Twikila okuninga exumokomesho

OSHIKANDO shotete eshi we lihonga okutula moilonga omafinamhango Ombibeli, onghedi yoye yokudiladila, yokupopya nosho yo elihumbato loye oya enda tai lunduka kanini nakanini. Mahapu omomalunduluko oo owe a ninga nokuli ofimbo ino hovela okukufa ombinga mOfikola yOukalele woPauteokratika. Otashi dulika paife owa ninga exumokomesho nowe liyapulila Jehova. Ndele mbela osho osha hala okutya ku na vali okuninga exumokomesho? Hasho nande nande. Eninginifo loye oli li ashike ehovelo.

Omuhongwa Timoteus okwa hangwa nale e li omukulunhuongalo Omukriste eshi Paulus a li e mu lombwela a ‘diinine’ omayele nosho yo omaufembanghenda oo a li a pewa ‘nokukala muo’ opo ‘okweehena kwaye komesho ku monike kuaveshe.’ (1 Tim. 4:12-15) Otu na okukala tu na ehalo lokuninga exumokomesho, kashi na nee mbudi kutya opo twa hovele okweenda mondjila yoshili ile otwa kala mo.

Eshiivo nosho yo nokuninga omalunduluko

MOvaefeso 3:14-19, ohatu lesha mo shi na sha naashi omuyapostoli Paulus a li a ilikanena ovaitaveli vakwao va ‘koneke oumbwalangadja, oule womukokomoko, oule woposhi, noule wopombada’ woshili. Nomolwaasho, Jesus okwa yandja eeshali odo di li ovanhu di honge, di pukulule nokutunga eongalo. Okukala hatu dilonga pandjikilile kEendjovo daKalunga da nwefwa mo nosho yo ewiliko olo hatu pewa kovahongi ovo ve na owino, otaku tu kwafele tu “kule” pamhepo. — Ef. 4:11-15.

Ekulo la tya ngaho ola kwatela mo ‘okushituka vape momhepo yomadiladilo etu.’ Osho osha kwatela mo okukulika oikala yopamadiladilo oyo i li metwokumwe nomadiladilo aKalunga nao aKristus. Otwa pumbwa okukala alushe hatu lihongo shi na sha nonghedi yavo yokudiladila opo tu “djale omunhu mupe.” (Ef. 4:23, 24) Ngeenge to konakona omahokololo Omavangeli e na sha nokukalamwenyo kwaKristus, mbela oho kala u wete nghee to dulu oku mu hopaenena? Mbela oho kendabala okudidilika omaukwatya aJesus okondadalunde nopo nee to ningi eenghendabala da mana mo opo u a hopaenene? — 1 Pet. 2:21.

Oinima oyo ho popi otai dulu okuulika kutya owa ninga exumokomesho li fike peni moshinima osho. Ovo va djala ounhu mupe ihava popi oipupulu, ihava tukana noihava popi oinima inai koshoka. Ponhele yaasho, ohava popi eendjovo odo “diwa dokutungafana, da wapala okupwilikina.” (Ef. 4:25, 26, 29, 31; 5:3, 4; Jud. 16) Omatyekosha avo neendjovo odo hava popi ngeenge ve li ovo aveke ile pokwoongala otai holola kutya oshili oya lundulula okukalamwenyo kwavo.

Otashi ulike yo kutya owa ninga exumokomesho ngeenge iho ‘telaanifwa nokufungaafungifwa keemhepo adishe dehongo.’ (Ef. 4:14) Pashihopaenenwa, oho linyenge ngahelipi ngeenge ounyuni tau kendabala oku ku yada omadiladilo mahapu noku ku kokela momalihafifo e lili noku lili? Mbela oho kala wa hala okulongifa po efimbo lomalipyakidilo e na sha noinima yopamhepo moinima ya tya ngaho? Ngeenge osho ho ningi ngaho, osho otashi ke ku imba okuninga exumokomesho lopamhepo. Kashi li tuu pandunge okukonga efimbo tu ninge oinima yopamhepo! — Ef. 5:15, 16.

Onghedi omo ho ungaunga navamwe otai dulu yo okuulika kutya owa ninga exumokomesho lopamhepo shi fike peni. Mbela ‘oho file onghenda noho dimine po’ ovamwaxo? — Ef. 4:32.

Okuninga exumokomesho mokuninga oinima monghedi oyo Jehova a hokwa oku na okukala ku liwetikile meongalo nosho yo keumbo. Oku na yo okukala ku liwetikile kofikola, keenhele daaveshe nosho yo koilonga. (Ef. 5:21–6:9) Ngeenge owa kala to ulike omaukwatya opakalunga pauyadi moinima aishe, exumokomesho loye otali ka kala li liwetikile.

Longifa oshali yoye

Jehova okwa pa keshe umwe womufye oitalendi nosho yo okudula kwa yoolokafana. Okwa hala tu longife oinima oyo omolwouwa wavamwe, nokungaho ote va ulikila olune laye inali longelwa okupitila mufye. Omuyapostoli Petrus okwa shanga shi na sha naasho a ti: ‘Yakulafaneni keshe tuu noshalinghenda e i pewa ngaashi omalenga mawa efilonghenda laKalunga.’ (1 Pet. 4:10) Oho wanifa po ngahelipi oshinakuwanifwa shoye u li elenga?

Petrus okwa li a weda ko a ti: “Ou ta popi, na popye ngaashi eendjovo daKalunga.” (1 Pet. 4:11) Ovelishe oyo otai divilike kutya otu na oshinakuwanifwa shokukala hatu popi metwokumwe nEendjovo daKalunga, opo tu mu tumbalekife. Onghedi omo hatu popi oi na okukala tai tumbalekifa Jehova. Edeulo olo hatu pewa okupitila mOfikola yOukalele woPauteokratika otali ke ku kwafela u longife oshali yoye mokufimanekifa Kalunga okupitila monghedi omo ho kwafele vamwe. Molwaashi olo olo elalakano loye, ongahelipi to dulu okumona kutya oto ningi exumokomesho li fike peni mofikola?

Ponhele yokudiladila kutya otwa longela koitwa ingapi oyo i li momusholondodo woitwa oko ovanafikola ve na okulongela ile oludi loipopiwa olo twa pewa, diladila kutya owa ninga exumokomesho li fike peni mokuyambela Kalunga oshiimati shomilungu eshi wa pewa edeulo. Ofikola ohai tu deula tu kale hatu pondola neenghono moukalele. Onghee hano, lipula kutya: ‘Mbela ohandi lilongekidile ngoo osho handi ka tya moukalele? Mbela onde lihonga okukala ndi na ko nasha novanhu ovo handi udifile? Mbela ohandi fiye nda pula ovanhu ovo handi udifile epulo opo eshi handi ka aluka tu kale tu na sha shokukundafana? Ngeenge ohandi konakona Ombibeli naumwe, ohandi ningi ngoo eenghendabala ndi ninge exumokomesho ndi li omuhongi opo ndi hange omutima waye?’

Ino diladila kutya oinakuwanifwa oyo wa pewa oyo tai ufa exumokomesho loye. Exumokomesho loye ihali limonikila okupitila moinakuwanifwa oyo wa pewa, ndele ohali limonikila monghedi omo ho ungaunga nayo. Ngeenge owa li wa pewa oshipopiwa, lipula kutya: ‘Mbela onda longifa ngoo shili ounghulungu wokuhonga? Mbela onda longifa ngoo nawa ouyelele oo nda li nda pewa opo u nwefe mo okukalamwenyo kwaavo ve u uda?’

Ekumaido lokulongifa oshali oyo tu na otali ulike kutya otashi pula eenghendabala. Mbela oho katuka eenghatu opo u longe pamwe navamwe moukalele? Oho kwafele ngoo oilyo yeongalo leni oyo ipe, inyasha ile oyo tai ehama? Oho yambidida ngoo elongekido lokuwapaleka Olupale lOuhamba ile u kwafele meenghedi di lili noku lili poyoongalele? Mbela ito dulu okukala ho longo u li omukwafelikokolindjila efimbo nefimbo? Mbela ito dulu okulonga u li omukokolindjila wondjiikilile ile u ka kwafele meongalo omo mu na omhumbwe inene? Ngeenge ou li omumwatate, mbela oto ningi eenghendabala opo u wanife po oiteelelwa yopamishangwa i na sha nokukala omuyakuliongalo ile omukulunhuongalo? Otashi ulike kutya owa ninga exumokomesho ngeenge ou na ehalo lokukwafela opo pe na omhumbwe noho kala wa hala okutambula ko oinakuwanifwa. — Eps. 110:3.

Onghandangala oyo oimoniwa hai dana

Ino teka omukumo ngeenge ku na owino moinima i na sha nokukalamwenyo kwopaKriste. Eendjovo daKalunga otadi dulu ‘okunongopaleka omalai.’ (Eps. 19:8; 119:130; Omayel. 1:1-4) Ngeenge otwa kala hatu tula moilonga omayele Ombibeli, otashi ke tu kwafela tu mone ouwa mounongo waJehova oo wa wanenena nowa denga mbada u dule oshinima keshe osho twe lihonga okupitila moimoniwa. Ndelenee, eshi hatu ningi exumokomesho mokulongela Jehova, ohatu ke likola owino muhapu. Ohatu ka longifa ngahelipi owino oo opo u tu etele ouwa?

Ngeenge omunhu okwa pita meenghalo di lili noku lili monghalamwenyo, otashi dulika a tomhafane ta ti: ‘Onda pita nale monghalo ya tya ngaha. Ondi shii kutya ondi na okuninga po shike.’ Ndele mbela otashi ka kala ngoo pandunge okutomhafana ngaho? Omayeletumbulo 3:7 otae tu londwele taa ti: “Ino kala omunongo momesho oye mwene.” Oimoniwa oyo twa pita muyo oi na oku tu kwafela tu kale netaleko la mbwalangadjeka li na sha noinima oyo tu na okukaleka momadiladilo ngeenge hatu ungaunga neenghalo monghalamwenyo. Ndele ngeenge ohatu ningi exumokomesho lopamhepo, eenghalo odo twa pita mudo odi na yo oku tu kwafela tu mone kutya opo tu pondole monghalamwenyo otwa pumbwa ekwafo laJehova. Onghee hano, otashi ke limonikila mo kutya otwa ninga exumokomesho ngeenge hatu pula ekwafo kuJehova e tu wilike meenghalo donhumba, ndele hamokulineekela mufye vene. Kungaho, ohatu ulike kutya otu na elineekelo kutya kape na osho tashi ka ningwa nopehe na epitikilo laye nohatu tu ulike kutya otu na ekwatafano lopofingo naTate yetu womeulu.

Twikila okuninga exumokomesho

Nonande omuyapostoli Paulus okwa li a pyokoka pamhepo nokwa li Omukriste omuvaekwa, okwa li a dimina kutya okwa pumbwa ‘okulalakanena ei yokomesho’ opo a ka mone ondjabi yomwenyo. (Fil. 3:13-16) Mbela naave ou na etaleko la fa laPaulus?

Mbela owa ninga exumokomesho li fike peni? Likonakona u tale ngeenge owa djala tuu ounhu mupe pauyadi, ngeenge oho dulika filufilu kounamapangelo waJehova, nongeenge oho longifa pauyadi oshali yoye opo u fimanekife Jehova. Eshi to mono ouwa mOfikola yOukalele woPauteokratika, omaukwatya oo a tumbulwa mEendjovo daKalunga oe na okukala e liwetikile monghedi yoye yokupopya noyokuhonga. Kaleka oinima oyo i na sha nekulo lopamhepo momadiladilo. I lalakanena nehafo, opo nee exumokomesho loye otali ke limonikila kwaaveshe.