Mona omanangeko noupuna okupitila mOhamba oyo tai wilikwa komhepo yaKalunga!
‘Omhepo yOmwene otai kala nokutulumukwa kombada yaye.’ — JES. 11:2.
1. Vamwe ova ti shike eshi va li tava holola okunakonasha kwavo shi na sha nomaupyakadi ounyuni?
MOMUDO 2006, omunongononi umwe wewangadjo, Stephen Hawking, okwa li a pula a ti: “Mbela ovanhu otava ka xupa ngoo konima yomido 100 ngeenge ounyuni ou na omaupyakadi opapolotika, opanghalafano nosho yo omudingonoko?” Oshifokundaneki shedina, New Statesman, osha ti: “Inatu dula okuxulifa po oluhepo ile okweeta po ombili mounyuni. Ponhele yokuxulifa po oluhepo, otwe li hapupalifa ashike, ponhele yokuxulifa po oita, otwe i xumifa ashike komesho. Osho inashi hala ngeno kutya inatu ninga eenghendabala nandenande. Otwa kendabala onghedi keshe yokupangela, ngaashi epangelo loukomonisi, epangelo loukapitali; otwa li twa tota po Oshipandi shOiwana notwa li twa ongela oilwifo yopalute opo tu kelele oita. Otwa lwa ‘oita ihapu opo ngeno tu xulife po oita’ molwaashi otwa li hatu diladila kutya otu shii nghee hatu dulu oku i xulifa po.”
2. Jehova ota ka ulika ngahelipi mafiku kutya oye e na oufemba wokupangela edu?
2 Oshiwana shaJehova ihashi kumwifwa komapopyo a tya ngaho. Ombibeli otai tu lombwele kutya ovanhu kava li va shitwa va kale tave lipangele vo vene. (Jer. 10:23) Jehova oye aeke e na oufemba wokukala Omupangeli wetu. Onghee hano, oye aeke e na oufemba woku tu tulila po omifikamhango, okuufa kutya onghalamwenyo yetu oi na okukala nelalakano lilipi noku tu wilika tu hange elalakano olo. Kakele kaasho, mafiku Jehova ota ka longifa eenghonopangelo daye opo a xulife po eenghendabala dovanhu dokulipangela vo vene odo da xulila mounyengwi. Ndele pefimbo opo tuu opo, Kalunga ota ka hanauna po aveshe ovo inava hala okudulika kounamapangelo waye nova ninga ovapika voulunde nokuhawanenena notava pangelwa “kukalunga kefimbo lounyuni [ou],” Satana Ondiaboli. — 2 Kor. 4:4.
3. Jesaja okwa li a xunganeka shike shi na sha naMessias?
3 Mounyuni mupe oo tau ka kala Oparadisa, Jehova ota ka pangela ovanhu pahole okupitila mOuhamba wopaMessias. (Dan. 7:13, 14) Omuprofeti Jesaja okwa xunganeka shi na sha nOhamba oyo a ti: “Oshitutumine otashi tutuma moshifidi shaIsai, noshiti omomudi waye, ndee tashi imi oiimati; nOmhepo otai ka kala nokutulumukwa kombada yaye, Omhepo yeendunge noyounongo, Omhepo yomayele noyeenghono, Omhepo yeshiivo noyokutila Omwene.” (Jes. 11:1, 2) Omeenghedi dilipi dokondadalunde omo omhepo iyapuki yaKalunga ya kwafela ‘oshitutumine osho sha tutuma moshifidi shaIsai,’ Jesus Kristus, shi kale sha wana okupangela ovanhu? Epangelo laye otali ka eta omanangeko noupuna elipi? Oshike tu na okuninga opo tu ka mone omanangeko noupuna a tya ngaho?
Kalunga oye a kwafela Jesus a kale a wana okupangela
4-6. Eshiivo lilipi tali ka kwafela Jesus a dule okuninga Ohamba, Omupristeri Omukulunhu nOmutokoli omunaendunge nomunalukeno?
4 Jehova okwa hala okwaalulila ovapangelwa vaye mewaneneno okupitila mewiliko lOhamba, Omupristeri Omukulunhu nOmutokoli omunaendunge shili nomunalukeno. Nomolwaasho okwa hoolola Jesus Kristus, oo a kwafela okupitila momhepo yaye iyapuki opo a kale a wana okuwanifa po oinakuwanifwa oyo ya fimanenena. Natu ka taleni komatomheno amwe kutya omolwashike Jesus ta ka dula okuwanifa po nawanawa oinakuwanifwa yaye oyo a pewa kuKalunga.
5 Jesus oku shii Kalunga nawanawa. Omona ewifa laKalunga okwa kala naXe oule womido omamiliyona omayovi mahapu noku mu shii nawa e dule keshe umwe. Pefimbo opo, Jesus okwa li a mona eshiivo lokushiiva Jehova, nomolwaasho taku dulu okutiwa kutya oye “olupe laKalunga iha monika.” (Kol. 1:15) Jesus okwa popya shi na sha naye mwene a ti: “Ou [a] mona nge, oye a mona Tate.” — Joh. 14:9.
6 E li omutivali meshito a landula Jehova, Jesus oku shii nawanawa oishitwa aishe, mwa kwatelwa ovanhu. Ovakolossi 1:16, 17 ova ti: ‘Osheshi muye [Omona waKalunga] omo mwa shitilwa aishe inya yomeulu naai yokombada yedu, ei i wetike naai i he wetike. Ndele Oye wotete kuaishe, nomuye aishe ya pamenena mo.’ Diladila ashike kwaasho! E li “omulongi onghulungu,” (NW) Jesus okwa kufa ombinga mokushitwa kwoishitwa ikwao aishe. Onghee hano, oku shii nawanawa eshito alishe, okudja ngoo kounima vanininini vomeshito ihava monika nomesho fiyo okouluvi womunhu oo mukumwifi. Heeno, Kristus omunongo shili! — Omayel. 8:12, 22, 30, 31.
7, 8. Kalunga okwa li a longifa ngahelipi omhepo yaye iyapuki opo a kwafele Jesus moukalele waye?
7 Jesus okwa li a vaekwa nomhepo iyapuki yaKalunga. Okwa ti: “Omhepo yOmwene [oi] li kombada yange, osheshi Ye okwa vaeka nge ndi udifile eehepele evangeli, Ye okwa tuma nge ndi xunge ava ve nomutima wa nyanyaulwa; okwa tuma nge ndi ingidile eenghwate emangululo novapofi etwikululo, okutembukifa mo oonakuhepekwa, nokuudifa omudo muwa wOmwene.” (Luk. 4:18, 19) Eshi Jesus a ninginifwa, osha yela kutya omhepo iyapuki oya li ye mu dimbulukifa oinima oyo a li e lihonga fimbo ine uya kombada yedu, mwa kwatelwa osho Kalunga a li a hala a wanife po pefimbo loukalele waye wokombada yedu e li Messias. — Lesha Jesaja 42:1; Lukas 3:21, 22; Johannes 12:50.
8 Jesus ka li ashike omunhu munenenene oo a li kombada yedu, ndele okwa li yo Omuhongi munenenene, molwaashi okwa li a pewa eenghono okupitila momhepo iyapuki, a li e na olutu nosho yo ouluvi wa wanenena. Doshili, ovapwilikini vaye ova li va “kuminwa elongo laye.” (Mat. 7:28) Shimwe vali, Jesus okwa li a holola kutya oinima ngaashi oulunde, okuhawanenena nosho yo okuhashiiva Kalunga, oyo oyeetifi yomaupyakadi ovanhu. Kakele kaasho, okwa li ha dulu okumona kutya oshike shi li momitima dovanhu nokuungaunga navo she likolelela kwaasho a mona muvo. — Mat. 9:4; Joh. 1:47.
9. Okudilonga koimoniwa yomokukalamwenyo kwaJesus kwokombada yedu okwa kuma ngahelipi elineekelo loye muye e li Omupangeli?
9 Jesus okwa li omunhu wopambelela. Molwaashi Jesus okwa li omunhu wopambelela nokwa li e na ekwatafano lopofingo novanhu inava wanenena, osho oshe mu kwafela neenghono a kale a wana okuninga Ohamba. Omuyapostoli Paulus okwa ti: “[Jesus] okwa li e nokufafana novamwaxe moinima aishe, opo a ninge omupristeri omukulunhu omunamutimanghenda nomudiinini moilonga yaye yopuKalunga, Ye a longele ovanhu edimepo lomatimba. Osheshi Oye mwene, eshi a yahamekwa nokwa hongaulwa, ota dulu okukwafa ava tava hongaulwa.” (Heb. 2:17, 18) Molwaashi Jesus naye okwa li a “hongaulwa,” ota dulu okuudila oukwao wananghali ovo tava hangwa komahongaulo. Olukeno laye ola li liwetikile pefimbo loukalele waye wokombada yedu. Ovanhu ngaashi ovanaudu, oingudu, ovafininikwa, nokuli nounona, ova li hava kala va manguluka okuuya kuye. (Mark. 5:22-24, 38-42; 10:14-16) Ovalininipiki nosho yo ovanhu ovo va li va fya ondjala yopamhepo navo ova li va nanenwa kuye. Ndele ovalinenepeki nosho yo ovanhu ovo ‘ohole yaKalunga ihe mo muvo,’ kava li va tambula ko Jesus, ova li ve mu tonde nohave mu pataneke. — Joh. 5:40-42; 11:47-53.
10. Omonghedi ya tongomana ilipi omo Jesus a ulika kutya oku tu hole?
10 Jesus okwe tu yandjela omwenyo waye. Oumbangi munene oo tau ulike kutya kape na vali omupangeli umwe a denga e dule Jesus oyoo kutya okwe tu fila nehalo liwa. (Lesha Epsalme 40:7-11.) Kristus okwa ti: “Kape na ou e nohole i dule yaau ta yandjele ookaume kaye omwenyo waye.” (Joh. 15:13) Doshili, mepingafano novapangeli inava wanenena ovo luhapu hava kala nonghalamwenyo youdjeko tava longifa oimaliwa oyo va kufa kovapangelwa vavo, Jesus okwa yandjela ovanhu omwenyo waye. — Mat. 20:28.
Jesus okwa pewa eenghono a etele ovanhu omanangeko noupuna okupitila mekuliloyambo
11. Omolwashike hatu dulu okulineekela Jesus filufilu e li Omukulili wetu?
11 Inashi yuka tuu eshi Jesus, oo e li Omupristeri Omukulunhu, oye ta ka kwatela komesho mokweetela ovanhu omanangeko noupuna okupitila mekuliloyambo laye! Pefimbo loukalele waye wokombada yedu, Jesus okwe tu ulikila kanini kombinga yaasho ta ka ninga pefimbo lEpangelo laye lOmido Eyovi e li Omukulili wetu, nohatu dulu oku ka hafela omauwa oo ngeenge otwa kanyatele oudiinini wetu. Eshi Jesus a li kombada yedu, okwa li a velula ovanaudu noingudu, a nyumuna ovafi, a palula eemhunga dovanhu nokwa li nokuli a pangela eenghono domeshito. (Mat. 8:26; 14:14-21; Luk. 7:14, 15) Kakele kaasho, ka li a longa oikumwifilonga oyo opo ngeno a ulike kutya oku na eenghonopangelo ile kutya oku na eenghono dinene shi fike peni, ndele okwe shi ninga opo a ulike kutya oku li omunalukeno nomunahole. Pomhito imwe eshi Jesus a li a pulwa komunashilundu umwe ngeenge okwa hala oku mu velula, okwa li e mu nyamukula a ti: “Onda hala.” (Mark. 1:40, 41) Natango Jesus ota ka ulikila ovanhu olukeno pefimbo lEpangelo laye lOmido Eyovi, ndele pomhito opo, ote ke li ulikila ovanhu aveshe.
12. Jesaja 11:9 ota ka wanifwa ngahelipi?
12 Kristus nosho yo ovo tava ka pangela pamwe naye, otava ka twikila okuyandja ehongo lopamhepo olo Jesus a li a hovela omido 2 000 lwaapo da pita. Opo nee, eendjovo daJesaja 11:9 otadi ka wanifwa, odo tadi ti: “Edu alishe otali ka kala li yadi eshiivo lokushiiva Omwene, ngaashi omeva a tuvikila efuta.” Nopehe na omalimbililo, ehongo olo lopakalunga otali ka kala la kwatela mo omalombwelo e na sha nanghee edu nosho yo oishitwa ihapu yokombada yedu i na okufilwa oshisho, oshilonga sha faafana naasho sha li sha pewa Adam pehovelo. Pexulilo lomido 1 000, elalakano laKalunga lopehovelo olo la popiwa muGenesis 1:28 otali ka wanifwa, nekuliloyambo laJesus otali ka tulwa moilonga pauyadi.
Jesus okwa pewa eenghono kuKalunga a ninge Omutokoli
13. Jesus okwa li a ulika ngahelipi kutya oku hole ouyuki?
13 Kristus “Oye tuu ou Kalunga e mu ninga omutokoli wovanamwenyo nowovafi.” (Oil. 10:42) Itashi hekeleke tuu okushiiva kutya muJesus kamu na nande enyonauko nonokutya ouyuki noudiinini owa ninga omwiya woshiya shaye, wa mangelwa mo wa pamenena! (Jes. 11:5) Jesus okwa li a ulika kutya oku tonde olwisho, oihelele nosho yo owii aushe, nokwa tokola ovo va li vehe na ko nasha nokumona oixuna kwavamwe. (Mat. 23:1-8, 25-28; Mark. 3:5) Kakele kaasho, Jesus okwa li a ulika kutya ka li ha pukifwa keholokepo lomunhu lokombada, “osheshi Oye mwene a shiiva eshi sha kala momunhu.” — Joh. 2:25.
14. Omonghedi ilipi kunena omo Jesus ta ulike kutya oku hole ouyuki, notu na okulipula omapulo elipi?
14 Jesus ota twikile natango okuulika kutya oku hole ouyuki mokupashukila oshikonga shinenenene mondjokonona yovanhu shi na sha nokuudifa nokuhonga. Kape na nande omunhu ile epangelo lopanhu ile oshishitwa shopamhepo shikolokoshi tashi dulu okwiimba oilonga oyo i longwe fiyo oposhitwa opo Kalunga a hala. Onghee hano, ohatu dulu okukala nelineekelo kutya konima yoita yaHarmagedon, ouyuki waKalunga otau ka twikila okulongwa. (Lesha Jesaja 11:4; Mateus 16:27.) Lipula kutya: ‘Ohandi ulikile ngoo ovanhu omaukwatya a fa aJesus ngeenge ndi li moukalele? Ohandi ningi ngoo eenghendabala ndi longele Jehova ngaashi handi dulu nonande oukolele wange ile eenghalo dange otashi dulika itadi pitike nge ndi ninge ngaashi nda hala?’
15. Oshike tu na okukaleka momadiladilo osho tashi dulu oku tu kwafela tu longele Kalunga ngaashi hatu dulu?
15 Ngeenge otwa kaleke momadiladilo oushili kutya oilonga yokuudifa oyaKalunga, otashi ke tu kwafela tu mu longele nomwenyo wetu aushe. Kalunga oye a ti kutya oilonga oyo nai longwe; ohe i wilike yo okupitila mOmona waye, noha pameke ovo tava kufa ombinga muyo nomhepo yaye iyapuki. Ndele mbela otwa lenga ngoo oufembanghenda oo tu na wokukala ovalongi pamwe naKalunga nosho yo nOmona waye oo ta wilikwa komhepo yaYe iyapuki? Mbela ope na ngoo vali umwe ta dulu okulinyengifa ovanhu va konda pomamiliyona aheyali, ovo vahapu vomuvo va talwa ko kutya “ovanhu vongaho, inava longwa,” va udife etumwalaka lOuhamba moilongo 236 ehe fi ashike Jehova? — Oil. 4:13.
Mona omanangeko noupuna okupitila muKristus!
16. Genesis 22:18 ota holola shike shi na sha nomanangeko noupuna aKalunga?
16 Jehova okwa li a lombwela Abraham a ti: “[Oiwana] aishe kombada yedu tai ka nangekwa noupuna moludalo loye, osheshi ove wa uda ondaka yange.” (Gen. 22:18) Osho otashi ulike kutya ovo ve na olupandu otava dulu okuteelela nelineekelo omanangeko noupuna oo taa ka etifwa kOludalo lopaMessias. Ovanhu va tya ngaho ove lipyakidila kunena noilonga yaKalunga nohava kaleke momadiladilo omanangeko noupuna oo.
17, 18. Jehova okwa li a udaneka shike muDeuteronomion 28:2, naasho otashi ti shike kufye?
17 Pomhito imwe, Kalunga okwa li a lombwela oludalo laAbraham lopambelela, oshiwana shaIsrael, a ti: ‘Omanangeko noupuna aeshe aa [a tumbulwa mehangano lOmhango] otae uya kombada yoye, ndee tae ku hange, ngeenge to pwilikine ondaka yOmwene Kalunga koye.’ (Deut. 28:2) Eendjovo odo otadi longo yo kovapiya vaKalunga vokunena. Ngeenge owa hala oku ka mona omanangeko noupuna aJehova, ou na ‘okupwilikina’ kondaka yaye. Opo nee, omanangeko noupuna aye otae “uya kombada yoye, ndee tae ku hange.” Ndele mbela ‘okupwilikina’ okwa kwatela mo naanaa shike?
18 Okupwilikina okwa kwatela mo okukala twa tala ko kutya osho sha popiwa mEendjovo daKalunga nosho yo eendja dopamhepo odo he tu pe, oda kwata moiti. (Mat. 24:45) Otashi ti yo kutya otu na okudulika kuKalunga nosho yo kOmona waye. Jesus okwa ti: ‘Hakeshe ou ta ti kuame: Omwene, Omwene! ta i mouhamba womeulu, ndelenee oye tuu ou ha longo ehalo laTate womeulu.’ (Mat. 7:21) Okupwilikina kuKalunga otashi ti yo kutya okukala hatu dulika nehalo liwa kelongekido laye, eongalo lopaKriste omo mu na ovakulunhuongalo va nangekwa po, ve li “eeshali di li ovanhu.” — Ef. 4:8, NW.
19. Oshike tashi dulu oku tu kwafela tu ka mone omanangeko noupuna?
19 “Eeshali di li ovanhu” oda kwatela mo oilyo yOlutuwiliki, oyo tai longo i li ovakalelipo veongalo alishe lopaKriste. (Oil. 15:2, 6) Doshili, ohatu ka tokolwa pefimbo loudjuu munene she likolelela unene kunghee hatu tale ko ovamwaxe vaKristus vopamhepo. (Mat. 25:34-40) Onghee hano, oshinima shimwe osho tashi ke tu pe fa omanangeko noupuna osho okukala hatu yambidida noudiinini ovavaekwa vaKalunga.
20. (a) “Eeshali di li ovanhu” odi na oshinakuwanifwa sha fimanenena shilipi? (b) Ongahelipi hatu dulu okuulika kutya otwa fimaneka ovamwatate va tya ngaho?
20 “Eeshali di li ovanhu” oda kwatela mo yo oilyo yEekomitiye dOitaimbelewa, ovapashukili ovaendi nosho yo ovakulunhuongalo. Ovamwatate aveshe ovo ova nangekwa po okupitila momhepo iyapuki. (Oil. 20:28) Oshinakuwanifwa sha fimanenena shovamwatate va tya ngaho osho okutunga oshiwana shaKalunga fiyo “atushe hatu hange oukumwe womeitavelo nomeshiivo okushiiva Omona waKalunga, tu ninge ovakulunhu, twa kula, twa fika kewano louyadi waKristus.” (Ef. 4:13) Oshoshili kutya ovamwatate va tya ngaho navo inava wanenena ngaashi fye. Ndele nande ongaho, ohatu ka likola omanangeko noupuna ngeenge otwa tambula ko nolupandu efiloshisho lavo lopahole. — Heb. 13:7, 17.
21. Omolwashike okudulika kOmona waKalunga ku li oshinima sha endelela?
21 Mafiku Kristus ota ka katukila onghatu onghalelo yaSatana youkolokoshi. Ngeenge osho osha ningwa, ohatu ka xupifwa she likolelela kunghee Jesus te ke tu tokola, molwaashi okwa pewa eenghonopangelo kuKalunga a wilike “ongudu inene” oyo ya xunganekwa, e i twale “keefifiya domeva di nomwenyo.” (Eh. 7:9, 16, 17) Onghee hano, natu ningeni ngaashi hatu dulu paife tu kale hatu dulika nehalo liwa nokukala tu na olupandu okupandula Ohamba oyo tai wilikwa komhepo yaJehova.
Oshike twe lihonga . . .
• mOilonga yOvayapostoli 10:42?
[Efano pepandja 25]
Olukeno laJesus ola li li liwetikile eshi a nyumuna okamonakadona kaJairus