“Twikileni okulipulapula nghee mwa tya”

“Twikileni okuliyeleka ngeenge omu li meitavelo, twikileni okulipulapula nghee mwa tya.”—2 OVAKORINTO 13:5, NW.

1, 2. (a) Ongahelipi okukala nomalimbililo shi na sha neitavelo letu taku dulu oku tu kuma? (b) Onghalo ilipi ya li po muKorinto shomefelemudo lotete oyo tashi dulika ya li ya ningifa vamwe va kale ve he shii ondjila oyo ve na okweenda nayo?

OMULUMENHU oo a li ta ende koitukulwa yokomikunda okwe uya pomatukukilo eendjila. Molwaashi ka li e shii kutya ondjila ilipi tai mu twala oko a yuka, okwa pula ovanhu ovo va li tava ende po ve mu pukulule, ndele omauyelele oo a pewa kaa li taa tu kumwe. Molwaashi okwa li a lyalyakana, ka li ta dulu okutwikila nondjila. Okukala nomalimbililo shi na sha neitavelo letu otaku dulu okukala ku na oidjemo ya faafana. Omalimbililo a tya ngaho otaa dulu okuya moshipala okudula kwetu okuninga omatokolo, sha hala okutya, taku tu ningifa tu kale tu he na oushili shi na sha nondjila oyo tu na okweenda nayo.

² Opa li onghalo oyo kwa li tai dulu okukuma vamwe monghedi ya tya ngaho, meongalo lopaKriste lomefelemudo lotete, muKorinto shomuGreka. ‘Ovayapostoli vanene’ ova li tava kembaula okukala omuyapostoli kwaPaulus, tava ti: “Eenhumwafo daye, vati, odi neenghono noda pama, ndelenee okuholoka kwaye kwopalutu okwa nyika oungone nokupopya kwaye kaku noshilonga.” (2 Ovakorinto 10:7-12; 11:5, 6) Etaleko la tya ngaho otashi dulika la li la ningifa vamwe meongalo laKorinto va kale ve he shii nhumbi ve na okweenda.

3, 4. Omolwashike omakumaido oo Paulus a li a yandja kOvakorinto mahokwifa kufye?

³ Paulus okwa li a tota po eongalo lomuKorinto pefimbo letalelepo laye mo 50 O.P. Okwa kala muKorinto “odula imwe neehani 6, ta longo mokati kavo eendjovo daKalunga.” Doshili, “[Ovakorinto] vahapu vomuava va li tava pwilikine ova itavela, ndele va [ninginifwa, NW].” (Oilonga 18:5-11) Paulus okwa li unene e na ko nasha nonghalonawa yopamhepo yovaitaveli vakwao muKorinto. Kakele kaasho, Ovakorinto ova li va shangela Paulus tava pula omayele omolwoinima yonhumba. (1 Ovakorinto 7:1) Nokwe va pa omakumaido mawa.

⁴ Paulus okwa shanga a ti: “Twikileni okuliyeleka ngeenge mu li meitavelo, twikileni okulipulapula nghee mwa tya.” (2 Ovakorinto 13:5, NW) Okudulika komayele oo okwa li taku ka amena ovamwatate venya vomuKorinto va ha kale nomalimbililo shi na sha nondjila oyo ve na okweenda nayo. Omayele oo otaa dulu yo oku tu amena kunena. Ndele ongahelipi hatu dulu okutula moilonga omayele aPaulus? Ongahelipi hatu dulu okuliyeleka ngeenge otu li ngoo meitavelo? Noshike sha kwatelwa mokulipulapula nghee twa tya?

‘Twikileni okuliyeleka ngeenge omu li meitavelo’

5, 6. Oshiyelekifo shilipi tu na shokuliyeleka ngeenge otu li ngoo meitavelo, nomolwashike shi li oshiyelekifo tashi wapalele ku he na vali?

⁵ Mekonakono, ope na okukala alushe osho tashi konakonwa nosho yo ekanghameno oko ekonakono le likolelela ile oshiyelekifo osho tashi yelekifwa. Shi na sha nekonakono eli tali popiwa moshitukulwa eshi, osho tashi konakonwa kashi fi eitavelo —  omahongo oo twa itavela  — ndelenee ofye pauhandimwe. Opo ekonakono li ningwe, otu na oshiyelekifo tashi wapalele. Eimbilo limwe olo la totwa komupsalme David otali ti: “Omhango yOmwene oya wanenena, yo ohai hekeleke omwenyo; ehepaululo lOmwene oli [shii] okulineekelwa shili, olo hali nongopaleke omalai. Omalombwelo Omwene okwa yuka, taa hafifa omutima; omhango yOmwene oi yela sheke, tai minikile omesho.” (Epsalme 19:8, 9) Ombibeli oi na eemhango daJehova da wanenena nomalombwelo aye a yuka, omahepaululo aye e shii okulineekelwa nosho yo omhango iyela sheke. Etumwalaka lOmbibeli oli li oshiyelekifo tashi wapalele ku he na vali.

⁶ Shi na sha netumwalaka olo la nwefwa mo kuKalunga, omuyapostoli Paulus okwa ti: “Ondjovo yaKalunga oi nomwenyo neenghono, noi neememo i dule eongamukonda leememo keembinga mbali, otai tu, ndele tai tongola omwenyo nomhepo, eengolo nomungo; ndele i shii kutokola omadilongo nomadiladilo omutima.” (Ovaheberi 4:12) Doshili, eendjovo daKalunga otadi dulu okukonakona omutima wetu —  osho tu li shili meni. Ongahelipi hatu dulu okutula moilonga pauhandimwe etumwalaka olo li na eememo noli na eenghono? Omupsalme okwa yelifa nawa nghee hatu dulu okutula moilonga eendjovo daKalunga di konakone omitima detu. Okwa imba a ti: “Omulumenhu omunelao ou, . . . ha hokwa omhango yOmwene noku i diladila omutenya noufiku.” (Epsalme 1:1, 2) “Omhango yOmwene” otai hangika mEendjovo daKalunga da shangwa, Ombibeli. Otu na okukala twa hokwa okulesha Eendjovo daJehova. Doshili, otu na okulitulila po efimbo tu di leshe nondaka yopedu, sha hala okutya, oku di dilonga. Eshi hatu shi ningi, otu na okweefa osho sha shangwa mo shi tu konakone.

7. Onghedi ya fimanenena yokuliyeleka ngeenge otu li ngoo meitavelo oilipi?

⁷ Onghee hano, onghedi ya fimanenena yokuliyeleka ngeenge ou li ngoo meitavelo oyo okulesha nokudilonga Eendjovo daKalunga nosho yo okulikonakona ngeenge elihumbato loye oli li tuu filufilu metwokumwe naasho to lihongo. Ohatu dulu okukala twa hafa molwaashi otu na ekwafo linene oku tu kwafela tu ude ko Eendjovo daKalunga.

8. Ongahelipi oishangomwa ‘yomupiya omudiinini nomunaendunge’ tai dulu oku tu kwafela tu liyeleke ngeenge otu li ngoo meitavelo?

⁸ Jehova okwe tu pa ehongo okupitila moishangomwa oyo hai yandjwa ‘komupiya omudiinini nomunaendunge,’ oyo tai yelifa Omishangwa. (Mateus 24:45) Pashihopaenenwa, diladila koshimhungu shi na oshipalanyole “Omapulo okudilongwa,” osho shi li kexulilo lomatukulwa mahapu embo Draw Close to Jehovah.a Omapulo oo itaa yandje tuu omhito iwa nokudilonga pauhandimwe! Oinima ihapu oyo ya kundafanwa moifo yetu, Oshungonangelo no-Awake!, ohai tu kwafele yo tu liyeleke ngeenge otu li ngoo meitavelo. Shi na sha noitukulwa oyo tai kundafana embo lOmayeletumbulo oyo hai holoka paife moifo yOshungonangelo (mOshiingilisha), omukainhu umwe Omukriste okwa ti: “Oitukulwa oyo ohai kwafele nge neenghono. Ohai kwafele nge ndi konakone ngeenge okupopya kwange, elihumbato lange nosho yo oikala yange oi li ngoo shili metwokumwe nomifikamhango daJehova douyuki.”

9, 10. Omafiloshisho aJehova elipi hae tu kwafele tu liyeleke ngeenge otu li ngoo meitavelo?

⁹ Ohatu mono yo ehongo netwomukumo lihapu pokwoongala kweongalo nosho yo poyoongalele inini naai ya kula. Oo oku li amwe omomafiloshisho opamhepo oo Kalunga a pa ovo Jesaja a xunganeka shi na sha navo, a ti: “Pomaxulilo omafiku omhunda yongulu yOmwene otai ka kala ya pamenena, koxulo yeemhunda adishe, ndele otaku tondokele oiwana aishe. Noiwana ihapu oko tai ka ya, ndee tai ti: Ileni tu ka londeni komhunda yOmwene, . . . opo e tu longe eendjila daye, fye tu shiive okweenda momalila aye.” (Jesaja 2:2, 3) Oshi li shili enangeko noupuna okukala tu na ehongo la tya ngaho li na sha neendjila daJehova.

¹⁰ Onghedi imwe omo hatu dulu okulikonakona, omokudiladila kunghee hatu linyenge komayele aavo va pyokoka pamhepo, mwa kwatelwa ovakulunhuongalo Ovakriste. Shi na sha navo, Ombibeli otai ti: “Ovamwatate, omunhu ngenge ta hangika a nyona, opo nee onye ava vopamhepo mu pukululeni nomhepo yonheni, ove u lungame naave yo u ha hongaulwe.” (Ovagalati 6:1) Inatu hafa tuu eshi tu na efiloshisho olo li lile po oku tu kwafelwa tu ninge omalunduluko!

11. Okuliyeleka ngeenge otu li ngoo meitavelo otaku pula shike?

¹¹ Oishangomwa yetu, okwoongala kwetu kwopaKriste nosho yo ovalumenhu ovo va nangekwa po —  aishe oyo oi li omafiloshisho mawa a dja kuJehova. Ndelenee okuliyeleka ngeenge otu li ngoo meitavelo otashi pula okulikonakona mwene. Onghee hano, ngeenge hatu lesha oishangomwa yetu ile hatu pwilikine komakumaido opamishangwa, otwa pumbwa okulipula kutya: ‘Mbela eshi otashi popi kombinga yange? Mbela ohandi shi ningi ngoo? Mbela ohandi dulika komahongo aeshe opaKriste?’ Oikala yetu i na sha nouyelele oo hatu mono okupitila momafiloshisho oo ohai nwefa mo yo onghalo yetu yopamhepo. Ombibeli otai ti: “Omunhu wopashitwe iha tambula osho shOmhepo yaKalunga, osheshi ohe shi tale oulai . . . Ndele omunhu [wopamhepo] oye ta koneke aishe.” (1 Ovakorinto 2:14, 15) Mbela katu na okukendabala okukala netaleko liwa lopamhepo li na sha naasho hatu lesha momambo etu, moifo yetu nomoishangomwa yetu ikwao nosho yo shi na sha naasho hatu udu pokwoongala kwetu nokovakulunhuongalo?

“Twikileni okulipulapula nghee mwa tya”

12. Okulipulapula kutya otwa tya ngahelipi okwa kwatela mo shike?

¹² Okulipulapula kutya otwa tya ngahelipi osha kwatela mo okulikonakona. Heeno, ohatu dulu okukala tu li moshili, ndele mbela oupamhepo wetu ou li ngahelipi? Okulipulapula kutya otwa tya ngahelipi okwa kwatela mo okuyandja oumbangi kutya otwa pyokoka nosho yo okukala nolupandu lashili li na sha nomafiloshisho opamhepo.

13. PaVaheberi 5:14, oshike tashi ka ulika kutya otwa pyokoka?

¹³ Ongahelipi hatu dulu okumona pauhandimwe kutya otu li Ovakriste va pyokoka? Omuyapostoli Paulus okwa shanga a ti: “Eendya da pama odaava va kula, ava [eenghono davo dokukoneka da deulwa moku di longifa, NW] okutongola ouwa nowii.” (Ovaheberi 5:14) Ohatu ulike kutya otwa pyokoka mokudeula eenghono detu dokukoneka. Ngaashi ashike eenhumba donhumba domolutu lomulotoki momaudano da pumbwa okudeulwa lwoikando fimbo ina ninga omulotoki muwa, eenghono detu dokukoneka oda pumbwa okudeulwa moku di longifa mokutula moilonga omafinamhango Ombibeli.

14, 15. Omolwashike tu na okuninga eenghendabala da mana mo opo tu konakone oinima yomoule yEendjovo daKalunga?

¹⁴ Ndele omanga inatu deula eenghono detu dokukoneka, otu na okukala tu na eshiivo. Opo tu di deule, otwa pumbwa okukonakona paumwene noukeka. Ngeenge hatu ningi alushe ekonakono lopaumwene —  naunene tuu shi na sha noinima yomoule yEendjovo daKalunga  — eenghono detu dokukoneka ohadi xwepopala. Momukokomoko womido da pita, oinima ihapu yomoule oya kala nokukundafanwa mOshungonangelo. Ohatu linyenge ngahelipi ngeenge hatu lesha oitukulwa oyo tai kundafana oshili yomoule? Mbela ohatu kala twa hala oku i henuka molwaashi oi na “oinima imwe idjuu”? (2 Petrus 3:16, OB-1986) Ponhele yaasho, ohatu ningi eenghendabala da wedwa po opo tu ude ko osho tashi popiwa. —  Ovaefeso 3:18.

¹⁵ Ongahelipi nee ngeenge ohatu mono okuninga ekonakono lopaumwene kudjuu? Osha fimanenena tu kendabale okulihonga tu kale hatu li hafele.this was missingb (1 Petrus 2:2) Opo tu pyokoke otwa pumbwa tu kale hatu lipalula neendja da pama, eeshili domoule dEendjovo daKalunga. Ngeenge itatu ningi ngaho, eenghono detu dokukoneka otadi ka kala da ngabekwa. Ndelenee okuyandja oumbangi kutya otwa pyokoka okwa kwatela mo shihapu shi he fi ashike okukala neenghono dokukoneka. Monghalamwenyo yetu yakeshe efiku, otu na okutula moilonga eshiivo olo hatu mono okupitila mokukonakona noukeka paumwene.

16, 17. Ekumaido lilipi omuhongwa Jakob a yandja shi na sha nokukala “ovawanifi veendjovo”?

¹⁶ Oumbangi kutya otwa tya ngahelipi otau limonikila yo mokuulika kwetu olupandu li na sha noshili, sha hala okutya, okupitila moilonga yetu yeitavelo. Omuhongwa Jakob okwa longifa efaneko li na eenghono mokuyelifa nghee tu na okulikonakona moshinima osho, a ti: “Kaleni hano ovawanifi veendjovo, havapwilikini vongaho nokulifufya nye vene. Osheshi umwe ngenge omupwilikini weendjovo ndele hamuwanifi wado, okwa fa omulumenhu ta tale oshipala shaye mokatengelelo; ye ote litale, ndee ta di po, ndee te lidimbwa diva nhumbi ye a tya. Ndelenee ou ta tale nokukonakona momhango ei ya wana yemanguluko ndee ta kala mo, ye e he fi omupwilikini ha dimbwa, ndelenee omuwanifi shili, oye ta kala omunelao mokulonga kwaye.” —  Jakob 1:22-25.

¹⁷ Jakob okwa hala okutya: ‘Litalela mokatengelelo keendjovo daKalunga, ndele to likonakona. Twikila oku shi ninga, nokulikonakona she likolelela kwaasho wa mona meendjovo daKalunga. Ndele ino dimbwa diva osho wa mona. Ninga omalunduluko oo a pumbiwa.’ Okulandula omayele oo otaku dulu okukala eshongo omafimbo amwe.

18. Omolwashike okulandula omayele aJakob ku li eshongo?

¹⁸ Pashihopaenenwa, diladila oshinakuwanifwa shokukufa ombinga moilonga yokuudifa Ouhamba. Paulus okwa shanga a ti: “Okwiitavela nomutima otaku yukipalifa, nokuhepaulula nokanya otaku xupifa.” (Ovaroma 10:10) Okuhepaulula nokanya ketu otaku pula okuninga omalunduluko mahapu. Okukufa ombinga moilonga yokuudifa kashi fi oshinima shipu kuvahapu vomufye. Okukala ovaladi moilonga yokuudifa noku i tala ko ya fimanenena monghalamwenyo yetu otaku tu pula yo vali tu ninge omalunduluko nomaliyambo mahapu. (Mateus 6:33) Ndelenee ngeenge otwa kala hatu wanifa po oilonga oyo twa pewa kuKalunga, ohatu kala twa hafa molwaashi otai fimanekifa Jehova. Mbela otu li ovaudifi vOuhamba ovaladi?

19. Oilonga yetu yeitavelo oi na okukala ya kwatela mo shike?

¹⁹ Oilonga yetu yeitavelo oi na okukala ya kwatela mo shike? Paulus okwa ti: “Naai mwe i lilonga nomwe i tambula nomwe i uda nomwe i mona muame, i ningeni, Kalunga kombili nota ka kala pamwe nanye.” (Ovafilippi 4:9) Oumbangi kutya otwa tya ngahelipi ohau limonikila ngeenge hatu tula moilonga osho twe lihonga, twa tambula ko, twa uda notwa mona —  aishe oyo ya kwatelwa meliyapulo lopaKriste nokukala omuhongwa. Jehova ote tu lombwele okupitila momuprofeti Jesaja ta ti: “Apa ondjila, ei mu nokweenda nayo!” —  Jesaja 30:21.

20. Ovanhu voludi lilipi ve li enangeko noupuna keongalo?

²⁰ Ovalumenhu novakainhu ovo ve li ovakonakoni ovanekeka vEendjovo daKalunga, ve li ovaudifi ovaladi vonghundana iwa, ve li ovakanyateli voudiinini nove li ovayambididi vOuhamba ovadiinini, ove li enangeko noupuna linene komaongalo avo. Okukala po kwavo ohaku kwafele okupameka eongalo olo hava endafana nalo. Ove li ekwafo linene, naunene tuu molwaashi ope na vahapu vape ovo ve na okufilwa oshisho. Ngeenge hatu kaleke momadiladilo omayele aPaulus ‘okutwikila okuliyeleka ngeenge otu li meitavelo, nokutwikila okulipulapula nghee twa tya,’ nafye ohatu ka kala yo enwefemo liwa kuvakwetu.

Hafela okulonga ehalo laKalunga

21, 22. Ongahelipi hatu dulu okuhafela okulonga ehalo laKalunga?

²¹ Ohamba David yaIsrael shonale oya imba ya ti: “Kalunga kange, okuwanifa ehalo loye, osho otashi nyakula nge, nomhango yoye oyo ya nyolelwa moule womwenyo wange.” (Epsalme 40:9) David okwa li a hafela okulonga ehalo laKalunga. Omolwashike mbela? Omolwaashi omhango yaJehova oya li momutima waye. Okwa li e shii ondjila oyo e na okweenda nayo.

²² Ngeenge omhango yaKalunga oya shangelwa moule weemwenyo detu, ohatu kala tu shii ondjila oyo tu na okweenda nayo. Ohatu hafele okulonga ehalo laKalunga. Onghee hano, natu “kondjeni” neenghono adishe eshi hatu longele Jehova tashi di komutima.— Lukas 13:24.

[Omashangelo opedu]

Oto dimbuluka?

• Ongahelipi hatu dulu okuliyeleka ngeenge otu li ngoo meitavelo?

• Oshike sha kwatelwa mokulipulapula nghee twa tya?

• Ongahelipi hatu dulu okuulika kutya otu li Ovakriste va pyokoka?

• Oilonga yetu yeitavelo ohai tu kwafele ngahelipi tu mone nghee twa tya?

[Efano pepandja 9]

Ou shii onghedi ya fimanenena yokuliyeleka ngeenge ou li ngoo meitavelo?

[Efano pepandja 10]

Ohatu ulike kutya otu li Ovakriste va pyokoka mokulongifa eenghono detu dokukoneka

[Efano pepandja 11]

Ohatu ulike kutya otwa tya ngahelipi mokukala tu he li ‘ovapwilikini ovadimbwanhu, ndele ovawanifi veendjovo’