شىلدە
1-شىلدە، سەيسەنبى
ول ەل ارالاپ، يگى ىستەر جاسادى جانە... بارلىعىن ساۋىقتىردى (ەل. ٸس. 10:38).
يسانىڭ بارلىق ٴسوزى مەن ىسىنەن، سونىڭ ىشىندە كەرەمەتتەرىنەن دە، ەحوبانىڭ وي قالپى مەن سەزىمدەرىن تانيمىز. سەبەبى ول اكەسىنىڭ قاسيەتتەرىن اينىتپاي تانىتقان (جوح. 14:9). يسانىڭ كەرەمەتتەرىنەن نە بىلەمىز؟ يسا مەن ەحوبا ٴبىزدى قاتتى سۇيەدى. سوندىقتان دا جەردە قىزمەت ەتكەنىندە يسا ادامداردىڭ ازابىن جەڭىلدەتۋ ٷشىن كەرەمەتتەر جاساعان. ەكى زاعيپ كىسى ودان ايعايلاپ كومەك سۇراعان جاعدايدى الايىقشى (مات. 20:30—34). يسا ولاردى «اياپ كەتتى» دە، كوزدەرىن كورەتىن ەتتى. وسى جەردە «اياپ كەتتى» دەپ اۋدارىلعان گرەك ٴسوزى ادامنىڭ ٸشى-باۋىرى ەزىلىپ، قاتتى جانى اشۋىن بىلدىرەدى. ادامداردى سۇيگەندىكتەن، وسىلاي جانى اشىعان يسا ازاپتارىنا قاراپ تۇرا الماي، الاپەستەردى ايىقتىرعان، اشىققاندارىن تاماقتاندىرعان (مات. 15:32؛ مار. 1:41). راسىندا دا، جاناشىر قۇدايىمىز ەحوبا مەن ونىڭ ۇلى يسا ٴبىزدى قاتتى سۇيەدى ٵرى قينالعانىمىزدا بىرگە قينالادى (لۇقا 1:78؛ پەت. 1-ح. 5:7). ادامزاتتى زار يلەتكەن بۇكىل جاماندىق پەن ازاپتان قۇتقاراتىن كەزدى ولار اڭساپ كۇتىپ وتىر! 23w.04 3-ب.، 4، 5-ابز.
2-شىلدە، سارسەنبى
ەي، ەحوبانى جاقسى كورەتىندەر، جاماندىقتى جەك كورىڭدەر. ول ادال قىزمەتشىلەرىنىڭ جانىن قورعايدى، ولاردى زۇلىمنىڭ قولىنان اراشالايدى (ٴزاب. 97:10).
شايتاننىڭ دۇنيەسىندە كوپشىلىككە جاعىمدى، ٴبىراق تەرىس وي-پىكىرلەر كوپ. سولاردىڭ اسەرىن شەكتەۋ ٷشىن، ناقتى ارەكەتتەر جاسايىق. سونداي-اق كيەلى كىتاپتى وقىپ-زەرتتەۋ ارقىلى سانامىزدى تازا ويلارعا تولتىرايىق. قاۋىم كەزدەسۋلەرىنە بارعانىمىز، قىزمەتكە شىققانىمىز دا وي-سانامىزدى ساقتايدى. ال ەحوبا ٶز كەزەگىندە «شامادان تىس سىنالۋلارىڭا جول بەرمەيمىن» دەپ ۋادە ەتەدى (قور. 1-ح. 10:12، 13). وسى سوڭعى كۇندەردەگى قيىن ۋاقىتتا ەحوباعا ادالدىق ساقتاۋ ٷشىن، بۇرىنعىدان دا كوبىرەك دۇعا ەتۋ كەرەك. ول ٴسىزدىڭ «جۇرەك سىرلارىڭىزدى» تىڭداعىسى كەلەدى (ٴزاب. 62:8). دۇعادا ونى داڭقتاڭىز، جاساعان بار جاقسىلىعىنا راقمەت ايتىڭىز. قىزمەتتە باتىل بولۋعا كومەك سۇراڭىز. باسىڭىزعا تۇسكەن قيىندىقتارعا توتەپ بەرۋگە، ازعىرۋلارعا بەرىلمەۋگە كۇش سۇراڭىز. ەحوباعا ۇدايى دۇعا ەتۋگە ەش نارسە دە، ەشكىم دە كەدەرگى بولماسىن. 23w.05 6، 7-ب.، 17، 18-ابز.
3-شىلدە، بەيسەنبى
ٴبىر-بىرىمىزگە كوڭىل بولەيىك..، ٴبىر-ٴبىرىمىزدى جىگەرلەندىرە بەرەيىك (ەۆر. 10:24، 25).
ٴبىز قاۋىم كەزدەسۋلەرىنە نە ٷشىن قاتىسامىز؟ ەڭ الدىمەن، ەحوبانى ماداقتاۋ ٷشىن (ٴزاب. 26:12؛ 111:1). سونداي-اق قازىرگى قيىن زاماندا ٴبىر-ٴبىرىمىزدى جىگەرلەندىرۋ ٷشىن (سال. 1-ح. 5:11). قول كوتەرىپ، تۇسىنىكتەمە بەرگەندە ٴبىز وسىنىڭ ەكەۋىنە دە قول جەتكىزەمىز. ٴبىراق كەيبىرەۋىمىز قوبالجىپ، قول كوتەرۋگە جۇرەكسىنەمىز. ال وزگەلەر ٴجيى-ٴجيى جاۋاپ بەرۋدى قالاعانمەن، ولاردان سۇراماۋى مۇمكىن. سوندايدا نە ىستەسە بولادى؟ ەلشى پاۋىل «ٴبىر-ٴبىرىمىزدى جىگەرلەندىرە بەرەيىك» دەپ شاقىرعان. دەمەك، «ٴبىر-ەكى اۋىز ٴسوزىمنىڭ ٶزى دە باۋىرلاستارىمدى جىگەرلەندىرەدى عوي» دەپ ويلاساق، تۇسىنىكتەمە بەرۋگە ىنتالىراق بولامىز. ال كوبىرەك اتسالىسقىمىز كەلگەنىمەن، بىزدەن سۇراماي جاتسا، باسقالارعا جول بەرگەنىمىزدى ويلاپ قۋانايىق (پەت. 1-ح. 3:8). 23w.04 20-ب.، 1—3 ابز.
4-شىلدە، جۇما
يەرۋساليمگە بارسىن دا،.. ەحوبانىڭ... ٷيىن قايتا سوقسىن (ەزرا 1:3).
پاتشا ەشكىم كۇتپەگەن ٴبىر جارلىق شىعاردى! بابىلدا 70 جىل تۇتقىن بولعان ەۆرەيلەر ەندى ٶز ەلدەرى يسرايلگە ورالا الادى (ەزرا 1:2—4). ادەتتە بابىلدىقتار ٶز قۇلدارىن ەشقاشان بوساتپايتىن. سوندا بۇل قالاي بولدى؟ بۇل تەك ەحوبانىڭ ارقاسىندا جۇزەگە استى (يشايا 14:4، 17). ميديالىقتار مەن پارسىلار بابىلدىقتاردى تىزە بۇكتىرگەن سوڭ، جاڭا پاتشا ەۆرەيلەرگە ازاتتىق بەردى. ەندى ٵربىر ەۆرەيگە، اسىرەسە وتاعالارىنا، تاڭداۋ جاساۋ كەرەك بولدى: ول يسرايلگە بارا ما، الدە بابىلدا قالا ما؟ بۇل وڭاي تاڭداۋ بولعان جوق. ويتكەنى قارت كىسىلەردىڭ كوبىسى ۇزاق جولعا جارامايتىن. ونىڭ ۇستىنە، سول كەزدەگى ەۆرەيلەردىڭ باسىم كوپشىلىگى بابىلدا تۋىپ-وسكەندىكتەن، يسرايل جەرى ولارعا جاي عانا اتا-باباسى تۇرعان بەيتانىس جەر بولعان. ەۆرەيلەردىڭ اراسىندا بابىلدا جايلى ٶمىر كەشىپ، شارۋالارىن دوڭگەلەتىپ، وركەندەپ جاتقاندارى دا بولدى. ولارعا مۇنىڭ ٴبارىن تاستاپ، باسقا جەردە جاڭا ٶمىر باستاۋ قيىن بولعان شىعار. 23w.05 14-ب.، 1، 2-ابز.
5-شىلدە، سەنبى
دايىن بولىڭدار (مات. 24:44).
قۇداي ٴسوزى تاباندىلىق، جاناشىرلىق پەن سۇيىسپەنشىلىگىمىزدى ٵرى قاراي شىڭداي بەرۋگە ۇندەيدى. لۇقا 21:19 دا: «تاباندى بولۋلارىڭمەن جاندارىڭدى ساقتاپ قالاسىڭدار»،— دەلىنگەن. ال قولوستىقتارعا 3:12: «جاناشىرلىققا... بولەنىڭدەر»،— دەيدى. سالونيكالىقتارعا 1-حات 4:9، 10 دا بولسا: «ٴبىر-ٴبىرىڭدى ٴسۇيۋدى سەندەرگە قۇداي ۇيرەتىپ جاتىر عوي... ٴبىراق، باۋىرلاستار، ٴبىز سەندەردى وسى جاعىنان ٵرى قاراي دا جاقسارا بەرۋگە شاقىرامىز»،— دەپ جازىلعان. بۇل سوزدەردى ەستىگەن ماسىحشىلەر اتالمىش قاسيەتتەردى ونسىز دا تانىتىپ جۇرگەن. سوندا دا ولارعا وسى جاعىنان جاقسارا بەرۋ كەرەك ەدى. دەمەك، بىزگە دە سولاي ەتۋ كەرەك. بۇل ٷشىن، I عاسىرداعى ماسىحشىلەر بۇل قاسيەتتەردى قالاي تانىتقانىن قاراستىرىڭىز. سوندا ولاردى قالاي تانىتا الاتىنىڭىزدى جانە زور الاپاتقا قالاي دايىن بولا الاتىنىڭىزدى بىلە الاسىز. قازىردەن باستاپ سىناقتارعا تاباندىلىقپەن توتەپ بەرسەڭىز، كەيىن زور الاپاتتا اناعۇرلىم جەڭىل بولادى. 23w.07 3-ب.، 4-ابز.؛ 3-ب.، 8-ابز.
6-شىلدە، جەكسەنبى
سول جەردە داڭعىل جول بولادى، ول «قاسيەتتى جول» دەپ اتالادى (يشايا 35:8).
ٴبىز مايلانعاندارعا نە «باسقا قويلارعا» جاتپايىق، ەشقايسىسىمىز «قاسيەتتى جولدان» اۋىتقىماۋىمىز كەرەك. بۇل جول ٴبىزدى قازىردىڭ وزىندە رۋحاني جۇماقپەن الىپ كەلە جاتىر، ال سوڭىندا باتاعا تولى قۇدايدىڭ پاتشالىعىنا الىپ كىرەدى (جوح. 10:16). ال بۇل بەينەلى داڭعىل جول قاشان اشىلدى؟ 1919-جىلدان بەرى ميلليونداعان ادام — ىشىندە ەرلەر، ايەلدەر، بالالار دا بار — دۇنيەجۇزىلىك جالعان دىندەر يمپەرياسى ۇلى بابىلدان شىعىپ، وسى بەينەلى جولمەن ٴجۇرىپ كەلە جاتىر. ەۆرەيلەر بابىلدان شىققان كەزدە ەحوبا ولاردىڭ جولىندا كەدەرگىلەردىڭ بولماۋىن قامداعان (يشايا 57:14). ال ٴبىزدىڭ كەزىمىزدەگى «قاسيەتتى جول» جايلى نە دەۋگە بولادى؟ 1919-جىلدان بىرنەشە عاسىر بۇرىن قۇدايدى قاستەرلەيتىن ەر كىسىلەردى پايدالانىپ، ەحوبا ۇلى بابىلدان شىعاتىن جولدى دايارلادى (يشايا 40:3 سالىستىرىڭىز). اقجۇرەكتى ادامدار ۇلى بابىلدان شىعىپ، تازا عيبادات ورناعان رۋحاني جۇماققا كىرۋى ٷشىن جول دايارلاۋدا بۇل كىسىلەر اۋىر ەڭبەك ەتتى. 23w.05 15، 16-ب.، 8، 9-ابز.
7-شىلدە، دۇيسەنبى
ەحوباعا قۋانا قىزمەت ەتىڭدەر، ونىڭ الدىنا قۋانا اندەتىپ كەلىڭدەر (ٴزاب. 100:2).
ەحوبا ٴبىزدىڭ وعان قۋانىشپەن قىزمەت ەتكەنىمىزدى قالايدى (قور. 2-ح. 9:7). ەندەشە، قويعان رۋحاني ماقساتىمىزعا جەتۋگە ىقىلاسىمىز بولماسا دا، ٶزىمىزدى كۇشتەپ ارەكەتتەنگەنىمىز دۇرىس پا؟ مىسالعا ەلشى پاۋىلدى الايىقشى. ول: «دەنەمدى ۇرعىلاپ، وزىمە قۇل ىسپەتتى باعىندىرۋدامىن»،— دەگەن (قور. 1-ح. 9:25—27). دەمەك، پاۋىلدىڭ دۇرىس نارسەنى ىستەۋگە ەشقانداي قالاۋى بولماسا دا، ول ٶزىن تارتىپكە سالىپ، كۇشتەگەن. وسىلاي اتقارعان قىزمەتىنە ەحوبا ريزا بولدى ما؟ ارينە! ەحوبا ونىڭ قاجىرلى ەڭبەگىن جارىلقاپ، سي بەردى (ٴتىم. 2-ح. 4:7، 8). تۋرا سولاي، ىقىلاسىمىز بولماسا دا، ماقساتىمىزعا قاراي ۇمتىلىپ جاتقانىمىزدى كورىپ، ەحوبا بىزگە ريزا بولادى. سول ٸستىڭ ٶزىن سۇيمەي تۇرساق تا، ەحوبانى سۇيگەندىكتەن ارەكەت ەتىپ جاتقانىمىزعا ول قۋانادى. ەلشى پاۋىلدى جارىلقاعانداي، ەحوبا ٴبىزدىڭ دە ەڭبەگىمىزگە باتاسىن بەرەدى (ٴزاب. 126:5). ال ونىڭ باتاسىنا كەنەلگەندە، ىقىلاسىمىز ويانا باستايدى. 23w.05 29-ب.، 9، 10-ابز.
8-شىلدە، سەيسەنبى
ەحوبانىڭ كۇنى... كەلەدى (سال. 1-ح. 5:2).
ەلشى پاۋىل ەحوبانىڭ كۇنى امان قالمايتىن ادامداردى ۇيىقتاپ جاتقان ادامدارعا تەڭەگەن. مۇنداي ادام اينالاسىندا نە بولىپ جاتقانىن، ۋاقىتتىڭ قالاي ٶتىپ جاتقانىن سەزبەيدى. سوندىقتان ماڭىزدى وقيعالار ٶربىپ جاتسا دا، ول ونى سەزبەي، ارەكەتسىز جاتا بەرەدى. قازىرگى الەمدە دە باسىم كوپشىلىك رۋحاني ماعىنادا ۇيىقتاپ ٴجۇر (ريم. 11:8). ولار «سوڭعى كۇندەرى» ٶمىر ٴسۇرىپ جاتقانىمىزدىڭ انىق دالەلدەرىنە جانە زور الاپاتتىڭ تاياپ قالعانىنا ەش ٴمان بەرمەيدى (پەت. 2-ح. 3:3، 4). الايدا ٴبىز كۇن وتكەن سايىن وياۋ ٴجۇرۋدىڭ ماڭىزدىلىعى ارتا تۇسەتىنىن جاقسى تۇسىنەمىز (سال. 1-ح. 5:6). سوندىقتان بىزگە سابىرلى دا بايسالدى بولۋ قاجەت. نەگە؟ مىنا دۇنيەدەگى ساياسي يا قوعامدىق ماسەلەلەرگە ارالاسىپ كەتپەۋ ٷشىن. ەحوبانىڭ كۇنى جاقىنداعان سايىن، وسىنداي ماسەلەلەردە ادامدار ٴبىزدى ٶز جاعىنا شىعارۋ ٷشىن قىسىمعا الا تۇسەدى. ٴبىراق بىزگە سوندايدا نە ىستەيمىن، نە ايتامىن دەپ ۋايىمداۋدىڭ قاجەتى جوق. ويتكەنى قۇدايدىڭ رۋحى بىزگە سابىر ساقتاپ، بايسالدى بولۋعا، دۇرىس شەشىم قابىلداۋعا كومەكتەسەدى (لۇقا 12:11، 12). 23w.06 9، 10-ب.، 6، 7-ابز.
9-شىلدە، سارسەنبى
الەمنىڭ ٵمىرشىسى ەحوبا، وتىنەمىن، مەنى ەسىڭە الىپ، سوڭعى رەت كۇش بەرە كورشى (بي. 16:28).
سامسون دەگەن ەسىمدى ەستىگەندە كىمدى ەلەستەتەسىز؟ كوبىسى ەرەكشە كۇشكە يە باتىردى ەلەستەتىپ جاتادى. ٴبىراق سامسون ٴبىر جەردەن قاتتى قاتەلەسىپ، سونىڭ اۋىر سالدارىن تارتقان ادام دا بولعان. دەسە دە ەحوبا ونىڭ قاتەلىگىنە ەمەس، سەنىمگە تولى ىستەرىنە نازار اۋدارعان ٵرى بىزگە ۇلگى بولسىن دەپ كيەلى كىتاپقا جازدىرعان. ەحوبا ٶزىنىڭ تاڭداۋلى يسرايل حالقىنا كومەكتەسۋ ٷشىن سامسون ارقىلى تاڭعاجايىپ ىستەر جاساعان. ال عاسىرلار وتە ەلشى پاۋىل ەحوبانىڭ قوزعاۋ سالۋىمەن سامسوندى سەنىمى مىقتى ادامداردىڭ قاتارىنا جاتقىزعان (ەۆر. 11:32—34). ول قيىن جاعدايدا دا ەحوباعا ارقا سۇيەي بىلگەن. ٴبىز دە سامسوننىڭ مىسالىن قاراستىرىپ، جىگەر الا الامىز. 23w.09 2-ب.، 1، 2-ابز.
10-شىلدە، بەيسەنبى
بارلىق وتىنىشتەرىڭدى... قۇدايعا بىلدىرىڭدەر (ٴفىلىپ. 4:6).
تاباندىلىعىمىزدى شىڭدايتىن نارسە — ەحوباعا بار ۋايىمىمىزدى اقتارىپ، ٴجيى-ٴجيى دۇعا ايتۋ (سال. 1-ح. 5:17). بالكىم، ٴدال قازىر ٴسىزدى قاتتى ۋايىمداتىپ جاتقان اۋىر سىناق جوق شىعار. ٴبىراق كوڭىلىڭىز تۇسكەندە، نە ىستەرىڭىزدى بىلمەي دال بولعاندا، بىردەن دۇعا ايتىپ، ەحوبادان اقىل سۇرايسىز با؟ كۇندەلىكتى مايدا-شۇيدە ماسەلەدە ەحوباعا ارقا سۇيەپ ۇيرەنسەڭىز، الداعى ۇلكەن سىناقتا دا بىردەن سولاي ەتەسىز. وسىلايشا ەحوبا ٴسىز ٷشىن ٴدال ۋاقىتىندا جانە ٴدال كەرەك جولمەن ارەكەت ەتەتىنىنە سەنىمدى بولاسىز (ٴزاب. 27:1، 3). قازىردەن باستاپ سىناقتارعا تاباندىلىقپەن توتەپ بەرسەك، كەيىن زور الاپاتتا وزىمىزگە اناعۇرلىم جەڭىل بولادى (ريم. 5:3). مۇنى كوپ باۋىرلاستار ٶز باسىنان وتكەرگەن. ولاردىڭ ايتۋىنشا، ٵربىر سىناقتى ارتتا قالدىرعان سايىن، كەلەسىسىنە توتەپ بەرۋگە دايىن بولادى ەكەنسىڭ. قالاي؟ سىناققا ەحوبانىڭ كومەگىمەن توتەپ بەرگەندە، تاباندىلىعىڭ شىڭدالىپ، ەحوبا ەشقاشان كومەكسىز قالدىرمايتىنىنا سەنىمىڭ قاتايادى. وسىنداي سەنىم كەلەسى سىناقتاردا تاباندى تۇرۋعا كومەكتەسەدى (جاق. 1:2—4). 23w.07 3-ب.، 7، 8-ابز.
11-شىلدە، جۇما
تىلەگىڭدى ورىندايىن (مۇس. 1-ج. 19:21).
ەحوبانىڭ يلىككىشتىگىنىڭ ارتىندا كىشىپەيىلدىلىك پەن جاناشىرلىق قاسيەتتەرى جاتىر. مىسالى، ابدەن زۇلىمدىققا باتقان سودوم قالاسىن جويامىن دەگەندە ەحوبانىڭ قالاي كىشىپەيىلدىلىك تانىتقانىن الايىقشى. ٵدىل لۇتتى قۇتقارىپ قالۋ ٷشىن، ول وعان پەرىشتەلەرىن جىبەرىپ، تاۋعا قاشۋدى بۇيىرادى. ٴبىراق لۇت ول جاققا بارۋعا قورقىپ، جاقىن جەردەگى سيعور قالاشىعىن پانالايىنشى دەپ جالىنادى. ال ەحوبا سيعوردى دا ۇكىمگە كەسىپ قويعان بولاتىن. سوندا ول لۇتقا «ايتقانىم — ايتقان، قالاي بۇيىردىم، سولاي ىستە» دەگەن جوق. قايتا، ونىڭ ٶتىنىشىن ورىنداپ، سيعوردى امان الىپ قالدى (مۇس. 1-ج. 19:18—22). ال كەيىن عاسىرلار وتە ەحوبا نينەۆيا حالقىنا جاناشىرلىق كورسەتتى. باسىندا ول زۇلىمدىق جايلاعان بۇل قالاعا پايعامبارىن جىبەرىپ، قالانىڭ ٶزى دە، تۇرعىندارى دا قۇرىپ جوق بولاتىنىن جاريا ەتكىزگەن. ٴبىراق كەيىن ولار كۇنالارىنا وكىنگەندە، ەحوبا ولاردى اياپ، قالانى جويامىن دەگەن رايىنان قايتادى (ٴجۇنىس 3:1، 10؛ 4:10، 11). 23w.07 21-ب.، 5-ابز.
12-شىلدە، سەنبى
جوعاستى... ٶلتىرىپ كەتتى. ٴبىراق پاتشالار قابىرىنە قويمادى (شەج. 2-ج. 24:25).
جوعاستان قانداي ساباق الامىز؟ ول تىرەۋىشكە بايلانىپ تۇرعان، تامىرى قىپ-قىسقا اعاش سياقتى بولدى. وعان تىرەك بولعان ەحوداي كوز جۇمعاننان كەيىن جولدانتايۋشىلاردىڭ ىقپالى جەلدەي سوعىپ ەدى، ول بىردەن قۇلاپ ٴتۇستى. ٴبىزدىڭ دە باۋىرلاستارىمىزدىڭ نە ٴماسىحشى وتباسىمىزدىڭ ىقپالىمەن عانا قۇدايدان قورقىپ جۇرگەنىمىز جارامايدى. جەكە زەرتتەۋ، وي جۇگىرتۋ جانە دۇعا ەتۋمەن قۇدايدان قورقىنىشىمىز بەن شىن بەرىلگەندىگىمىزدى بەكەمدەي بەرۋىمىز كەرەك. سوندا تامىرىمىز تەرەڭ جايىلىپ، رۋحاني مىقتى بولامىز (ەرم. 17:7، 8؛ قول. 2:6، 7). ەحوبا بىزدەن كوپ نارسە تالاپ ەتپەيدى. ونىڭ بىزدەن نە كۇتەتىنى ۋاعىزداۋشى 12:13 تە بىلاي دەپ تۇيىندەلگەن: «قۇدايدان قورقىپ، بۇيرىقتارىن ورىندا، سەبەبى ادام بالاسىنىڭ بار پارىزى — وسى». بويىمىزدا وسىنداي قورقىنىش بولسا، الداعى كەز كەلگەن سىناقتان سۇرىنبەي ٶتىپ، نىق تۇرامىز. سوندا ەحوبامەن دوستىعىمىزدى ەش نارسە بۇزا المايدى. 23w.06 19-ب.، 17—19 ابز.
13-شىلدە، جەكسەنبى
مىنە، ٴبارىن دە جاڭادان جاراتىپ جاتىرمىن (ايان 21:5).
5-تارماقتىڭ باسىندا بۇنىڭ ٴبارى «تاقتا وتىرعاننىڭ» سوزدەرى ەكەنى ايتىلادى (ايان 21:5ا). ال ەحوبانىڭ تىكەلەي ٶزى سويلەگەنى ايان كىتابىندا بار-جوعى ٷش-اق رەت كەزدەسەدى. ويلاپ كورىڭىزشى، بۇل كەپىلدىكتى قۇدىرەتتى پەرىشتە ەمەس، قايتا تىرىلگەن يسا دا ەمەس، ەحوبانىڭ ٶزى ايتقان! بۇل ونىڭ ايتقالى جاتقان 5، 6-تارماقتاعى سوزدەرىنىڭ راستىعىنا سالماق قوسا تۇسەدى. ويتكەنى ەحوبا — «وتىرىك ايتا المايتىن قۇداي» (تيت. 1:2). سوندىقتان ٴبىز ونىڭ سوزدەرىنە كامىل سەنىمدىمىز. ەندى ەحوبانىڭ «مىنە» دەگەن ٴسوزىن قاراستىرايىق. «مىنە» دەپ اۋدارىلعان گرەك ٴسوزى ايان كىتابىندا ٴجيى كەزدەسەدى. ەحوبا نە نارسەگە نازارىمىزدى بۇرعىسى كەلەدى؟ ول: «ٴبارىن دە جاڭادان جاراتىپ جاتىرمىن»،— دەيدى. ەحوبا بولاشاقتا ىستەيتىن جايتتاردى ايتىپ تۇرسا دا، ول ونى وسى شاقتا ايتقان. ويتكەنى ونى ىستەيتىنىنە تولىقتاي سەنىمدى (يشايا 46:10). 23w.11 3، 4-ب.، 7، 8-ابز.
14-شىلدە، دۇيسەنبى
ول سىرتقا شىعىپ، وكىرىپ جىلادى (مات. 26:75).
ەلشى پەتىر بىردەن السىزدىكتەرىنەن ارىلا قويعان جوق. مىسالى، يسا كيەلى كىتاپتاعى پايعامبارلىقتارعا ساي ازاپ شەگىپ، ٶلۋى كەرەكتىگىن ايتقاندا، پەتىر قارسىلىق ٴبىلدىردى (مار. 8:31—33). باسقا ەلشىلەرمەن قوسا، ول دا «ارامىزدا ەڭ ۇلى كىم» دەپ قايتا-قايتا داۋلاستى (مار. 9:33، 34). ال يسا ولەر الدىنداعى ٴتۇنى پەتىر الدى-ارتىن ويلاماستان ٴبىر كىسىنىڭ قۇلاعىن شاۋىپ ٴتۇسىردى (جوح. 18:10). ٴدال سول ٴتۇنى ول ۇرەيگە بوي الدىرىپ، يسادان ٴبىر ەمەس، ٷش رەت تاندى (مار. 14:66—72). سول ٷشىن كەيىن وكىرىپ جىلادى. پەتىر مۇڭعا باتىپ جۇرگەندە، يسا ودان تەرىس اينالماعانىن كورسەتتى. قايتا تىرىلگەن سوڭ، ول پەتىرگە سۇيىسپەنشىلىگىن دالەلدەۋگە مۇمكىندىك بەرىپ، توقتى-قوزىلارىن باعۋدى تاپسىردى (جوح. 21:15—17). پەتىر بۇل تاپسىرمانى ورىنداۋعا بار ىقىلاسىمەن كەلىستى. ٴسۇيتىپ، ەلۋىنشى كۇن مەيرامىندا يەرۋساليمدە العاش كيەلى رۋحپەن مايلانعانداردىڭ اراسىندا بولدى. 23w.09 22-ب.، 6، 7-ابز.
15-شىلدە، سەيسەنبى
قوزىلارىمدى باق (جوح. 21:16).
ەلشى پەتىر وزگە اقساقالداردى دا قۇدايدىڭ وتارىن باعۋعا شاقىرعان (پەت. 1-ح. 5:1—4). قىمباتتى اقساقال، ٴسىز دە باۋىرلاستاردى جاقسى كورەسىز، ولاردى قامقورلاعىڭىز كەلەدى. ٴبىراق كەيدە مۇرنىڭىزدان شانشىلىپ، ابدەن قاجىعاندىقتان، مىندەتىڭىزدى ويداعىداي اتقارماي جۇرگەندەي سەزىنەرسىز. مۇندايدا نە ىستەسەڭىز بولادى؟ نە ۋايىمداپ، نە سەزىنىپ جۇرگەنىڭىزدىڭ ٴبارىن ەحوباعا ايتىڭىز. پەتىر: «كىم قىزمەت ەتسە، قۇدايدىڭ كۇشىنە سۇيەنىپ قىزمەت ەتسىن»،— دەپ جازعان (پەت. 1-ح. 4:11). باۋىرلاستارىمىزدىڭ كەزىگىپ جۇرگەن قيىندىقتارى بۇل دۇنيەدە شەشىلمەۋى مۇمكىن. ٴبىراق ۇمىتپاڭىز، «باس باعۋشى» — يسا ٴماسىح، ول باۋىرلاستارىڭىز ٷشىن ٴسىزدىڭ قولىڭىزدان كەلمەيتىن نارسەنى ىستەي الادى. كەيبىر نارسەلەردى ول قازىر-اق ىستەپ جاتىر، ال كەيبىرىن بولاشاقتا قولعا الادى. قۇدايدىڭ سىزدەن بار كۇتەتىنى — باۋىرلاستارىڭىزدى جاقسى كورىپ، ولاردى قامقورلاعانىڭىز ٵرى ولارعا «ۇلگى-ونەگە بولعانىڭىز». 23w.09 30-ب.، 13، 14-ابز.
16-شىلدە، سارسەنبى
ەحوبا دانىشپانداردىڭ وي-پىكىرلەرىنىڭ بەكەر ەكەنىن بىلەدى (قور. 1-ح. 3:20).
ٴبىز ادامداردىڭ كوزقاراسىنا ەرمەۋىمىز كەرەك. اينالامىزداعى ادامداردىڭ وي-پىكىرىنە ەرىپ كەتسەك، ەحوبانى دا، ونىڭ نورمالارىن دا ەلەمەي كەتەمىز (قور. 1-ح. 3:19). ويتكەنى «وسى دۇنيەنىڭ دانالىعى» ەڭ ٴبىرىنشى تاندىك قالاۋىڭدى ويلاۋعا شاقىرادى. كەزىندە پەرگام مەن تياتيرا قالالارىندا پۇتقا تابىنۋ، ازعىن ٶمىر ٴسۇرۋ كادىمگى نارسە سانالاتىن. بۇل جامان كوزقاراس قاۋىمداعى بىرەن-ساران ماسىحشىگە دە سىڭگەن بولاتىن. جىنىستىق ازعىندىققا ٴتوزىپ جۇرگەندەرى ٷشىن وسى ەكى قاۋىمدى يسا قاتاڭ ەسكەرتكەن (ايان 2:14، 20). بۇگىندە دە وسى الەم بۇرىس كوزقاراسىن بىزگە جان-جاقتان تىقپىشتايدى. مىسالى، ويىمىزدان اينىپ، قۇداي زاڭدارىنان اتتاي سالۋىمىز ٷشىن، جاقىندارىمىز يا تانىستارىمىز جاندى جەرىمىزگە باسىپ، سەزىمدەرىمىزگە اسەر ەتكىلەرى كەلەر. ولار ٶز قالاۋىڭدى ورىنداعاندا تۇرعان ەشتەڭە جوق، ال كيەلى كىتاپتىڭ مورالدىق نورمالارى قازىرگى زامانعا ساي كەلمەيدى دەۋى مۇمكىن. ال كەيدە ٴبىز وزىمىزشە پايىمداپ، ەحوبانىڭ بەرگەن نۇسقاۋلارىن از كورۋىمىز مۇمكىن. ٴسۇيتىپ، «جازىلعانداردى عانا ۇستانعان» جەتكىلىكسىز دەپ، قوسىمشا ەرەجە ورناتقىمىز كەلەر (قور. 1-ح. 4:6). 23w.07 16-ب.، 10، 11-ابز.
17-شىلدە، بەيسەنبى
ناعىز دوس ارقاشان جاقسى كورەر، ول — باۋىرىڭ قيىن شاقتا ارقا سۇيەر (ناق. س. 17:17).
يسانىڭ اناسى ٴماريام كۇش-جىگەرگە مۇقتاج بولدى. تۇرمىسقا شىقپاعان بولسا دا، پەرىشتە وعان بالا كوتەرەتىنىن ايتتى. ەشقاشان بالا تاربيەلەمەگەن ول ٴماسىح بولاتىن بالانى قالاي وسىرەدى؟! ونىڭ ۇستىنە، ەشقانداي ەركەكپەن جاقىنداسپاسا دا، جۇكتى بولاتىنىن بولاشاق كۇيەۋى جۇسىپكە قالاي تۇسىندىرەدى؟ (لۇقا 1:26—33). ٴماريام قايدان كۇش الدى؟ ول وزگەلەردىڭ كومەگىنە جۇگىندى. الدىمەن، جابىرەيىلدەن وسى تاپسىرمانىڭ ٴمان-جايىن سۇراپ الدى (لۇقا 1:34). سودان سوڭ تۋىسى ەلىزابەتكە بارۋ ٷشىن سوناۋ ياھۋدا جەرىندەگى «تاۋلى وڭىرگە» ساپار شەكتى. ەلىزابەت ٴماريامدى ماقتاپ، ەحوبانىڭ قوزعاۋ سالۋىمەن ونىڭ تۋاتىن ٴسابيى جايلى پايعامبارلىق ايتتى (لۇقا 1:39—45). سول كەزدە ٴماريام ەحوبانىڭ «ٶز قولىمەن قۇدىرەتتى ىستەر جاساعانىن» ايتتى (لۇقا 1:46—51). وسىلاي ەحوبا جابىرەيىل مەن ەلىزابەت ارقىلى ٴماريامنىڭ بويىنا كۇش ٴبىتىرىپ، نىعايتىپ تاستادى. 23w.10 14، 15-ب.، 10—12 ابز.
18-شىلدە، جۇما
ٴبىزدى پاتشا جانە ٶزىنىڭ قۇدايى ٵرى اكەسىنىڭ ٴدىني قىزمەتكەرلەرى ەتتى (ايان 1:6).
يسانىڭ شاكىرتتەرىنىڭ 144 000-ى كيەلى رۋحپەن مايلانعان. ولار ەحوبامەن ەرەكشە قارىم-قاتىناسقا يە. كوكتە ولار يسامەن بىرگە ٴدىني قىزمەتكەر بولىپ قىزمەت ەتەدى (ايان 14:1). جەردە بولعاندا ولاردى ەحوبا كيەلى رۋحىمەن مايلاپ، ٶزىنىڭ بالالارى ەتەدى. قاسيەتتى بولمە ولاردىڭ ەحوبامەن وسى ەرەكشە قارىم-قاتىناستارىن بىلدىرەدى (ريم. 8:15—17). ەڭ قاسيەتتى بولمە بولسا، ەحوبا مەكەندەيتىن كوكتى بەينەلەيدى. قاسيەتتى بولمە مەن ەڭ قاسيەتتى بولمەنى ٴبولىپ تۇرعان «شىمىلدىق» يسانىڭ جەردەگى ٴتانىن بىلدىرەدى. ويتكەنى ٴتانى وعان كوكتەگى رۋحاني عيباداتحاناعا ۇلى باس ٴدىني قىزمەتكەر رەتىندە كىرۋگە كەدەرگى جاسادى. ول وسى دەنەسىن بۇكىل ادامزات ٷشىن قۇربان ەتكەندە، بارلىق مايلانعان ماسىحشىلەر ٷشىن كوكتەگى ومىرگە جول اشىلدى. كوكتەگى سيلارىن الۋ ٷشىن، مايلانعاندار دا جەردەگى تاندەرىمەن قوش ايتىسۋلارى كەرەك (ەۆر. 10:19، 20؛ قور. 1-ح. 15:50). 23w.10 28-ب.، 13-ابز.
19-شىلدە، سەنبى
گەدەون... جايىندا ايتۋعا ۋاقىتىم جەتپەس ەدى (ەۆر. 11:32).
ەفرەمدىكتەر كەلىپ، اشۋلانىپ، وعان ايىپ تاققاندا، گەدەون ولارعا سابىرمەن جاۋاپ بەردى (بي. 8:1—3). ول اشۋعا بەرىلمەي، ەفرەمدىكتەردى كىشىپەيىلدىلىكپەن تىڭدادى. ولارعا مەيىرىممەن سويلەپ، سابالارىنا ٴتۇسىردى. وزگەلەر ايىپتاپ جاتسا، دانا اقساقالدار دا سابىرمەن تىڭداپ، ىزەتپەن جاۋاپ بەرەدى (جاق. 3:13). وسىلاي قاۋىمنىڭ ىنتىماعىن ساقتايدى. مادياندىقتاردى جەڭگەنى ٷشىن يسرايلدىكتەر گەدەوندى ماقتاپ، سي-قۇرمەتكە بولەگەندە، ول ەحوباعا نازار اۋداردى (بي. 8:22،23). تاعايىندالعان ەر باۋىرلاستار ودان نە ۇيرەنەدى؟ ولار جەتكەن جەتىستىكتەرى ٷشىن ەحوبانى ماقتاۋلارى كەرەك (قور. 1-ح. 4:6،7). مىسالى، باۋىرلاستار اقساقالدى كەرەمەت ٴتالىم بەرەتىنى ٷشىن ماقتاسا، ول سول ٴتالىمنىڭ قۇداي سوزىنەن الىنعانىنا جانە ەحوبانىڭ ۇيىمىنان ۇيرەنىپ جاتقانىنا كوڭىل بۇرسا بولادى. اراگىدىك اقساقالدار قالاي ٴتالىم بەرىپ جۇرگەندەرى جايلى ويلانىپ تۇرعاندارى دۇرىس، ويتكەنى ولار سوزىمەن جۇرتتى تامساندىرۋدى ويلاپ كەتۋى مۇمكىن. 23w.06 4-ب.، 7، 8-ابز.
20-شىلدە، جەكسەنبى
مەنىڭ ويلارىم سەندەردىكىنەن وزگە (يشايا 55:8).
دۇعامىزعا جاۋاپ الماي جاتساق، ٶزىمىزدى كەلەسى سۇراقپەن تەكسەرە الامىز. «مەنىڭ وسىلاي سۇراعانىم دۇرىس پا؟» دەپ ويلانساق بولادى. ادەتتە ٴبىز وزىمە نە كەرەك ەكەنىن جاقسى بىلەمىن دەپ ويلايمىز. ٴبىراق بىزگە ەڭ دۇرىسى نە ەكەنىن ەحوبا جاقسىراق بىلەدى. مىسالى، ٴبىز «مىنا ماسەلە بىلاي شەشىلسىنشى» دەپ سۇراۋىمىز مۇمكىن. ٴبىراق ونىڭ ودان دا كەرەمەت شەشىمى بار شىعار. ال كەيدە ٴبىزدىڭ ٶتىنىشىمىز ەحوبانىڭ ەركىنە ساي كەلمەۋى مۇمكىن (جوح. 1-ح. 5:14). مىسالى، ەحوبادان بالامىز شىندىقتا قالسىنشى دەپ سۇراعان اتا-انانى الايىق. ٴبىر قاراعاندا، بۇل ورىندى ٶتىنىش سياقتى. ٴبىراق ەحوبا ەشكىمدى وزىنە قىزمەت ەتۋگە ماجبۇرلەمەيدى عوي. ول ٴبىزدىڭ دە، بالالارىمىزدىڭ دا وعان ٶز ەركىمەن عيبادات ەتكەنىن قالايدى (مۇس. 5-ج. 10:12، 13؛ 30:19، 20). سوندىقتان اتا-انانىڭ ەحوباعا «بالامىز سەنى ٴسۇيىپ، سەنىڭ دوسىڭ بولعىسى كەلۋى ٷشىن ونىڭ جۇرەگىنە جول تابا الايىقشى» دەپ سۇراعانى دۇرىسىراق بولادى (ناق. س. 22:6؛ ەفەس. 6:4). 23w.11 21-ب.، 5-ابز.؛ 23-ب.، 12-ابز.
21-شىلدە، دۇيسەنبى
ٴبىر-ٴبىرىڭدى ٵردايىم... جۇباتىڭدار (سال. 1-ح. 4:18).
نەلىكتەن وزگەلەردى جۇباتۋ — سۇيىسپەنشىلىك تانىتۋدىڭ ماڭىزدى قىرى؟ كيەلى كىتاپتى تۇسىندىرەتىن ٴبىر ەڭبەكتە ايتىلعانداي، «جۇباتۋ» دەپ اۋدارىلعان ٴتۇپنۇسقاداعى ٴسوز «اۋىر كەزەڭدى باستان وتكەرىپ جاتقان ادامنىڭ قاسىندا بولىپ، جىگەر بەرۋدى» بىلدىرەدى. دەمەك، كۇيزەلىپ جۇرگەن باۋىرلاسىمىزدى جۇباتقاندا ٴبىز وعان ەڭسەسىن تىكتەپ، ٵرى قاراي ەحوباعا قىزمەت ەتە بەرۋگە كومەكتەسەمىز. قاجەت كەزدە باۋىرلاسىمىزدىڭ جانىنان تابىلىپ، كوڭىلىن اۋلاساق، ونى سۇيەتىنىمىزدى كورسەتەمىز (قور. 2-ح. 7:6، 7، 13). جاناشىرلىق پەن جۇباتۋ ٴبىر-بىرىمەن تىكەلەي بايلانىستى. ويتكەنى جاناشىر ادام باسقالاردىڭ اۋىرتپالىعىن جەڭىلدەتىپ، جۇباتۋعا اسىعادى. دەمەك، ادامدى جۇباتۋ ٷشىن الدىمەن بىزدە سوعان قوزعاۋ سالاتىن جاناشىرلىق سەزىمى بولۋ كەرەك. ەحوبانىڭ قاسيەتىن سيپاتتاي وتىرىپ، پاۋىل وسى بايلانىستى انىق كورسەتكەن. ول ەحوبانى «قايىرىمى مول اكە جانە جۇبانىش اتاۋلىنىڭ قاينار كوزى» دەگەن (قور. 2-ح. 1:3). 23w.11 9، 10-ب.، 8—10 ابز.
22-شىلدە، سەيسەنبى
قيىندىق كورگەن كەزدە شاتتانايىق! (ريم. 5:3).
ٴماسىحتىڭ ٸزباسارلارىنىڭ ٴبارى قيىندىققا كەزىگەدى. مىسالى، ەلشى پاۋىلدىڭ جاعدايىن الايىق. ول سالونيكاداعى باۋىرلاستارعا بىلاي دەپ جازعان: «قيىندىققا كەزىگۋىمىز كەرەكتىگىن وزدەرىڭمەن بىرگە بولعاندا ايتىپ ٴجۇرۋشى ەدىك. مىنە، سول ايتقانىمىز بولدى» (سال. 1-ح. 3:4). ال قورىنتتاعى قاۋىمعا: «باۋىرلاستار، سەندەردى ازيا ايماعىندا باسىمىزعا تۇسكەن قيىندىقتان بەيحابار قالدىرعىمىز كەلمەيدى. باسىمىزعا تۇسكەن قيىندىقتىڭ ەرەكشە اۋىر... بولعانى سونشا — ٴتىرى قالامىز دەپ ۇمىتتەنبەدىك تە»،— دەپ جازدى (قور. 2-ح. 1:8؛ 11:23—27). بۇگىندەگى ماسىحشىلەر دە قيىندىقتارعا ۇشىرايتىندارىن تۇسىنۋلەرى كەرەك (ٴتىم. 2-ح. 3:12). يساعا سەنىپ، ونىڭ سوڭىنان ەرگەنىڭىز ٷشىن دوستارىڭىز نە تۋىستارىڭىز سىزگە ايعايلاپ، ۇرساتىن شىعار. نەمەسە جۇمىستا وتىرىك ايتپايتىنىڭىز ٷشىن قيىندىق كورگەن كەزىڭىز بولعان با؟ (ەۆر. 13:18). يا بولماسا ٷمىتىڭىز جايلى وزگەلەرگە ايتقانىڭىز ٷشىن ۇكىمەت تاراپىنان قۋعىن كورگەن بولارسىز. باسىمىزعا قانداي قيىندىق تۇسپەسىن، پاۋىل ايتقانداي، ٴبىز قۋانۋىمىز كەرەك. 23w.12 10، 11-ب.، 9، 10-ابز.
23-شىلدە، سارسەنبى
سەندەر... باسىمدى ۇلكەن پالەگە قالدىردىڭدار (مۇس. 1-ج. 34:30).
جاقىپتىڭ ٶمىرىنىڭ كولەڭكەلى تۇستارى كوپ بولدى. شيمون مەن لەۋى اۋلەتتەرىن قارابەت قىلاتىن، ەحوبانىڭ اتىنا كىر كەلتىرەتىن سۇمدىق ٸس جاسايدى. بۇل ازداي، اياۋلى جارى راحيلا ەكىنشى ۇلىن بوسانىپ جاتىپ قايتىس بولادى. ال كەيىن ەلدى زۇلمات اشتىق جايلاپ، شاشى اعارعان شاعىندا جاقىپ جات ەلگە كوشۋگە ٴماجبۇر بولادى (مۇس. 1-ج. 35:16—19؛ 37:28؛ 45:9—11، 28). باسىنا نەبىر قيىندىق تۋسا دا، جاقىپ ەحوباعا دەگەن جانە ونىڭ ۋادەسىنە دەگەن سەنىمىن شايقالتپاعان. ال ەحوبا وعان رازى ەكەنىن ٴبىلدىرىپ وتىرعان. مىسالى، ەحوبا ونىڭ مال-مۇلكىن كوبەيتتى. سونداي-اق جىلدار بويى ٶلدى دەپ ويلاپ كەلگەن سۇيىكتى ۇلى جۇسىپپەن قايتا قاۋىشقاندا، جاقىپ ەحوباعا مىڭ العىسىن جاۋدىرعان شىعار! ەحوبامەن جاقىن دوس بولعانىنىڭ ارقاسىندا ول نەبىر قيىندىقتان قايىسپاي ٶتتى (مۇس. 1-ج. 30:43؛ 32:9، 10؛ 46:28—30). ٴبىز دە ەحوبامەن ايىرىلماس دوس بوپ قالا بەرسەك، كوپتەگەن قيىندىقتارعا قاسقايىپ توتەپ بەرە الامىز. 23w.04 15-ب.، 6، 7-ابز.
24-شىلدە، بەيسەنبى
ەحوبا — مەنىڭ باعۋشىم، مەن ەشتەڭەدەن تارىقپايمىن (ٴزاب. 23:1).
ٴزابۇردىڭ 23-جىرىنان ٴداۋىتتىڭ ٴسۇيۋشى، قامقورشى قۇدايىنا دەگەن سەنىمدىلىگى ەسىپ تۇر. ٴداۋىت ٶزىنىڭ باعۋشىسى ەحوباعا ەتەنە جاقىن ەكەنىن سيپاتتاعان. ول ەحوبانىڭ جەتەلەۋىمەن جۇرگەندە قاۋىپسىز سەزىنگەن، ٶزىن وعان تولىقتاي سەنىپ تاپسىرعان. ول ٶمىرىنىڭ ٵر كۇنى ەحوبانىڭ سۇيىسپەنشىلىگىن كورەتىنىنە سەنىمدى بولعان. نە سەبەپتى؟ ەحوبا ٴداۋىتتى كەرەگىمەن ٵردايىم قامتاماسىز ەتىپ وتىرعاندىقتان، ول ونىڭ قامقورلىعىن كورگەن. بۇعان قوسا، ول ەحوبامەن دوس بولىپ، ونىڭ شاپاعاتىن سەزىنگەن. سوندىقتان دا ول الدا نە بولماسىن، ەحوبا قاجەتىمەن قامداي بەرەتىنىنە سەنىمدى بولدى. ٴداۋىتتىڭ ەحوبانىڭ سۇيىسپەنشىلىگىنە دەگەن سەنىمدىلىگى مىقتى بولعاندىقتان، ول ەشقانداي ۋايىم مەن قورقىنىشقا بەرىلمەگەن. قايتا، باقىت پەن قاناعات سەزىنگەن (ٴزاب. 16:11). 24w.01 28، 29-ب.، 12، 13-ابز.
25-شىلدە، جۇما
مەن وسى زامان اياقتالعانشا، ٵر كۇنى سەندەرمەن بىرگەمىن (مات. 28:20).
ەكىنشى دۇنيەجۇزىلىك سوعىستان بەرى ەحوبانىڭ قىزمەتشىلەرى كوپ ەلدە ەركىن ۋاعىزداپ كەلەدى. وسىلاي ٸسىمىز العا باسىپ، قۇلاشىن كەڭ جايدى. بۇگىندە باسقارۋشى كەڭەستىڭ مۇشەلەرى يسانىڭ باسشىلىعىنا جۇگىنەدى. ولار باۋىرلاستارعا بەرەتىن نۇسقاۋلارى ەحوبا مەن يسانىڭ وي قالپىنا ساي بولعانىن قالايدى. سوسىن سول نۇسقاۋلاردى اۋداندىق باقىلاۋشىلار مەن اقساقالدار ارقىلى قاۋىمدارعا جەتكىزەدى. كيەلى رۋحپەن مايلانعان اقساقالدار (كەڭ ماعىنادا بارلىق اقساقالدار) يسا ٴماسىحتىڭ «وڭ قولىندا» (ايان 2:1). كەمەلسىز بولعاندىقتان ولار دا قاتەلىكتەر جىبەرەدى، ارينە. مۇسا دا، ەشۋا دا، I عاسىرداعى ەلشىلەر دە كەيدە قاتەلەسكەن (مۇس. 4-ج. 20:12؛ ەشۋا 9:14، 15؛ ريم. 3:23). ٴبىراق يسا ادال قۇل مەن اقساقالدارعا مۇقيات باعىت بەرىپ وتىرادى. ولاي بولسا، جاۋاپتى باۋىرلاستاردىڭ باسشىلىعىنا تولىقتاي سەنىم ارتا الامىز. 24w.02 23، 24-ب.، 13، 14-ابز.
26-شىلدە، سەنبى
سۇيىكتى بالالارى رەتىندە قۇدايعا ەلىكتەڭدەر (ەفەس. 5:1).
وزگەلەرگە ەحوبا تۋرالى ايتقاندا، وعان دەگەن ريزاشىلىعىمىز بەن سۇيىسپەنشىلىگىمىز سەزىلىپ تۇرسا، ول قۋانادى. قىزمەتتە ٴبىزدىڭ باستى ماقساتىمىز — ادامدارعا ەحوباعا جاقىنداۋعا كومەكتەسۋ. ٴبىز سياقتى ولار دا ەحوبانى سۇيىكتى اكە دەپ تانىعانىن قالايمىز (جاق. 4:8). ٴبىز كيەلى كىتاپتان ادامدارعا ەحوبانىڭ ادامزاتتى سۇيەتىن، ٵدىل، دانا، قۇدىرەتتى جانە باسقا دا تاماشا قاسيەتتەرى بار قۇداي ەكەنىن كورسەتەمىز. ەحوبانى قۋانتىپ، ماداقتاۋدىڭ تاعى ٴبىر جولى — بارىنشا وعان ۇقساۋعا تىرىسۋ. وسىلايشا ٴبىز مىنا زۇلىم دۇنيەدەن ەرەكشەلەنەمىز. ال ادامدار بۇنى بايقاپ، سەبەبىن بىلگىسى كەلەتىن شىعار (مات. 5:14—16). سوندىقتان وزگەلەرمەن كۇندەلىكتى شارۋالارمەن ۇشىراسقاندا مۇمكىندىك تۋسا، ولارعا ٸس-ارەكەتىمىزدىڭ نەگە باسقاشا ەكەنىن ٴتۇسىندىرىپ كەتسەك بولادى. ناتيجەسىندە اقجۇرەكتى ادامداردىڭ بويىندا قۇدايىمىزعا دەگەن قىزىعۋشىلىق پايدا بولادى. وسىنداي جولدارمەن ەحوبانى ماداقتاعانىمىز وعان قاتتى ۇنايدى (ٴتىم. 1-ح. 2:3، 4). 24w.02 10-ب.، 7-ابز.
27-شىلدە، جەكسەنبى
ول... جىگەرلەندىرە الۋى جانە اشكەرەلەي الۋى... كەرەك (تيت. 1:9).
رۋحاني تولىسقان ەر ازامات بولۋ ٷشىن ساعان ومىرگە قاجەتتى قابىلەتتەردى ۇيرەنىپ الۋ كەرەك. بۇل ساعان قاۋىمداعى مىندەتتەرىڭدى اتقارۋعا، ٶزىڭدى يا وتباسىڭدى اسىراۋ ٷشىن جۇمىس ىستەۋگە جانە باسقالارمەن جاقسى قارىم-قاتىناستا بولۋعا كومەكتەسەدى. ماسەلەن، دۇرىس وقىپ-جازۋدى ۇيرەن. كيەلى جازبالاردا قۇداي ٴسوزىن كۇن سايىن وقىپ، وي جۇگىرتەتىن ادامنىڭ باقىتتى ٵرى ونىڭ ٵربىر ٸسى ٴساتتى بولاتىنى ايتىلعان (ٴزاب. 1:1—3). كيەلى كىتاپتى كۇندەلىكتى وقىساڭ، ەحوبانىڭ ويىن جاقسىراق بىلەسىڭ. وسىلايشا سارالاپ-سالماقتاۋدى جانە جازبالارعا ساي ارەكەت ەتۋدى ۇيرەنەسىڭ (ناق. س. 1:3، 4). باۋىرلاستار كيەلى كىتاپقا نەگىزدەپ باعىت-باعدار سىلتەي الاتىن، كەڭەس بەرە الاتىن ەر ادامدارعا مۇقتاج. دۇرىس وقىپ، ساۋاتتى جازۋدى ۇيرەنسەڭ، قاۋىمدا مازمۇندى ٵرى سەنىمدى نىعايتاتىن باياندامالار ايتىپ، تۇسىنىكتەمەلەر بەرە الاسىڭ. سونداي-اق وسى داعدىنىڭ ارقاسىندا سەن پايدالى ويلاردى وزىڭە ٴتۇرتىپ الا الاسىڭ. بۇل جازبالارىڭ ٶز سەنىمىڭدى نىعايتۋعا جانە باسقالاردى جىگەرلەندىرۋگە كومەك بولادى. 23w.12 26، 27-ب.، 9—11 ابز.
28-شىلدە، دۇيسەنبى
سەندەرمەن بىرلىكتەگى قۇداي وسى دۇنيەمەن بىرلىكتەگى ىبىلىستەن الدەقايدا كۇشتى (جوح. 1-ح. 4:4).
بويىڭىزدى قورقىنىش مەڭدەگەندە، بولاشاقتا شايتان قۇردىمعا كەتىپ، ەحوبانىڭ نە ىستەيتىنى جايلى ويلانىڭىز. 2014-جىلعى ايماقتىق كونگرەستە بولعان كورىنىستە ٴبىر وتاعاسى وتباسىمەن تىموتەگە 2-حات 3:1—5 تارماقتار جۇماققا قاتىستى ايتىلعاندا قالاي بولار ەدى دەپ تالقىلايدى. ول بىلاي دەيدى: «جاڭا دۇنيەدە ەڭ باقىتتى ۋاقىت بولاتىنىن ٴبىلىپ قوي: ادامدار وزگەلەردى جاقسى كورەتىن، رۋحاني قازىنانى باعالايتىن، قاراپايىم، مومىن، قۇدايعا ماداق اكەلەتىن، اتا-اناسىنا مويىنسۇناتىن، العىس بىلدىرەتىن، ادال، باۋىرمال، ىمىراشىل، وزگەلەردى تەك ماقتايتىن، ۇستامدى، جۇمساق، جاقسىلىقتى جاقسى كورەتىن، سەنىم ارتۋعا تۇراتىن، يلىككىش، كىشىپەيىل، ٴلاززات-ەرمەكتەن گورى قۇدايدى جاقسى كورەتىن ٵرى وعان شىن جۇرەكتەن بەرىلگەن بولادى. مۇندايلاردان اجىراما». ٴسىز جۇماقتا ٶمىرىمىز قانداي بولاتىنىن وتباسىڭىزبەن نە باۋىرلاستارمەن تالقىلاپ تۇراسىز با؟ 24w.01 6-ب.، 13، 14-ابز.
29-شىلدە، سەيسەنبى
مەن ساعان ريزامىن (لۇقا 3:22).
ەحوبا جەر بەتىندەگى حالقىنا قاراپ ريزا بولاتىنىن ٴبىلۋ نەتكەن قۋانىش! كيەلى كىتاپتا: «ەحوبا ٶز حالقىنان راقات تابادى»،— دەلىنگەن (ٴزاب. 149:4). دەسە دە كەيبىر باۋىرلاستار «جەكە ماعان ەحوبا ريزا ەمەس شىعار» دەپ ويلاپ، كوڭىلى تۇسەدى. قۇدايدىڭ ەجەلدە ٶمىر سۇرگەن ادال قىزمەتشىلەرىنىڭ ٴبىرازىندا وسىنداي كۇمان بولعان (سام. 1-ج. 1:6—10؛ ٵيۇپ 29:2، 4؛ ٴزاب. 51:11). كيەلى كىتاپتان بىلەتىنىمىزدەي، كەمەلسىز بولساق تا قۇدايدىڭ كوڭىلىنەن شىعىپ، ونى ريزا قىلا الامىز. ول ٷشىن يسا ماسىحكە سەنىپ، سوسىن شومىلدىرۋ راسىمىنەن ٶتۋ كەرەك (جوح. 3:16). وسىلايشا كۇنالارىمىزعا وكىنگەنىمىزدى جانە قۇدايدىڭ ەركىن ورىندايمىن دەپ ۋادە ەتكەنىمىزدى جۇرت الدىندا پاش ەتەمىز (ەل. ٸس. 2:38؛ 3:19). وسى قادامداردى جاساپ، قۇدايعا جاقىن بولۋعا تىرىسىپ جاتقانىمىزدى كورىپ، ول قاتتى قۋانادى. باعىشتالعانىمىزعا ساي بولىپ جۇرگەن ۋاقىتتىڭ بارىندە ەحوبا بىزگە ريزا ٵرى ٴبىزدى دوسىم دەپ بىلەدى (ٴزاب. 25:14). 24w.03 26-ب.، 1، 2-ابز.
30-شىلدە، سارسەنبى
ال ٴبىز كورىپ-ەستىگەنىمىز جايلى ٷنسىز قالا المايمىز (ەل. ٸس. 4:20).
بيلىك باسىنداعىلار تيىم سالسا دا ۋاعىزداي بەرۋىمىزبەن شاكىرتتەردىڭ ۇلگىسىنە ەلىكتەسەك بولادى. ەحوبا بىزگە دە قىزمەتىمىزدى اتقارۋعا كومەكتەسەتىنىنە سەنىمدى بولايىق. وعان دۇعا ايتىپ، دانالىق پەن باتىلدىق جانە قيىندىققا توتەپ بەرۋگە كومەك سۇرايىق. ارامىزدا جان اۋرۋىنا نە ٴتان اۋرۋىنا شالدىققان، جاقىنىن جوعالتقان، قۋعىن كورىپ جاتقان نەمەسە وتباسىلىق قيىندىقتارعا ۇشىراعان باۋىرلاستار بار. پاندەميانىڭ نە سوعىستىڭ سالدارى ولاردىڭ جاعدايىن ودان سايىن ۋشىقتىرىپ جاتىر. وسىنداي قيىندىقتار كورىپ جاتساڭىز، ەحوباعا ىشىڭىزدەگىنىڭ ٴبارىن ايتىپ دۇعا ەتىڭىز. وعان جاعدايىڭىزدىڭ قىر-سىرىن ايتىپ، جان دوسىڭىزبەن سويلەسكەندەي سويلەسىڭىز. ەحوبا ٴسىزدىڭ «يگىلىگىڭىز ٷشىن ارەكەت ەتەتىنىنە» ەش كۇماندانباڭىز (ٴزاب. 37:3، 5). ۇدايى دۇعا ەتسەك، «قيىنشىلىقتا تاباندى بولامىز» (ريم. 12:12). ەحوبا قىزمەتشىلەرىنىڭ باسىنان نە ٶتىپ جاتقانىن بىلەدى. ولاردىڭ «كومەك سۇراعان ۇندەرىن ەستيدى» (ٴزاب. 145:18، 19). 23w.05 5، 6-ب.، 12—15 ابز.
31-شىلدە، بەيسەنبى
يەمىزگە نە ۇنايتىنىنا ٵردايىم كوز جەتكىزىپ وتىرىڭدار (ەفەس. 5:10).
ماڭىزدى شەشىمدەر قابىلدار الدىندا «ەحوبانىڭ ەركىن تانىپ-ٴبىلىپ»، سول بويىنشا ارەكەت ەتۋىمىز كەرەك (ەفەس. 5:17). ال سول ماسەلەگە قاتىستى ەحوبانىڭ وي-پىكىرىن ٴبىلۋ دەگەنىمىز ٴبىزدىڭ جاعدايىمىزعا ساي كەلەتىن كيەلى كىتاپ ٴپرينسيپىن تابۋدى بىلدىرەدى. سول پرينسيپتەرگە ساي ارەكەت ەتسەك، دۇرىس شەشىم قابىلداي الامىز. ٴبىزدىڭ جاۋىمىز «زۇلىم» شايتان وسى دۇنيەنىڭ تىرلىكتەرىنەن قولىمىز ەش بوساماي، ەحوباعا قىزمەت ەتۋگە ۋاقىتىمىز قالماسىن دەيدى (جوح. 1-ح. 5:19 ٴسىلت.). ٴماسىحشى ەحوباعا قىزمەت ەتۋدىڭ مۇمكىندىكتەرىن كەيىنگە ىسىرىپ، جۇمىس، اقشا مەن ٴبىلىم قۋىپ كەتۋى مۇمكىن. وسىعان جول بەرگەنى — وعان وسى دۇنيەنىڭ كوزقاراسى اسەر ەتىپ جاتقانىنىڭ بەلگىسى. نەگىزى، بۇل نارسەلەردىڭ ٶزى جامان ەمەس. ٴبىراق ولار ەشقاشان دا ٶمىرىمىزدىڭ تورىنە شىعىپ كەتپەۋ كەرەك. 24w.03 24-ب.، 16، 17-ابز.