Okuyelifa omishangwa mondjila

NGEENGE hatu hongo vamwe, otwa pumbwa okuninga shihapu she fi ashike oku va leshela eevelishe okudja mOmbibeli. Omuyapostoli Paulus okwa li a shangela omulongi pamwe naye, Timoteus, a ti: “Diinina, u monike kuKalunga oove omufindani [momayeleko], omulongi ita fi ohoni oshilonga shaye, e shii [okulongifa nawa eendjovo doshili, NW].” — 2 Tim. 2:15.

Opo tu ninge ngaho, eyelifo letu lomishangwa oli na okukala metwokumwe naasho Ombibeli tai hongo. Osho otashi ti kutya otu na okukaleka momadiladilo oshikalimo shetukulwa ile embo omo mwa dja omushangwa, ponhele ashike yokuhoolola mo omautumbulilo oo twa hokwa nokuyelifa oinima she likolelela komataleko etu. Jehova okwa li a longifa omuprofeti Jeremia a londwele ovaprofeti ovo va li tava ti kutya ohava popi medina laYe, ndele ova li tava popi “omamoniko omitima davo vene.” (Jer. 23:16) Omuyapostoli Paulus okwa li a londwela Ovakriste vaha lumbakanife Eendjovo daKalunga nomaufilosofi ovanhu eshi a ti kutya “twa efa oinima aishe yohoni yomeholeko, ndele fye ihatu ende nekoto, ihatu endameke [“haula,” NW] eendjovo daKalunga.” Monale, ovashingifi vomaviinyu ovakengeleledi ova li hava haula omaviinyu opo va kale ve na shihapu okulandifa va mone oimaliwa ihapu. Ihatu haula Eendjovo daKalunga moku di lumbakanifa nomaufilosofi ovanhu. Paulus okwa ti: “Inatu fa venya vahapu hava shingifa eendjovo daKalunga, ndelenee onomadiladilo a yela, ngaashi ava hava longifwa kuKalunga, omoipafi yaKalunga ohatu popi muKristus.” — 2 Kor. 2:17; 4:2.

Omafimbo amwe, otashi dulika u tofe mo omushangwa wonhumba opo u divilike efinamhango lonhumba. Ombibeli oi yadi omafinamhango oo taa dulu oku tu wilika opo tu ungaunge nomupondo neenghalo di lili noku lili. (2 Tim. 3:16, 17) Ndele ou na okushilipaleka kutya etulomoilonga loye li na sha nomushangwa wonhumba oli li mondjila noito longifa nai omushangwa oo, to yandje omadiladilo oye mwene. (Eps. 91:11, 12; Mat. 4:5, 6) Eyelifo loye oli na okukala metwokumwe nelalakano laJehova, sha hala okutya, li li metwokumwe nOmbibeli aishe.

“Okulongifa nawa eendjovo doshili” okwa kwatela mo yo okuuda ko osho Ombibeli tai hongo. Ombibeli kai fi oshilongifo shokukembaula vamwe ile oku va ula nai. Ovahongi vomalongelokalunga ovo va li hava pataneke Jesus Kristus ova li hava tofa mOmishangwa, ndele ova li have lipwililikile oinenenima yomomhango yaKalunga, oyo ya kwatela mo okulonga ouyuki, okukala nonghenda nosho yo oudiinini. (Mat. 22:23, 24; 23:23, 24) Jesus okwa li ha hopaenene omaukwatya aXe ngeenge ta hongo ovanhu. Jesus okwa li e na ouladi wokuhonga oshili, nokwa li e hole neenghono ovanhu ovo a li ha hongo. Otu na oku mu hopaenena moshinima osho. — Mat. 11:28.

Mbela ongahelipi hatu dulu okushilipaleka kutya ohatu yelifa mondjila omishangwa? Otwa pumbwa okukala hatu lesha Ombibeli pandjikilile. Otu na yo okukala nolupandu omolweendja dopamhepo odo Jehova ha yandje kovalongelikalunga vashili okupitila ‘momupiya omudiinini nomunaendunge,’ ongudu yOvakriste ovavaekwa. (Mat. 24:45) Okukonakona paumwene, okukala pokwoongala kweongalo nokukufa ombinga muko otaku ke tu kwafela tu mone ouwa mehongo olo hatu pewa okupitila mongudu yomupiya omudiinini nomunaendunge.

Embo Reasoning From the Scriptures ile okambo Oipalanyole yeenghundafana dopaMbibeli otai dulu oku ku kwafela u mone nghee omishangwa dihapu tadi dulu okulongifwa mondjila moukalele. Ou na nee okukala u shii nawa nghee oishangomwa oyo tai dulu okulongifwa. Ngeenge oto diladila oku ka longifa omushangwa wonhumba ndele ku u udite ko lela, oukwatya welininipiko otau ke ku kwafela opo u konge ouyelele wa wedwa po, oo tau ke ku kwafela u longife nawa eendjovo doshili. — Omayel. 11:2.

Yelifa Omishangwa monghedi ya yela nawa. Ngeenge to hongo vamwe, shilipaleka kutya ove wete lela ekwatafano olo li li pokati komishangwa odo to longifa noshikundafanwa osho tamu kundafana. Ngeenge owa pula epulo, ove to shikulifa ko omushangwa, ovapwilikini nava kale ve shi liwetele nghee omushangwa oo tau yandje enyamukulo kepulo olo. Ngeenge oto longifa omushangwa wonhumba opo u yambidide osho to popi, shilipaleka kutya omukonakoni oku wete lela ekwatafano pokati komushangwa oo naasho to popi.

Inashi wana ashike okulesha omushangwa wonhumba nonande oto u lesha nomufindo. Dimbuluka kutya ovanhu ovo inava hongwa lela kave shii nawa Ombibeli notashi dulika itava ka uda ko osho wa hala okutya ngeenge owe va leshele ashike lumwe okudja mOmbibeli. Yukifa elitulemo koshitukulwa shomushangwa osho tashi yambidida oshitwa osho tamu kundafana nomunhu.

Osho osha hala okutya ou na okutongola mo oitya oyo ya fimanenena, oitya oyo ya pamba lela osho tashi kundafanwa. Onghedi ipu omo to dulu okuninga ngaho, okweendulula omautumbulilo oo taa yambidida oshikundafanwa shoye. Ngeenge to popi nomunhu wonhumba, oto dulu oku mu pula omapulo oo taa dulu oku mu kwafela a didilike oitya oyo ya fimanenena momishangwa. Ovapopi vamwe, ngeenge tava popi nongudu yovanhu, ove hole okulongifa eesinonime (oitya i na eityo la faafana ile omaityo e li li popepi) ile va endulule osho va popya opo va hange elalakano lavo. Ndele ngeenge owa hoolola okuninga ngaho, lungama uha ningife ovapwilikini va kale va lyalyakana novaha mone ekwatafano olo li li pokati kaasho to kundafana neendjovo odo di li momushangwa.

Oto ka dika po ekanghameno liwa ngeenge owa yoolola mo oitya oyo ya fimanenena. Okudja opo, yelifa nee omushangwa. Mbela owa ninga ngoo etwalemo li na sha nomushangwa oo olo tali ulike kutya omolwashike to u longifa? Ngeenge osho wa ningi ngaho, yelifila ovapwilikini voye nghee oitya oyo ya tongomana momushangwa ya pambafana noshikundafanwa sheni. Nonande eshi wa ninga etwalemo lomushangwa ino popya kondadalunde kutya omolwashike tamu ke u lesha, owa pumbwa oku u yelifa.

Ovafarisai ova li va pula Jesus epulo olo va li ve wete ta ka nyengwa oku li nyamukula, va ti: “Osha wapala tuu omulumenhu ta henge po omukainhu waye omolwondjovo keshe?” Jesus okwe va nyamukula ta tofa muGenesis 2:24. Didilika kutya Jesus okwa li a yukifa ashike elitulemo koshitukulwa shimwe shomushangwa oo, ndele ta yelifa eityo lasho. Okwa tomhafana navo kutya omulumenhu nomukainhu ngeenge va hombola ohava ningi “ombelela imwe.” Opo nee, okwa xulifa ta ti: “Hano osho Kalunga e shi tula kumwe, inashi kufwa kumwe komunhu.” — Mat. 19:3-6.

Mbela ou na okulongifa ouyelele u fike peni, opo u yelife mondjila omushangwa wonhumba? Ovapwilikini voye nosho yo efimano loshitwa osho tashi kundafanwa oyo tai ka ufa kutya ou na okuyandja ouyelele mu fike peni. Ashike oshiwa okuyandja ouyelele wa yela noupu okuudiwa ko.

Tomhafana okudja mOmishangwa. Oilonga 17:2, 3 otai tu lombwele kutya omuyapostoli Paulus okwa li ha ‘kundafana novanhu omishangwa,’ sha hala okutya okwa li ha tomhafana novanhu okudja mOmishangwa, eshi a li ta wanifa po oukalele waye muTessaloniki. Omupiya waJehova keshe oku na okukendabala okukulika ounghulungu wa tya ngaho. Pashihopaenenwa, Paulus okwa li a ulika kutya oiningwanima yomokukalamwenyo nosho yo yomoukalele waJesus oya li ya xunganekwa mOmishangwa dOshiheberi. Opo nee okwa xulifa etomhafano laye ta popi nomufindo ta ti: “Jesus tuu ou, handi mu udifile, Oye Kristus.”

Paulus okwa li a tofa luhapu mOmishangwa dOshiheberi eshi a li a shangela Ovaheberi onhumwafo. Opo a divilike ile a yelife oshitwa shonhumba, okwa li ha tongola mo oshitya shonhumba ile omautumbulilo onhumba e li pauxupi noku a yelifa. (Heb. 12:26, 27) Eshi a li ta shange etukulwa eti-3 lOvaheberi, okwa tofa okudja mEpsalme 95:7-11. Didilika kutya okwa li a yelifa oinima itatu oyo ya tumbulwa mepsalme olo: (1) omutima (Heb. 3:8-12) (2) eityo loutumbulilo ‘nena’ (Heb. 3:7, 13-15; 4:6-11) nosho yo (3) eityo loutumbulilo: “Ovo itava fiki metulumuko lange.” (Heb. 3:11, 18, 19; 4:1-11). Kendabala okuhopaenena oshihopaenenwa shaPaulus ngeenge to yelifa omushangwa keshe.

Didilika nghee Jesus a li a pondola okutomhafana okudja mOmishangwa mehokololo olo tali hangwa muLukas 10:25-37. Omunongo wOmhango umwe okwa li e mu pula a ti: “Omuhongi, ondi na okulonga shike ndi fyuulule omwenyo waalushe?” Fimbo Jesus ina nyamukula omulumenhu oo, okwa li tete e mu pula a popye etaleko laye, opo nee Jesus okwa li e mu lombwela nghee sha fimana okuninga osho Eendjovo daKalunga tadi ti. Eshi Jesus a mona kutya omulumenhu oo ke udite ko oshitwa, okwa tongola mo oshitya shimwe, “omukwetu,” okudja momushangwa ndele ta kundafana kombinga yasho oule wokafimbo. Ponhele ashike yoku shi fatulula, Jesus okwa li a longifa efaneko opo a kwafele omulumenhu oo e uye pexulifodiladilo li li mondjila kuye mwene.

Osha yela kutya Jesus ka li ashike ha tofa omishangwa odo tadi yandje omanyamukulo odikilila ngeenge a li ta nyamukula omapulo ovanhu. Okwa li ha konakona osho omishangwa tadi ti noku di longifa opo a nyamukule omapulo avamwe.

Eshi ovasadukai va li tave mu pula omapulo e na sha nenyumuko, Jesus okwa li a yukifa elitulemo koshitukulwa shimwe shokondadalunde shaExodus 3:6. Ina tofa mo ashike oshitukulwa shomushangwa oo ndele ta mwena, ndelenee okwa tomhafana navo pakanghameno lomushangwa oo opo a ulike filufilu kutya enyumuko oli li oshitukulwa shelalakano laKalunga. — Mark. 12:24-27.

Opo tu kale ovahongi ovanekeka, otwa pumbwa okukala tu shii okutomhafana pandunge okudja mOmishangwa.