ماۋسىم
1-ماۋسىم، جەكسەنبى
ٴبىز قۇداي پاتشالىعىنا تالاي ازاپ شەگۋ ارقىلى كىرۋىمىز كەرەك (ەل. ٸس. 14:22).
ەحوبا جاڭا جاعدايلارعا بەيىمدەلە بىلگەن ٴبىرىنشى عاسىرداعى ماسىحشىلەردى جارىلقادى. ولار كوپ قۋعىن-سۇرگىن كورگەن. كەيدە بۇل ويلاماعان جەردەن بولاتىن. پاۋىل مەن بارنابانىڭ ليسترا توڭىرەگىندە ۋاعىزداپ جۇرگەن كەزىن الايىقشى. العاشىندا جۇرت ولاردى جاقسى قابىلداپ، ۇيىپ تىڭدايدى. ٴبىراق قارسىلاستار «جۇرتتى ۇگىتتەپ»، پاۋىل مەن بارناباعا ايداپ سالعاندا، الگى تىڭداپ تۇرعان ادامداردىڭ كەيبىرى سولارعا قوسىلىپ، پاۋىلدى تاسپەن اتقىلايدى دا، ٶلىمشى كۇيدە تاستاپ كەتەدى (ەل. ٸس. 14:19). ٴبىراق پاۋىل مەن بارنابا ول جەردەن كەتىپ، باسقا جاققا بارىپ ۋاعىزداي بەرەدى. ناتيجەسىندە، ولار «ٴبىراز ادامدى شاكىرت ەتەدى» ٵرى ٶز ۇلگىلەرىمەن جانە سوزدەرىمەن باۋىرلاستاردىڭ سەنىمىن نىعايتادى (ەل. ٸس. 14:21، 22). بارنابا مەن پاۋىلدىڭ قۋدالانسا دا كەرى شەگىنبەي، ۋاعىزداي بەرگەندەرى كوبىسىنە پايداسىن تيگىزدى. دەمەك، ٴبىز دە ەحوبا تاپسىرعان ٸستى قايتپاس قايسارلىقپەن اتقارا بەرسەك، مىندەتتى تۇردە باتاسىنا كەنەلەمىز. 23w.04 16، 17-ب.، 13، 14-ابز.
2-ماۋسىم، دۇيسەنبى
ۋا، ەحوبا، دۇعاما قۇلاق سالشى، كومەك سۇراعان وتىنىشىمە دەن قويشى. باسىما كۇن تۋعاندا ٶزىڭدى شاقىرامىن، ويتكەنى سەن جاۋاپ بەرەسىڭ (ٴزاب. 86:6، 7).
ٴداۋىت پاتشانىڭ كوزىن قۇرتقىسى كەلگەن دۇشپاندارى كوپ بولعان. ٴبىراق ول ەحوباعا دۇعا ەتىپ، كومەك سۇرايتىن. ول ەحوبا ونىڭ دۇعالارىن تىڭدايتىنىنا جانە جاۋاپ بەرەتىنىنە ەش كۇماندانباعان. ٴبىز دە وسىعان سەنىمدى بولا الامىز. كيەلى كىتاپتا ايتىلعانداي، ەحوبا قيىندىقتاردى ەڭسەرۋگە دانالىق پەن كۇش بەرەدى. سونداي-اق ول بىزگە كومەكتەسۋ ٷشىن رۋحاني وتباسىمىزدى، ٴتىپتى وعان عيبادات ەتپەيتىن ادامداردى دا قولدانا الادى. ەحوبا دۇعامىزعا ۇنەمى ٴبىز قالاعانداي جاۋاپ بەرمەسە دە، جاۋاپسىز قالدىرمايدى. ەحوبا بىزگە ٴدال كەرەگىن بەرەدى جانە ونى ەڭ دۇرىس ۋاقىتتا ىستەيدى. سونىمەن، ەحوبا قازىردىڭ وزىندە قامىڭىزدى جاسايتىنىنا جانە جاڭا دۇنيەدە «بارشا تىرشىلىك يەلەرىنىڭ قاجەتىن بەرەتىنىنە» سەنىمدى بولا وتىرىپ، دۇعا ەتۋدى دوعارماڭىز (ٴزاب. 145:16). 23w.05 8-ب.، 4-ابز.؛ 13-ب.، 17، 18-ابز.
3-ماۋسىم، سەيسەنبى
ەحوبانىڭ جاساعان بار جاقسىلىعىن قالاي وتەيمىن؟ (ٴزاب. 116:12).
ماقساتىڭىزعا جەتكەندە توگىلەتىن باتالارعا نازار تىككەنىڭىز جاقسى. ال ٴسىز ٶز ماقساتىڭىزعا جەتسەڭىز، قانداي باتالارعا كەنەلەسىز؟ مىسالى، ٴسىز كيەلى كىتاپ وقۋدى، دۇعاڭىزدى جاقسارتۋدى ماقسات ەتسەڭىز، ناتيجەسىندە ەحوبامەن دوستىعىڭىز قالاي نىعاياتىنىن ويلاڭىز (ٴزاب. 145:18، 19). ال قانداي دا ٴبىر قاسيەت دامىتۋعا ۇمتىلساڭىز، وزگەلەرمەن قارىم-قاتىناسىڭىز قالاي جاقساراتىنىن ويلاڭىز (قول. 3:14). قانداي دا ٴبىر ماقساتقا نە ٷشىن جەتكىڭىز كەلەتىنىن ٴتىزىپ جازىپ قويىڭىز. اراگىدىك سول تىزىمگە قاراپ تۇرىڭىز. بۇعان قوسا، ىقىلاسىڭىزدى ارتتىراتىن ادامدارمەن ارالاسىڭىز (ناق. س. 13:20). شىنى كەرەك، ماقساتقا جەتۋ ٷشىن ارەكەتتەنۋگە كەيدە ەش ىقىلاسىمىز بولماي تۇرادى. ىقىلاسىمىز بولماسا، ەندى ەشقايدا قوزعالا المايمىز دەگەن ٴسوز بە؟ ماقساتىمىزدىڭ جولىندا تالاپتانىپ، ارەكەت ەتە بەرگەنىمىز ٴجون. بۇل ٷشىن، ارينە، ٶزىمىزدى تارتىپكە سالۋ كەرەك بولاتىن شىعار. ٴبىراق كوپ ۇزاماي بۇنىڭ جاقسى جەمىسىن كورەسىز. 23w.05 27، 28-ب.، 5—8 ابز.
4-ماۋسىم، سارسەنبى
ادام نە ەكسە، سونى ورادى (عال. 6:7).
ىستەگەن ٸسىمىز ٷشىن جاۋاپتى ەكەنىمىزدى تۇسىنسەك، قاتەلىگىمىزدى مويىندايمىز، تۇزەلۋگە جانە ونى قايتالاماۋعا تىرىسامىز. سونىڭ ارقاسىندا ٶمىر جارىسىنان شىعىپ كەتپەيمىز. شالىس قادام باسقان بولساڭىز، نە ىستەسەڭىز بولادى؟ بولار ٸس بولدى، ەندى وتكەندى وزگەرتە المايسىز. ٶزىڭىزدى اقتاپ نە كەرىسىنشە كىنالاپ، يا باسقا بىرەۋدى ايىپتاپ، كۇش كەتىرمەي-اق قويىڭىز. قايتا، قاتەلىگىڭىزدى مويىنداپ، قازىر قولىڭىزدان نە كەلەدى، سونى جاساي بەرىڭىز. ىستەگەن جامان ٸسىڭىز ٷشىن ار-ۇجدانىڭىز قيناپ جاتسا، ەحوباعا كىشىپەيىلدىلىكپەن دۇعا ەتىڭىز. قاتەلىگىڭىزدى مويىنداپ، ودان كەشىرىم سۇراڭىز (ٴزاب. 25:11؛ 51:3، 4). بىرەۋدى جارالاعان بولساڭىز، ودان دا بارىپ كەشىرىم سۇراڭىز. قاجەت بولسا، اقساقالداردىڭ كومەگىنە جۇگىنىڭىز (جاق. 5:14، 15). قاتەلىگىڭىزدەن ساباق الىپ، قايتالاماۋعا تىرىسىڭىز. سوندا ەحوبا سىزگە مىندەتتى تۇردە راقىم تانىتىپ، قاجەتتى كومەگىن بەرەدى (ٴزاب. 103:8—13). 23w.08 28، 29-ب.، 8، 9-ابز.
5-ماۋسىم، بەيسەنبى
ٴدىني قىزمەتكەر ەحوداي نۇسقاۋ بەرىپ وتىرعان كەزدىڭ بارىندە جوعاس ەحوبانىڭ الدىندا ۇنامدى ارەكەت ەتىپ ٴجۇردى (پات. 2-ج. 12:2).
ەحوداي جوعاس پاتشاعا جاقسى ىقپال ەتتى. جاس كەزىندە جوعاس ەحوباعا ۇنامدىنى ىستەۋگە نيەتتى ەدى. ٴبىراق ەحوداي قايتىس بولعان سوڭ، ول جولدان تايعان بەكزادالارعا ەرىپ كەتتى (شەج. 2-ج. 24:4، 17، 18). بۇعان قاتتى جۇرەگى اۋىرعان «ەحوبا ولاردى وزىنە قايتارۋ ٷشىن پايعامبارلارىن جىبەرگەنمەن،.. ولار قۇلاق اسۋدان باس تارتتى». ولار ٴتىپتى ەحودايدىڭ ۇلى زاكاريانى دا — ەحوبانىڭ پايعامبارى ٵرى ٴدىني قىزمەتكەر بولسا دا، ٴتىپتى جوعاس پاتشانىڭ نەمەرە باۋىرى بولسا دا — تىڭدامادى. بۇدان دا سوراقىسى، جوعاس پاتشا زاكاريانى ٶلتىرتتى (شەج. 2-ج. 22:11؛ 24:19—22). ول ەحوبادان قورىقپاي كەتتى. ەحوبا: «مەنى مەنسىنبەيتىندەر جۇرتتىڭ بارىنە جەكسۇرىن بولادى»،— دەگەن بولاتىن (سام. 1-ج. 2:30). سيريانىڭ از عانا اسكەرى جوعاستىڭ قالىڭ اسكەرىن ويران ەتىپ، ال ٶزىن قاتتى جارالايدى (شەج. 2-ج. 24:24، 25). ال كەيىنىرەك، كەزىندە زاكاريانىڭ قانىن توككەنى ٷشىن، بۇل زۇلىم پاتشانى ٶز قىزمەتشىلەرى ٶلتىرىپ كەتەدى. 23w.06 18، 19-ب.، 16، 17-ابز.
6-ماۋسىم، جۇما
كەزىندە سەندەر تۇنەك ەدىڭدەر، ال ەندى... جارىقسىڭدار (ەفەس. 5:8).
ەلشى پاۋىل ەفەس قالاسىندا ٴبىراز ۋاقىت بولىپ، ىزگى حاباردى ۋاعىزداپ، ٴتالىم بەرگەن (ەل. ٸس. 19:1، 8—10؛ 20:20، 21). ول سونداعى باۋىرلاستاردى قاتتى جاقسى كوردى ٵرى ولارعا ەحوباعا ادالدىق ساقتاۋعا كومەكتەسكىسى كەلدى. بۇرىن ەفەستىكتەر جالعان ٴدىننىڭ ىلىمدەرى مەن ىرىمشىلدىقتىڭ قۇرساۋىندا بولعان. ەجەلدە ەفەس ازعىندىق پەن ورەسكەل قىلىقتارعا بەلشەسىنەن باتقان قالا ەدى. تەاتر ساحنالارىندا، ٴتىپتى ٴدىني مەرەكەلەردە ۇياتسىز، تۇرپايى اڭگىمەلەر كوپ ايتىلاتىن (ەفەس. 5:3). قالا تۇرعىندارىنىڭ كوبىسى «ۇياتتان ابدەن بەزگەن» ەدى. ٴتۇپنۇسقاداعى بۇل تىركەس سوزبە-ٴسوز «اۋرۋدى سەزبەي قالعان» دەپ اۋدارىلادى (ەفەس. 4:17—19). دەمەك، نەنىڭ شىنىمەن دە دۇرىس، ال نەنىڭ بۇرىس ەكەنىن بىلمەي تۇرعاندا، ەفەستىكتەردىڭ ار-ۇجدانى ەش مازالاماعان. سوندىقتان دا پاۋىل ونداي ادامداردى «سانالارىن قاراڭعىلىق باسىپ، قۇدايدان كەلەتىن ومىردەن شەت قالعاندار» دەپ سيپاتتاعان. دەگەنمەن ەفەستىكتەردىڭ كەيبىرى سول تۇنەكتەن شىقتى. 24w.03 20-ب.، 2-ابز.؛ 20-ب.، 4-ابز.؛ 21-ب.، 5، 6-ابز.
7-ماۋسىم، سەنبى
ەحوباعا ٷمىت ارتاتىندار... شارشامايدى (يشايا 40:31).
گەدەونعا بي بولىپ قىزمەت ەتۋ ٷشىن كوپ كۇش پەن قاجىرلىق قاجەت بولدى. تۇندە شايقاس ٴجۇرىپ جاتقاندا مادياندىقتار قاشىپ كەتىپ، گەدەون سوناۋ يوردان وزەنىنە دەيىن سوڭدارىنان قۋادى (بي. 7:22). گەدەون سول جەرگە كەلىپ، توقتاپ قالدى ما؟ جوق، ول 300 ساربازىمەن شارشاپ تۇرسا دا، يورداندى كەسىپ ٶتىپ، جاۋدىڭ سوڭىنان قۋا بەردى. اقىرىندا قۋىپ جەتىپ، مادياندىقتاردى تاس-تالقان ەتتى (بي. 8:4—12). گەدەون ەحوبا وعان كۇش دارىتاتىنىنا سەنىم ارتىپ ەدى، ەحوبا ونىڭ سەنىمىن اقتادى (بي. 6:14، 34). بىردە گەدەون مەن ساربازدارى ەكى مادياندىق پاتشانىڭ سوڭىنان جاياۋ قۋادى، ال ولار تۇيەلەرىنە ٴمىنىپ قاشسا كەرەك (بي. 8:12، 21). ٴبىراق قۇدايدىڭ كومەگىمەن يسرايلدىكتەر ولاردى ٴبارىبىر قۋىپ جەتىپ، شايقاستا جەڭىپ شىعادى. اقساقالدار دا ەش «شارشامايتىن، قاجىمايتىن» ەحوباعا ارقا سۇيەسە بولادى. ەحوبا ولارعا قاجەت كەزىندە كۇش دارىتادى (يشايا 40:28، 29). 23w.06 6-ب.، 14-ابز.؛ 7-ب.، 16-ابز.
8-ماۋسىم، جەكسەنبى
[ەحوبا] سەندەردى ەشقاشان تاستامايدى، جالعىز قالدىرمايدى (مۇس. 5-ج. 31:6).
كەز كەلگەن سىناقتا مىزعىماي تۇراتىن جۇرەككە ٴبىز دە يە بولا الامىز. سوندىقتان ەحوباعا سەنىم ارتىڭىز. ەحوباعا سەنىم ارتىپ، نۇسقاۋىنا مويىنسۇنعاننىڭ ارقاسىندا باراق بي جەڭىسكە جەتكەن. بۇكىل يسرايلدە ٴبىر تال نايزا دا، قالقان دا جوق زاماندا ەحوبا وعان قاناحاندىقتاردىڭ مۇزداي قارۋلانعان اسكەرىنە قارسى اتتانۋدى بۇيىرادى (بي. 5:8). دەبورا پايعامبار باراققا قاناحاندىقتاردىڭ قولباسشىسى سيسارانىڭ 900 سوعىس ارباسىمەن جازىق جەردە شايقاسۋدى ايتادى. تەگىس جەردە سوعىس اربالارى جۇيتكىپ، جاۋلارىنىڭ كۇشى باسىم تۇسەتىنىن بىلسە دە، باراق ەحوباعا مويىنسۇنادى. ٴسۇيتىپ، ول ساربازدارىمەن تابور تاۋىنان تۇسە بەرگەندە، ەحوبا كوكتەن نوسەر قۇيدىرىپ، جەر مي باتپاققا اينالادى. سيسارانىڭ اربالارى باتپاقتان شىعا الماي قالادى دا، ەحوبا باراقتى جەڭىسكە جەتكىزەدى (بي. 4:1—7، 10، 13—16). ٴبىز دە جەڭىسكە جەتۋ ٷشىن ەحوبادان جانە ونىڭ وكىلدەرىنەن كەلەتىن نۇسقاۋلارعا سەنىم ارتۋىمىز كەرەك. 23w.07 19-ب.، 17، 18-ابز.
9-ماۋسىم، دۇيسەنبى
سوڭىنا دەيىن تاباندىلىق تانىتقان ادام قۇتقارىلادى (مات. 24:13).
شىدامدىلىق قۇتقارىلۋ ٷشىن اسا قاجەت. ٴبىز ەجەلدەگى ادال قىزمەتشىلەر ىسپەتتى ەحوبانىڭ ۋادەلەرى ورىندالاتىن كەزدى شىداممەن كۇتۋىمىز كەرەك (ەۆر. 6:11، 12). كيەلى كىتاپ ٴبىزدىڭ جاعدايىمىزدى ديقانعا تەڭەيدى (جاق. 5:7، 8). ديقان ناقتى قاشان ٶسىپ شىعاتىنىن بىلمەسە دە، ەگىندىگىن سۋعارىپ، ايانباي ەڭبەك ەتە بەرەدى. ٴبىراق مىندەتتى تۇردە ٶنىم جينايتىنىنا سەنىمدى بولعاندىقتان، ونى شىداممەن كۇتەدى. سول سياقتى ٴبىز دە «يەمىزدىڭ قاي كۇنى كەلەتىنىن بىلمەسەك تە»، رۋحاني ىستەردەن قولىمىز بوساماۋ كەرەك (مات. 24:42). ەحوبا ۋادەلەرىن ٶزى بەلگىلەگەن ۋاقىتتا ورىندايتىنىنا سەنىمدى بولعاندىقتان، سابىرمەن كۇتە بەرەمىز. ال ەگەر شىدامسىز بولساق، كۇتۋدەن جالىعىپ، بىرتە-بىرتە شىندىقتان الىستاپ كەتۋىمىز مۇمكىن. ٴتىپتى بار نازارىمىز وزىمىزگە ۇنايتىن نارسەلەرگە اۋىپ كەتۋى دە ىقتيمال. ٴبىراق شىدامدى بولساق، سوڭىنا دەيىن تاباندى بولىپ، قۇتقارىلامىز (ميحا 7:7). 23w.08 22-ب.، 7-ابز.
10-ماۋسىم، سەيسەنبى
باشپايلار جارتىلاي تەمىردەن، جارتىلاي سازدان بولدى (دان. 2:42).
دانيال 2:41—43 جازىلعان پايعامبارلىقتى دانيال جانە ايان كىتابىنداعى باسقا دا پايعامبارلىقتارمەن سالىستىرا كەلە، تابان — قازىرگى زامانداعى ەڭ قۋاتتى دەرجاۆا — انگلو-امەريكا وداعىن بىلدىرەدى دەپ تۇيىندەيمىز. دانيال بۇل دەرجاۆانى «جارتىلاي بەرىك، جارتىلاي مورت سىنعىش پاتشالىق» دەپ سيپاتتاعان. قاي ماعىنادا ول «جارتىلاي مورت سىنعىش»؟ ويتكەنى جۇمساق ساز، ياعني وسى دەرجاۆاداعى بۇقارا حالىق بيلىكتىڭ تەمىردەي مىقتى بولۋىنا كەدەرگى جاساپ وتىر. دانيالدىڭ وسى مۇسىنگە قاتىستى ايتقان سوزدەرىنەن ٴبىز وتە ماڭىزدى شىندىقتاردى بىلەمىز. بىرىنشىدەن، انگلو-امەريكا وداعى ٶزىنىڭ تەمىردەي كۇشتىلىگىن كورسەتىپ كەلەدى. مىسالى، دۇنيەجۇزىلىك سوعىستاردىڭ ەكەۋىندە دە بۇل ەكى ەل ۇلكەن ٴرول ويناپ، جەڭىسكە جەتكەندەردىڭ قاتارىندا بولدى. ٴبىراق بۇل مەملەكەتتەر ٶز ازاماتتارىنىڭ اراسىنداعى تالاس-تارتىستىڭ كەسىرىنەن السىرەپ وتىر، بۇل ٵرى قاراي دا سولاي بولا بەرمەك. ەكىنشىدەن، بۇكىل ادامي مەملەكەتتەردى جوياتىن قۇداي پاتشالىعى وسى انگلو-امەريكا دەرجاۆاسىنىڭ تۇسىندا كەلەدى. 23w.08 11-ب.، 12، 13-ابز.
11-ماۋسىم، سارسەنبى
بويىمدى قايعى مەڭدەگەندە، ەحوباعا جۇگىندىم، قۇدايىما جالبارىنا سيىندىم. كيەلى شاتىرىنان ول ٷنىمدى ەستىدى (ٴزاب. 18:6).
باسىنا ۇيىلگەن سىناقتار مەن قيىندىقتاردىڭ كەسىرىنەن كەيدە ٴداۋىت كۇيزەلىپ كەتەتىن (ٴزاب. 18:4، 5). ٴبىراق جاناشىر دا قامقور ەحوبا ونىڭ جانىن جادىراتاتىن. ول شارشاپ، قالجىراعان دوسىن «جاسىل جايلاۋ» مەن «سۋى مول جايىلىمدارعا» جەتەلەيتىن. سوندا ٴداۋىت قايتادان كۇش-قايراتقا كەنەلىپ، ٵرى قاراي ەحوباعا قىزمەت ەتە العان (ٴزاب. 18:28—32؛ 23:2). بۇگىندە ٴبىز دە ٶمىردىڭ تاۋقىمەتىن كورگەندە، «ەحوبانىڭ اينىماس سۇيىسپەنشىلىگىنىڭ ارقاسىندا تۇگەل جويىلىپ كەتپەيمىز» (ەرم. ز. 3:22؛ قول. 1:11). ٴداۋىتتىڭ ومىرىنە ٴجيى قاۋىپ-قاتەر تونگەن جانە جاۋلارىنىڭ كوبىسى وتە مىقتى بولعان. الايدا ول ەحوبانىڭ سۇيىسپەنشىلىگىنىڭ ارقاسىندا ٶزىن قاۋىپسىز سەزىنگەن. ٴداۋىت ٵربىر جاعدايدا ەحوبا ونىڭ قاسىندا ەكەنىن بىلگەن، سوندىقتان كوڭىلى تىنىش بولعان. ول: «[ەحوبا] بار قورقىنىشىمنان ارىلتتى»،— دەپ جىرلاعان (ٴزاب. 34:4). ٴداۋىتتىڭ قورىققانى راس، ٴبىراق ەحوبانىڭ سۇيىسپەنشىلىگى ونىڭ قورقىنىشىن سەيىلتىپ تاستاعان. 24w.01 30-ب.، 15—17 ابز.
12-ماۋسىم، بەيسەنبى
كۇناكارلار ەلىكتىرسە، كونبە (ناق. س. 1:10).
جوعاستىڭ جامانىنان جيرەن. باس ٴدىني قىزمەتكەر ەحوداي كوز جۇمعان سوڭ، جوعاس جامان ورتامەن ارالاسىپ، ەحوبانى سۇيمەيتىن ياھۋدا بەكزادالارىنا ەرىپ كەتتى (شەج. 2-ج. 24:17، 18). باسىن پالەگە ۇشىراتاتىن سول كىسىلەردەن اۋلاق بولۋدىڭ ورنىنا، سولاردىڭ ايتقانىمەن ٴجۇردى. ال ٶزىنىڭ جاقىن تۋىسى زاكاريا كەلىپ جونگە سالعاندا، جوعاس ونى تىڭداۋدىڭ ورنىنا ٶلتىرتىپ تاستادى (شەج. 2-ج. 24:20، 21؛ مات. 23:35). نەتكەن سوراقىلىق، نەتكەن ەسسىزدىك! جوعاس جاستايىنان ٶمىرىن ٴتاپ-ٴتاۋىر باستاپ كەلە جاتقان ەدى. ٴبىراق كەيىن ەحوبانىڭ جولىنان تايىپ كەتتى، ٴتىپتى قولىن قانعا مالىدى! اقىر اياعىندا ول ٶز قىزمەتشىلەرىنىڭ قولىنان ٶلدى (شەج. 2-ج. 24:22—25). اتتەڭ، ول ەحوبا مەن ونى سۇيەتىن ادامداردى تىڭداعاندا عوي، ٶمىرى بۇلاي اياقتالماس ەدى! 23w.09 9-ب.، 6-ابز.
13-ماۋسىم، جۇما
قورىقپا! (لۇقا 5:10).
يسا پەتىردىڭ اقىرىنا دەيىن ادال بولىپ قالا الاتىنىن دا ٴبىلدى. سوندىقتان: «قورىقپا!»— دەپ، ونى نىعايتىپ قويدى. يسانىڭ سەنىم بىلدىرگەنى پەتىرگە قاتتى اسەر ەتتى. ٴسۇيتىپ، باۋىرى ٵندىر ەكەۋى بالىق اۋلاۋ كاسىبىن تاستاپ، ٴماسىحتىڭ سوڭىنان ەردى. وسى شەشىمدەرى ٷشىن ەحوبا ولارعا كەرەمەت باتالار توكتى! (مار. 1:16—18). پەتىر يساعا ەرگەننىڭ ارقاسىندا عاجاپ وقيعالاردىڭ كۋاسى بولدى. اۋرۋلاردىڭ ساۋىققانىن، جىنداردىڭ قۋىلعانىن، ٴتىپتى ولگەندەردىڭ قايتا تىرىلگەنىن كوردى (مات. 8:14—17؛ مار. 5:37، 41، 42). بۇعان قوسا، ول يسانىڭ بولاشاقتاعى پاتشالىقتا قانداي ۇلىلىققا بولەنەتىنىن دە كوردى. بۇل ايان ونىڭ ومىرىندە وشپەس ٸز قالدىردى (مار. 9:1—8؛ پەت. 2-ح. 1:16—18). وسىنىڭ ٴبارىن كورەتىنى ونىڭ ٷش ۇيىقتاسا تۇسىنە كىرمەگەن شىعار! پەتىر «كەرتارتپا ويلارعا بەرىلمەگەنىم قانداي جاقسى بولعان، ايتپەسە، وسىلاردىڭ بارىنەن قۇر قالار ەدىم!» دەپ قۋانعان شىعار. 23w.09 21-ب.، 4، 5-ابز.
14-ماۋسىم، سەنبى
يسا بىلاي دەپ جاۋاپ بەردى: «ساعان ايتامىن، جەتى ەمەس، جەتپىس جەتى رەتكە دەيىن» (مات. 18:22).
ٴبىرىنشى حاتىندا ەلشى پەتىر باۋىرلاستاردى بارىنشا سۇيسەك، ٴبىر-ەكەۋىن عانا ەمەس، «كوپتەگەن كۇنانى» جابا الاتىنىمىزدى ايتقان (پەت. 1-ح. 4:8). بالكىم، وسى كەزدە بىرنەشە جىل بۇرىن يسانىڭ بەرگەن كەشىرىمدىلىك ساباعى پەتىردىڭ ەسىنە تۇسكەن بولار. سول كەزدە ول «باۋىرلاسىمدى جەتى رەت كەشىرسەم، مەنەن اسقان مەيىرىمدى ادام جوق» دەپ ويلاعان شىعار. ٴبىراق يسا «جەتى ەمەس، جەتپىس جەتى رەتكە دەيىن»، ياعني شەكسىز كەشىرە بەرۋ كەرەكتىگىن ۇيرەتتى (مات. 18:21). ەگەر قايتا-قايتا كەشىرە بەرۋ سىزگە قيىن بولسا، ەش مويىماڭىز! ەحوبانىڭ كەمەلسىز قىزمەتشىلەرىنىڭ بارلىعىنا دا بۇل قيىن بوپ جاتادى. ەڭ باستىسى، جۇرەگىڭىزدەگى رەنىشتەن ارىلىپ، باۋىرلاسىڭىزبەن تاتۋلاسۋعا قولىڭىزدان كەلگەنشە ارەكەت قىلا بەرىڭىز. 23w.09 29-ب.، 12-ابز.
15-ماۋسىم، جەكسەنبى
ەحوبانى شاقىردىم، سوندا ول ماعان جاۋاپ بەردى (ٴجۇنىس 2:2).
ٴجۇنىس بالىقتىڭ قۇرساعىندا جاتقاندا، ەحوبا كىشىرەيىپ، شىن وكىنگەن ادامنىڭ دۇعاسىن تىڭدايتىنىنا جانە كومەكسىز قالدىرمايتىنىنا سەنىمدى بولدى. تۇبىندە ەحوبا ونى قۇتقارىپ الدى. ٴجۇنىس ەندى قۇدايدىڭ بەرگەن تاپسىرماسىن موينىنا الىپ، ورىنداۋعا دايىن بولدى (ٴجۇنىس 2:10—3:4). قيىنشىلىقتار كەزىندە ۋايىمنىڭ تۇڭعيىعىنا باتىپ، دۇرىس دۇعا ەتە الماي قالاتىن كەزىڭىز بولا ما؟ وقىپ-زەرتتەۋگە دە ٵل-قۋاتىڭىز جەتپەي تۇراتىن شىعار. مۇندايدا ەحوبا ٴسىزدىڭ ٴحالىڭىزدى تولىقتاي تۇسىنەدى. سوندىقتان دۇعادا ٴبىر-ەكى اۋىز ٴسوز ايتساڭىز دا، ول ٴسىزدى ەستىپ، ٴدال كەرەگىڭىزدى بەرەدى (ەفەس. 3:20). جانىڭىز يا ٴتانىڭىز اۋىرىپ تۇرعاندىقتان وقىپ-زەرتتەۋگە شاماڭىز جەتپەي جاتسا، كيەلى كىتاپ پەن ادەبيەتتەرىمىزدىڭ اۋديوجازباسىن تىڭداپ كورسەڭىز بولادى. سونداي-اق ٴبىزدىڭ اندەرىمىز دە، jw.org تور بەكەتىندەگى بەينەروليكتەر دە سىزگە كۇش بەرەدى. ەحوباعا دۇعا ايتىپ، جاۋابىن ول بەرىپ وتىرعان رۋحاني شارالاردان ىزدەر بولساڭىز، ونىڭ ٴسىزدى نىعايتۋىنا جاعداي جاسايسىز. 23w.10 13-ب.، 6-ابز.؛ 14-ب.، 9-ابز.
16-ماۋسىم، دۇيسەنبى
كيەلى رۋح مىنانى كورسەتىپ وتىر: ٴبىرىنشى شاتىر باردا، قاسيەتتى ورىنعا ٵلى جول جابىق (ەۆر. 9:8).
كيەلى شاتىردىڭ دا، كەيىننەن يەرۋساليمدە تۇرعىزىلعان عيباداتحانانىڭ دا ىشكى جوباسى بىردەي بولعان. ولاردىڭ ىشىندە ەكى بولمە — «قاسيەتتى بولمە» مەن «ەڭ قاسيەتتى بولمە» — بولعان. ولاردىڭ اراسىن كەستەلەنگەن پەردە ٴبولىپ تۇرعان (ەۆر. 9:2—5؛ مۇس. 2-ج. 26:31—33). قاسيەتتى بولمەنىڭ ىشىندە التىن شامدال، حوش ٴيىستى زات تۇتەتەتىن قۇرباندىق ۇستەلى جانە نان تارتۋى تۇراتىن ۇستەل بولعان. قاسيەتتى بولمەگە تەك «ٴدىني قىزمەتكە تاعايىندالعاندار» عانا كىرىپ، مىندەتتەرىن اتقاراتىن (مۇس. 4-ج. 3:3، 7، 10). ەڭ قاسيەتتى بولمەنىڭ ىشىندە ەحوبانىڭ سول جەردە ەكەنىن بەينەلەيتىن التىن كەلىسىم ساندىعى تۇرعان (مۇس. 2-ج. 25:21، 22). شىمىلدىقتىڭ ار جاعىنداعى سول بولمەگە جىلىنا ٴبىر رەت كۇنانى وتەيتىن كۇنى باس ٴدىني قىزمەتكەر عانا كىرە الاتىن (مۇس. 3-ج. 16:2، 17). ول ٶزىنىڭ جانە بۇكىل حالىقتىڭ كۇناسىن وتەۋ ٷشىن سول بولمەگە مالدىڭ قانىن الىپ كىرەتىن. ۋاقىت وتە ەحوبا كيەلى شاتىردىڭ وسى بولىكتەرى نەنى بەينەلەيتىنىن اشتى (ەۆر. 9:6، 7). 23w.10 27-ب.، 12-ابز.
17-ماۋسىم، سەيسەنبى
ٴبىر-ٴبىرىڭدى سۇيىڭدەر (جوح. 15:17).
قۇداي سوزىندە «ٴبىر-ٴبىرىڭدى سۇيىڭدەر» دەپ قايتا-قايتا ايتىلعان (جوح. 15:12؛ ريم. 13:8؛ سال. 1-ح. 4:9؛ پەت. 1-ح. 1:22؛ جوح. 1-ح. 4:11). ٴبىراق سۇيىسپەنشىلىك كوزگە كورىنبەيتىن ىشتەگى سەزىم عوي. ونى قالاي ٴبىز سىرتقا كورسەتە الامىز؟ سوزىمىزبەن جانە ىسىمىزبەن. باۋىرلاستاردى جاقسى كورەتىنىمىزدى كورسەتۋدىڭ جولدارى كوپ. سولاردىڭ كەيبىرى مىنالار: «ٴبىر-بىرىڭە شىندىقتى ايتىڭدار» (زاك. 8:16). «ٶزارا تاتۋلىق ساقتاڭدار» (مار. 9:50). «ٴبىر-بىرىڭە ٴبىرىنشى بولىپ قۇرمەت كورسەتىڭدەر» (ريم. 12:10). «ٴبىر-ٴبىرىڭدى. . . قابىلداڭدار» (ريم. 15:7). «ٴبىر-ٴبىرىڭدى. . . كەشىرىڭدەر» (قول. 3:13). «ٴبىرىڭنىڭ اۋىرتپالىعىڭدى ەكىنشىڭ كوتەرىسىڭدەر» (عال. 6:2). «ٴبىر-ٴبىرىڭدى ٵردايىم. . . جۇباتىڭدار» (سال. 1-ح. 4:18). «ٴبىر-ٴبىرىڭدى. . . نىعايتىپ جۇرىڭدەر» (سال. 1-ح. 5:11). «ٴبىر-ٴبىرىڭ ٷشىن دۇعا ەتىڭدەر» (جاق. 5:16). 23w.11 9-ب.، 7، 8-ابز.
18-ماۋسىم، سارسەنبى
ۇمىتتەرىڭە قۋانىڭدار (ريم. 12:12).
ٴبىز كۇن سايىن بەرىك سەنىمدى قاجەت ەتەتىن شەشىمدەر قابىلدايمىز. مىسالى، بۇعان ارالاساتىن ورتا، كوڭىل كوتەرۋ، ٴبىلىم الۋ، نەكە، بالا-شاعا جانە جۇمىسقا قاتىستى تاڭداۋلار جاتادى. وسى ورايدا ٶزىمىزدى بىلاي تەكسەرىپ كورسەك بولادى: «مەنىڭ شەشىمدەرىمنەن مىنا دۇنيەنىڭ ۋاقىتشا ەكەنىنە ٵرى جاقىندا جاڭا دۇنيە ورنايتىنىنا سەنەتىنىم كورىنە مە؟ الدە «اسارىمىزدى اساپ، جاسارىمىزدى جاساپ قالايىق، ەرتەڭ ٴبارىبىر ولەمىز» دەيتىن ادامدار سياقتى شەشىم قابىلدايمىن با؟» (مات. 6:19، 20؛ لۇقا 12:16—21). باسىمىزعا سىناقتار تۇسكەندە دە بەرىك سەنىم قاجەت. بالكىم، قۋعىن-سۇرگىنگە، سوزىلمالى اۋرۋعا يا ەڭسەمىزدى تۇسىرەتىن باسقا ٴبىر قيىندىققا ۇشىرارمىز. العاشىندا ٴبىز بۇل قيىندىقتارعا توتەپ بەرە الاتىنداي سەزىنەمىز. ٴبىراق كوپ جاعدايدا ولار ۇزاققا سوزىلىپ جاتادى. سوندايدا مىزعىماس سەنىم بىزگە قيىندىققا ٴتوزىپ، ەحوباعا قۋانىشپەن قىزمەت ەتە بەرۋگە كۇش بەرەدى (پەت. 1-ح. 1:6، 7). 23w.04 27-ب.، 4، 5-ابز.
19-ماۋسىم، بەيسەنبى
ۇدايى دۇعا ەتىڭدەر (سال. 1-ح. 5:17).
ەحوبا بىزدەن دۇعامىزعا ساي ارەكەت ەتۋدى كۇتەدى. ٴبىر ەر باۋىرلاس ايماقتىق كونگرەسكە بارۋ ٷشىن باستىعىمنان سۇرانۋعا كومەكتەسشى دەپ دۇعا ەتەدى دەلىك. ەحوبا وعان قالاي جاۋاپ بەرۋى مۇمكىن؟ ول باۋىرلاسىمىزعا باستىعىمەن سويلەسۋگە باتىلدىق بەرە الادى. ٴبىراق ول ٶزى دە دۇعاسىنا ساي ارەكەت ەتىپ، باستىعىنان سۇرانۋى قاجەت. وعان ٴتىپتى باستىعىنىڭ الدىنا ٴبىر ەمەس، بىرنەشە رەت كىرۋ كەرەك بولار. سول كۇندەرگە باسقا جۇمىسشىمەن اۋىسۋدى نە جالاقى تولەنبەيتىن دەمالىس الۋدى ۇسىنىپ كورەتىن شىعار. ەحوبا مازالايتىن ماسەلەمىز جايلى قايتا-قايتا دۇعا ەتكەنىمىزدى قالايدى. يسانىڭ سوزدەرىنەن ٴبىزدىڭ ٶتىنىشىمىز سۇراعان بويدا ورىندالا قويمايتىنىن تۇسىنەمىز (لۇقا 11:9). ولاي بولسا، ەش مويىماي، ەحوباعا بار ىنتى-شىنتىڭىزبەن دۇعا ەتىپ، قايتا-قايتا سۇراڭىز (لۇقا 18:1—7). سوندا ٴسىزدىڭ سۇراپ جاتقانىڭىز انشەيىن وتكىنشى قالاۋ ەمەس ەكەنىن كورسەتەسىز. سونداي-اق ەحوبانىڭ سىزگە كومەكتەسە الاتىنىنا سەنەتىنىڭىز دە كورىنەدى. 23w.11 22-ب.، 10، 11-ابز.
20-ماۋسىم، جۇما
ٷمىت اقتالماي قالمايدى (ريم. 5:5).
ەحوبا دوسى ىبىرايىمعا ونىڭ ۇرپاعى ارقىلى جەر بەتىندەگى بارلىق حالىقتارعا باتاسى قوناتىنىن ۋادە ەتكەن بولاتىن (مۇس. 1-ج. 15:5؛ 22:18). قۇدايعا دەگەن سەنىمى بەرىك بولعاندىقتان، بۇل ۋادەنىڭ جۇزەگە اساتىنىنا ىبىرايىم ەش كۇماندانبادى. ٴبىراق ارادا جىلدار ٶتىپ، ىبىرايىم 100 گە، ال ايەلى 90 عا كەلدى جانە سول ۋاقىتقا دەيىن ەكەۋى بىردە-ٴبىر بالا سۇيمەدى (مۇس. 1-ج. 21:1—7). دەسە دە كيەلى كىتاپتا: «[ىبىرايىم] كوپتەگەن حالىقتاردىڭ ٴتۇپ اتاسى بولاتىنىنا ٷمىتىن ۇزبەي سەنە بەردى»،— دەلىنگەن (ريم. 4:18). بىلەتىنىمىزدەي، تۇبىندە ىبىرايىمنىڭ ٷمىتى اقتالدى. ويتكەنى كوپتەن كۇتكەن ۇلى ىسقاق دۇنيەگە كەلىپ، ول اكە اتاندى. ەحوبانىڭ ۋادەسى ٴبارىبىر ورىندالاتىنىنا ىبىرايىم نە ٷشىن سەنىمدى بولدى؟ ىبىرايىم ەحوبانى وتە جاقسى بىلگەندىكتەن، ول «ٶز ۋادەسىن ورىنداي الاتىنىنا كامىل سەنگەن» (ريم. 4:21). ىبىرايىمنىڭ سەنىمىن كورىپ، ەحوبا ونى ىقىلاسىنا بولەدى جانە ٵدىل ادام دەپ تاپتى (جاق. 2:23). 23w.12 8-ب.، 1، 2-ابز.
21-ماۋسىم، سەنبى
كىشكەنە نارسەدە سەنىمدى بولعان ۇلكەن نارسەدە دە سەنىمدى. ال كىشكەنە نارسەدە سەنىمسىز بولعان ۇلكەن نارسەدە دە سەنىمسىز (لۇقا 16:10).
سەنىمدى اقتاي بىلەتىن جاس جىگىت بۇكىل جاۋاپكەرشىلىكتەرىن ۇقىپتى اتقارادى. مىسالى، يسا ەشقاشان دا جاۋاپسىز بولىپ، مىندەتىنە ٵتۇستى قاراماعان. ول ەحوبانىڭ تاپسىرعان ٸسىن، ٴتىپتى قيىنعا سوققان كەزدە دە، اتقارىپ شىققان. ول ادامداردى، اسىرەسە ٶز شاكىرتتەرىن، جاقسى كورگەن جانە ولار ٷشىن ٶمىرىن قيعان (جوح. 13:1). سەن دە يساعا ەلىكتەپ، وزىڭە جۇكتەلگەن كەز كەلگەن تاپسىرمانى تياناقتى اتقارۋعا بارىڭدى سال. ال ەگەر تاپسىرمانى قالاي ورىنداۋدى بىلمەي جاتساڭ، كىشىپەيىلدىلىك تانىتىپ، تولىسقان ەر باۋىرلاستاردىڭ كومەگىنە جۇگىن. «ايتەۋىر جوقتان جاقسى عوي» دەپ، ٴتيىپ-قاشىپ ىستەي سالما (ريم. 12:11). قايتا، «ادامدار ٷشىن ەمەس، ەحوبا ٷشىن ىستەگەندەي» سوڭىنا دەيىن جەتكىز (قول. 3:23). ارينە، كەمەلسىز ەكەنىڭدى دە ۇمىتپاي، قاراپايىم بول جانە قاتەلىكتەرىڭدى مويىنداي ٴبىل (ناق. س. 11:2). 23w.12 26-ب.، 8-ابز.
22-ماۋسىم، جەكسەنبى
ەحوباعا سەنىم ارتاتىن... ادام جارىلقانسىن (ەرم. 17:7).
«اۋلالارىڭدا مەكەندەسىن دەپ، ٶزىڭ [ەحوبا] تاڭداپ العان، ٶزىڭ جاقىنداتقان ادام نەتكەن باقىتتى!» (ٴزاب. 65:4). بۇل سوزدەر شومىلدىرۋ راسىمىنەن وتكەن باۋىرلاستاردىڭ سەزىمىن جاقسى سيپاتتايدى. راسىندا دا، وسىنداي ماڭىزدى قادامدى جاساپ، ەحوبانىڭ وتباسىنا قوسىلۋ — اسقاق مارتەبە. ٴبىراق ەحوبا كەز كەلگەن ادامدى اۋلاسىنا شاقىرا بەرمەيدى. ول وزىمەن دوس بولعىسى كەلەتىندەردى عانا جاقىنداتىپ تارتادى (جاق. 4:8). ٴسىز باعىشتالىپ، شومىلدىرۋ راسىمىنەن وتكەن كەزدە، ەحوبا سىزگە «كول-كوسىر ەتىپ باتاسىن توگەتىنىنە» ٴبىر ساتكە دە كۇماندانباڭىز (مالح. 3:10؛ ەرم. 17:8). شومىلدىرۋ راسىمىنەن ٶتۋ — تەك باستاماسى عانا. ازعىرۋلارعا نە سىناقتارعا كەزىكسەڭىز دە، باعىشتالعاندا بەرگەن سەرتىڭىزگە ساي ٶمىر سۇرە بەرىڭىز (ۋاع. 5:4، 5). يسانىڭ شاكىرتى بولعاندىقتان، ونىڭ ۇلگىسىنە بارىنشا ەلىكتەپ، نۇسقاۋلارىن دا بەرىك ۇستانىڭىز (مات. 28:19، 20؛ پەت. 1-ح. 2:21). 24w.03 8-ب.، 1—3 ابز.
23-ماۋسىم، دۇيسەنبى
ەركەك اكە-شەشەسىن قالدىرىپ، ايەلىنە قوسىلادى (مۇس. 1-ج. 2:24).
جۇبايىڭىز ەكەۋىڭىزگە ٴبىر-بىرىڭىزبەن ۋاقىت وتكىزۋ ۇناماسا شە؟ مۇندايدا نە ىستەۋگە بولادى؟ وتتى مىسالعا الايىقشى. ول بىردەن لاۋلاپ جانىپ كەتپەيدى. وتتى تۇتاندىرۋ ٷشىن الدىمەن مايدا شىبىقتاردى تاستايمىز، ال ودان كەيىن ۇلكەندەۋ اعاشتاردى سالامىز. تۋرا سولاي، سىزدەر دە از-ازدان بىرگە ۋاقىت وتكىزۋدەن باستاڭىز، ەكەۋىڭىزگە دە ۇنايتىن ىستەرمەن اينالىسىڭىز (جاق. 3:18). وسىلاي بىرتە-بىرتە ماحابباتتارىڭىز قايتا مازدايدى. وت الاۋلاپ جانىپ تۇرۋ ٷشىن وعان وتتەگى كەرەك. تۋرا سولاي نەكەدە دە قۇرمەت اۋاداي قاجەت. وتتەگى بولماسا وتتىڭ لاپىلى تەز-اق ٶشىپ قالاتىنداي، نەكەدە دە ەكەۋارا قۇرمەت جوعالسا، ماحاببات تەز-اق سۋىپ كەتەدى. ال ٴبىر-بىرىنە قۇرمەت پەن سيلاستىق تانىتۋعا تىرىساتىن ەرلى-زايىپتىلار ارالارىنداعى ماحاببات وتىن سوندىرمەي، جالىنداتىپ وتىرادى. الايدا ٴسىز جارىڭىزدى قۇرمەتتەيمىن دەپ ويلاعانىڭىزبەن، جارىڭىز سونداي ويدا ما؟ ول ٴسىزدىڭ قۇرمەتىڭىزدى سەزە مە؟ ماسەلە وسىدا. 23w.05 22-ب.، 9-ابز.؛ 23، 24-ب.، 14، 15-ابز.
24-ماۋسىم، سەيسەنبى
سارىۋايىمعا سالىنعانىمدا، سەن مەنى جۇباتىپ، جانىما جاي بەردىڭ (ٴزاب. 94:19).
ەجەلدە قۇدايدىڭ ادال قىزمەتشىلەرى دە دۇشپاندارىنىڭ يا باسقا دا قيىندىقتاردىڭ كەسىرىنەن جاندارى قىسىلىپ، ٴدىرىل قاققان (ٴزاب. 18:4؛ 55:1، 5). سول سياقتى مەكتەپتە، جۇمىستا، ۇيىمىزدە نەمەسە ۇكىمەت بىزگە قارسى شىعۋى مۇمكىن. يا بولماسا دەنساۋلىعىمىز سىر بەرگەندىكتەن ٶلىپ قالۋدان قورقاتىن شىعارمىز. سوندايدا ٶزىمىزدى دارمەنسىز سابيدەي سەزىنەرمىز. ەحوبا ٴبىزدى مۇنداي كۇيدەن قالاي شىعارادى؟ ول ٴبىزدى جۇباتىپ، جانىمىز جاي تاپقانشا قاسىمىزدا بولادى. سول ٷشىن ۇنەمى دۇعا ەتۋ جانە ٴسوزىن وقۋ ارقىلى ەحوبامەن بىرگە بولۋعا ۋاقىت ٴبولىڭىز (ٴزاب. 77:1، 12—14). وسىنى ادەتكە اينالدىرساڭىز، كەز كەلگەن قيىن جاعدايدا بىردەن ەحوباعا جۇگىنەسىز. نەدەن قورقىپ، نەنى ۋايىمداپ تۇرسىز، ٴبارىن ەحوباعا اشىق ايتىڭىز. كەيىن جازبالاردان ونىڭ ٴسوزىن تىڭداپ، جۇبانىش الىڭىز (ٴزاب. 119:28). 24w.01 24، 25-ب.، 14—16 ابز.
25-ماۋسىم، سارسەنبى
وزىنە ۇنايتىندى ىستەۋلەرىڭ ٷشىن، قۇدايدىڭ ٶزى بويلارىڭدا ىقىلاس وياتىپ، كۇش بەرىپ وتىر (ٴفىلىپ. 2:13).
ىقىلاس بولماسا، رۋحاني ماقساتقا جەتۋ وتە قيىن. ويتكەنى ىستىق ىقىلاس — ادامدى ماقسات-مۇراتىنا جەتەلەيتىن مىقتى قالاۋ، قوزعاۋشى كۇش. ٴبىزدىڭ دە ىقىلاسىمىز تاسىپ تۇرسا، وندا ماقساتىمىزعا مىندەتتى تۇردە جەتەمىز. ەندەشە، ىقىلاسىمىزدى قالاي كۇشەيتسەك بولادى؟ دۇعادا ىقىلاس سۇراڭىز. كەيدە ٴبىز كەيبىر ماقساتتارعا ٶزىمىزدى مىندەتتى سەزىنگەندىكتەن ۇمتىلىپ جاتامىز، ٴبىراق ەشقانداي ىقىلاسىمىز بولماۋى مۇمكىن. وندايدا ەحوبا سىزگە كيەلى رۋحىمەن ماقساتىڭىزعا جەتۋگە ىستىق ىقىلاس بەرە الادى. ەحوبانىڭ سىزگە جاساعان جاقسىلىقتارى تۋرالى ويلانىڭىز (ٴزاب. 143:5). ەلشى پاۋىل ەحوبانىڭ وعان تانىتقان راقىمى جايلى ويلانعاندىقتان، اۋىر ەڭبەك ەتۋگە تالپىنعان (قور. 1-ح. 15:9، 10؛ ٴتىم. 1-ح. 1:12—14). ٴسىز دە ەحوبانىڭ جاساعان جاقسىلىقتارى تۋرالى كوبىرەك ويلانساڭىز، ماقساتىڭىزعا جەتۋگە دەگەن قۇلشىنىسىڭىز ارتادى (ٴزاب. 116:12). 23w.05 27-ب.، 3—5 ابز.
26-ماۋسىم، بەيسەنبى
ەحوبانىڭ ەسىمىن داڭقتاڭدار! (ٴزاب. 113:1).
ەحوبانىڭ ەسىمىن ماداقتاساق، ول بىزگە ريزا بولادى (ٴزاب. 119:108). سوندا قۇدىرەتتى قۇداي تاعالا كەمەلسىز ادامدار سياقتى بىرەۋدىڭ ماقتاپ-ماراپاتتاۋىنا مۇقتاج با؟ ارينە، ولاي ەمەس. اكەمىز ەحوبانى ماداقتاعاندا شايتاننىڭ ٴبىز تۋرالى ايتقان وتىرىگىن دە جوققا شىعارامىز. ونىڭ ايتۋىنشا، ەشقايسىسىمىز ەحوبانىڭ جاعىندا سوڭىنا دەيىن تۇرا المايمىز. سىنالعاندا، مىنسىزدىگىمىزدەن تايىپ كەتە سالامىز. وزىمىزگە ٴتيىمدى بولىپ تۇرسا، قۇداي جولىنان اينىپ كەتەمىز (ٵيۇپ 1:9—11؛ 2:4). ٴبىراق بۇنىڭ جالعان ەكەنىن ٵيۇپ پايعامبار دالەلدەپ كەتتى. ال ٴسىز سولاي ەتەسىز بە؟ ٵربىرىمىز كوكتەگى اكەمىزدىڭ اتىن اقىرىنا دەيىن قورعاپ، مىنسىزدىكپەن قىزمەت ەتۋىمىزبەن ونى قۋانتا الامىز (ناق. س. 27:11). بۇل — ٴبىز ٷشىن زور مارتەبە. 24w.02 8، 9-ب.، 3—5 ابز.
27-ماۋسىم، جۇما
ونىڭ پايعامبارلارىنا سەنىم ارتىڭدار، سوندا ىستەرىڭ العا باسادى! (شەج. 2-ج. 20:20).
مۇسا مەن ەشۋانىڭ كۇندەرىنەن كەيىن ەحوبا حالقىنا باسشىلىق بەرۋ ٷشىن بيلەردى تاعايىندادى. سوسىن پاتشالاردىڭ تۇسىندا پايعامبارلارىن جىبەرىپ وتىردى. ادال پاتشالار سول پايعامبارلاردىڭ كەڭەسىنە قۇلاق اسقان. مىسالى، ٴداۋىت پاتشا ناتان پايعامبار ونى جونگە سالعاندا، كىشىرەيىپ، كۇناسىن مويىنداعان (سام. 2-ج. 12:7، 13؛ شەج. 1-ج. 17:3، 4). ال جوسافات پاتشا جاحازيەل پايعامباردىڭ ايتقانىنا مويىنسۇنىپ، حالىقتى «[قۇدايدىڭ] پايعامبارلارىنا سەنىم ارتۋعا» شاقىرعان (شەج. 2-ج. 20:14، 15). ەزەكيا پاتشا بولسا قىسىلتاياڭ شاقتا يشايا پايعامباردىڭ كومەگىنە جۇگىنگەن (يشايا 37:1—6). پاتشالار ونىڭ باسشىلىعىنا قۇلاق اسقان سايىن، ەحوبا ولاردى جارىلقاپ، حالقىن قورعاپ وتىرعان (شەج. 2-ج. 20:29، 30؛ 32:22). ەحوبا حالقىن پايعامبارلار ارقىلى جەتەلەپ وتىرعانى ايدان انىق ەدى. 24w.02 21-ب.، 8-ابز.
28-ماۋسىم، سەنبى
مۇندايلارمەن ەش بايلانىستارىڭ بولماسىن (ەفەس. 5:7).
شايتان ٴبىزدىڭ ەحوبانىڭ تالاپتارىن ۇستانۋعا كەدەرگى جاسايتىن ادامدارمەن ارالاسقانىمىزدى قالايدى. بىزگە تەك جۇزبە-ٴجۇز ارالاساتىن ادامدار عانا ەمەس، الەۋمەتتىك جەلىدە ارالاساتىن ادامدار دا ىقپال ەتەتىنىن ەستە ۇستاۋىمىز كەرەك. ٴبىز ازعىندىقتى قالىپتى نارسە دەيتىن وسى دۇنيەنىڭ كوزقاراسىنا قارسى تۇرۋىمىز قاجەت. ولاردىكى دۇرىس ەمەس ەكەنىن ٴبىز جاقسى بىلەمىز (ەفەس. 4:19، 20). ٶزىمىزدى تەكسەرۋ ٷشىن بىلاي دەپ ويلانساق بولادى: «مەن ارىپتەستەرىممەن، سىنىپتاستارىممەن جانە باسقا دا ەحوبانىڭ تالاپتارىن ۇستانبايتىن ادامدارمەن قاجەتسىز ارالاسپاۋعا تىرىسامىن با؟ وزگەلەر مەنى كوزقاراسىڭ تار دەپ ايىپتاپ جاتسا دا، ەحوبانىڭ زاڭ-تالاپتارىن باتىل ۇستانامىن با؟» بۇعان قوسا، تىموتەگە 2-حات 2:20—22 دەيىنگى ويلاردى ەسكەرە وتىرىپ، ٴبىز قاۋىمدا دا جاقىن دوستاردى مۇقيات تاڭداۋىمىز كەرەك. ويتكەنى قاۋىمدا دا كەيبىرەۋلەر ەحوباعا ادالدىق ساقتاۋىمىزعا كەدەرگى كەلتىرۋى مۇمكىن. 24w.03 22، 23-ب.، 11، 12-ابز.
29-ماۋسىم، جەكسەنبى
ەحوبا وتە جاناشىر (جاق. 5:11).
ٴسىز ەحوبانى قالاي ەلەستەتەسىز؟ ٴبىز ونى كورە الماساق تا، كيەلى كىتاپتا ەحوبا ٵرتۇرلى سوزدەرمەن سيپاتتالعان. مىسالى، ول «كۇنىمىز ٵرى قالقانىمىز»، «جالماپ قوياتىن وت ىسپەتتى» دەلىنگەن (ٴزاب. 84:11؛ ەۆر. 12:29). ال ەزەكيەل كورگەن اياندا ول جاقۇت تاسىنا، لاۋلاعان مەتالعا جانە جارقىراعان كەمپىرقوساققا ۇقساتىلعان (ەزەك. 1:26—28). ەحوبانى كوزىمىزبەن كورمەگەندىكتەن ونىڭ ٴبىزدى جاقسى كورەتىنىنە سەنۋ قيىن بولۋى مۇمكىن. كەيبىرەۋلەر ومىرلەرىندە كوپ قيىندىق بولعاندىقتان، ەحوبا ولاردى سۇيەدى دەگەنگە سەنە المايدى. ەحوبا وسىنداي سەزىمدەرىمىزدى، بۇل سەزىمدەر بىزگە قالاي اسەر ەتەتىنىن جاقسى تۇسىنەدى. سوندىقتان وعان جاقىنداي الۋىمىز ٷشىن بىزگە كيەلى كىتاپتا ٶزىنىڭ جىلى دا جارقىن بەينەسىن اشادى. ەحوبانى ەڭ كەرەمەت سيپاتتايتىن ٴسوز — سۇيىسپەنشىلىك (جوح. 1-ح. 4:8). ول ٵربىر ارەكەتىن سۇيىسپەنشىلىكتىڭ قوزعاۋىمەن جاسايدى. ونىڭ ماحابباتىنىڭ كەڭدىگى مەن قۇدىرەتى سونداي — ٶزىن سۇيمەيتىن ادامدارعا دا جەتەدى (مات. 5:44، 45). 24w.01 26-ب.، 1—3 ابز.
30-ماۋسىم، دۇيسەنبى
ولارعا بۇلت باعاناسىنان سويلەۋشى ەدى (ٴزاب. 99:7).
ەحوبا مۇسانى يسرايلدىكتەردى مىسىردان الىپ شىعۋعا تاعايىندادى. حالىقتى جەتەلەپ كەلە جاتقانىن دالەلدەيتىن ناقتى بەلگىلەر دە كورسەتتى. مىسالى، ول كۇندىز بۇلت باعاناسىن، ال تۇندە وت باعاناسىن جىبەرەتىن (مۇس. 2-ج. 13:21). مۇسا وسى باعاناعا ىلەسىپ، حالىقتى قىزىل تەڭىزگە الىپ باردى. الايدا قىزىل تەڭىز بەن مىسىر اسكەرىنىڭ ورتاسىندا قالعاندا، حالىق قاتتى ابىرجىپ، شوشىپ كەتتى. ٴبىراق بۇل قاتەلىك ەمەس ەدى. ەحوبا مۇسا ارقىلى ولاردى سول جەرگە ادەيى اكەلگەن ەدى (مۇس. 2-ج. 14:2). سوسىن ول حالىقتى عاجايىپ تۇردە قۇتقارىپ قالدى (مۇس. 2-ج. 14:26—28). مۇسا قۇداي ٴشول دالادا حالقىن بۇلت باعاناسى ارقىلى جەتەلەپ كەلە جاتقانىنا سەنىپ، 40 جىل بويى سوعان ادال ىلەسە بەردى (مۇس. 2-ج. 33:7، 9، 10). ەحوبا مۇساعا وسى باعانادان سويلەپ، نۇسقاۋلار بەرەتىن. ال مۇسا ونى حالىققا جەتكىزەتىن. دەمەك، ەحوبا يسرايلدىكتەردى مۇسا ارقىلى جەتەلەپ جاتقانى حالىققا تايعا تاڭبا باسقانداي انىق ەدى. 24w.02 21-ب.، 4، 5-ابز.