Ombibeli Eendjovo ngoo daKalunga shili?

OMUYAPOSTOLI Paulus ina longifa tuu eendjovo di na eenghono odo tadi ulike kutya Ombibeli oi na ongushu neenghono! Oshoshili kutya okwa li ta popi kondadalunde kombinga yoshitukulwa shOmbibeli osho sha li po pefimbo laye, omambo Ombibeli oo ovanhu vahapu hava ti Etestamenti Likulu. Ndele nande ongaho, eendjovo odo Paulus a popya otadi longo yo komambo Ombibeli aeshe 66, mwa kwatelwa oo a shangwa kovahongwa vaJesus ovadiinini mefelemudo lotete O.P.

Mbela naave owa lenga ngoo Ombibeli neenghono ngaashi Paulus? Mbela oto diladila kutya ovashangi vOmbibeli ova nwefwa mo shili kuKalunga? Ovakriste vashili vomefelemudo lotete ova li va itavela kutya Ombibeli oya nwefwa mo kuKalunga. Pashihopaenenwa, omuwiliki welongelokalunga Omwiingilisha wedina John Wycliffe womefelemudo 14, okwa li a tala ko Ombibeli i li “omhango yoshili i shii okulineekelwa.” O-The New Bible Dictionary oya popya kombinga yeendjovo daPaulus odo da tumbulwa metetekelo ya ti kutya Kalunga oye a “nwefa mo Ombibeli, onghee hano, oinima aishe oyo i li mo oyoshili.”

Oikala yovanhu i na sha nOmbibeli oya enda tai lunduluka

Mefimbo opo la di ko, ovanhu vahapu ova enda tava kanifa elineekelo lavo mOmbibeli. Embo The World’s Religions ola ti: “Pakutala, Ovakriste aveshe ova dimina [natango] kutya Ombibeli oi shii okulineekelwa, mokuwilika eenghatu davo nosho yo shi na sha neitavelo.” Ndele paulelalela, osho hasho shi li vali ngaho. Ovanhu vahapu ova tala ko Ombibeli kutya oi li “eenghulunghedi dovanhu dihe fi okulineekelwa.” Nonande ova dimina kutya ovashangi vOmbibeli ova li ovalumenhu ve na eitavelo linene, ove va tala ko kutya ova li ashike ovanhu vongaho ovo va li tava kendabala okuyelifa eeshili dopamhepo domoule ndele kava li ve na eshiivo nosho yo ouyelele oo tu na kunena.

Kunena, ovanhu ashike vanini hava wilikwa shili kOmbibeli mokudiladila nosho yo meenghatu davo. Pashihopaenenwa, mbela olungapi ho udu ovanhu tava ti kutya omifikamhango dOmbibeli dopaenghedi odonghuluyonale noitadi kwafa sha? Ovanhu vahapu ove udite va manguluka okuhekula eemhango nomafinamhango Ombibeli ile ve e lipwililikile nokuli filufilu ngeenge ove wete itae va wapalele. Vamwe ovo have liti Ovakriste ohave lipwililikile filufilu osho Ombibeli ya popya kombinga yoluhaelo, eteyohombo, oukengeleledi nosho yo oukolwe. — 1 Ovakorinto 6:9, 10.

Omolwashike mbela shi li ngaho? Lwopehovelo lefelemudo eti-20, omulafululi umwe woinima Sir Charles Marston okwa popya etomheno limwe membo laye ledina Ombibeli oyoshili a ti kutya ovanhu ova endelela “okutambula ko nopehe na okungongota omakembaulo nomafekelo ovashangi vokunena” ovo ve li omhinge noulineekelwa wOmbibeli. Mbela osho osho shi li ngaho nokunena? Ou na okutala ko ngahelipi omadiladilo nomaetepo ovahongwanhu ovo tava ningifa ovanhu va kanife elineekelo mOmbibeli? Natu ka tale kutya oshitukulwa tashi landula otashi ka tya shike kombinga yaasho.