Ovayakuliongalo ohava longo oilonga ya fimana

OMUYAPOSTOLI Paulus okwa li a shangela eongalo lOmufilippi, a ti: “Paulus naTimoteus, ovapiya vaKristus okovayapuki aveshe muKristus Jesus, ovo ve li muFilippi nokovafita nokovayakuliongalo.” (Fil. 1:1) Didilika kutya mepopifo olo omwa kwatelwa yo ovayakuliongalo. Ovalumenhu ovo ova li hava dana onghandangala ya fimana mokukwafela ovakulunhuongalo meongalo monakudiwa. Nokunena ohava ningi sha faafana. Ovayakuliongalo ohava longo oilonga oyo hai kwafele ovapashukili nopo eongalo li kale melandulafano.

² Mbela ou shii kutya oolyelye ve li ovayakuliongalo meongalo leni? Mbela ou shii oilonga oyo hava longo omolwouwa woye noweongalo alishe? Jehova oha pandula eenghendabala dovalumenhu va tya ngaho. Paulus okwa shanga a ti: “Ava tava yakula nawa, ovo tave limonene oulineekelwa muwa nouladi uhapu meitavelo lomuKristus Jesus.” — 1 Tim. 3:13.

OITEELELWA YOPAMISHANGWA YOVAYAKULIONGALO

³ Ovayakuliongalo ova teelelika va kale nonghalamwenyo yopaKriste ya koshoka, nova kale hava wanifa po oinakuwanifwa yavo noukeka. Osho ohatu ke shi uda ko noupu ngeenge otwa konakona osho omuyapostoli Paulus a popya kombinga yoiteelelwa yavo monhumwafo oyo a li a shangela Timoteus a ti: “Ovayakuliongalo nava kale ve neenghedi da fimana vehe neendaka mbali, havapika voikolwifa, havakongi veliko loulunde, ndelenee ovayakuliongalo ovadiinini voshiholekwa sheitavelo meliudo la koshoka. Ndele naava yo nava talwe tete, nongeenge va monika vehe noshipo, opo nee tava shiiva okuyakula. Ovayakuliongalo ve nokukala ovalumenhu vomukainhu umwe auke, ve shii okutekula nawa ovana nomaumbo avo vene.” (1 Tim. 3:8-10, 12) Okulandula omifikamhango odo da kwata moiti, odo da tulilwa po ovayakuliongalo, ohaku amene eongalo liha popilwe mowii shi na sha noinakuwanifwa ye likalekelwa oyo ve lineekelelwa.

⁴ Ovayakuliongalo ohava kala ve lipyakidila moukalele omwedi keshe, kutya nee ovanyasha ile ovanamido. Ohava hopaenene Jesus mokukala hava longo nouladi moukalele. Omolwouladi wa tya ngaho, ohava ulike kutya Jehova okwa halelela okuxupifa ovanhu. — Jes. 9:7.

⁵ Ovalumenhu ovo hava longo ve li ovayakuliongalo ove li yo oshihopaenenwa shiwa mokudjala nokuliwapeka, mokupopya, moikala nomelihumbato lavo. Ova koshoka paenghedi, naasho ohashi va ningifa va kale va fimanekwa kuvamwe. Shikwao vali, ova lenga neenghono ekwatafano lavo naJehova nomaufembanghenda avo oilonga meongalo. — Tit. 2:2, 6-8.

⁶ Ovalumenhu ovo ohava ‘talwa tete’ fimbo inava nangekwa po. Ove na okuulika kutya ohava longele Jehova noudiinini. Ove na okuulika kutya ova pitifa komesho oinima yOuhamba monghalamwenyo yavo notava lalakanene omaufembanghenda oilonga keshe oo e va yeulukila. Ove li shili oshihopaenenwa shiwa kuvamwe meongalo. — 1 Tim. 3:10.

OHAVA LONGO NGAHELIPI?

⁷ Ovayakuliongalo ohava longo oilonga ya yoolokafana opo va yakule ovamwaxe novamwaina, naasho ohashi kwafele ovapashukili va longife efimbo lihapu mokuhonga nokuninga omatalelepo oufita. Ngeenge olutu lovakulunhuongalo tali va pe oinakuwanifwa, ohali tale kokudula kwavo pauhandimwe nokeemhumbwe deongalo.

⁸ Diladila ashike koilonga imwe yomwaayo: Omuyakuliongalo umwe otashi dulika a nangekwe po a kale ta ungaunga noileshomwa opo tu dule okukala hatu i mono noku i longifa moukalele. Vamwe ohava nangekwa po opo va ungaunge nomavalulo oimaliwa yeongalo ile oitukulwa meongalo. Vamwe ova nangekwa po va ungaunge noikwamambako, va yakule ovanhu nokukwafela ovakulunhuongalo meenghedi dimwe vali. Ope na oilonga ihapu ya pumbwa okulongwa opo Olupale lOuhamba li kalekwe monghalo iwa nola yela, onghee ovayakuliongalo ohava pulwa opo va kwafele mokuwanifa po oinakuwanifwa oyo.

⁹ Momaongalo amwe, otashi dulika omuyakuliongalo keshe a pewe oshinakuwanifwa shimwe shomwaayo. Momaongalo amwe vali, omuyakuliongalo umwe otashi dulika a ungaunge noinakuwanifwa ihapu. Natango momaongalo amwe, ovayakuliongalo ve dulife puumwe otashi dulika va kale tava ungaunga noshinakuwanifwa shonhumba sha faafana. Ngeenge kape na ovayakuliongalo va wana okuungaunga noinakuwanifwa imwe yo mwaayo, olutu lovakulunhuongalo otali dulu okupula ovamwatate vamwe ovo va ninginifwa nove li oshihopaenenwa shiwa va longe po oilonga oyo. Kungaho, otava ka mona owino oo tava ka pumbwa ngeenge ova ka kala va wana okunangekwa po ve li ovayakuliongalo. Ngeenge kape na ovamwatate, otaku dulu okupulwa omumwameme oo e li oshihopaenenwa shiwa a kwafele moinima imwe, nonande ke na okunangekwa po nandenande e li omuyakuliongalo. Omunhu oo e li oshihopaenenwa shiwa oyoo e na elihumbato liwa noha longele Kalunga monghedi i shii okuhopaenenwa. Oku na okukala e li oshihopaenenwa shiwa kuvamwe ngeenge tashi uya pokukala pokwoongala, okuya moukalele, onghalo youkwaneumbo wavo, ehoololo lomalihafifo, okudjala nokuliwapeka kwaye nosho tuu.

¹⁰ Momaongalo omo mu na ovakulunhuongalo vanini, ovayakuliongalo ovo tava dulu otashi dulika va pulwe va pule vamwe omapulo eninginifo e na sha nomahongo Ombiibeli. Omahongo oo otaa hangwa mOshiwedelwako “Oshitukulwa 1: Osho Ovakriste va itavela.” Molwaashi “Oshitukulwa 2: Onghalamwenyo yOvakriste” osha kwatela mo oinima yopaumwene, oshi na okupulwa komukulunhuongalo.

¹¹ Ngeenge ope na etomheno li shii okuudiwako, olutu lovakulunhuongalo otashi dulika li mone shiwa okulundulula oinakuwanifwa yovayakuliongalo efimbo nefimbo. Ashike oshiwa ovamwatate va kale hava ungaunga noinakuwanifwa ya faafana oule wefimbo lonhumba opo va mone owino nounghulungu.

¹² She likolelela keenghalo domoshitukulwa, otashi dulika pa kale oinakuwanifwa imwe vali oyo tai dulu okupewa ovayakuliongalo ovo exumokomesho lavo ‘li wetike kwaaveshe.’ (1 Tim. 4:15) Ngeenge kape na ovakulunhuongalo va wana, omuyakuliongalo ota dulu okupulwa a longe e li omukwafeli womupashukili wongudu, ile peemhito dimwe e li omuyakuli wongudu, ta longo koshi yewiliko lovakulunhuongalo. Ovayakuliongalo otashi dulika va pulwe va ungaunge noitukulwa imwe yokwoongala kwOnghalamwenyo yopaKriste noilonga yokuudifa, mwa kwatelwa Ekonakonombiibeli lEongalo ngeenge osha pumbiwa, nokuyandja oipopiwa yomoipafi. Ovayakuliongalo otava dulu okupewa omaufembanghenda makwao vali apa sha pumbiwa ngeenge ova wanifa po oiteelelwa yokupewa oinakuwanifwa oyo. (1 Pet. 4:10) Ovayakuliongalo ohava kwafele ovakulunhuongalo nehalo liwa.

¹³ Nonande oilonga yavo oya yooloka ko kwaayo yovakulunhuongalo, aishe oiyapuki kuKalunga notai kwafele eongalo li kale tali shi endifa nawa. Mokweendela ko kwefimbo, ngeenge ovayakuliongalo ohava wanifa po nawa oinakuwanifwa yavo ndele tava kala va wana okulonga ve li ovafita novahongi, otashi dulika va nangekwe po ve li ovakulunhuongalo.

¹⁴ Ngeenge ou li omumwatate womido omulongo nasha ile opo wa ninginifwa, mbela oto ningi ngoo eenghendabala u kale wa wana okuninga omuyakuliongalo? (1 Tim. 3:1) Molwaashi ovanhu vahapu otave uya moshili keshe odula, opa pumbiwa ovalumenhu va pyokoka pamhepo va pashukile nokufila oshisho omaongalo. Oto dulu oku shi ninga elalakano loye mokukala ho kwafele vamwe nehalo liwa. Onghedi imwe omo to dulu oku shi ninga omokudilonga koshihopaenenwa shiwa shaJesus. (Mat. 20:28; Joh. 4:6, 7; 13:4, 5) Ehalo loye otali ka kula eshi to ende to mono ehafo olo hali di mokuyandja kuvamwe. (Oil. 20:35) Onghee hano, kala ho liyambe opo u kwafele vamwe, ho kwafele okukaleka Olupale lOuhamba monghalo iwa, ile ho liyambe okuyandja oipopiwa pokwoongala kwOnghalamwenyo yopaKriste noilonga yokuudifa. Okulalakanena oinakuwanifwa okwa kwatela mo yo okukulika omaukwatya opamhepo okupitila mekonakono lopaumwene londjikilile. (Eps. 1:1, 2; Gal. 5:22) Shikwao vali, omumwatate oo a hala okulonga shihapu oha ulike kutya oku shii okulineekelwa nomudiinini ngeenge a pewa oinakuwanifwa meongalo. — 1 Kor. 4:2.

¹⁵ Ovayakuliongalo ohava nangekwa po komhepo iyapuki omolwouwa weongalo. Eongalo otali dulu okuulika olupandu lalo omolwoilonga youdiinini yovayakuliongalo mokulongela kumwe navo eshi tava wanifa po oinakuwanifwa yavo. Kungaho, eongalo otali ulike olupandu omolwefiloshisho laJehova eshi ta kaleke po elandulafano meongalo. — Gal. 6:10.