Oto shikula ngoo Kristus pauyadi?

‘Eshi osho hamu ningi shito. Onghee shi ningeni mu dule shito.’ — 1 TES. 4:1, OB-1986.

1, 2. (a) Oikumwifilonga ilipi ovanhu vahapu va mona tai longwa pefimbo laJesus? (b) Omolwashike efimbo eli tu li mulo nalo lididilikwedi?

MBELA owe lipula ngoo nale kutya ngeno osha kala shihokwifa shi fike peni ngeno owa li po eshi Jesus a li kombada yedu? Otashi dulika u diladile ngeno wa velulwa kuJesus nokungaho ito ka kala to hepekwa kouyahame wonhumba palutu. Ile otashi dulika ngeno u kale wa hala okumona nokuuda Jesus ta popi, opo u dule okulihonga kuye ile oku mu mona ta longo oikumwifilonga. (Mark. 4:1, 2; Luk. 5:3-9; 9:11) Ngeno inashi kala tuu oufembanghenda munene okukala po pefimbo olo Jesus a li ta longo oilonga aishe oyo! (Luk. 19:37) Kape na vali epupi limwe la mona oiningwanima ya tya ngaho lihe fi olo la li po pefimbo laJesus, naasho Jesus a wanifa po kombada yedu ‘omolweliyandjo laye mwene ngeyambo’ itashi ka endululwa vali. — Heb. 9:26; Joh. 14:19.

² Efimbo eli tu li mulo nalo olididilikwedi. Omolwashike mbela? Omolwaashi paife otu li pefimbo olo la xunganekwa mOmishangwa kutya ‘efimbo lexulilo’ nosho yo ‘omafiku axuuninwa.’ (Dan. 12:1-4, 9; 2 Tim. 3:1) Satana okwa umbwa mo meulu pefimbo eli lexulilo. Mafiku, Satana ota ka mangwa noku ekelwa “mombwili.” (Eh. 12:7-9, 12; 20:1-3) Pefimbo eli lexulilo, otu na yo oufembanghenda munene wokuudifa ‘evangeli louhamba’ mounyuni aushe, hatu lombwele ovanhu kombinga yeteelelo lOparadisa oyo i li pokuuya, noshilonga sha tya ngaho itashi ka endululwa vali. — Mat. 24:14.

3. Okafimbo kaxupi fimbo Jesus ina londa keulu, okwa li a lombwela ovashikuli vaye va ninge shike, naasho osha li tashi ka kwatela mo shike?

³ Okafimbo kaxupi fimbo Jesus ina londa keulu, okwa li a lombwela ovashikuli vaye a ti: “Nye otamu pewa eenghono, Omhepo Iyapuki ngenge tai uya munye, ndee tamu ka ninga eendombwedi dange muJerusalem nomuJudea ashishe nomuSamaria nofiyo okominghulo dounyuni.” (Oil. 1:8) Oilonga oyo oya li tai ka kwatela mo oilonga yokuhonga ovanhu mounyuni aushe. Oshike sha li tashi ka kala elalakano loilonga oyo? Okuninga ovanhu ovahongwa, sha hala okutya, okukwafela ovanhu vahapu va ninge ovashikuli vaKristus fimbo exulilo inali uya. (Mat. 28:19, 20) Mbela oshike tu na okuninga po ngeenge otwa hala okupondola okuwanifa po elombwelo laKristus?

4. (a) Eendjovo daPetrus odo di li mu 2 Petrus 3:11, 12 otadi divilike omhumbwe yashike? (b) Otwa pumbwa okulungamena shike?

⁴ Didilika eendjovo domuyapostoli Petrus odo tadi ti: “Omu nokuhangika mwa tya ngahelipi [meengeda diyapuki nomoilonga yometilokalunga, NW], mokuteelela nokweendelelifa euyo lefiku laKalunga.” (2 Pet. 3:11, 12) Eendjovo daPetrus otadi divilike omhumbwe yokukala oupafi filufilu momafiku aa axuuninwa mokukala hatu shilipaleke ngeenge otwa yandja ngoo natango elitulemo kokulonga oilonga yometilokalunga mokukalamwenyo kwetu. Oilonga ya tya ngaho oya kwatela mo okuudifa onghundana iwa. Kashi hafifa tuu okutala kouladi wovamwatate mounyuni aushe eshi tava wanifa po oshilonga shokuudifa osho va pewa kuKristus! Ndele pefimbo opo tuu opo, otu shii kutya otwa pumbwa okukala twa lungama opo omafininiko ounyuni waSatana oo hatu shakeneke efiku keshe nosho yo eamo letu loufyuululwalunde ihe tu ningife tu efe po ouladi wetu wokulonga oilonga yaKalunga. Onghee hano, natu ka kundafane kutya ongahelipi hatu dulu okushilipaleka kutya ohatu twikile okushikula Kristus.

Tambula ko nehalo liwa oinakuwanifwa oyo wa pewa kuKalunga

5, 6. (a) Paulus okwa li a pandula ovaitaveli vakwao vomuJerusalem kombinga yashike, nokwa li e va londwela shi na sha nashike? (b) Omolwashike tuhe na okukwata okahetengi oinakuwanifwa yetu oyo twa pewa kuKalunga?

⁵ Omuyapostoli Paulus okwa li a pandula Ovakriste vakwao muJerusalem monhumwafo oyo a li e va shangela omolwelididimiko lavo nokuli naashi va li tava hepekwa. Okwa ti: “Dimbulukweni omafiku enya onale, eshi mwa li mwa minikilwa, omwe lididimikila momahepeko madjuu.” Jehova okwa li shili a dimbuluka oilonga yavo youdiinini. (Heb. 6:10; 10:32-34) Eendjovo daPaulus odo dolupandu lopahole osha yela kutya oda li da twa omukumo neenghono Ovakriste ovo Ovaheberi. Ndele monhumwafo oyo tuu oyo, Paulus okwa li e va londwela kombinga yeamo limwe lopanhu olo tali dulu okuninipika ouladi wavo moilonga yaKalunga ngeenge inava lungama. Okwa ti kutya Ovakriste ove na okukala va lungama vaha anye ile va ninge omalipopilo shi na sha nokudulika koipango yaKalunga — Heb. 12:25.

⁶ Elondwelo olo la li la pewa Ovakriste vonale kutya inava anya okutambula ko oinakuwanifwa oyo va pewa kuKalunga otali longo yo nokOvakriste kunena. Otwe lihonga kutya otwa pumbwa okukala twa tokola toko tuha kwate okahetengi oinakuwanifwa yetu yopaKriste ile tuha kanife ouladi moilonga yetu yokulongela Kalunga. (Heb. 10:39) Ndele komesho yaaishe oyo, okulonga oilonga iyapuki otashi pula omwenyo ile efyo. — 1 Tim. 4:16.

7, 8. (a) Oshike tashi ke tu kwafela tu kale tu na ouladi moilonga yaKalunga? (b) Ngeenge katu na vali ouladi wa xwama ngaashi oo twa li tu na pehovelo, otu na okudimbuluka shike shi na sha naJehova nosho yo Jesus?

⁷ Oshike tashi ke tu kwafela tu henuke okukala hatu lipopile shi na sha nokuwanifa po oinakuwanifwa yetu oyo twa pewa kuKalunga? Onghedi imwe ya fimana oyo tai dulu oku tu kwafela tu kondjife eamo la tya ngaho oyo okukala hatu dilonga pandjikilile kombinga yeityo leliyapulo letu. Noitya imwe, otwa udanekela Jehova kutya ohatu ka pitifa komesho okulonga ehalo laye monghalamwenyo yetu, notwa hala okuwanifa po eudaneko olo. (Lesha Mateus 16:24.) Onghee hano, omafimbo amwe otwa pumbwa okukanghama po manga ndele hatu lipula kutya: ‘Mbela onda tokola ngoo toko natango okukala metwokumwe neliyapulo lange kuKalunga ngaashi nda li nda tokola peninginifo lange? Ile pamwe onda kanifa ouladi wange oo nda li ndi na nale?’

⁸ Ngeenge otwe likonakona paushili ndele hatu mono kutya omaoko etu okwa wa pedu kanini, otu na okudimbuluka eendjovo tadi pameke odo da popiwa komuprofeti Sefanja, tadi ti: “Omaoko oye inaa wa poshi! Omwene Kalunga koye e li mokati koye, Ye Omuladi ha xupifa. Ye ote ku hafele nehafo.” (Sef. 3:16, 17) Eendjovo odo tadi shilipaleke oda li tete tadi longo kOvaisrael vonale ovo va li va alukila kuJerusalem okudja moukwatwa kuBabilon. Ndele eshilipaleko olo otali longo yo nokoshiwana shaKalunga kunena. Molwaashi oilonga oyo hatu longo oyaJehova, otu na okudimbuluka kutya Jehova nOmona waye otave tu kwafele notave tu pameke opo tu dule okuwanifa po pauyadi oinakuwanifwa oyo twa pewa kuJehova. (Mat. 28:20; Fil. 4:13) Ngeenge otwa kendabala okutwikila okulonga oilonga yaKalunga nouladi, ote ke tu nangeka noupuna note ke tu kwafela tu twikile okuninga exumokomesho lopamhepo.

Natu ‘kongeni tete ouhamba’ nouladi

9, 10. Jesus okwa popya oshitwa shilipi meyele laye li na sha noitendele inene, noshilihongomwa shilipi hatu lihongo mo?

⁹ Pomhito imwe eshi Jesus a li a ka lya keumbo lomupangeli umwe Omufarisai, okwa li a popya efaneko li na sha noitendele inene. Jesus okwa li a popya mefaneko olo kutya ovanhu vamwe ova li va pewa omhito va dule oku ka ya mOuhamba womeulu. Jesus okwa li yo a yelifa kutya “okwaanya” osha hala okutya shike. (Lesha Lukas 14:16-21.) Ovaenda vomeyele laJesus ovo va li va shivwa ova li tava ningi omalipopilo kutya itava dulu okuya koshivilo. Umwe okwa li a nyamukula kutya okwa pumbwa okuya a ka tale epya olo opo a lande. Umwe okwa li a popya kutya okwa landa eenhani nomolwaasho okwa hala okuya e ke di konakone nawa. Umwe vali okwa ti: “Ame onda hombola, onghee itandi shiiva okuya ko.” Omalipopilo a tya ngaho kae na oshilonga. Luhapu omunhu ngeenge ta lande epya ile oimuna ohe i tale nawa komesho yefimbo, onghee hano, kasha li sha endelela unene oku ke i konakona konima eshi e i landa nale. Natango, mbela oshike sha li tashi imbi omunhu oo opo a hombola a tambule ko eshivo la fimana la tya ngaho? Hano itashi kumwifa eshi omushivi wovaenda womefaneko olo a li a handuka!

¹⁰ Oshiwana shaKalunga ashishe otashi dulu okulihonga mo sha meyele laJesus olo. Mbela oshike hatu dulu okulihonga mo? Katu na nandenande okweefa oinima yopaumwene, ngaashi oyo ya tumbulwa mefaneko laJesus, i kale ya fimanenena kufye komesho yoilonga yaKalunga. Ngeenge Omukriste ke na etaleko la yuka li na sha noinima yopaumwene, ouladi waye moukalele otau ka enda tau ninipala. (Lesha Lukas 8:14.) Opo tu henuke oshinima osho shihe tu ningilwe, natu dulike kekumaido laJesus olo tali ti: “Kongeni tete ouhamba waKalunga nouyuki waye, opo tamu wedelwa ko ei aishe.” (Mat. 6:33) Itashi tu tuu omukumo okutala ovapiya vaKalunga, kutya nee ovanyasha ile ovakulunhu, tava tula moilonga omayele oo a fimanenena! Vahapu ova katuka eenghatu va kaleke onghalamwenyo yavo paunafangwa opo va dule okulongifa efimbo lihapu moukalele. Ova mona kutya okukonga tete ouhamba nouladi ohashi eta ehafo lashili nembilipalelo linene.

11. Ehokololo lOmbibeli lilipi tali ulike nghee sha fimana okukala ovaladi nokulongela Kalunga nomutima aushe?

¹¹ Opo tu mone nghee sha fimana okukala ovaladi moilonga yaKalunga, natu didilike osho sha li sha ningwa po monghalamwenyo yohamba yaIsrael yedina Joas. Joas okwa li a ya kuElisa ta lili shi na sha naashi Ovaarami (Ovasiria) va li ve li pokufinda Ovaisrael. Omuprofeti okwa li a lombwela Joas a ti kutya na umbe oshikuti mekende a yukifa kuSiria, tashi ulike kutya Jehova ota ka finda oshiwana osho. Osho osha yela kutya osha li sha pameka ohamba. Elisa okwa li vali a lombwela Joas a kufe oikuti yaye ndele te i denge pedu. Joas okwa li ashike e i denga pedu lutatu. Osho osha li sha handukifa Elisa, molwaashi okudenga pedu lwoikando itano ile ihamano osha li tashi ulike kutya ‘Ovaarami otava ka tewatewa sheke.’ Joas okwa li ashike ta ka findana lutatu. Molwaashi Joas ka li a ulika ouladi wa xwama, ka li a pondola pauyadi. (2 Eeh. 13:14-19) Oshilihongomwa shilipi hatu lihongo mehokololo olo? Oshosho kutya Jehova ote ke tu nangeka ashike noupuna munene ngeenge otwe mu longele nomutima aushe nonouladi.

12. (a) Oshike tashi ke tu kwafela tu kale ovaladi mokulongela Kalunga eshi hatu ungaunga nomaupyakadi onghalamwenyo? (b) Hokolola kutya oho mono ouwa ulipi mokukala we lipyakidila moukalele.

¹² Omaupyakadi onghalamwenyo ohaa yeleke ouladi neliyandjo letu moilonga yaKalunga. Ovamwatate novamwameme vahapu otava kondjo nomaupyakadi opamaxupilo. Vamwe ova nyemata molwaashi ove kwetiwe komikifi da kwata moiti odo tadi va imbi okulongela Jehova ngaashi tava dulu. Ndele nande ongaho, keshe umwe womufye ota dulu okukatuka eenghatu opo a kale omuladi noku twikile okushikula Kristus pauyadi. Oto ladipikwa u tale omaetepo amwe nosho yo omishangwa odo di li moshimhungu shi na oshipalanyole: “Oshike tashi ke ku kwafela u twikile okushikula Kristus?” Kendabala u tale nghee to dulu oku di tula moilonga pauyadi. Ngeenge owe shi ningi, oto ka teya oiimati iwa. Okukala twe lipyakidila moukalele otaku ke tu pameka, otaku ka punapaleka onghalamwenyo yetu notaku ke tu etela ombili nehafo linene. (1 Kor. 15:58) Kakele kaasho, okulongela Kalunga nomutima aushe ohaku tu kwafele tu ‘kaleke okukala po kwefiku laye momadiladilo.’ — 2 Pet. 3:12, NW.

Konakona eenghalo doye paushili

13. Oshike tashi dulu oku tu kwafela tu mone kutya okulongela Kalunga nomutima aushe osha hala okutya shike kufye pauhandimwe?

¹³ Oshiwa okudimbuluka kutya okulongela Kalunga nomutima aushe inashi likolelela kouhapu wefimbo olo hatu longo moukalele. Eenghalo dovanhu oda yoolokafana. Omunhu oo ha longo ashike ovili imwe ile mbali moukalele omwedi keshe otashi dulika a kale a hokiwa kuJehova neenghono ngeenge oukolele waye osho tau mu pitike shili a longe efimbo li fike opo. (Yelekanifa naMarkus 12:41-44.) Onghee hano, opo tu shiive kutya okulongela Kalunga nomutima aushe otashi ti shike kufye pauhandimwe, otwa pumbwa okukonakona paushili okudula kwetu nosho yo eenghalo detu. Tu li ovashikuli vaKristus, nafye otwa hala okukala tu na etaleko la fa laye. (Lesha Ovaroma 15:5; 1 Kor. 2:16) Mbela Jesus okwa li a pitifa shike komesho mokukalamwenyo kwaye? Jesus okwa li a lombwela eemhunga dovanhu muKapernaum a ti: “Ondi na okuudifila oilando imwe yo evangeli louhamba waKalunga, osheshi olo tuu eli [nde] li tuminwa.” (Luk. 4:43; Joh. 18:37) Tu na ouladi waJesus u na sha noukalele momadiladilo, natu konakone eenghalo detu tu tale ngeenge ohatu dulu okutamununa mo oukalele wetu. — 1 Kor. 11:1.

14. Omeenghedi dilipi hatu dulu okutamununa mo oukalele wetu?

¹⁴ Okukonakona nawa eenghalo detu otaku dulu oku tu kwafela tu mone kutya ohatu dulu okuweda ko kefimbo olo hatu longo moukalele ile hasho. (Mat. 9:37, 38) Pashihopaenenwa, ovanyasha omayovi mahapu ovo opo va mane ondodo onhi-12 ova tamununa mo oukalele wavo nova mona ehafo olo hali di mokulonga nouladi ve li ovakokolindjila. Mbela naave ino hala okumona ehafo la tya ngaho? Ovamwatate novamwameme vamwe ova konakona eenghalo davo nova tokola kutya otava tembukile koitukulwa imwe moilongo yavo ile nokuli va tembukile koilongo imwe oko ku na omhumbwe inene yovaudifi vOuhamba. Vamwe ove lihonga omalaka amwe opo va kwafele ovapopi vomalaka oshinailongo. Nonande okutamununa mo oukalele wetu otaku dulu okukala eshongo, ohaku eta omanangeko noupuna mahapu notashi dulika tu kwafele ovanhu vahapu va “fike meshiivo loshili.” — 1 Tim. 2:3, 4; 2 Kor. 9:6.

Oihopaenenwa yomOmbibeli oyo hatu dulu okulandula

15, 16. Ovanhu velipi hatu dulu okuhopaenena ovo va li ovashikuli vaKristus ovaladi?

¹⁵ Ovanhu vamwe ovo va ka ninga ovayapostoli ova li ve linyenga ngahelipi eshi Kristus e va shiva va ninge ovashikuli vaye? Omishangwa oda popya kombinga yaMateus, da ti: “Ye okwa fiya po aishe ndele okwe mu shikula.” (Luk. 5:27, 28) Oda popya yo kombinga yaPetrus nosho yo Andreas ovo va li tava yulu eeshi, da ti: “Ova fiya po diva oiyulifo yavo ndee tave mu shikula.” Natango, Jesus okwa li a mona Jakob, Johannes naxe tava vandeke oiyulifo yavo. Mbela ova li ve linyenga ngahelipi keshivo laJesus? Ombibeli oya ti: “Ova fiya po diva owato naxe, ndee tave mu shikula.” — Mat. 4:18-22.

¹⁶ Ope na vali oshihopaenenwa shimwe shiwa shaSaul, oo a ka ninga omuyapostoli Paulus. Nonande Saul okwa li omuhepeki omukwanyanya wovashikuli vaKristus, okwa li a lundulula onghedi yaye yokukalamwenyo ndele ta ningi ‘oshilongifo sha hoololwa’ shokuhumbata edina laKristus. Ombibeli oya popya shi na sha naye ya ti: “Okwa udifa diva meeshinagoga Kristus nokutya, Oye Omona waKalunga.” (Oil. 9:3-22) Nonande Paulus okwa li e lididimikila omaupyakadi mahapu nosho yo omahepeko, ka li a kanifa ouladi waye. — 2 Kor. 11:23-29; 12:15.

17. (a) Owa halelela okuninga po shike eshi to shikula Kristus? (b) Omanangeko noupuna elipi hatu hafele molwaashi hatu longele Jehova nomutima aushe nosho yo neenghono detu?

¹⁷ Otwa halelela okushikula oshihopaenenwa shiwa shovahongwa vonale nokutambula ko eshivo laJesus nehalo liwa. (Heb. 6:11, 12) Omanangeko noupuna elipi hatu hafele eshi hatu kendabala okutwikila okushikula Kristus pauyadi nokukala ovaladi? Ohatu mono ehafo lashili mokulonga ehalo laKalunga nosho yo embilipalelo olo hali di mokutambula ko oilonga noinakuwanifwa ya wedwa po meongalo. (Eps. 40:9; lesha 1 Ovatessaloniki 4:1.) Heeno, eshi hatu kendabala noudiinini okushikula Kristus, ohatu mono omanangeko noupuna mahapu notaa kalelele, ngaashi ombili yopamadiladilo, embilipalelo, ewanenwo, okuhokiwa kuKalunga nosho yo etimaumbwile lomwenyo waalushe. — 1 Tim. 4:10.

Oto dimbuluka?

• Otwa pewa oilonga ya fimana ilipi, notu na oku i tala ko ngahelipi?

• Otu na okulungamena eamo lopanhu lilipi, nomolwashike?

• Otu na okulikonakona paushili shi na sha nashike?

• Oshike tashi ke tu kwafela tu twikile okushikula Kristus?

[Oshimhungu/Efano li li pepandja 31]

Oshike tashi ke ku kwafela u twikile okushikula Kristus?

▪ Kala ho lesha Eendjovo daKalunga efiku keshe nokudilonga kombinga yaasho wa lesha. — Eps. 1:1-3; 1 Tim. 4:15.

▪ Kala ho ilikana lwoikando u pewe ekwafo nosho ewiliko lomhepo yaKalunga. — Sak. 4:6; Luk. 11:9, 13.

▪ Kala ho endafana naavo hava longo nouladi moukalele notashi di komutima. — Omayel. 13:20; Heb. 10:24, 25.

▪ Kala u shii kutya efimbo olo tu li mulo ola endelela. — Ef. 5:15, 16.

▪ Kala wa nongela oilanduliko ya kwata moiti oyo hai etifwa ‘kokwaanya.’ — Luk. 9:59-62.

▪ Kala ho dilonga alushe kombinga yeano olo wa ninga eshi we liyapulila Jehova nosho yo omanangeko noupuna mahapu oo haa etifwa koku mu longela nosho yo kokushikula Kristus nomutima aushe. — Eps. 116:12-14; 133:3; Omayel. 10:22.