“Eheneni kuKalunga”

“Eheneni kuKalunga, opo nee Ye ta ehene kunye.”—JAKOB 4:8.

1, 2. (a) Ovanhu ohava popi luhapu kutya ove na shike? (b) Ekumaido lilipi Jakob a yandja, nomolwashike kwa li la pumbiwa?

“KALUNGA oku li pamwe nafye.” Eendjovo odo ohadi kala da shangwa komadidiliko opashiwana mahapu nokuli nokomidjalo dovakwaita. Outumbulilo “MuKalunga omo twe lineekela” owa shangwa koimaliwa ihapu kunena. Oshi li apeshe kovanhu okupopya kutya ove na ekwatafano lopofingo naKalunga. Ndelenee mbela ito tu kumwe naasho kutya okukala shili nekwatafano la tya ngaho otashi pula shihapu shi he fi ashike okupopya kombinga yasho ile okuulika eendjovo da shangwa di na sha naasho opo di monike kuvamwe?

² Ombibeli otai ulike kutya otashi shiiva okukala nekwatafano naKalunga. Ndelenee opa pumbiwa eenghendabala. Nokuli nOvakriste vamwe ovavaekwa vomefelemido lotete okwa li va pumbwa okunghonopaleka ekwatafano lavo naJehova Kalunga. Omupashukili Omukriste Jakob okwa londwela vamwe shi na sha neamo lavo lopambelela nosho yo okukanifa kwavo oukoshoki wopamhepo. Mepukululo olo, okwa yandja ekumaido eli li na eenghono, tali ti: “Eheneni kuKalunga, opo nee Ye ta ehene kunye.” (Jakob 4:1-12) Jakob okwa li a hala okutya shike eshi a ti “eheneni”?

3, 4. (a) Oshike osho tashi dulika ovaleshi vonhumwafo yaJakob vomefelemido lotete kwa li va dimbulukifwa koutumbulilo “eheneni kuKalunga”? (b) Omolwashike hatu dulu okukala noushili kutya okweehena kuKalunga otashi shiiva?

³ Jakob okwa longifa outumbulilo oo kwa li tau dulu okuudiwa ko noupu kovaleshi vonhumwafo yaye. Omhango yaMoses oya yandja omalombwelo okondadalunde kovapristeri anghee ve na ‘okweehena’ kuJehova omolwoshiwana shaye. (Exodus 19:22) Kungaha, ovaleshi vonhumwafo yaJakob otashi dulika kwa li va dimbulukifwa kutya okweehena kuJehova kashi fi oshinima shokutalika ko shi li shongaho. Jehova oye omufimanekwa a shiya ko meshito alishe.

⁴ Ndele nande ongaho, ngaashi omuhongwanhu umwe wOmbibeli okwa didilika, “ekumaido olo [li li muJakob 4:8] otali holola eteelelo li na eenghono.” Jakob okwa li e shi shii kutya Jehova okwa kala alushe nokwiifana pahole ovanhu inava wanenena va ehene popepi naYe. (2 Omafimbo 15:2) Eyambo laJesus ola yeulula omhito yokweehena popepi naJehova pauyadi. (Ovaefeso 3:11, 12) Kunena, omhito yokweehena popepi naKalunga oya yeulukila ovanhu omamiliyona. Ndelenee ongahelipi hatu dulu okulongifa nawa omhito oyo ikumwifi? Ohatu ka kundafana eenghedi nhatu omo hatu dulu okweehena popepi naJehova Kalunga.

Twikila ‘okushiiva’ Kalunga

5, 6. Oshihopaenenwa shomunyasha Samuel otashi ulike ngahelipi osho sha kwatelwa ‘mokushiiva’ Kalunga?

⁵ PaJohannes 17:3, Jesus okwa ti: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” Jesus okwa li a hala okutya shike eshi a popya shi na sha ‘nokushiiva’ Kalunga? Ovahongwanhu vahapu ova didilika kutya eityo loshitya osho sha longifwa mOshigreka shopetameko ola kwatela mo shihapu—onghedi tai twikile, oyo tashi dulika i twale nokuli fiyo omokushiiva omunhu nawanawa.

⁶ Okushiiva Kalunga nawanawa kasha li ediladilo lipe mefimbo laJesus. Pashihopaenenwa, ohatu lesha mOmishangwa dOshiheberi shi na sha naSamuel kutya eshi a li okamatyona “ina shiiva natango Omwene.” (1 Samuel 3:7) Mbela eshi osha hala okutya Samuel okwa li e shii ashike kanini kombinga yaKalunga kaye? Ahowe. Nope he na omalimbililo, ovakulunhu vaye novapristeri okwa li ve mu honga shihapu. Ndelenee oshitya shOshiheberi osho sha longifwa movelishe oyo, pamuhongwanhu umwe, otashi dulu “okulongifwa shi na sha nokushiiva nawa filufilu.” Samuel ka li natango a shiiva Jehova nawanawa ngaashi kwa li te ke mu shiiva eshi ta ka kala omupopikalelipo waYe. Eshi Samuel a kula, okwa shiiva Jehova shili nokwa kulika ekwatafano lopofingo naye.—1 Samuel 3:19, 20.

7, 8. (a) Omolwashike tu he na okutila okulihonga omahongo omoule Ombibeli? (b) Eeshili dimwe domoule dEendjovo daKalunga dilipi tashi dulika twa hala okulihonga nawa?

⁷ Mbela oto lihongo okushiiva Jehova opo u kale u mu shii nawanawa? Opo u shi ninge, owa pumbwa okukala wa ‘hala shili’ eendja dopamhepo odo Kalunga ta yandje. (1 Petrus 2:2) Ino kala ashike wa wanenwa nokukala neshiivo lomahovelelohongo. Kendabala okulihonga omahongo Ombibeli omoule. (Ovaheberi 5:12-14) Mbela owa tila okulihonga omahongo oo, molwaashi to diladila kutya omadjuu unene? Ngeenge osho shi li ngaho, dimbuluka kutya Jehova oye “Omuhongi Munenenene.” (Jesaja 30:20, NW) Oku shii okuudifa ko ovanhu inava wanenena eeshili domoule. Nota dulu okunangeka noupuna eenghendabala doye di li paushili opo u ude ko osho te ku hongo.—Epsalme 25:4.

⁸ Omolwashike ito konakona kwoove mwene imwe ‘yomoinima yomoule yaKalunga’? (1 Ovakorinto 2:10, NW) Oyo kai fi oinima yongaho ngaashi oyo tai dulu okutwifwa omhata kovalihongi vouteologi nokovakwamhepo. Oi li omahongo taa ti sha, oo okupitila muo hatu dulu okumona eudeko likumwifi li na sha nomadiladilo nosho yo nomutima waTate yetu omunahole. Pashihopaenenwa, ekulilo, “oshiholekwa shiyapuki” nosho yo omahangano e lili noku lili oo Jehova a longifa okunangeka noupuna oshiwana shaye nokuwanifa po omalalakano aye—oinima oyo nosho yo ikwao ye i pamba oihafifa notai ti sha, noi shii okukonakonwa nokulihongwa paumwene.—1 Ovakorinto 2:7, NW.

9, 10. (a) Omolwashike elinenepeko la nyika oshiponga, noshike tashi ke tu kwafela tu li henuke? (b) Ngeenge tashi uya peshiivo lokushiiva Jehova, omolwashike tu na okukendabala tu lininipike?

⁹ Eshi to kulu meshiivo leeshili domoule dopamhepo, lungamena oshiponga osho hashi uya pamwe neshiivo—elinenepeko. (1 Ovakorinto 8:1) Elinenepeko ola nyika oshiponga, molwaashi ohali tukula ovanhu kuKalunga. (Omayeletumbulo 16:5; Jakob 4:6) Dimbuluka kutya kape na omunhu e na etomheno lokulitangela eshiivo laye. Oku shi faneka, diladila keendjovo odo da dja metwalemo lembo olo li na sha nomakonakono omaxumokomesho opaunongononi wovanhu momafimbo opaife, tadi ti: “Mokushiiva kwetu shihapu, omo ngoo mokumona kutya otu shii shinini. . . . Keshe osho twe lihonga oshongaho elela oku shi yeleka naasho tu na okulihonga natango.” Elininipiko la tya ngaho olihokwifa shili. Onghee hano, ngeenge tashi uya peshiivo olo la shiya ko—eshiivo lokushiiva Jehova Kalunga—otu na nokuli etomheno linene lokukala twe lininipika. Omolwashike mbela?

¹⁰ Didilika omatumbulo amwe opaMbibeli oo taa popi shi na sha naJehova. “Omadiladilo oye omale unene neenghono.” (Epsalme 92:6) “Omayele [aJehova] kae na oshiyelekifo.” (Epsalme 147:5) “Ounongo [waJehova] ohau nyenge okukonakonwa.” (Jesaja 40:28) “[Oule ou] fike peni woupuna noweendunge nowounongo waKalunga!” (Ovaroma 11:33) Osha yela kutya itatu ka shiiva oinima aishe i na sha naJehova. (Omuudifi 3:11) Okwe tu honga oinima ihapu ikumwifi, ndelenee otu na natango eshiivo lihapu olo tu na okulihonga nope he na exulilo. Mbela ihatu kala tu udite kutya etimaumbwile la tya ngaho olikumwifi notali tu lininipikifa yo? Onghee hano eshi hatu lihongo, natu longife alushe eshiivo letu li li ekanghameno lokweehena popepi naJehova nosho yo okukwafela vamwe va ninge sha faafana, ndele haku li longifa nande opo tu linenepekele vamwe.—Mateus 23:12; Lukas 9:48.

Ulika ohole yoye yokuhola Jehova

11, 12. (a) Ongahelipi eshiivo olo hatu mono li na sha naJehova li na oku tu kuma? (b) Oshike tashi ufa kutya ohole yomunhu yokuhola Kalunga oyashili?

¹¹ Omuyapostoli Paulus okwa ninga oshinima osho tashi wapalele eshi a kwatakanifa eshiivo nohole. Okwa shanga ta ti: “Eshi osho handi twikile okwiindila, opo ohole yeni i hapupale unene neshiivo lashili neendunge adishe dokuyoolola.” (Ovafilippi 1:9, NW) Ponhele yoku tu linenepekifa, oshili keshe i na ondilo oyo hatu lihongo shi na sha naJehova nomalalakano aye oi na okuhapupalifa ohole yetu yokuhola Tate yetu womeulu.

¹² Doshili, vahapu ovo hava ti kutya ove hole Kalunga hasho lela ve li. Otashi dulika shili va kale ve udite ve na omaliudo e na eenghono momitima davo. Omaliudo a tya ngaho omawa, noku shii nokuli okupandulwa ngeenge oku li metwokumwe neshiivo lashili. Ndelenee kuo vene kae li euliko lohole yashili yokuhola Kalunga. Omolwashike mbela? Didilika nghee Eendjovo daKalunga tadi yelifa ohole ya tya ngaho, tadi ti: “Ohole yokuhola Kalunga oyo tuu ei nokutya, tu diinine oipango yaye.” (1 Johannes 5:3) Onghee hano, ohole yokuhola Jehova oi li ashike yashili ngeenge tai ulikwa moilonga yokudulika.

13. Ongahelipi etilokalunga tali ke tu kwafela tu ulike ohole yetu yokuhola Jehova?

¹³ Etilokalunga otali tu kwafele tu dulike kuJehova. Etilofimaneko lomoule lokutila Jehova ohali di moku mu shiiva, okulihonga kombinga youyapuki, oshinge, eenghono, ouyuki, ounongo nosho yo ohole yaye i he fi okuyelekwa. Etilo la tya ngaho ola fimanenena mokweehena popepi naye. Doshili, didilika osho Epsalme 25:14 tali ti: “Eendafano lOmwene oli li naava have mu tila.” Hano ngeenge otu na etilo liwa lokutila okunyemateka Tate yetu womeulu omunahole, ohatu dulu okweehena popepi naye. Etilokalunga otali ke tu kwafela tu dulike komayele opandunge oo a shangwa mOmayeletumbulo 3:6 taa ti: “Mu shiiva meendjila doye adishe, opo nee Ye ota ka lalakanifa omalila oye.” Eshi osha hala okutya ngahelipi mbela?

14, 15. (a) Omatokolo amwe elipi oo twa taalela mokukalamwenyo kwakeshe efiku? (b) Ongahelipi hatu dulu okuninga omatokolo monghedi oyo tai ulike kutya otu na etilokalunga?

¹⁴ Ou na okuninga omatokolo keshe efiku, makula nosho yo oo manini. Pashihopaenenwa, eenghundafana doludi lilipi to ka kundafana novanailonga vakweni, ovanafikola vakweni nosho yo ovashiinda shoye? (Lukas 6:45) Mbela oto ka longa ngoo noudiinini shi na sha noinakuwanifwa oyo wa pewa ile oto ka longa noundede? (Ovakolossi 3:23) Mbela oto ka ehena popepi naavo hava ulike ohole inini yokuhola Jehova ile ihava ulike nande ohole yoku mu hola, ile oto ka kendabala u nghonopaleke omakwatafano oye novanhu ovo ve na oupamhepo muwa? (Omayeletumbulo 13:20) Oto ningi po shike nokuli nande oshinini opo u xumife komesho oinima yOuhamba waKalunga? (Mateus 6:33) Ngeenge omafinamhango opamishangwa ngaashi oo a tumbulwa apa otaa wilike omatokolo oye akeshe efiku, hano doshili ou li to shiiva Jehova “meendjila doye adishe.”

¹⁵ Doshili, etokolo keshe hatu ningi otu na okuwilikwa kediladilo eli kutya: ‘Oshike ngeno Jehova ta kala a hala ndi ninge? Onghatu ilipi tai ke mu hafifa unene?’ (Omayeletumbulo 27:11) Okuulika etilokalunga monghedi oyo, oshi li onghedi ya denga mbada yokuulika ohole yokuhola Jehova. Etilokalunga otali tu linyengifa yo tu kale twa koshoka—pamhepo, paenghedi nosho yo palutu. Dimbuluka kutya movelishe oyo Jakob a kumaida nayo Ovakriste va ‘ehene kuKalunga,’ okwa kumaida yo ta ti: “Yelifeni omake eni, nye ovalunde, yelifeni omitima deni, nye ovanamitimambali.”—Jakob 4:8.

16. Mokuyandja kuJehova, oshike osho itatu dulu nande okuwanifa po, ndelenee oshike osho hatu ka pondola?

¹⁶ Doshili, okuulika ohole yetu yokuhola Jehova osha kwatela mo shihapu shi he fi ashike okuhenuka okuninga osho shii. Ohole otai tu linyengifa yo tu ninge osho sha yuka. Pashihopaenenwa, ohatu linyengifwa ngahelipi kokuyandja kwaJehova kukumwifi? Jakob okwa shanga ta ti: “Keshe oshipewa shiwa, nokeshe oshali sha wanenena, ohashi di kombada, okuXe yomauyelele.” (Jakob 1:17) Doshili, ngeenge hatu yandjele Jehova oiniwe yetu, itatu mu yambapaleke. Oye nale mwene woinima aishe nomaliko aeshe. (Epsalme 50:12) Nongeenge hatu yandjele Jehova efimbo letu neenghono detu, itatu wanifa po omhumbwe oyo ita dulu okuwanifa po. Nokuli nongeenge otwa anye okuudifa onghundana iwa yOuhamba Kalunga, ota dulu okuningifa omamanya a ingide. Omolwashike nee tu na okuyandjela Jehova oiniwe yetu, efimbo letu nosho yo eenghono detu? Komesho yaaishe, omolwaashi kungaha ohatu ulike ohole yetu yoku mu hola nomutima aushe nomwenyo aushe nomadiladilo aeshe nosho yo neenghono detu adishe.—Markus 12:29, 30.

17. Oshike tashi dulu oku tu linyengifa tu yandje kuJehova nehafo?

¹⁷ Ngeenge hatu yandje kuJehova, otu na oku shi ninga nehafo “osheshi Kalunga e hole ou ta yandje nehafo.” (2 Ovakorinto 9:7) Efinamhango olo la shangwa muDeuteronomion 16:17 tali dulu oku tu kwafela tu kale hatu yandje nehafo, otali ti: “Keshe umwe na ete paenghono denangeko noupuna lOmwene Kalunga koye, ngaashi Ye e mu pa.” Ngeenge hatu diladila kunghee Jehova a kala nokuyandja molwetu, ohatu kala tu na ehalo loku mu pa nehalo liwa. Okuyandja kwa tya ngaho ohaku hafifa omutima waye, ngaashi oshali inini ya dja kokaana okaholike hai hafifa omudali. Okuulika ohole yetu monghedi oyo otaku tu kwafele tu ehene popepi naJehova.

Panga oukaume naye wopofingo okupitila meilikano

18. Omolwashike sha fimana okutala nghee hatu dulu okuxwepopaleka oukwatya womailikano etu?

¹⁸ Eemhito dokwiilikana kwetu paumwene oda fimana nodi li eemhito dokweehena kuTate yetu womeulu nosho yo okupopya naye oiholekwa yetu. (Ovafilippi 4:6) Molwaashi okwiilikana oku li onghedi ya fimanenena yokweehena popepi naKalunga, osha fimana okukufa okafimbo ndele hatu diladila kombinga youkwatya womailikano etu. Inashi hala okutya ngeno a kale a ngongwa nawa noitya, ndele oku na okuningwa neendjovo di li paushili notadi di komutima. Ongahelipi hatu dulu okuxwepopaleka oukwatya womailikano etu?

19, 20. Omolwashike tu na okudilonga omanga inatu ilikana, noinima imwe ilipi ya wapala okudilongwa?

¹⁹ Ohatu dulu okukendabala okudilonga omanga inatu ilikana. Ngeenge otwa dilonga komesho yefimbo, ohatu dulu okuninga omailikano etu a kale okondadalunde notaa ti sha, nokungaha ohatu ka henuka onghedi yokweendulula omatumbulo oo haa dimbulukiwa noupu. (Omayeletumbulo 15:28, 29) Okudiladila kwaamwe omomanenediladilo oo Jesus a tumbula meilikano laye loshihopaenenwa nokutala nghee a pambafana neenghalo omo tu li, otashi dulika shi tu kwafele. (Mateus 6:9-13) Pashihopaenenwa, otashi dulika tu lipule kutya otwa hala okudana onghandangala ilipi nande oinini mokuwanifa po ehalo laJehova oku kombada yedu. Mbela ohatu dulu okuhololela Jehova ehalo letu lokulongifwa kuye ngaashi tashi dulika nokupula ekwafo opo tu wanife po oshinakuwanifwa keshe osho e tu pa? Mbela otwa wililwa po koisho i na sha neemhumbwe detu dopainiwe? Mbela omanyono elipi twa pumbwa okudiminwa po, noolyelye twa pumbwa unene okukala hatu dimine po? Omayeleko elipi tae tu yahameke, notu udite mbela nghee sha endelela okumona eameno laJehova moshinima osho?

²⁰ Kakele kaasho, otashi dulika tu diladile shi na sha novanhu ovo tu shii kutya ova pumbwa ekwafo laJehova moshinima shonhumba. (2 Ovakorinto 1:11) Ndelenee shimwe shi he fi okudimbuwa osho okuyandja olupandu. Ngeenge otwa diladila nawa kombinga yaasho, ohatu ka mona omatomheno mahapu okupandula Jehova noku mu hambelela efiku keshe omolwouwa waye muhapu. (Deuteronomion 8:10; Lukas 10:21) Okuninga ngaho oku na ouwa wa wedwa po—otaku tu kwafele tu kale tu na olupandu nosho yo etaleko liwa lokukalamwenyo.

21. Okukonakona oihopaenenwa yopamishangwa ilipi taku dulu oku tu kwafela ngeenge hatu ehene kuJehova meilikano?

²¹ Okukonakona nako otaku dulu yo okuxwepopaleka omailikano etu. Ope na omailikano a denga mbada ovalumenhu novakainhu ovadiinini oo a shangwa mEendjovo daKalunga. Pashihopaenenwa, ngeenge otwa taalelwa koupyakadi u li eshongo, tau tu kaleke noshisho shonhumba nosho yo nokuli noutile u na sha nonghalonawa yetu ile yovaholike vetu, ohatu dulu okulesha eilikano laJakob li na sha nokukashakeneka kwaye omumwainamati Esau oo a li e mu nine onghone. (Genesis 32:9-12) Ile otashi dulika tu konakone eilikano lohamba Asa olo a ilikana eshi etanga lovakwaita Ovaetiopia emiliyona limwe nasha kwa li tali tilifa oshiwana shaKalunga. (2 Omafimbo 14:11, 12) Ngeenge otwa taalelwa koupyakadi oo tau fininike okweetela edina liwa laJehova odino, oshiwa okudiladila keilikano laElia olo a ilikana moipafi yovailikani vaBaal komhunda yaKarmel nosho yo kwaalo laNehemia li na sha nonghalo ya naipala yaJerusalem. (1 Eehamba 18:36, 37; Nehemia 1:4-11) Okulesha nokudilonga shi na sha nomailikano a tya ngaho otaku dulu okunghonopaleka eitavelo letu noku tu pa omadiladilo anghee tu na okweehena nawa kuJehova noisho oyo tai tu wilile po.

22. Omushangwa womudo 2003 otau ka kala ulipi, noshike hatu dulu okukala nokulipula efimbo nefimbo momukokomoko womudo oo?

²² Osha yela kutya kape na oufembanghenda wa kula nosho yo elalakano la shiya ko li dule okudulika komayele aJakob ‘okweehena kuKalunga.’ (Jakob 4:8) Natu ninge ngaho mokuxuma komesho meshiivo letu lokushiiva Kalunga, mokukendabala okuulika ohole yetu unene yoku mu hola nosho yo mokupanga oukaume wopofingo naye okupitila momailikano etu. Momukokomoko womudo 2003, eshi hatu kaleke momadiladilo Jakob 4:8 e li omushangwa womudo, natu twikile okulikonakona tu tale ngeenge ohatu ehene shili popepi naJehova. Ndele ongahelipi kombinga yoshitukulwa shaxuuninwa shomushangwa oo? Mbela omonghedi ilipi Jehova ta ka ‘ehena kunye,’ nota ka eta omanangeko noupuna elipi? Oshitukulwa tashi landula otashi ka kundafana oshinima osho.

“Ye ta ehene kunye”

“[Kalunga] ina kala kokule nafye nande oumwe.”—OILONGA 17:27.

1, 2. (a) Ngeenge hatu tale keulu li yadi eenyofi, epulo lilipi hatu dulu okupula shi na sha nOmushiti? (b) Ombibeli otai tu shilipaleke ngahelipi kutya Jehova iha tale ko ovanhu kutya inava fimana momesho aye?

OWA tala ngoo nale keulu li yadi eenyofi oufiku ndele to kala wa kumwa? Omuvalu muhapu weenyofi nosho yo ounene wewangadjo otau tu ningifa tu kale tu na etilofimaneko. Mevalelwa eli linenenene, edu oli li ashike ngaashi okanhongo. Mbela eshi osha hala okutya Omushiti, ‘Omukombadambada wedu alishe,’ okwa tumbala unene nokukala e na ko na sha novanhu ile oku li unene kokule noita dulu okushiivika kuvo?—Epsalme 83:18.

² Ombibeli otai tu shilipaleke kutya Jehova iha tale ko ovanhu kutya inava fimana momesho aye. Doshili, Eendjovo daKalunga otadi tu ladipike tu mu konge, tadi ti: “Ina kala kokule nafye nande oumwe.” (Oilonga 17:27; 1 Omafimbo 28:9) Doshili, ngeenge otwa kufa onghatu yokweehena popepi naKalunga, ote ke linyenga omolweenghendabala detu. Mbela omonghedi ilipi? Eendjovo domushangwa wetu womudo 2003 otadi yandje enyamukulo olo tali hafifa omutima, tadi ti: “Ye ta ehene kunye.” (Jakob 4:8) Natu kundafaneni amwe omomanangeko noupuna makumwifi oo Jehova ta yandje kwaavo va ehena popepi naye.

Oshali ya dja kuJehova mwene

3. Oshali ilipi Jehova ta yandje kwaavo tava ehene popepi naye?

³ Tete, ovapiya vaJehova ova pewa oshali i na ondilo oyo e i tuvikilila oshiwana shaye. Eenghono adishe, omaliko aeshe nehongo alishe olo tali yandjwa konghalelo ei yoinima, itai dulu okuyandja oshali oyo. Oshali oyo otai di kuJehova mwene note i yandje ashike kwaavo va ehena popepi naye. Mbela oyo oshike? Eendjovo daKalunga otadi nyamukula tadi ti: “Ngenge . . . ho yelulile ondaka yoye keendunge, ngenge to di kongo ngaashi oshisilveri ndee to di shitilile ngaashi omamona a holekwa, opo nee to ka uda ko etilo lokutila Omwene nokumona eshiivo lokushiiva Kalunga. Osheshi Omwene ta yandje ounongo.” (Omayeletumbulo 2:3-6) Diladila kwaasho kutya ovanhu inava wanenena otava dulu okumona “eshiivo lokushiiva Kalunga”! Oshali oyo—eshiivo olo tali hangika mEendjovo daKalunga—otai yelekwa ‘nomamona a holekwa.’ Omolwashike mbela?

4, 5. Omolwashike “eshiivo lokushiiva Kalunga” tali dulu okuyelekwa ‘nomamona a holekwa’? Shi faneka.

⁴ Oshinima shimwe oshosho kutya eshiivo lokushiiva Kalunga oli na ongushu ya denga mbada. Limwe lomomanangeko noupuna alo e na ondilo olo eteelelo lomwenyo waalushe. (Johannes 17:3) Ndelenee eshiivo olo otali yambapaleke okukalamwenyo kwetu nokuli nokunena. Pashihopaenenwa, shi li oshidjemo shokukonakona kwetu noukeka Eendjovo daKalunga, otwa mona omanyamukulo komapulo a fimana ngaashi: Edina laKalunga olyelye? (Epsalme 83:18, KB-1955) Onghalo yoonakufya yashili oilipi? (Omuudifi 9:5, 10) Elalakano laKalunga li na sha nedu nosho yo novanhu olilipi? (Jesaja 45:18) Otwa shiiva yo kutya onghedi yokukalamwenyo oyo ya denga mbada oyo okutula moilonga omayele opandunge Ombibeli. (Jesaja 30:20, 21; 48:17, 18) Kungaha, otu na ewiliko liwa olo tali tu kwafele tu ungaunge noisho yokukalamwenyo nosho yo okulandula ondjila oyo tai eta elao nembilipalelo lashili. Komesho yaaishe, okukonakona kwetu Eendjovo daKalunga okwe tu kwafela tu shiive omaukwatya aYe makumwifi nokweehena popepi naye. Oshike mbela shi na ondilo shi dulife okukala nekwatafano lopofingo naJehova la kanghamena ‘keshiivo loku mu shiiva’?

⁵ Ope na vali etomheno limwe molwaashi eshiivo lokushiiva Kalunga tali dulu okuyelekwa ‘nomamona a holekwa.’ Ngaashi omamona mahapu, eshiivo olo ola pumba shili mounyuni ou. Mokati kovakali kombada yedu omamiliyona omayovi ahamano lwaapo, omamiliyona ashike ahamano lwaapo oo e li ovalongeli vaJehova a mona “eshiivo lokushiiva Kalunga” ile tu tye omunhu umwe movanhu 1 000. Oku shi faneka kutya oshi li oufembanghenda wa pumba okushiiva oshili yEendjovo daKalunga, diladila ashike kepulo lopaMbibeli limwe, olo tali ti: Oshike hashi ningilwa ovanhu pefyo? Otu shi shii okudja mOmishangwa kutya omwenyo ohau fi nosho yo kutya ovafi kave na eshi ve shii. (Hesekiel 18:4) Ndele nande ongaho, eitavelo loipupulu kutya ope na sha momunhu osho hashi fyaala po nokutwikila okukala nomwenyo konima yefyo ola tandavela momalongelokalunga mahapu mounyuni. Oli li oshitukulwa sha fimana momalongelokalunga Oukwakriste. Oli li yo mOubuddha, mOuhindu, mOuislam, mOujaini, mOujuda, mOushinto, mOusikhi nosho yo mOutao. Diladila ashike—omamiliyona omayovi ovanhu a pukifwa kehongo loipupulu olo limwe!

6, 7. (a) Oolyelye ashike tava dulu okumona “eshiivo lokushiva Kalunga”? (b) Oshihopaenenwa shilipi tashi ulike kutya Jehova okwe tu nangeka noupuna wokukala neudeko olo ihali monika nande ‘kovanongo novanaendunge’ vahapu?

⁶ Omolwashike havanhu vahapu va mona “eshiivo lokushiiva Kalunga”? Omolwaashi omunhu ita dulu okuuda ko filufilu eityo lEendjovo daKalunga nope he na ekwafo laYe. Dimbuluka kutya eshiivo olo oli li oshali. Jehova ohe li pe ashike ovo ve na ehalo lokukonakona Eendjovo daye noushili nosho yo nelininipiko. Ovanhu va tya ngaho otashi dulika va ha kale “ovanongo vopanhu.” (1 Ovakorinto 1:26) Vahapu vomuvo otashi dulika nokuli va talike ko ve li “ovanhu vongaho, inava longwa” pamifika dounyuni. (Oilonga 4:13) Ndelenee osho kashi na eshi tashi ti. Jehova okwe tu pa ‘eshiivo loku mu shiiva’ omolwomaukwatya oo e wete momitima detu.

⁷ Diladila koshihopaenenwa. Ovahongwanhu vahapu vomOukwakriste ova shanga omatyekosha mahapu e na sha nOmbibeli. Omauyelele a tya ngaho otashi dulika a hepaulule ondjokonona, omaityo oitya yOshiheberi noyOshigreka nosho tuu. Ndele nande ve lihonga, mbela ovahongwanhu va tya ngaho ova mona shili “eshiivo lokushiiva Kalunga”? Doshili, mbela ove udite ko ngoo filufilu enenediladilo lOmbibeli—eyukipalifo lounamapangelo waJehova okupitila mOuhamba waye womeulu? Mbela ove shi shii ngoo kutya Jehova Kalunga ke fi oshitukulwa shOukwatatu? Ndelenee mepingafano navo, fye otu na eshiivo lashili loinima ya tya ngaho. Omolwashike? Jehova okwe tu nangeka noupuna wokukala neudeko leeshili dopamhepo odo inadi shiivika ‘kovanongo novanaendunge’ vahapu. (Mateus 11:25) Jehova iha nangeke tuu noupuna ovo hava ehene popepi naye!

“Omwene oha amene aveshe, ava ve mu hole”

8, 9. (a) David okwa hepaulula ngahelipi enangeko noupuna limwe olo li na sha naavo va ehena popepi naJehova? (b) Omolwashike Ovakriste vashili va pumbwa eameno laKalunga?

⁸ Ovo va ehena popepi naJehova otava hafele enangeko noupuna vali limwe—eameno olo tali di kuYe. Omupsalme David oo kwa li a shakeneka omaupyakadi mahapu, okwa shanga ta ti: “Omwene oku li popepi naaveshe, have mu ifana, aveshe ava have mu ifana moshili. Ava, have mu tila, ote va wanifile eshi va hala, nonghuwo yavo ohe i udu, ndee te va xupifa. Omwene oha amene aveshe, ava ve mu hole.” (Epsalme 145:18-20) Heeno, Jehova oku li popepi naavo ve mu hole nonghee hano oha dulu okulinyenga divadiva omolwomaindilo avo ekwafo.

⁹ Omolwashike twa pumbwa eameno laKalunga? Kakele kokuuda nghee onghalo yokukala ‘momafimbo aa madjuu’ tai va kumu, Ovakriste vashili ove li oshihakanwa she likalekelwa shOmutondi munene waJehova, Satana Ondiaboli. (2 Timoteus 3:1) Omutondi oo e na oinheya okwa tokola toko oku tu ‘xwaka po.’ (1 Petrus 5:8) Satana ote tu hepeke, te tu fininike note tu yeleke. Ota tale yo koikala yomadiladilo noyomitima opo e i longife nai. Elalakano olo e na momadiladilo aye olo: okunghundipaleka eitavelo letu nokuhanauna po oupamhepo wetu. (Ehololo 12:12, 17) Molwaashi otu na omutondi a tya ngaho e na eenghono oo tu na okulwifa, itashi hekeleke mbela okushiiva kutya “Omwene oha amene aveshe, ava ve mu hole”?

10. (a) Jehova oha amene oshiwana shaye ngahelipi? (b) Eameno loludi lilipi la fimana unene, nomolwashike?

¹⁰ Ndelenee ongahelipi Jehova ha amene oshiwana shaye? Okuudaneka kwaye oku tu amena inaku hala okutya kutya itatu ka shakeneka omaupyakadi omonghalamwenyo monghalelo ei noitaku ti kutya ye oku na okulonga oikumwifilonga molwetu. Ndele nande ongaho, Jehova oha yandje eameno lolela koshiwana shaye shi li ongudu. Doshili, ita ka efa nandenande Ondiaboli i hanaune po filufilu ovalongelikalunga vashili kombada yedu! (2 Petrus 2:9) Komesho yaaishe, Jehova ote tu amene pamhepo. Ohe tu pe ashishe osho twa pumbwa opo tu lididimikile omayeleko nokwaamena ekwatafano letu naye. Xuuninwa eameno lopamhepo olo oludi leameno la fimana unene. Omolwashike mbela? Shimha ashike tu na ekwatafano letu naJehova, kape na nande sha shimwe—nokuli nande efyo—tashi dulu oku tu yahameka nouyahame tau kalelele.—Mateus 10:28.

11. Omafiloshisho elipi Jehova a ninga opo oshiwana shaye shi kale neameno lopamhepo?

¹¹ Jehova okwa yandja omafiloshisho mahapu okwaamena pamhepo ovo va ehene popepi naye. Okupitila mEendjovo daye Ombibeli, ote tu pe ounongo opo tu pondole mokuungaunga nomayeleko e lili noku lili. (Jakob 1:2-5) Okutula moilonga omayele taa longo oo taa hangika mOmishangwa oku li eameno. Kakele kaasho, Jehova oha yandje “Omhepo Iyapuki kuava tave mu indile.” (Lukas 11:13) Omhepo oyo oyo eenghono da shiya ko meshito alishe, onghee hano otai dulu oku tu kwafela tu taalele nomupondo eyeleko keshe hatu dulu okushakeneka. Okupitila muKristus, Jehova okwa yandja “eeshali odo di li ovanhu.” (Ovaefeso 4:8, NW) Ovalumenhu ovo va pyokoka pamhepo ohava kendabala okuhopaenena olukeno laJehova tali di komutima mokukwafela ovalongelikalunga vakwao.—Jakob 5:14, 15.

12, 13. (a) Okupitila meenghedi dilipi Jehova he tu pe eendja dopamhepo pefimbo la wapala? (b) Ou udite ngahelipi shi na sha nomafiloshisho aJehova e na sha nonghalonawa yetu yopamhepo?

¹² Jehova oha yandje natango shimwe shi lili opo e tu amene: eendja dopamhepo pefimbo la wapala. (Mateus 24:45) Okupitila moishangomwa, mwa kwatelwa oifo yOshungonangelo noAwake! nosho yo okupitila mokwoongala, moyoongalele inini naai ya kula, Jehova ohe tu pe osho twa pumbwa pefimbo olo twe shi pumbwa. Mbela oto dulu okudimbuluka omhito yonhumba oyo wa li wa uda oshinima shonhumba pokwoongala kwopaKriste ile poshoongalele shinini ile sha kula, osho kwa li sha kuma omutima woye noshe ku pameka ile she ku hekeleka? Mbela owa lesha ngoo nande onale oshitukulwa shonhumba moifo shimwe shomwaayo ya tumbulwa metetekelo ndele to kala u udite kutya oove sha shangelwa?

¹³ Shimwe shomoilwifo yaSatana tai pondola osho etekomukumo, noinatu lya olusha loilanduliko yalo. Oku shi shii nawa kutya okuheneteelelo taku kwata efimbo lile ohaku dulu oku tu kanififa eenghono notaku tu ningi nokuli oihakanwa. (Omayeletumbulo 24:10) Molwaashi Satana ota kendabala okulongela komaliudo okuteka omukumo, otwa pumbwa ekwafo. Oifo yOshungonangelo nosho yo yoAwake! omafimbo amwe oya nyanyangida oitukulwa oyo tai tu kwafele tu kondjife etekomukumo. Omumwameme umwe Omukriste okwa shanga shi na sha noshitukulwa shimwe sholudi olo, ta ti: “Ohandi lesha oshitukulwa osho hanga efiku keshe nohandi kengele alushe omahodi. Ohandi shi kaleke popepi nombete yange opo ndi dule oku shi lesha alushe ngeenge ndi udite nda teka omukumo. Okupitila moitukulwa ya tya ngaho, ohandi kala ndi udite okwooko kwaJehova kweameno taku papatele nge.” Mbela katu na olupandu molwaashi Jehova he tu pe eendja dopamhepo di li pefimbo? Dimbuluka kutya omafiloshisho aye e na sha noukalinawa wetu wopamhepo oku li oumbangi kutya oku li popepi nafye nosho yo kutya otu li meameno laye.

Omhito yokuya ‘kOmuudi womailikano’

14, 15. (a) Enangeko noupuna lilipi Jehova mwene a yandja kwaavo va ehena popepi naye? (b) Omolwashike okupewa omhito ya manguluka yokuya kuJehova meilikano shi li oufembanghenda ukonekwedi?

¹⁴ Mbela owa didilika kutya ngeenge ovanhu tava weda ko keenghonopangelo, ohava kala luhapu itava dulu vali okupopiwa navo noupu kovapangelwa vavo. Ndelenee ongahelipi shi na sha naJehova Kalunga? Mbela oku li kokule nokukala e na ko nasha nomapopyo oo ovanhu vongaho ve a yukifa kuye? Hasho nande! Oshali yeilikano oi li enangeko noupuna limwe vali olo Jehova a yandja kwaavo va ehena popepi naye. Okupewa omhito ya manguluka yokuya ‘kOmuudi womailikano’ oku li oufembanghenda ukumwifi. (Epsalme 65:3) Omolwashike mbela?

¹⁵ Oku shi faneka: Natu tye nee ngeno omukulunhu wehangano lonhumba oku na oinakuwanifwa ihapu. Oha tokola kutya oinima ilipi ta ka ungaunga nayo ye mwene nosho yo kutya ilipi ta yandje kuvamwe. Sha faafana, Omunamapangelo weshito alishe ota dulu okutokola kutya oinima ilipi ta ka ungaunga nayo ye mwene nosho yo kutya ilipi ta yandje kuvamwe. Diladila koinima aishe oyo Jehova a yandja i ungaungwe nayo kOmona waye omuholike, Jesus. Omona okwa pewa “eenghono dokutokola.” (Johannes 5:27) Ovaengeli ova tulwa “koshi yaye.” (1 Petrus 3:22) Jesus okwa pewa omhepo iyapuki yaJehova i na eenghono opo a dule oku i longifa a wilike ovahongwa vaye kombada yedu. (Johannes 15:26; 16:7) Onghee hano Jesus okwa li ta dulu okutya: “Onda pewa eenghono adishe meulu nokombada yedu.” (Mateus 28:18) Ndelenee ngeenge tashi uya pomailikano etu, Jehova okwa hoolola okuungaunga nao ye mwene. Omolwaasho Ombibeli tai tu lombwele tu yukife omailikano etu kuJehova oye aeke, hatu shi ningi medina laJesus.—Epsalme 69:14; Johannes 14:6, 13.

16. Omolwashike hatu dulu okukala nelineekelo kutya Jehova oha pwilikine shili komailikano etu?

¹⁶ Mbela Jehova oha pwilikine shili komailikano etu? Ngeno okwa li e he na ko nasha, ngeno ite tu ladipike tu ‘diinine mokwiilikana’ ile kutya natu mu undulile omitengi detu noisho yetu. (Ovaroma 12:12; Epsalme 55:23; 1 Petrus 5:7) Ovapiya ovadiinini vomefimbo lOmbibeli okwa li ve na elineekelo filufilu kutya Jehova oha pwilikine omailikano. (1 Johannes 5:14) Omolwaasho omupsalme David a ti: “[Jehova] ota udu ondaka yange.” (Epsalme 55:18) Nafye otu na yo omatomheno mahapu okukala nelineekelo kutya Jehova oku li popepi nokwe lilongekida okuuda omalipulo etu noisho yetu aishe.

Jehova oha pe ovapiya vaye ondjabi

17, 18. (a) Jehova oha kala e udite ngahelipi shi na sha noilonga youdiinini yoishitwa yaye oinaendunge? (b) Yelifa nghee Omayeletumbulo 19:17 taa ulike kutya oilonga yetu yefilonghenda ohai kala i wetike kuJehova.

¹⁷ Ondodo yaJehova e li Omunamapangelo aeshe ihai kumwa nande kwaasho ovanhu vongaho tava ningi ile tava anye okuninga. Ndelenee Jehova oKalunga ha ulike olupandu. Doshili, iha pandula ashike oilonga youdiinini yoishitwa yaye oinaendunge, ovanhu nosho yo ovaengeli, ndele ohe i tale ko yo i na lela ongushu. (Epsalme 147:11) Hano osho oshi li ouwa umwe vali oo hau hafelwa kwaavo va ehena popepi naJehova: Oha pe ovapiya vaye ondjabi.—Ovaheberi 11:6.

¹⁸ Ombibeli otai ulike sha yela kutya Jehova oha pandula osho ovalongeli vaye tava ningi. Pashihopaenenwa, ohatu lesha taku ti: “Ou ta filonghenda eehepele, ota tulike kOmwene. Ndele Ye ote ke mu alulila oshilonga shaye shiwa.” (Omayeletumbulo 19:17) Okukala kwaJehova nefilonghenda shi na sha neehepele okwa ulikwa mOmhango yaMoses. (Leviticus 14:21; 19:15) Jehova oha kala e udite ngahelipi ngeenge hatu hopaenene onghenda yaye mokuungaunga kwetu neehepele? Ngeenge ohatu yandje keehepele tu he na eteelelo lokwaalulilwa, Jehova ote shi tale ko shi li okuyandja ekwafo kuYe. Jehova ota udaneke kutya ota ka futila po oshikolo osho nohokwe yokuhokiwa kuYe nosho yo nomanangeko noupuna. (Omayeletumbulo 10:22; Mateus 6:3, 4; Lukas 14:12-14) Heeno, ngeenge hatu ulikile omulongelikalunga mukwetu olukeno, oo e na omhumbwe, ohashi kumu omutima waJehova. Katu na tuu olupandu okushiiva kutya oilonga yetu yefilonghenda ohai kala i wetike kuTate yetu womeulu!—Mateus 5:7.

19. (a) Omolwashike hatu dulu okukala noushili kutya Jehova oha pandula osho hatu ningi moilonga yokuudifa noyokuninga ovanhu ovahongwa? (b) Ongahelipi Jehova ha yandje ondjabi omolwoilonga oyo ya longwa okuyambidida Ouhamba waye?

¹⁹ Jehova oha pandula unene tuu osho hatu ningi molwOuhamba waye. Eshi hatu ehene popepi naJehova, oshi li ashike paushitwe okukala twa hala okulongifa efimbo letu, eenghono detu nosho yo oiniwe yetu opo tu kufe ombinga iyadi ngaashi tashi shiiva moilonga yokuudifa Ouhamba noyokuninga ovanhu ovahongwa. (Mateus 28:19, 20) Omafimbo amwe otashi dulika tu kale tu udite hatu longo shinini. Omitima detu inadi wanenena otashi dulika di tu limbililike shi na sha nongeenge Jehova okwa hafela tuu eenghendabala detu. (1 Johannes 3:19, 20) Ndelenee Jehova oha pandula oshali keshe—kutya nee oinini shi fike peni—oyo tai di komutima tau linyengifwa kohole. (Markus 12:41-44) Ombibeli otai tu shilipaleke tai ti: “Kalunga ke fi omuhenouyuki a dimbwe ngeno oilonga yeni nohole yeni mokufimanekifa edina laye.” (Ovaheberi 6:10) Doshili, Jehova oha dimbuluka noha yandje ondjabi nokuli nande omolwoshilonga shinini osho sha longwa okuyambidida Ouhamba waye. Kakele komanangeko noupuna opamhepo paife, ohatu dulu okuteelela ehafo lokukalamwenyo mounyuni mupe oo tau uya, omo Jehova ta ka kamutulula eke laye ndele ta palula omahalo e li pauyuki aaveshe ovo va ehena popepi naye.—Epsalme 145:16; 2 Petrus 3:13.

20. Momukokomoko womudo 2003, ongahelipi hatu ka kaleka momadiladilo eendjovo domushangwa womudo, noshidjemo otashi ka kala shike?

²⁰ Momukokomoko womudo 2003, natu kale hatu lipula ngeenge ohatu ningi tuu eenghendabala tadi twikile dokweehena popepi naTate yetu womeulu. Ngeenge osho hatu ningi, ohatu dulu okukala noushili kutya ota ka ninga ngaashi a udaneka. Doshili, ‘Kalunga iha fufya.’ (Titus 1:2) Ngeenge owa ehene popepi naye, ye ota ka ehena popepi naave. (Jakob 4:8) Noshidjemo otashi ka kala shike? Omanangeko noupuna paife nosho yo eteelelo lokweehena popepi elela naJehova fiyo alushe!

Oto dimbuluka?

• Oshali ilipi Jehova a pa ovo tava ehene popepi naye?