41-زەرتتەۋ ماقالاسى
«زور الاپات» كەزىندە ادال بولىڭىز
«ەحوباعا ادال جاندار، ٴبارىڭ دە ونى جاقسى كورىڭدەر! ەحوبا ادالداردى قورعايدى» (ٴزاب. 31:23).
129-ٵن تاباندى بولامىز
اڭداتپاa
1، 2. ا) جاقىندا الەمدىك كوشباسشىلار قانداي حاباردى جاريالايدى؟ ٵ) قانداي سۇراقتاردىڭ جاۋابىن الۋىمىز كەرەك؟
الەمدىك كوشباسشىلار كوپتەن كۇتكەن «بەيبىتشىلىك پەن قاۋىپسىزدىك» حابارىن جاڭا عانا جاريالاعانىن ەلەستەتىپ كورىڭىزشى. ولار جەر بەتىندە بۇرىن-سوڭدى بۇنداي بەيبىت زامان بولمادى دەپ ابدەن ماقتانۋى مۇمكىن. سونداي-اق ٴبىزدى دۇنيەدەگى بارلىق قيىندىقتاردى شەشەمىز دەگەنگە نىق سەندىرگىسى كەلەدى. ٴبىراق ولار ودان كەيىن بولاتىن وقيعاعا ەش توسقاۋىل بولا المايدى. نەگە؟ كيەلى كىتاپتاعى پايعامبارلىققا ساي، «ولاردىڭ جويىلاتىن كەزى كەنەتتەن كەلەدى»، «سوندا ولار ەش قۇتىلمايدى» (سال. 1-ح. 5:3).
2 ٴبىز مىنا ٴبىر ماڭىزدى سۇراقتاردىڭ جاۋابىن تابۋىمىز كەرەك: «زور الاپات» كەزىندە قانداي وقيعالار بولادى؟ سول كەزدە ەحوبا ٴبىزدىڭ نە ىستەگەنىمىزدى قالايدى؟ «زور الاپات» كەزىندە ادال بولىپ قالۋعا قالاي دايىندالۋىمىز كەرەك؟ (مات. 24:21).
«زور الاپات» كەزىندە نە بولادى؟
3. ايان 17:5، 15—18 تارماقتارعا ساي، قۇداي ۇلى بابىلدى قالاي جويادى؟
3 ايان 17:5، 15—18 وقىڭىز. «ۇلى بابىل» جويىلاتىن بولادى. قالاي؟ «قۇداي ولاردىڭ [ياعني الەمدىك كوشباسشىلاردىڭ] جۇرەكتەرىنە ٶز ويىن سالىپ، جۇزەگە اسىرتادى». بۇل قانداي وي؟ دۇنيەجۇزىلىك جالعان دىندەر يمپەرياسىن، ونىڭ ىشىندە حريستيان الەمىن جويۋ تۋرالى وي سالادىb. قۇداي ٶز ويىن «ال قىزىل جىرتقىش اڭنىڭ» «ون ٴمۇيىزىن» بەينەلەيتىندەردىڭ جۇرەگىنە سالادى. ون ٴمۇيىز دەگەن «جىرتقىش اڭدى»، ياعني بۇۇ-نى قولدايتىن بارلىق ۇكىمەتتەردى بەينەلەيدى (ايان 17:3، 11—13؛ 18:8). بۇل ۇكىمەتتەر جالعان دىنگە شابۋىل جاساعاندا، زور الاپاتتىڭ باستالعانىنىڭ بەلگىسى بولادى. ول كەنەتتەن كەلەتىن، ەشكىمدى اينالىپ وتپەيتىن ۇرەيلى وقيعا بولماق.
4. ا) الەمدىك كوشباسشىلار جالعان دىنگە جاسايتىن شابۋىلدارىن قانداي سەبەپتەرمەن ٴتۇسىندىرۋى مۇمكىن؟ ٵ) سول دىندەردىڭ بۇرىنعى مۇشەلەرى نە ىستەيتىنگە ۇقسايدى؟
4 الەمدىك كوشباسشىلار ۇلى بابىلعا جاسايتىن شابۋىلدارىن قانداي سەبەپتەرمەن تۇسىندىرەتىنىن بىلمەيمىز. ولار ۇلى بابىل الەمنىڭ تىنىشىن الىپ، ساياساتقا باسىن سۇعا بەرەدى دەۋى مۇمكىن. نەمەسە ەنشىسىندەگى بايلىعى مەن مەنشىگى تىم كوپ دەپ ايتۋى مۇمكىن (ايان 18:3، 7). وسى شابۋىل كەزىندە ولار جالعان دىندەردىڭ بارلىق مۇشەسىن جويادى دەپ ايتۋ قيسىنسىز. كەرىسىنشە، ولار دىندەردى جويادى دەپ تۇسىنگەن قيسىندى بولسا كەرەك. دىندەر جويىلعان سوڭ ولاردىڭ بۇرىنعى مۇشەلەرى ٴدىني قىزمەتكەرلەرگە الدانعانىن ٴتۇسىنىپ، سول دىنگە قاتىسى جوق ادامداي سىڭاي تانىتاتىنعا ۇقسايدى.
5. ەحوبا زور الاپاتقا قاتىستى نەنى ۋادە ەتكەن جانە نەگە؟
5 كيەلى كىتاپتا ۇلى بابىلدىڭ جويىلۋى قانشا ۋاقىتقا سوزىلاتىنى جايلى ەشتەڭە ايتىلماعان، ٴبىراق بۇل سالىستىرمالى تۇردە از ۋاقىتتىڭ ىشىندە بولاتىنىن بىلەمىز (ايان 18:10، 21). «تاڭداپ العاندار» مەن شىنايى ٴدىن جويىلىپ كەتپەس ٷشىن ەحوبا «سول كۇندەردى قىسقارتاتىنىن» ۋادە ەتكەن (مار. 13:19، 20). ٴبىراق زور الاپات باستالعاننان ارماگەددون سوعىسىنا دەيىنگى ۋاقىت ارالىعىندا ەحوبا بىزدەن نە تالاپ ەتەدى؟
شىنايى ٴدىندى ۇستانا بەرىڭىز
6. جالعان دىنمەن كەز كەلگەن بايلانىستى ٷزىپ قويا سالۋ جەتكىلىكتى مە؟
6 الدىڭعى ماقالادا ايتقانىمىزداي، ەحوبا ٶز قىزمەتشىلەرىنىڭ ۇلى بابىلدان شىعىپ كەتۋىن تالاپ ەتەدى. الايدا بۇل ٷشىن جالعان دىنمەن كەز كەلگەن بايلانىستى ٷزىپ قويا سالۋ جەتكىلىكسىز. ٴبىز ەحوباعا قىزمەت ەتۋگە دە نىق بەكىنۋىمىز كەرەك. قازىر سونىڭ ەكى جولىن قاراستىرايىق.
ٴتىپتى اۋىر كەزدەردە دە جينالىستاردى قالدىرمايىق (7-ابزاستى قاراڭىز)g
7. ا) ەحوبانىڭ ٵدىل مورالدىق نورمالارىن قالاي بەك ۇستانا الامىز؟ ٵ) ەۆرەيلەرگە 10:24، 25 تە نە سەبەپتى جينالىپ تۇرۋىمىز كەرەك دەپ ايتىلعان جانە نەگە بۇل اسىرەسە بۇگىندە ماڭىزدى؟
7 بىرىنشىدەن، ٴبىز ەحوبانىڭ ٵدىل مورالدىق نورمالارىن ٵرى قاراي دا بەك ۇستانۋىمىز كەرەك. ٴبىز وسى الەمنىڭ ازعىن ٴجۇرىس-تۇرىستارىن ەشقاشان قۇپ كورمەۋىمىز كەرەك. مىسالى، ٴبىز كەز كەلگەن جىنىستىق ونەگەسىزدىكتى، سونداي-اق ٴبىر جىنىستى ادامداردىڭ نەكەلەسۋىن جانە باسقا دا گوموسەكسۋالدىق ارەكەتتەردى ماقۇلدامايمىز (مات. 19:4، 5؛ ريم. 1:26، 27). ەكىنشىدەن، باۋىرلاستارىمىزبەن بىرگە عيبادات ەتۋدى دوعارماۋىمىز كەرەك. مۇمكىن بولسا پاتشالىق سارايلارىندا، ال مۇمكىندىك جوق بولسا، باۋىرلاستاردىڭ ۇيلەرىندە يا باسقا دا جەرلەردە ٴتىپتى جاسىرىن كەزدەسە بەرەمىز. قانداي جاعداي بولماسىن، ٴبىز كەزدەسۋلەرگە بارۋدى ەشقاشان دوعارمايمىز. «سول كۇننىڭ جاقىن قالعانىن بىلگەندىكتەن» ٴبىز «بۇرىنعىدان دا كوبىرەك» جينالۋىمىز كەرەك (ەۆرەيلەرگە 10:24، 25 وقىڭىز).
8. بولاشاقتا ۋاعىزدايتىن حابارىمىز قالاي اۋىسۋى مۇمكىن؟
8 زور الاپات كەزىندە جاريالايتىن حابارىمىز باسقا حابار بولاتىنعا ۇقسايدى. قازىر ٴبىز پاتشالىق جايلى ىزگى حاباردى ۋاعىزداپ ٴجۇرمىز، شاكىرت دايىنداۋعا ۇمتىلىپ ٴجۇرمىز. ٴبىراق زور الاپات كەزىندە ٴبىز سوققىداي تيەتىن حاباردى ۋاعىزداۋىمىز مۇمكىن. كيەلى كىتاپتا سول حابار ۇلكەن بۇرشاقپەن سالىستىرىلعان (ايان 16:21). ٴبىز شايتاننىڭ دۇنيەسى جاقىندا تۇپتامىرىمەن جويىلاتىنى جايلى ۋاعىزداۋىمىز مۇمكىن. حابارىمىزدىڭ قانداي بولاتىنىن، ونى قالاي جاريالايتىنىمىزدى ۋاقىتى كەلگەندە ناقتى بىلە جاتارمىز. ٴجۇز جىلدان بەرى قالاي ۋاعىزداپ، قالاي ٴتالىم بەرسەك، سول كەزدە دە تۋرا سول تاسىلدەردى قولدانامىز با؟ الدە باسقا تاسىلدەر بولا ما؟ بۇنى ۋاقىت كورسەتەدى. قالاي ۋاعىزداساق تا، ٴبىز ەحوبانىڭ ۇكىم حابارىن باتىلدىقپەن ۋاعىزداۋ مارتەبەسىنە يە بولاتىنعا ۇقسايمىز (ەزەك. 2:3—5).
9. الەمدىك كوشباسشىلار ٴبىزدىڭ حابارىمىزعا قالاي قارايدى، ٴبىراق ٴبىز نە نارسەگە كۇماندانباساق بولادى؟
9 حابارىمىزدى ەستىگەندە، الەمدىك كوشباسشىلار ٴبىزدىڭ اۋزىمىزدى ٴبىرجولا جاۋىپ تاستاۋعا تىرىسۋى ابدەن مۇمكىن. بۇگىندە قىزمەتتە ەحوبانىڭ كومەگىنە قالاي ارقا سۇيەسەك، سول كەزدە دە ونىڭ قولداۋىنا تۋرا سولاي ٷمىت ارتۋ قاجەت بولادى. قۇداي ٶز ەركىن ورىنداۋ ٷشىن بىزگە قاجەتتى كۇش دارىتاتىنىنا ەش كۇماندانباساق بولادى (ميحا 3:8).
شابۋىلعا دايىن بولىڭىز
10. لۇقا 21:25—28 تارماقتاردا ايتىلعانداي، زور الاپات كەزىندە بولاتىن وقيعالاردى ادامداردىڭ باسىم كوپشىلىگى قالاي قابىلدايدى؟
10 لۇقا 21:25—28 وقىڭىز. زور الاپات كەزىندە ادامدار وزدەرى سەنىپ كەلگەن، تۇراقتى بولىپ كورىنگەن ساياسي، ساۋدا-ساتتىق جۇيەسى جانە وسى دۇنيەنىڭ باسقا دا بولىكتەرىنىڭ جويىلىپ جاتقانىن كورگەندە، قاتتى ابدىراپ قالادى. ولار «ازاپ» شەگەتىن بولادى جانە ادامزات تاريحىنداعى ەڭ قايعىلى كەزەڭدە ٶلىپ كەتەمىز بە دەپ قورقاتىن بولادى (ساف. 1:14، 15). سول كەزدە ٴتىپتى ەحوبانىڭ حالقىنىڭ ٶمىرى دە قيىنداسا كەرەك. وسى دۇنيەلىك بولماعاندىقتان ٴبىز كەيبىر قيىندىقتارعا كەزىگۋىمىز ىقتيمال. قانداي دا ٴبىر قاجەت نارسەلەردىڭ وزىنە ٴزارۋ بولۋىمىز دا مۇمكىن.
11. ا) جالعان دىندەر جويىلعان كەزدە نەگە ەحوبا كۋاگەرلەرى ادامدار مەن الەمدىك كوشباسشىلاردىڭ نازارىندا بولادى؟ ٵ) نەگە زور الاپاتتان قورىقپاۋىمىز كەرەك؟
11 سول كەزدەرى دىندەرى جويىلعان ادامدار ەحوبا كۋاگەرلەرىنىڭ ٴدىنى نەگە ٵلى جويىلماعان دەپ قاتتى اشۋلانۋى مۇمكىن. ولار نارازىلىقتارىن كورسەتىپ، شۋ شىعارادى. مىسالى، ينتەرنەت، تەلەديدار، راديو ارقىلى. الەمدىك كوشباسشىلار مەن وسى دۇنيەنىڭ بيلەۋشىسى شايتان ٴبىزدى جەك كورەتىن بولادى، ويتكەنى جەر بەتىندە جويىلماعان جالعىز ٴدىن ٴبىز بولامىز. ولار جەر بەتىندەگى بارلىق دىندەردى جويامىز دەگەن ماقساتىنا قول جەتكىزە الماي قالادى. سوندىقتان ٴبىز بارلىعىنىڭ نازارىنا ىلىنەمىز. سول شاقتا الەمدىك كوشباسشىلار ماگوگ جەرىندەگى گوگقا اينالادىc. ولار بىرگە جينالىپ، ەحوبانىڭ حالقىنا اياۋسىز شابۋىل جاسايدى (ەزەك. 38:2، 14—16). ٴبىز قازىر جاعدايدى بۇگە-شىگەسىنە دەيىن بىلمەگەندىكتەن، زور الاپات كەزىندە نە بولار ەكەن دەپ ۋايىمداي باستاۋىمىز مۇمكىن. ٴبىراق ٴبىر انىعى — زور الاپاتتان قورقۋدىڭ قاجەتى جوق. ەحوبا بىزگە امان قالۋعا كومەكتەسەتىن نۇسقاۋلار بەرەدى (ٴزاب. 34:19). سول كەزدە ٴبىز «ەڭسەلەرىمىزدى تۇزەپ، باستارىمىزدى كوتەرىپ» تۇرامىز، ويتكەنى «قۇتقارىلۋىمىز جاقىن» ەكەنىن بىلەمىزd.
12. الدا بولاتىن جايتتارعا دايىن بولۋىمىزعا «ادال دا اقىلدى قۇل» قالاي كومەكتەسىپ جاتىر؟
12 «ادال دا اقىلدى قۇل» زور الاپاتتا ادال بولىپ قالۋعا ٴبىزدى دايىنداپ جاتىر (مات. 24:45). مۇنى ٵرتۇرلى جولمەن ىستەپ كەلەدى. سونىڭ ٴبىر مىسالىن قاراستىرايىق: بۇل — 2016—2018 جىلدار ارالىعىندا بولعان ۋاقىتىلى ايماقتىق كونگرەستەر. سول كونگرەستەردەگى باياندامالار ەحوبانىڭ كۇنىندە امان قالۋ ٷشىن قاجەت بولاتىن قاسيەتتەردى ۇشتاي تۇسۋگە تالپىندىردى. قازىر سول قاسيەتتەردى ەسكە تۇسىرەيىك.
ادالدىقتى، تاباندىلىق پەن باتىلدىقتى بەكەمدەيىك
«زور الاپاتتان» امان قالۋ ٷشىن قازىردەن دايىندالىڭىز (13—16 ابزاستاردى قاراڭىز)h
13. ەحوباعا دەگەن ادالدىعىمىزدى قالاي وسىرسەك بولادى جانە نەگە مۇنى قازىردەن ىستەگەن ٴجون؟
13 ادالدىق. 2016-جىلعى ايماقتىق كونگرەستىڭ تاقىرىبى — «ەحوبا قۇدايعا ادال بولايىق!» سول كونگرەستە ەحوبامەن قارىم-قاتىناسىمىز تىعىز بولسا، وعان ادالدىق ساقتاۋ قيىن بولمايتىنى ايتىلدى. قۇدايعا جاقىن بولۋ ٷشىن ماعىنالى دۇعا ەتۋ، جەكە زەرتتەۋدى تىڭعىلىقتى جۇرگىزۋ وتە ماڭىزدى ەكەنىن دە ەسىمىزگە سالدى. بۇل بىزگە تاۋداي كەدەرگىلەردى جەڭۋگە كۇش-قايرات بەرەدى. زور الاپات جاقىنداعاندىقتان ٴبىزدىڭ قۇدايعا جانە ونىڭ پاتشالىعىنا قانشالىقتى ادال ەكەنىمىز ودان بەتەر سىنالاتىنىن بىلەمىز. قۇدايعا ادالدىق ساقتاعانىمىز ٷشىن ٵلى دە تالاي مازاق بولۋىمىز مۇمكىن (پەت. 2-ح. 3:3، 4). بۇعان نەگىزىنەن ٴبىزدىڭ شايتاننىڭ دۇنيەسىن قولداماي، بەيتاراپتىق ساقتاعانىمىز سەبەپ بولادى. ادالدىعىمىزدى بۇگىننەن بەكەمدەيىك، سوندا زور الاپات كەزىندە دە ادالدىعىمىزدان تايمايمىز.
14. ا) جەتەكشىلىك ەتەتىن ەر باۋىرلاستارعا قاتىستى قانداي وزگەرىس بولادى؟ ٵ) سول كەزدە نەگە ادالدىق تانىتۋىمىز كەرەك؟
14 زور الاپات كەزىندە جەردە جەتەكشىلىك ەتەتىن ەر باۋىرلاستار اۋىسادى. قانداي دا ٴبىر ساتتە جەردە قالعان مايلانعان ماسىحشىلەر ارماگەددون سوعىسىنا قاتىسۋ ٷشىن كوككە جينالادى (مات. 24:31؛ ايان 2:26، 27). بۇل دەگەنىمىز — باسقارۋشى كەڭەس بىزبەن بىرگە جەردە بولمايدى دەگەن ٴسوز. ٴبىراق باسقا قويلاردىڭ اراسىندا جەتەكشىلىكتى قولعا الاتىن بىلىكتى ەر باۋىرلاستار بولادى. سول كەزدە قۇدايعا ادالدىعىمىزدى سول ەر باۋىرلاستاردى قولداۋىمىزبەن، ولاردىڭ قۇدايدان العان نۇسقاۋلارىنا قۇلاق اسۋىمىزبەن كورسەتۋ قاجەت بولادى. ويتكەنى ٴبىزدىڭ قۇتقارىلۋىمىز نۇسقاۋلارعا مويىنسۇنعانىمىزعا بايلانىستى!
15. تاباندىلىعىمىزدى قالاي شىڭداي الامىز جانە نەگە مۇنى قازىردەن ىستەگەن ٴجون؟
15 تاباندىلىق. 2017-جىلعى ايماقتىق كونگرەستىڭ تاقىرىبى «ەش بەرىلمەيىك!» بولدى. سول باعدارلاما قيىندىقتاردا تاباندى بولۋدى ۇيرەتتى. ٴبىزدىڭ تاباندىلىعىمىز جاعدايدىڭ قولايلىلىعىنا بايلانىستى ەمەس ەكەنىن بىلدىك. ٴبىز تاباندىلىعىمىزدى ەحوباعا ارقا سۇيەپ قانا شىڭداي الامىز (ريم. 12:12). يسانىڭ مىنا ۋادەسىن ەشقاشان ەسىمىزدەن شىعارمايىق: «سوڭىنا دەيىن تاباندىلىق تانىتقان ادام قۇتقارىلادى» (مات. 24:13). بۇل كەز كەلگەن قيىندىقتارىمىزعا قاراماستان ادال بولىپ قالۋىمىز كەرەك دەگەندى بىلدىرەدى. ٵر قيىندىعىمىزعا بۇگىننەن تاباندىلىقپەن توزسەك، زور الاپات كەلگەنشە سەنىمىمىز ۇلعايىپ، تاستاي بەرىك بولادى.
16. ٴبىزدى نە باتىل ەتەدى جانە باتىلدىعىمىزدى قازىر قالاي بەكەمدەي الامىز؟
16 باتىلدىق. 2018-جىلعى ايماقتىق كونگرەستىڭ تاقىرىبى — «باتىل بولايىق!» بۇل كونگرەستە باتىلدىعىمىز قابىلەتتەرىمىزگە قاراپ انىقتالمايتىنىن بىلدىك. تاباندىلىق سياقتى ناعىز باتىلدىق تا ەحوباعا ارقا سۇيەگەندە پايدا بولادى. ەحوباعا ودان دا كوبىرەك ارقا سۇيەۋدى قالاي ۇيرەنە الامىز؟ ونىڭ ٴسوزىن كۇندە وقىپ، ەجەلدە حالقىن قالاي قۇتقارعانى جايلى وي جۇگىرتەيىك (ٴزاب. 68:20؛ پەت. 2-ح. 2:9). زور الاپاتتا الەمدىك كوشباسشىلار بىزگە شابۋىلداعان كەزدە بىزگە باتىل بولۋ كەرەك جانە ەحوباعا ەرەكشە سەنىم ارتۋ كەرەك (ٴزاب. 112:7، 8؛ ەۆر. 13:6). ەحوباعا قازىر سەنىم ارتساق، گوگ شابۋىلداعان كەزدە بويىمىزدا قاجەتتى باتىلدىق تابىلادىe.
قۇتقارىلاتىن كەزدى كۇتىڭىز
جاقىندا يسا مەن ونىڭ كوكتەگى اسكەرى ارماگەددون شايقاسىندا قۇدايدىڭ جاۋلارىن جويۋ ٷشىن كەلەدى! (17-ابزاستى قاراڭىز)
17. ارماگەددون سوعىسىنان نەگە قورىقپاۋىمىز كەرەك؟ (مۇقاباداعى سۋرەتتى قاراڭىز.)
17 الدىڭعى ماقالادا ايتىلىپ وتكەندەي، كوبىمىزدىڭ ٶمىرىمىز سوڭعى كۇندەرى ٶتىپ جاتىر. ٴبىراق ٴبىز زور الاپاتتان امان وتۋگە دە ۇمىتتەنەمىز. ارماگەددون سوعىسىمەن بىرگە وسى دۇنيەنىڭ عۇمىرى دا بىتەدى. الايدا بىزگە ەش قورقۋدىڭ قاجەتى جوق. نەگە؟ ويتكەنى بۇل ەحوبا قۇدايدىڭ شايقاسى بولادى جانە بىزگە سوعىسۋدىڭ قاجەتى بولمايدى (ناق. س. 1:33؛ ەزەك. 38:18—20؛ زاك. 14:3). ەحوبا بۇيرىق بەرگەندە، يسا ٴماسىح قۇدايدىڭ اسكەرىن شايقاسقا باستاپ شىعادى. يسانىڭ جانىندا قايتا تىرىلگەن مايلانعاندار مەن سانسىز كوپ پەرىشتەلەر بولادى. ولار شايتان مەن ونىڭ جىن-پەرىلەرىنە جانە ولاردىڭ جەردەگى اسكەرىنە قارسى شايقاسادى (دان. 12:1؛ ايان 6:2؛ 17:14).
18. ا) ەحوبا نەنى ۋادە ەتەدى؟ ٵ) ايان 7:9، 13—17 تارماقتار بولاشاققا سەنىممەن قاراۋعا قالاي كومەكتەسەدى؟
18 ەحوبا: «ساعان قارسى جاسالعان ەشبىر قارۋ جەڭىسكە جەتپەيدى»،— دەپ ۋادە ەتەدى (يشايا 54:17). ەحوبانىڭ ادال قىزمەتشىلەرىنىڭ «ۇلى جاماعاتى» «زور الاپاتتان» امان-ەسەن وتەدى! سوسىن ولار ەحوباعا دەگەن قىزمەتتەرىن جالعاستىراتىن بولادى (ايان 7:9، 13—17 وقىڭىز). كيەلى كىتاپ بولاشاقتا امان قالاتىنىمىزعا ۇلكەن سەنىمدىلىك بەرەدى! ٴبىز «ەحوبانىڭ ادالداردى قورعايتىنىن» بىلەمىز (ٴزاب. 31:23). ەحوبانى جاقسى كورەتىندەر مەن ماداقتايتىندار ونىڭ كيەلى ەسىمىنىڭ اقتالعانىن كورىپ شات-شادىمان بولادى (ەزەك. 38:23).
19. ٴبىزدى قانداي كەرەمەت بولاشاق كۇتىپ تۇر؟
19 شايتاننىڭ ىقپالىنان ادا جاڭا دۇنيەدەگى ادامدار جايلى تىموتەگە 2-حات 3:2—5 تارماقتاردا نە ايتىلار ەدى، قالاي ويلايسىز؟ («جاڭا دۇنيەدەگى ادامداردىڭ بولمىسى» دەگەن قورشاۋدى قاراڭىز.). باسقارۋشى كەڭەستىڭ مۇشەسى بولعان دجوردج گانگاسf باۋىرلاس مۇنى بىلاي سۋرەتتەدى: «جەر بەتىندەگى ٵربىر ادام ەحوباعا قىزمەت ەتكەندە، ٶمىر قانداي تاماشا بولادى! جاقىندا سىزدەر جاڭا دۇنيەدە ٶمىر ٴسۇرۋ مارتەبەسىنە يە بولاسىزدار. عۇمىرلارىڭىز ەحوبانىڭ عۇمىرىنداي بولادى. ٴيا، ٴبىز ماڭگى ٶمىر سۇرەتىن بولامىز». بۇل نەتكەن كەرەمەت ٷمىت!
122-ٵن بەرىك تە مىعىم بول!
a جاقىندا بۇكىل ادامزاتتىڭ باسىنا «زور الاپات» تونەدى. سول كەزدە ەحوبانىڭ قىزمەتشىلەرىمەن نە بولادى؟ ەحوبا ٴبىزدىڭ نە ىستەگەنىمىزدى قالايدى؟ «زور الاپاتتىڭ» كەزىندە ادال بولىپ قالۋ ٷشىن قانداي قاسيەتتەردى قازىردەن شىڭداۋىمىز كەرەك؟ بۇل ماقالادا وسى سۇراقتاردىڭ جاۋابىن الامىز.
b ٴسوز ٴمانى: حريستيان الەمىنە وزدەرىن ٴماسىحشىمىز دەپ اتايتىن، ٴبىراق ەحوبانىڭ نورمالارىنا ساي عيبادات ەتپەيتىن دىندەر جاتادى.
c ٴسوز ٴمانى: ماگوگ جەرىندەگى گوگ (قىسقاشا اتاۋى گوگ) دەگەن تىركەس زور الاپات كەزىندە ەحوباعا عيبادات ەتەتىندەرگە قارسى شابۋىل جاسايتىن وداقتاسقان حالىقتارعا نۇسقايدى.
d ارماگەددون سوعىسىنا دەيىن نە بولاتىنىن تولىعىراق ٴبىلۋ ٷشىن «قۇداي پاتشالىعى بيلىك ەتۋدە!» (حانزۇشا) كىتابىنىڭ 21-تاراۋىن قاراڭىز. ماگوگ جەرىندەگى گوگتىڭ شابۋىلى جايلى جانە ارماگەددون كەزىندە ەحوبا ٶز حالقىن قالاي قورعايتىنى جايلى كوبىرەك ٴبىلۋ ٷشىن «تازا عيبادات قالپىنا كەلتىرىلدى» (اعىلشىنشا) كىتابىنىڭ 17، 18-تاراۋلارىن قاراڭىز.
e 2019-جىلدىڭ «سۇيىسپەنشىلىك ەش سارقىلمايدى!» اتتى ايماقتىق كونگرەسى ەحوبانىڭ قورعانىشىندا عانا قاۋىپسىزدىكتە بولا الاتىنىمىزعا كوزىمىزدى جەتكىزدى (قور. 1-ح. 13:8).
f «كۇزەت مۇناراسىنداعى» (حانزۇشا) «ىستەرى ونىمەن بىرگە بارادى» دەگەن ماقالانى كورىڭىز (1994-جىل، 1-جەلتوقسان، 31-بەت).
g سۋرەت سيپاتتاماسى: زور الاپات كەزىندە كۋاگەرلەردىڭ شاعىن توبى باتىلدىق تانىتىپ، كەزدەسۋ وتكىزۋ ٷشىن ورماندا جينالىپ جاتىر.
h سۋرەت سيپاتتاماسى: ەحوبانىڭ ادال قىزمەتشىلەرىنىڭ ۇلى جاماعاتى زور الاپاتتان امان-ەسەن ٶتىپ، شات-شادىمان بولىپ جاتىر!