Kaleni mwa shiivikila ondjele. Lipula kutya: ‘Mbela ovanhu ova tala nge ko ndi na ondjele, handi tifuka nohandi tale onheni? Ile ova tala nge ko handi komangele, ndi na onyanya, ile ndi na omutwe mukukutu? Ile ohandi pwilikine kuvamwe nokutifuka, ngeenge osha pumbiwa?’ Ohatu ka ulika kutya ohatu hopaenene Jehova naJesus shi fike peni, monghedi omo hatu ulike ondjele. Okukala tu na ondjele okwa kwatela mo okukala hatu tifuka, ngeenge eenghalo detu da lunduluka. Omalunduluko a tya ngaho, okwa kwatela mo eenghalo didjuu odo twa li inatu teelela. Pashihopaenenwa, otashi dulika tu hangike ombadilila koupyakadi wokuhe na oukolele wa kwata moiti. Ile onghalo youxupilo, ile yopapolotika otai dulu okulunduluka ombadilila moshitukulwa omo tu li, naasho otashi dulu okudjuupaleka onghalamwenyo yetu. (Omuud. 9:11) Otashi dulu nokuli okukala shidjuu kufye, ngeenge ehangano ole tu pula tu longele Jehova monghedi imwe i lili, ile konhele imwe i lili. Ohatu dulu okutambula ko nomupondo onghalo oyo ipe, ngeenge otwa katuka eenghatu nhee tadi shikula: (1) dimina kutya onghalo yoye oya lunduluka, (2) diladila konakwiiwa, (3) yandja elitulemo koinima oyo tai tungu nosho yo (4) kwafela vamwe. w23.07 21-22 ¶7-8

Omuprofeti Daniel okwa li omunyasha, eshi Ovababilon va li ve mu kwata po e li onghwate ve mu twala kuBabilon okudja muJerusalem. Nonande Daniel okwa li omunyasha, okwa li a kumwifa omalenga omuBabilon. Ova tala “osho shokombada,” sha hala okutya Daniel ka li e na ‘oshipo shasha kolutu, ndelenee omuwa okutala’ nokwa dja yo moukwaneumbo wa punapala. (1 Sam. 16:7) Omolwomatomheno oo, Ovababilon ova li ve mu deula, opo a kale ta yakula mombala yavo. (Dan. 1:​3, 4, 6) Jehova okwa li e hole Daniel, hamolweholokepo laye lokombada, ile omaufembanghenda e likalekelwa oo a li e na mombala, ndele omolwonghedi omo omulumenhu oo omunyasha a hoolola onghalamwenyo yaye i kale. Eshi Jehova a popya kutya Daniel okwa fa Noa naJob, Daniel otashi dulika a li e na ashike omido 20 lwaapo. Onghee Jehova okwa li a tala ko omulumenhu oo omunyasha omuyuki ngaashi Noa naJob, ovo ve mu longela noudiinini omido dihapu. (Gen. 5:32; 6:​9, 10; Job 42:​16, 17; Hes. 14:14) Jehova okwa twikila okukala e hole Daniel momukokomoko wonghalamwenyo yaye ile noididilikwedi. — Dan. 10:​11, 19. w23.08 2 ¶1-2

Ngeenge to ningi etokolo lokulanda eumbo, oto ka kala wa hala okukonakona, oinima aishe komudidi oyo i li oshitukulwa sheumbo olo. Ohatu dulu okuninga sha faafana, ngeenge hatu lesha nokukonakona Ombiibeli. Ngeenge owa lesha to endelele, oto ka shiiva ashike “omahovelohongo eendjovo daKalunga.” (Heb. 5:12) Ngaashi ashike wa pumbwa okuya meni leumbo, opo u lihonge shihapu kombinga yalo, owa pumbwa yo okukonakona Ombiibeli noukeka, opo u dule oku i uda ko pauyadi. Onghedi imwe ya denga mbada yokukonakona Ombiibeli, okumona nghee oitukulwa ya yoolokafana yetumwalaka lOmbiibeli ya kwatafana. Kendabala okuuda ko osho wa itavela nosho yo omatomheno kutya omolwashike shoshili. Opo tu ude ko Eendjovo daKalunga pauyadi, otu na oku di konakona moule. Omuyapostoli Paulus okwa ladipika ovamwaxe va konakone Eendjovo daKalunga noukeka, opo va ‘shiive nawanawa ounene, oule womukokomoko, oule wopombada noule wopedu’ woshili. Kungaho, otava ka kala va “twama nova pamenena” meitavelo. (Ef. 3:​14-19) Nafye otwa pumbwa okuninga sha faafana. w23.10 18 ¶1-3