Ombiibeli oyo etumwalaka la dja kuKalunga

Jehova okwe tu pa Ombiibeli i li oshali ya denga mbada oyo ya fikama po momambo 66. Ndele otashi dulika u lipule kutya: ‘Ombiibeli oye uya po ngahelipi? Olyelye omushangi wayo?’ Opo tu nyamukule omapulo oo, natu ka kundafaneni nghee Eendjovo daKalunga Ombiibeli de uya po.

1. Ngeenge ovanhu ovo va shanga Ombiibeli, omolwashike taku ti oya dja kuKalunga?

Ombiibeli oya shangwa kovalumenhu 40 lwaapo, momukokomoko womido hanga 1 600, okudja 1513 K.O.P. fiyo olwo 98 O.P. Ovashangi vayo ova dja momaputuko a yoolokafana. Ndele nande ongaho, oitukulwa yOmbiibeli otai tu kumwe. Osho otashi shiiva ngahelipi? Omolwaashi Kalunga oye omushangi wOmbiibeli. (Lesha 1 Ovatessaloniki 2:13.) Ovashangi vayo inava shanga omadiladilo avo vene. Ponhele yaasho, ova “popya eendjovo daKalunga tava wilikwa komhepo iyapuki.”a (2 Petrus 1:21) Kalunga okwa longifa omhepo yaye iyapuki opo i nwefe mo, ile i linyengife ovalumenhu ovo va shange omadiladilo aye.— 2 Timoteus 3:16.

2. Mbela ovanhu aveshe otava dulu ngoo okumona ouwa mOmbiibeli?

Ovanhu ‘vomoiwana, vomihoko, vomalaka novomaludi aeshe,’ otava dulu okumona ouwa monghundana iwa oyo tai hangwa mOmbiibeli. (Lesha Ehololo 14:6.) Kalunga okwa shilipaleka kutya Ombiibeli oya shangwa momalaka mahapu ngaashi tashi shiiva, i dule nokuli omambo mahapu mondjokonona. Konyala keshe umwe ota dulu okulimonena Ombiibeli, kashi na nee mbudi kutya oku li peni, ile oha popi elaka lilipi.

3. Jehova okwa amena ngahelipi Ombiibeli iha hanaunwe po?

Ombiibeli oya li ya shangwa koinima oyo hai dulu okukulupa diva, ngaashi koipa nosho yo komanenge. Ashike ovalumenhu ovo va li ve hole Ombiibeli ova li ve i tapa noukeka, tave i shangulula komake. Nonande ovanhu ovanaenghono ova li va kendabala oku i hanauna po, oohandimwe ova li va tula eemwenyo davo moshiponga opo ve i amene. Jehova ina efa nande oumwe, ile oshinima shonhumba shi ye moshipala okutandavelifwa kwembo olo ha longifa okupopya nafye. Ombiibeli oya ti: “Ondjovo yaKalunga ketu otai kala po fiyo alushe.”— Jesaja 40:8.

KONAKONA MOULE

4. Ombiibeli oya popya kombinga yOmushangi wayo

Dana OKAVIDIO, opo nee to lesha 2 Timoteus 3:16, ndele tamu kundafana omapulo taa shikula.

OKAVIDIO: Olyelye omushangi wOmbiibeli?— Okatukulwa kaxupi (2:48)

• Ngeenge Ombiibeli oya shangwa kovanhu, omolwashike tai ifanwa Eendjovo daKalunga?

• Mbela oto diladila kutya oshi li pandunge okwiitavela kutya Kalunga okwa yandja omadiladilo aye kovanhu opo ve a shange?

5. Ombiibeli oya xupa nonande opa li ovo va hala oku i hanauna po

OKAVIDIO: Ova li va lenga Ombiibeli— Okatukulwa kaxupi (William Tyndale) (6:17)

• Okutala keenghendabala adishe odo da ningwa po mokuxupifa Ombiibeli, mbela oshe ku linyengifa u kale wa hala oku i lesha? Omolwashike?

Lesha Epsalme 119:97, ndele tamu kundafana epulo tali shikula:

• Oshike she linyengifa ovanhu vahapu va tule eemwenyo davo moshiponga opo va toloke Ombiibeli noku i andjakaneka?

6. Embo olo tali dulu okweetela aveshe ouwa

Ombiibeli oyo embo olo la tolokwa nokwaandjakanekwa li dule omambo aeshe mondjokonona. Lesha Oilonga 10:34, 35, ndele tamu kundafana omapulo taa shikula:

• Omolwashike Kalunga a hala Eendjovo daye di tolokwe momalaka mahapu nokwaandjakanekwa?

• Oshike u hole kombinga yOmbiibeli?

ENGONGO

Ombiibeli oi li Eendjovo daKalunga, nokwa shilipaleka kutya ovanhu aveshe otava dulu oku i lesha.

Eendululo

• Osha hala okutya ngahelipi eshi taku ti Kalunga okwa nwefa mo ovanhu va shange Ombiibeli?

• Oshike she ku kumwifa shi na sha nonghedi omo Ombiibeli ya xupa, ya tolokwa noku andjakanekwa?

• Ou shi uditile ngahelipi eshi Kalunga a ninga eenghendabala adishe odo opo a kale ha popi naave okupitila mEendjovo daye?

TALA OUYELELE WA WEDWA PO

Lesha kombinga yondjokonona yOmbiibeli; okudja ngoo komashangelo opehovelo fiyo oketoloko olo li li ko kunena.

“Nghee Ombiibeli ya xupa fiyo okunena” (Kala oupafi!, Novemba 2007)

Lihonga nghee Ombiibeli ya xupa moiponga yopatatu inene.

“Nghee Ombiibeli ya xupa” (Oshungonangelo No. 4 2016)

Tala nghee vamwe va li va tula eemwenyo davo moshiponga eshi va li tava toloka Ombiibeli.

Ova li va lenga Ombiibeli (14:26)

Ombiibeli oya kala nokutapwa nokutolokululwa lwoikando ihapu. Ongahelipi hatu dulu okukala noushili kutya etumwalaka lOmbiibeli inali lunduluka?

“Mbela etumwalaka lOmbiibeli ola lundululwa?” (Oshitukulwa shi li ko jw.org)