Twikila okweehena popepi naJehova

Momukokomoko wekonakonombiibeli loye owe lihonga shihapu kombinga yaJehova. Oinima oyo we lihonga oye ku ningifa u kale u mu hole neenghono, notashi dulika osho she ku linyengifa u mu liyapulile nokuninginifwa. Nongeenge ino liyapulila Kalunga nokuninginifwa, otashi dulika to diladila okuninga ngaho mafiku. Ashike konima ngeenge owa ninginifwa, inashi hala okutya ino pumbwa vali okweehena popepi naJehova. Oto dulu okutwikila okweehena popepi naJehova fiyo alushe. Ongahelipi to dulu okuninga ngaho?

1. Omolwashike wa pumbwa okutwikila okupameka oukaume woye naJehova?

Otwa pumbwa okulonga noudiinini, opo tu twikile okupameka oukaume wetu naJehova. Omolwashike mbela? “Opo tuha twalwaatwalwe” nokufiya po Jehova. (Ovaheberi 2:1) Oshike tashi dulu oku tu kwafela, opo tu twikile okulongela Jehova noudiinini? Ohatu dulu okukala twe lipyakidila moilonga yetu yokuudifa nokutala vali kutya omeenghedi dilipi hatu dulu okulongela Kalunga ketu pauyadi. (Lesha Ovafilippi 3:16.) Okulongela Jehova oko onghedi ya denga mbada yokukalamwenyo!— Epsalme 84:10.

2. Oshike vali wa pumbwa okutwikila okuninga?

Nonande ekonakonombiibeli loye oli li pokupwa, onghalamwenyo yoye u li Omukrsite otai twikile. Ombiibeli oya ti kutya otwa pumbwa ‘okudjala omunhu mupe.’ (Ovaefeso 4:23, 24) Eshi to twikile okukonakona Eendjovo daKalunga nokukala pokwoongala, oto ke lihonga oinima ipe kombinga yaJehova nosho yo omaukwatya aye. Tala kutya omeenghedi dilipi to dulu okuhopaenena omaukwatya aJehova monghalamwenyo yoye. Twikila okuninga omalunduluko a pumbiwa, opo u mu hafife.

3. Ongahelipi Jehova te ke ku kwafela u ninge exumokomesho?

Ombiibeli oya ti: “Kalunga. . . ota ka manifa oku mu deula. Ote ke mu pa eenghono, te mu kwafele mu kale ovadiinini nomwa pamenena.” (1 Petrus 5:10) Atusheni ohatu shakeneke omayeleko. Ashike Jehova ote ke tu pa osho twa pumbwa, opo tu dule oku a finda. (Epsalme 139:23, 24) Okwa udaneka kutya ote ke tu pa eenghono nosho yo ehalo loku mu longela noudiinini.— Lesha Ovafilippi 2:13.

KONAKONA MOULE

4. Kala ho popi nokupwilikina kukaume koye kopofingo

Okwiilikana nosho yo okukonakona Ombiibeli okwe ku kwafela, opo u ninge kaume kaJehova. Ongahelipi okutwikila okuninga oinima oyo taku ku kwafele u ehene popepi elela naye?

Lesha Epsalme 62:8, ndele tamu kundafana epulo tali shikula:

• Opo u pameke oukaume woye naJehova, ongahelipi to dulu okuxwepopaleka onghedi yoye yokwiilikana?

Lesha Epsalme 1:2, ndele tamu kundafana epulo tali shikula:

• Opo u pameke oukaume woye naJehova, ongahelipi to dulu okuxwepopaleka onghedi omo ho lesha Ombiibeli?

Oshike u na okuninga, opo u shilipaleke kutya oho mono ouwa muhapu mekonakono loye lopaumwene? Opo u mone omaetepo amwe, dana OKAVIDIO, ndele tamu kundafana omapulo taa shikula.

OKAVIDIO: Xwepopaleka ekonakono loye lopaumwene (5:22)

• Omaetepo amwe elipi, oo a popiwa mokavidio, wa hala okutula moilonga?

• Oikundafanwa ilipi wa hala okukonakona?

5. Litulila po omalalakano opamhepo

Ngeenge owe litulile po omalalakano, eshi to longele Jehova, otashi ke ku kwafela u ninge exumokomesho. Dana OKAVIDIO, ndele tamu kundafana epulo tali shikula.

OKAVIDIO: Onghedi ya denga mbada yokukalamwenyo (3:31)

• Ngaashi sha ulikwa mokavidio, ongahelipi Cameron a mona ouwa, eshi e litulila po omalalakano opamhepo?

Hakeshe umwe ta dulu okutembuka a ka udifile koshilongo shimwe shi lili. Ndele nande ongaho, atusheni ohatu dulu okulitulila po omalalakano onhumba, oo hatu dulu okuhanga. Lesha Omayeletumbulo 21:5, ndele tamu konakona kutya omalalakano elipi wa hala okulitulila po . . .

• meongalo.

• nosho yo ngeenge tashi uya poilonga yokuudifa.

Ongahelipi efinamhango olo li li movelishe oyo tali dulu oku ku kwafela u hange omalalakano oye?

Amwe omomalalakano oo to dulu okulitulila po

• Xwepopaleka ongushu yomailikano oye.

• Lesha Ombiibeli aishe.

• Shiiva ovanhu aveshe meongalo leni.

• Kala u na omukonakonimbiibeli.

• Kufa oukwafelikokolindjila, ile u ninge omukokolindjila wondjikilile.

• Ngeenge ou li omumwatate, litulila po elalakano lokuninga omuyakuliongalo.

ENGONGO

Twikila okupameka oukaume woye naJehova nokulitulila po omalalakano opamhepo. Opo nee oto dulu okuhafela onghalamwenyo fiyo alushe!

Eendululo

• Omolwashike to dulu okukala nelineekelo kutya Jehova ote ke ku kwafela, opo u mu longele noudiinini?

• Ongahelipi to dulu okupameka oukaume woye naJehova?

• Ongahelipi okulitulila po omalalakano opamhepo taku ku kwafele u ninge exumokomesho?

TALA OUYELELE WA WEDWA PO

Mbela oshilipipo Jehova a lenga neenghono: okuulika ashike oule wokafimbo kutya owe mu liyandjela, ile oku mu longela noudiinini onghalamwenyo yoye aishe?

Kala omudiinini ngaashi Abraham (9:20)

Nokuli nomupiya waJehova omudiinini ota dulu okukanifa ehafo. Tala kutya ongahelipi ta dulu oku li mona vali.

Mona ehafo mokukala ho konakona nokudilonga (5:25)

Ongahelipi to dulu okulitulila po omalalakano opamhepo noku a hanga?

“Litulila po omalalakano opamhepo, opo u fimanekife Omushiti woye” (Oshungonangelo, 15 Juli 2004)

Omolwashike sha fimana okukala Omukriste a pyokoka, nongahelipi to dulu okuninga ngaho?

“Lalakanena oukulunhu wopamhepo molwaashi ‘efiku linene laJehova oli li popepi’” (Oshungonangelo, 1 Mei 2009)