Onghundana iwa oshike?

1. Onghundana iwa oyo ya dja kuKalunga oshike?

Kalunga okwa hala ovanhu va kale tava hafele onghalamwenyo iwa kombada yedu. Molwaashi oku hole ovanhu, okwe va shitila edu nokwa shitila ko yo oinima i lili noku lili. Mafiku, Jehova ota ka katuka onghatu opo ovanhu va dule okuhafela onghalamwenyo kombada yedu alishe. Ota ka xulifa po yo okumona oixuna akushe. — Lesha Jeremia 29:11.

Kape na nande epangelo limwe la dula okuxulifa po elongifo leenghono, omikifi ile efyo. Ndele onghundana iwa oyo ei kutya, mafiku Kalunga ota ka pingena po omapangelo aeshe opanhu nepangelo laye mwene. Ovapangelwa valo otava ka hafela ombili nosho yo oukolele muwa. — Lesha Jesaja 25:8; 33:24; Daniel 2:44.

2. Omolwashike onghundana iwa ya endelela?

Okumona oixuna otaku ka xula po ashike ngeenge Kalunga okwa hanauna po ovakolokoshi. (Sefanja 2:⁠3) Osho otashi ka ningwa naini? Eendjovo daKalunga oda kala nale da xunganeka eenghalo didjuu omo ovanhu ve li paife. Oiningwanima oyo tai ningwa kunena otai ulike kutya Kalunga oku li pokukatuka onghatu mafiku. — Lesha 2 Timoteus 3:1-5.

3. Fyeni oshike tu na okuninga po?

Otu na okulihonga kombinga yaKalunga okudja mEendjovo daye, Ombibeli. Ombibeli oya fa onhumwafo oyo ya dja kutate yetu omunahole. Otai tu lombwele shi na sha nanghee hatu dulu okukala nonghedi yokukalamwenyo iwa paife noku ka hafela omwenyo waalushe kombada yedu monakwiiwa. Otashi dulika vamwe itava ka kala va hala u kwafelwe opo u ude ko Ombibeli, ndele ino efa nande oumwe e ku imbe oku ka kala nonghalamwenyo iwa monakwiiwa. — Lesha Omayeletumbulo 29:25; Ehololo 14:6, 7.