. Ongahelipi Jehova a li a amena David aha longe owii, nongahelipi he tu amene kunena?
9 Eshi David a li ta tewatewa kuSaul, okwa li a ulika elipangelo eshi ina alulila ohamba oyo inandubo owii wayo. (1 Sam. 24:3-8) Ndele diva konima yaasho, okuhawanenena kwaye okwa li kwe mu ningifa a kanife elipangelo. David novakwaita vaye ova li ve na omhumbwe yoikulya nokwa li a pula ekwafo nefimaneko kOmuisrael mukwao wedina Nabal. Nabal okwa li a tuka David, ndele David ta handuka nokwa li a tokola okwaalulila Nabal noukwaneumbo waye aushe owii. David okwa li a dimbwa kutya ota ka kala e na etimba lohonde koshipala shaKalunga shimha a dipaa ovanhu ovo vehe na ondjo. Lao linene, omukulukadi waNabal wedina Abigail okwa li a endelela a ka shakeneke David, naasho osha li sha kwafela David aha longe owii. Eshi a mona kutya Jehova oye a li e mu kwafela aha nyone, okwa li a lombwela Abigail, a ti: “Omwene Kalunga kaIsrael na hambelelwe, ou e ku tuma nena okushakeneka nge! Neendunge doye nadi nangekwe noupuna, naave mwene u nangekwe noupuna, eshi wa kelela nge nena okutula etimba lohonde nokulikwafa neke lange mwene.” — 1 Sam. 25:9-13, 21, 22, 32, 33.
10 Oshike hatu lihongo mehokololo olo? Jehova okwa li a longifa Abigail opo a amene David aha longe owii. Jehova oha ningi sha faafana nokunena. Oshoshili kutya katu na okukala twa teelela Kalunga a tume omunhu wonhumba e tu kelele ngeenge hatu hale okulonga owii. Kakele kaasho, itatu dulu okufekela kutya Kalunga ota ka ninga po shike ngeenge opa holoka onghalo yonhumba ile kutya oshike ta ka efa shi ningwe opo a wanife po elalakano laye. (Omuud. 11:5) Ndele nande ongaho, otu na oushili kutya Jehova oku shii nawa eenghalo detu note ke tu kwafela tu kale ovadiinini kuye. Okwe tu shilipaleka a ti: “Onda hala ndi ku longe, ndi ku udikile ondjila, ei u nokweenda nayo; onda hala ndi ku twe omayele; eisho lange tali ku pashukile.” (Eps. 32:8) Jehova ohe tu pe omayele ngahelipi? Ongahelipi hatu dulu okumona mo ouwa muo? Omolwashike hatu dulu okukala noushili kutya Jehova ota wilike oshiwana shaye kunena? Natu ka taleni kunghee omapulo oo a nyamukulwa membo lEhololo.
OKUTAMBULA KO OMAYELE OHAKU TU AMENE
11. Jehova oku shii shi fike peni kombinga yaasho tashi linyenge momaongalo oshiwana shaye?
11 Omutumbalekwa Jesus Kristus okwa hokololwa memoniko olo li li mEhololo etukulwa eti-2 neti-3 ta konakona omaongalo aheyali okuAsia Linini. Emoniko olo otali ulike kutya Kristus ka li ashike ta konakona oinima momaongalo oo monghedi yakwalukeshe, ndele okwa li yo ta konenene eenghalo donhumba kondadalunde. Peemhito dimwe, okwa li nokuli a tumbula oohandimwe kondadalunde, e va pandula apa sha pumbiwa nokwe va pukulula moinima yonhumba. Ndele mbela emoniko olo otali ulike kushike? Omaongalo aheyali oo a tumbulwa memoniko olo otaa ulike kOvakriste ovavaekwa ovo va li tava ka kala ko okudja mo 1914, nomayele oo Jesus a li a yandja komaongalo oo otaa longo yo kOvakriste aveshe kunena. Onghee hano, ohatu dulu okutya Jehova ota wilike oshiwana shaye kunena okupitila mOmona waye. Ongahelipi hatu dulu okumona mo ouwa mewiliko olo Jehova ta yandje koshiwana shaye?
12. Ongahelipi hatu dulu okupitika Jehova a wilike eenghatu detu?
12 Onghedi imwe omo hatu dulu okumona ouwa mewiliko lopahole olo Jehova ta yandje omokukala hatu ningi ekonakono lopaumwene. Jehova oha yandje omayele opamishangwa taa longo okupitila moileshomwa oyo hai nyanyangidwa kongudu yomupiya omudiinini nomunaendunge. (Mat. 24:45) Ashike opo tu mone mo ouwa momayele oo, otu na okulitulila po efimbo lokukonakona oileshomwa oyo nokutula moilonga osho twe lihonga. Jehova ohe tu ‘amene tuha punduke’ okupitila mekonakono lopaumwene. (Jud. 24) Mbela ope na ngoo efimbo limwe wa li to konakona oshitukulwa shonhumba moshishangomwa shetu ndele osha fa ashike oove sha shangelwa? Kala ho tale ko omayele oo kutya okwa dja kuJehova. Ngaashi ashike kaume koye tashi dulika a popye naave te ku mbabala komapepe opo u yandje elitulemo kwaasho te ku lombwele, Jehova naye oha longifa omhepo yaye iyapuki i tu kwafele tu yandje elitulemo kelihumbato ile komaukwatya etu oo twa pumbwa okuxwepopaleka. Ngeenge otwa kala hatu dulika kewiliko lomhepo iyapuki, kungaho ohatu pitike Jehova a yukife eenghatu detu. (Lesha Epsalme 139:23, 24.) Onghee hano, otashi ka kala shiwa okutalulula onghedindjikilile yetu yokukonakona.
13. Omolwashike shi li pandunge okutalulula onghedindjikilile yetu yokukonakona?
13 Okukala hatu longifa efimbo lihapu momalihafifo otaku dulu okumana po efimbo letu lokukonakona paumwene. Omumwatate umwe okwa ti: “Oshipu neenghono okufaula okuninga ekonakono lopaumwene. Omalihafifo okwa hapupala neenghono kunena noshipu okukufa ombinga muo shi dulife nale. Ohaa ulikwa kee-TV, keekombiyuta nokeengodi dopeke. Hano, oku li apeshe.” Onghee hano, ngeenge inatu lungama itatu ka kala vali tu na efimbo la wana lokukonakona moule paumwene nohauxuuninwa ohatu ka efa po filufilu okukonakona. (Ef. 5:15-17) Keshe umwe womufye okwa pumbwa okulipula kutya: ‘Mbela olungapi handi kongo eemhito dokukonakona moule Eendjovo daKalunga? Mbela ongeenge ashike handi lilongekidile oshipopiwa ile oshitukulwa shonhumba shokwoongala?’ Ngeenge osho, otwa pumbwa okulongifa efimbo lokuninga Elongelokalunga lOukwaneumbo ile ekonakono lopaumwene opo tu konakone moule ounongo oo Jehova he tu pe oo tau ke tu kwafela tu ka xupifwe. — Omayel. 2:1-5.
ETWOMUKUMO OHALI TU PAMEKE
14. Omishangwa oda ulika ngahelipi kutya Jehova oha yandje elitulemo komaliudo etu?
14 David okwa pita meenghalo dihapu dinyikifa oluhodi monghalamwenyo yaye. (1 Sam. 30:3-6) Eendjovo da nwefwa mo odo a shanga otadi ulike kutya Jehova okwa li e shii omaliudo aye. (Lesha Epsalme 34:19; 56:9.) Kalunga oku shii yo omaliudo etu. Ngeenge ‘omitima detu da teyauka’ ile ‘omhepo yetu ya nyanyauka,’ oha ehene popepi nafye. Osho ohashi tu hekeleke ngaashi naanaa sha li sha hekeleka David oo a imba ta ti: “[Ohandi] hafele nokunyakukilwa ouwanghenda woye, shaashi wa tala oudjuu wange, nowa dimbulukwa omatilifo omwenyo wange.” (Eps. 31:8) Ndele Jehova oha ningi shihapu shihe fi ashike okuyandja elitulemo komaupyakadi etu. Ohe tu pameke moku tu hekeleka nomoku tu twa omukumo. Osho ohe shi ningi okupitila mokwoongala kwopaKriste.
15. Oshike hatu lihongo mo moshimoniwa shaAsaf?
15 Ouwa umwe oo hatu mono pokwoongala ou liwetikile moshimoniwa shomupsalme Asaf. Okukala te lipula unene shi na sha nouhenouyuki oo wa kala tau longwa okwe mu ningifa a kale a limbililwa okulongela kwaye Kalunga ngeenge oku na tuu ouwa washa. Osho osha li she mu teya omukumo. Okwa popya nghee a li e udite, a ti: “Okwa li nda lulilwa natango momutima, nondi [nekeshuko] meni lange.” Oshidjemo, Asaf okwa li hanga a efe po okulongela Jehova. Ndele mbela oshike sha li she mu kwafela a kale vali e na etaleko liwa? Okwa ti: ‘Onda li nda tyuukila mouyapuki waKalunga.’ Okukala kwaye mokati kovalongelikalunga vakwao mouyapuki okwa li kwe mu kwafela a kale vali e na etaleko la yuka. Osho osha li sha kwafela Asaf a mone kutya okupondola kwovahenakalunga okwopakafimbo ashike nosho yo kutya Jehova ita kala ina yukifa oinima. (Eps. 73:2, 13-22) Sha faafana, nafye ohatu dulu okuteka omukumo eshi hatu ungaunga nokuhenouyuki oko taku longwa mounyuni ou waSatana. Ndele okwoongala pamwe novamwatate ohaku tu pameke nohaku tu kwafele tu twikile okulongela Jehova nehafo.
16. Ongahelipi hatu dulu okumona ouwa moshihopaenenwa shaHanna?
16 Ndele mbela ongahelipi ngeenge ope na oshinima shonhumba osho she ku ningifa u kale u udite shidjuu okukala pokwoongala? Pashihopaenenwa, otashi dulika wa kufwa oufembanghenda wonhumba noho kala wa fya ohoni ile pa holoka okuhaudafana pokati keni nomumwatate ile nomumwameme wonhumba. Ngeenge osho, oshihopaenenwa shaHanna otashi dulu oku ku kwafela. (Lesha 1 Samuel 1:4-8.) Hanna okwa li ha nyematekwa neenghono kunyamunghwao wedina Peninna. Onghalo oyo oya enda tai naipala omudo keshe, unene tuu ngeenge oukwaneumbo wavo wa li tau ka yambela Jehova omayambo kuSilo. Oshinima osho osha li sha nyikifa Hanna oluhodi neenghono nokwa ka kala ta ‘lili noina hala okulya.’ Ndele nande ongaho, ina efa onghalo ya tya ngaho i mu imbe okukala ha i kotembeli a ka longele Jehova. Jehova okwa li a mona kutya Hanna omudiinini nokwa li e mu nangeka noupuna. — 1 Sam. 1:11, 20.
17, 18. (a) Omeenghedi dilipi hatu mono etwomukumo pokwoongala kweongalo? (b) Ou uditile ngahelipi efiloshisho lopahole olo Jehova he tu pe opo tu dule oku ka xupifwa?
17 Ovakriste kunena ove na okushikula oshihopaenena shaHanna shokukala ihava faula okwoongala. Ngaashi tu shi shii nawa, okwoongala ohaku tu pamekeni atusheni noku tu twa omukumo. (Heb. 10:24, 25) Ohatu hekelekwa kokukala hatu endafana nOvakriste vakwetu, koipopiwa nosho yo komatyekosha ovamwatate novamwameme. Okukala hatu kundafana novaitaveli vakwetu komesho nokonima yokwoongala, ohaku tu pe omhito yokuhokololelafana oimoniwa tai hekeleke nokuhololelafana omaliudo etu. (Omayel. 15:23; 17:17) Ohatu kala yo twa shambukwa ngeenge hatu imbile Jehova pamwe novamwatate. Ohatu kala twa pumbwa etwomukumo olo hali yandjwa pokwoongala unene tuu ngeenge tu “noshisho shoudjuu meni” letu, naJehova ohe tu pameke ‘nomahekeleko aye’ pokwoongala nohe tu yambidida tu twikile okukala ovadiinini. — Eps. 94:18, 19.
18 Efiloshisho lopahole olo Jehova he tu pe ohali tu ningifa tu kale tu udite ngaashi omupsalme Asaf oo a li a imbila Jehova ta ti: “Ove u kwete nge nawa kolulyo lange. Oto endifa nge pamhangela yoye mwene.” (Eps. 73:23, 24) Inatu hafa tuu eshi Jehova he tu amene opo tu ka xupifwe!
[Efano pepandja 28]
Naave owa nanwa kuJehova
[Efano pepandja 30]
Okutula moilonga omayele aKalunga ohaku tu amene
[Efano pepandja 31]
Etwomukumo olo hatu pewa ohali tu pameke