Owii otau ka xulifwa po shili!

KALUNGA okwe tu pa Eendjovo daye da nwefwa mo odo tadi yelifa kutya omolwashike ovanhu hava longo owii. Okwe tu shita tu na emanguluko lokuninga omatokolo nohatu dulu okukulika oukwatya welipangelo, oinima oyo hai tu kwafele tuha longe owii. (Deuteronomion 30:15, 16, 19) Molwaashi otwa shitwa hatu dulu okuninga ngaho, ohatu dulu okulikonakona tu tale ngeenge otwa kwatwa keamo lonhumba lii notu na okukatuka eenghatu odo da pumbiwa opo tu yukife eenghatu detu. Ngeenge otwa ningi ngaho, ohatu ka henuka okulonga owii nohatu ka kala twa hafa nokuhafifa yo ovo ve tu dingilila. — Epsalme 1:1.

Ndele nande ongaho, kutya nee otu ninge eenghendabala pauhandimwe di fike peni opo tu henuke okulonga owii, ovanhu onghee ngoo tava twikile okulongelwa owii kovanhu vakwao. Ombibeli oye tu londwela tai ti: “Kala u shi shii, omomafiku axuuninwa otape ke uya omafimbo madjuu.” Ombibeli oya popya yo kutya oshike tashi ka ningifa pa kale “omafimbo madjuu,” ya ti: “Ovanhu tava kala nokulihola vo vene, ovanalwisho voimaliwa, ovalitangi, novalinenepeki novasheki, ve he neduliko kovakulunhu, ve he shii kupandula, ve he neitavelo, ve he nohole, ve he nombili, ovalundili, ovahenalidiliko, ovakwanyanya, ovatondi vouwa, ovakengeleledi, ovahayavala, ovafulalali, ohole yavo yokuhola ouhalu mwii i dule ei yokuhola Kalunga; ovo ve nemoniko longaho letilokalunga, ndelenee tava shilike eenghono dalo. Naava ve li ngaha, va kukuma.” — 2 Timoteus 3:1-5.

Otashi dulika wa didilika outumbulilo “omomafiku axuuninwa” oo wa popiwa meendjovo dopaxunganeko odo da tetekela. Mbela outumbulilo oo otau ti shike kwoove? Ovanhu vahapu ove udite ko kutya outumbulilo ‘omafiku axuuninwa’ otau ulike kutya ope na oshinima shonhumba osho tashi ka xula po. Mbela oshike osho tashi ka xula po? Didilika osho Kalunga a udaneka mEendjovo daye.

Ovalongi vowii otava ka xulifwa po filufilu

“Ngenge pa pita okafimbo kaningholi, omuhenakalunga ita kala po vali, [nongeenge] to talaatala onhele yaye, ke po vali nande. Ndelenee ovananheni vo otava ka fyuulula edu, ndee tava ka hafela ombili inene.” — EPSALME 37:10, 11.

“Omwene oha amene aveshe, ava ve mu hole, ndelenee ovadudu aveshe ote va kombo po.” — EPSALME 145:20.

Itapa ka kala vali omafininiko.

“Otai ka xupifa epongo eli tali kuu onghuwo li kwafwe, nomukwanaluhepo ou e he na omukwafi. Ndee tai di kulile momafininiko nomomalwifo.” — EPSALME 72:12, 14.

“Oishitwa yovene otai ka mangululwa moupika wenyonauko i ye memanguluko loshinge shovana vaKalunga.” — OVAROMA 8:21.

Ovanhu otava ka wanifilwa po eemhumbwe davo dopainiwe.

“Otava ka kala omutumba, keshe umwe, momudile womuviinyu waye nowomukwiyu waye, ndele kape na ou te va tilifa.” — MIKA 4:4.

“Otava ka dika omaumbo ndee tava kala mo, ndele tava twike oikokola yomiviinyu, ndee tava li oiimati yayo; itava ka tunga mu kale vamwe, ihava ka twika, vamwe ngeno va lye oiimati yavo, osheshi ngaashi omafiku omiti e li, osho tashi ka kala yo omafiku ovanhu vange. Ovahoololwa vange ovo vene tava ka shambukilwa oilonga yomake avo.” — JESAJA 65:21, 22.

Kombada yedu otaku ka kala ouyuki.

“Kalunga ita yukifile mbela ovahoololwa vaye oshinima shavo ava have mu ifana pombada omutenya noufiku? . . . Ohandi mu lombwele: ote shi va yukifile divadiva.” — LUKAS 18:7, 8.

“Omwene oku hole ouyuki, novadiinini vaye ite va efa nande. Ote va amene fiyo alushe.” — EPSALME 37:28 yelekanifa no-OB-1986.

Ovanhu itava ka kala vali ve lihole vo vene, otava ka longa ashike ouyuki.

“Ovakwaunyuni otave lilongo ouyuki.” — JESAJA 26:9.

“Paudaneko laye fye hatu teelele eulu lipe nedu lipe omo tamu ka kala ouyuki.” — 2 PETRUS 3:13.

Ovanhu otava lundulula oikala yavo nokuli nopaife

Nopehe na omalimbililo, atusheni ohatu ka hafela omaudaneko a tya ngaho. Ndele eshilipaleko lilipi olo tali ulike kutya omaudaneko oo otaa ka wanifwa? Kunena, otu na oumbangi oo tau ulike kutya omaudaneko aKalunga otaa ka wanifwa shili. Mbela oumbangi ulipi tu na? Oumbangi oyoo kutya ovanhu omamiliyona mounyuni aushe kunena ova pondola okweefa po oinima ngaashi, oikala yokuliholamwene, oluhaelo ile elongifo leenghono loludi keshe, ndele tave lihongo okukala ovanashili, ovanambili nosho yo ovanalukeno. Eendombwedi daJehova kunena odo da konda pomamiliyona aheyali, odi li oshitukulwa shoumwainafana wopaiwana noda efa po oinima ngaashi okakombo noludi, oukwamuhoko, oukwashiwana, okutukaulwa keepolotika nosho yo keendodo dopamaliko. Oinima ya tya ngaho oya etifa outondwe munene, elongifo leenghono nosho yo etiko lohonde mondjokonona aishe yovanhu.a Molwaashi omalunduluko oo otaa ningwa kunena, osho otashi tu pe etomheno la kola lokwiitavela kutya omaudaneko aKalunga otaa ka wanifwa monghedi ya tongomana.

Ndele mbela oshike tashi ka etifa omalunduluko a tya ngaho? Enyamukulo lepulo olo otali hangwa meudaneko vali limwe lOmbibeli, mexunganeko lomuprofeti Jesaja. Jesaja okwa ti:

“Embungu otali li pamwe nodi, nongwe otai nangala pamwe noukombwena; nokatana nonghoshi yonyasha nohove otadi lile mumwe ndee tadi lifwa kokamati kanini. . . . Nonghoshi otai li omwiidi ngaashi ongobe. Ndele okaana kokomavele otaka danaukile pokwena kweuta, nokaana ka tova otaka twala eenyala dako komukwena wandevadele. Ndele vo itava ka ninga owii ile okunyona sha komhunda yange aishe iyapuki; osheshi edu alishe otali ka kala li yadi eshiivo lokushiiva Omwene, ngaashi omeva a tuvikila efuta.” — Jesaja 11:6-9.

Mbela exunganeko olo otali xunganeke ashike kombinga yefimbo olo ovanhu noinamwenyo tava ka kala pamwe nombili? Ahowe, ola kwatela mo shihapu shi dulife opo. Didilika kutya oshitukulwa shaxuuninwa shexunganeko olo osha popya kutya oshike tashi ka etifa po omalunduluko oo, sha ti: “Edu alishe otali ka kala li yadi eshiivo lokushiiva Omwene.” Mbela eshiivo lokushiiva Kalunga ohali lundulula ngoo oikala yoinamwenyo? Hasho. Ndele eshiivo olo ohali dulu okulundulula nola lundulula oikala yovanhu. Exunganeko olo otali ulike kutya ovanhu ovo tashi dulika ve na oikala ya fa yoinamwenyo otave ke i efa po ndele tava kulike omaukwatya a fa aKristus, molwaashi otave ke lihonga Ombibeli notava ka tula moilonga osho tai hongo.

Natu ka taleni koshihopaenenwa shaPedro.b Pedro okwa li a ninga oshilyo shongudu yoikulo, molwaashi okwa li a itavela kutya ota kondjele ouyuki. Konima eshi a deulilwa oukulo, okwa li a lombwelwa a ka hanaune po oshitaashi yopolifi. Ndele fimbo a li te lilongekida oku ka hanauna po oshitaashi oyo, okwa li a mangwa po. Pedro okwa kala modolongo oule weemwedi 18, nokwa kala ta twikile okutwa omhinge nepangelo. Fimbo Pedro a li natango modolongo, omukulukadi waye okwa li a hovela okukonakona Ombibeli nEendombwedi daJehova. Eshi Pedro a mangululwa, okwa li a hovela okukonakona Ombibeli nokwe linyengifwa kwaashi e lihonga kombinga yaJehova Kalunga, ndele ta lundulula filufilu oikala yaye nosho yo etaleko laye li na sha nomwenyo. Pedro okwa ti: “Ohandi pandula Jehova eshi inandi dipaa omunhu omido odo nda li oshikulo. Paife ohandi longifa eongamukonda lomhepo yaKalunga, Ombibeli, opo ndi twaalele vamwe etumwalaka lombili yashili nolouyuki, sha hala okutya, onghundana iwa yOuhamba waKalunga.” Pedro okwa li nokuli a ya koshitaashi yopolifi oyo kwa li a hala okuhanauna po, a twaalela ovapolifi etumwalaka lombili noku va honga kombinga younyuni omo itamu ka kala elongifo leenghono.

Okushiiva kutya Eendjovo daKalunga odi na eenghono odo tadi dulu okulundulula ovanhu, okwe tu pa omatomheno a wedwa po okwiitavela kutya eudaneko laKalunga lokuxulifa po owii aushe otali ka wanifwa. Oshoshili kutya ovanhu itava ka longa owii fiyo alushe, ndele ponhele yaasho, otava ka lundulula oikala yavo va ninge ovanhu va xwepo. Mafiku Jehova ota ka hanauna po omweetifi wowii iha monika, Satana Ondiaboli, oo e li konima yowii noha i olunyala moinima younyuni. Ombibeli oya ti: “[Ounyuni] aushe ou li mepangelo lomunawii.” (1 Johannes 5:19) Ashike mafiku Satana ota ka hanaunwa po. Ovakolokoshi ovo inava hala okulialuluka navo otava ka hanaunwa po. Itashi ka kala tuu shihokwifa okukala po pefimbo olo!

Ndele mbela oshike osho omunhu e na okuninga opo a dule okukala netimaumbwile li na sha nonakwiiwa ya tya ngaho? Natu dimbulukeni kutya oikala yovanhu kunena otai lunduluka ‘omolweshiivo lokushiiva Omwene’ notali ka etifa yo omalunduluko mounyuni oo u li poduka. Ngeenge owa mono eshiivo lashili lOmbibeli nokutula moilonga osho to lihongo ngaashi Pedro, naave oto dulu okukala netimaumbwile loku ka kala mounyuni omo “tamu ka kala ouyuki.” (2 Petrus 3:13) Onghee hano, ohatu ku ladipike u longife nawa omhito oyo u na natango u lihonge opo u mone eshiivo lokushiiva Kalunga nosho yo Jesus Kristus, nokungaho, oto dulu oku ka mona omwenyo waalushe. — Johannes 17:3.

[Omashangelo opedu]

[Eendjovo dididilikwedi pepandja 9]

Naave oto dulu okukala netimaumbwile loku ka kala mounyuni omo “tamu ka kala ouyuki.” — 2 PETRUS 3:13