14-زەرتتەۋ ماقالاسى
8-ٵن ەحوبا — ٴبىزدىڭ قورعانىمىز
«كىمگە قىزمەت ەتەتىندەرىڭدى... شەشىپ الىڭدار»
«ال مەن بولسام ٷي ىشىممەن ەحوباعا قىزمەت ەتەمىن» (ەشۋا 24:15).
نەگىزگى وي
ەحوباعا عيبادات ەتۋدى تاڭداۋعا ٴبىزدى نە تالپىندىرعانىن ەسكە تۇسىرەمىز.
1. شىن باقىتتى بولعىمىز كەلسە، ٴبىز نە ىستەۋىمىز كەرەك جانە نەگە؟ (يشايا 48:17، 18)
ەحوبا ٴبىزدى قاتتى جاقسى كورەدى. ول ٴبىزدىڭ قازىر دە، بولاشاقتا دا باقىتتى عۇمىر كەشكەنىمىزدى قالايدى (ۋاع. 3:12، 13). ول ٴبىزدىڭ بويىمىزعا نەبىر ەرەكشە قابىلەتتەر دارىتقان. ٴبىراق ول بىزگە ٶز قادامىمىزعا ٶزىمىز باعىت بەرەتىندەي، دۇرىس پەن بۇرىستى ٶزىمىز اجىراتاتىنداي قابىلەت بەرمەگەن (ۋاع. 8:9؛ ەرم. 10:23). سوندىقتان دا ٴبىز قۇدايعا تاۋەلدىمىز. شىن باقىتتى بولعىمىز كەلسە، وعان قىزمەت ەتىپ، ونىڭ دۇرىس پەن بۇرىسقا قاتىستى زاڭ-تالاپتارىنا ساي ٶمىر ٴسۇرۋىمىز قاجەت (يشايا 48:17، 18 وقىڭىز).
2. شايتان ٴبىزدى نە نارسەگە سەندىرگىسى كەلەدى جانە ەحوبا ونىڭ وتىرىكشى ەكەنىن دالەلدەۋ ٷشىن نە ىستەدى؟
2 شايتان ادامدار ٶز-وزدەرىنە بيلىك ەتىپ، ەحوباسىز-اق باقىتتى بولادى دەگەنگە سەندىرگىسى كەلەدى (مۇس. 1-ج. 3:4، 5). بۇنىڭ وتىرىك ەكەنىن دالەلدەۋ ٷشىن ەحوبا ادامداردىڭ قولىنا از ۋاقىتقا بيلىك بەردى. ادامنىڭ بيلىك ەتۋى ەشقانداي جاقسىلىق اكەلمەگەنىن ٶزىمىز دە كورىپ ٴجۇرمىز. الايدا كيەلى جازبالاردا ەحوباعا قىزمەت ەتكەننىڭ ارقاسىندا قانشاما ادامنىڭ ٴماندى دە ماعىنالى ٶمىر كەشكەنى جازىلعان. سولاردىڭ ٴبىرى — قۇدايدىڭ ۇلى يسا ٴماسىح. بۇل ماقالادا ٴبىز الدىمەن ەحوباعا قىزمەت ەتۋدى تاڭداۋعا يسانى نە تالپىندىرعانىن قاراستىرامىز. كەيىن نەگە كوكتەگى اكەمىز ەحوبا عيباداتىمىزعا ابدەن لايىق ەكەنىن كورەمىز. ال سوڭىندا ەحوباعا قىزمەت ەتۋدى تاڭداۋعا ٴبىزدى نە تالپىندىراتىنىن قاراستىرامىز.
ەحوباعا قىزمەت ەتۋدى تاڭداۋعا يسانى نە تالپىندىردى؟
3. يسا قانداي تاڭداۋدىڭ الدىندا تۇردى جانە ول قانداي تاڭداۋ جاسادى؟
3 بىردە يسانىڭ ٶزى دە تاڭداۋ الدىندا تۇردى. ول شومىلدىرۋ راسىمىنەن وتكەننەن كەيىن كوپ ۇزاماي، شايتان وعان جەرجۇزىنىڭ بارلىق پاتشالىقتارىن ۇسىنىپ، وزىنە ٴبىر رەت تابىنۋدى سۇرادى. سول كەزدە يسا قانداي تاڭداۋ جاسايتىنىن كورسەتىپ: «كەت قاسىمنان، شايتان! كيەلى جازبادا «ەحوبا قۇدايىڭا عيبادات ەتىپ، تەك سوعان عانا قىزمەت ەت!» دەپ جازىلعان عوي»،— دەدى (مات. 4:8—10). يسانى بۇنداي تاڭداۋ جاساۋعا نە تالپىندىرعانىن كورەيىك.
4، 5. يسانىڭ ەحوباعا قىزمەت ەتۋدى تاڭداعان سەبەبى نەدە؟
4 يسانىڭ ەحوباعا قىزمەت ەتۋدى تاڭداعان باستى سەبەبى — ول كوكتەگى اكەسىن بار جۇرەگىمەن جاقسى كورەدى (جوح. 14:31). ونىڭ ۇستىنە، يسا ەحوباعا قىزمەت ەتۋ دۇرىس ەكەنىن تۇسىنگەن (جوح. 8:28، 29؛ ايان 4:11). ول ەحوبانىڭ جاراتۋشى ەكەنىن، قانشالىقتى سەنىمدى ٵرى جومارت قۇداي ەكەنىن جاقسى بىلەدى (ٴزاب. 33:4؛ 36:9؛ جاق. 1:17). ەحوبا يساعا ٵردايىم شىندىقتى ايتقان جانە ودان ەشبىر يگىلىگىن اياماعان (جوح. 1:14). ال شايتان، كەرىسىنشە، كىسى ٶلتىرۋشى. ساراڭ ٵرى تەك قارا باسىن ويلايتىن ول نەبىر وتىرىكتى ايتۋعا دايىن (جوح. 8:44). يسا كىمنىڭ كىم ەكەنىن ٴبىلىپ تۇرعاندىقتان، ەحوبادان تەرىس اينالىپ، شايتانعا قىزمەت ەتۋ ويىنا دا كەلمەگەن (ٴفىلىپ. 2:5—8).
5 يسانىڭ ەحوباعا قىزمەت ەتۋدى تاڭداعان تاعى ٴبىر سەبەبى — ادال قىزمەتى قانداي تاماشا ناتيجە اكەلەتىنىن ويدا ۇستادى (ەۆر. 12:2). ادال بولىپ قالسا، ەحوبانىڭ ەسىمىن كيەلى ەتەتىنىن جانە ادامزاتتى كۇنا مەن ولىمنەن ازات ەتە الاتىنىن ول جاقسى ٴتۇسىندى.
ەحوبا عيباداتىمىزعا ابدەن لايىق
6، 7. بۇگىندە نەگە كوپ ادام ەحوباعا قىزمەت ەتپەيدى جانە نەگە ەحوبا ٴبىزدىڭ عيباداتىمىزعا ابدەن لايىق؟
6 بۇگىندە كوپ ادام ەحوباعا قىزمەت ەتپەيدى. ويتكەنى ولار قۇدايدىڭ كەرەمەت قاسيەتتەرىنەن، ونىڭ ادامزات ٷشىن جاساعان بار جاقسىلىعىنان بەيحابار. پاۋىلدىڭ زامانىندا دا ادامدار بىلمەستىكپەن ٶمىر سۇرگەن. سولاردىڭ اراسىندا افينالىقتار دا بولدى (ەل. ٸس. 17:19، 20، 30، 34).
7 پاۋىل افينالىقتارعا شىنايى قۇداي «بارلىعىنا ٶمىر، تىنىس جانە قاجەتتىنىڭ ٴبارىن بەرەتىنىن» ايتىپ تۇسىندىرگەن. كەيىن ارتىنان: «ونىڭ ارقاسىندا ٴبىز ٶمىر ٴسۇرىپ، ارەكەت ەتىپ، ٴتىرى ٴجۇرمىز»،— دەدى. ەحوبا «ٴبىر ادامنان كۇللى حالىقتاردى شىعارعان» جاراتۋشى بولعاندىقتان، ٴبىز وعان عيبادات ەتۋگە مىندەتتىمىز (ەل. ٸس. 17:25، 26، 28).
8. ەحوبا ەشقاشان نە ىستەمەيدى؟ ٴتۇسىندىرىڭىز.
8 ەحوبا جاراتۋشى ٵرى بۇكىل الەمنىڭ ٵمىرشىسى بولعاندىقتان، ادامداردى وزىنە قىزمەت ەتۋگە ماجبۇرلەي الار ەدى. ٴبىراق ەحوبا مۇندايعا ەشقاشان بارمايدى. ويتكەنى وعان قىزمەت ەتۋدى ادامدار ٶزى تاڭداسا ەكەن دەيدى. ونىڭ قانداي قۇداي ەكەنىنە، ٴبىزدى قانشالىقتى جاقسى كورەتىنىنە ٶزىمىزدىڭ كوزىمىز جەتۋ ٷشىن ەحوبا بىزگە مول ٴبىلىم بەرىپ جاتىر. ول مۇمكىندىگىنشە كوپ ادامنىڭ وعان قىزمەت ەتۋدى تاڭداپ، ماڭگى ٶمىر سۇرگەنىن قالايدى (ٴتىم. 1-ح. 2:3، 4). سوندىقتان دا ول بىزگە ٶزىنىڭ تاماشا نيەتى جايلى جانە ادامدار ٷشىن دايىنداپ قويعان جارقىن بولاشاق جايلى بارىنە ايتۋدى تاپسىردى. ول بىزگە بۇل ٸستى شەبەر اتقارۋدى ۇيرەتىپ تە جاتىر (مات. 10:11—13؛ 28:19، 20). وعان قىزمەت ەتۋدى تاڭداعاندار بىرلىكتە عيبادات ەتسىن دەپ ولاردى قاۋىمعا جينادى، سونداي-اق قامقور دا مەيىرىمدى باعۋشىلار بەردى (ەل. ٸس. 20:28).
9. ەحوبانىڭ سۇيىسپەنشىلىگى مول ەكەنى نەدەن كورىنەدى؟
9 ەحوباعا قىزمەت ەتپەيتىن ادامداردىڭ ومىرىنە قاراپ، ەحوبانىڭ سۇيىسپەنشىلىگى قانشالىقتى مول ەكەنىن كورۋگە بولادى. ويلاپ كورىڭىزشى: تالاي عاسىردان بەرى ميللياردتاعان ادام نەنىڭ دۇرىس، نەنىڭ بۇرىس ەكەنىن ٶزىم بىلەم دەپ، ٶز بەتتەرىنشە ٶمىر ٴسۇرىپ كەلەدى. سوعان قاراماستان، ەحوبا بۇل ادامدارعا ٶمىردىڭ قىزىعىن كورۋگە جول بەرىپ وتىر (مات. 5:44، 45؛ ەل. ٸس. 14:16، 17). ەحوبا ولاردى ٴسۇيۋ، سۇيىكتى بولۋ، وتباسىن قۇرۋ، ەڭبەگىنىڭ راقاتىن كورۋ سياقتى باقىتتان ايىرمادى (ٴزاب. 127:3؛ ۋاع. 2:24). بۇل كوكتەگى اكەمىزدىڭ بارلىق ادامدى جاقسى كورەتىنىن دالەلدەيدى (مۇس. 2-ج. 34:6). ال قازىر ەحوباعا قىزمەت ەتۋدى ٴبىز نە ٷشىن تاڭداعانىمىزدى جانە سول ٷشىن ول ٴبىزدى قانداي باتالارعا بولەپ جاتقانىن ەسكە تۇسىرەيىك.
ەحوباعا قىزمەت ەتۋدى تاڭداۋعا ٴبىزدى نە تالپىندىردى؟
10. ا) ٴبىز ەحوباعا ٴبىرىنشى كەزەكتە نە ٷشىن قىزمەت ەتەمىز؟ (ماتاي 22:37) ٵ) ەحوبانىڭ شىدامدىلىعىنا نە ٷشىن ريزاسىز؟ (ٴزابۇر 103:13، 14)
10 ەحوباعا قىزمەت ەتەتىنىمىزدىڭ باستى سەبەبى — ٴبىز دە يسا سياقتى ەحوبانى ەرەكشە جاقسى كورەمىز (ماتاي 22:37 وقىڭىز). ەحوبانىڭ تاماشا قاسيەتتەرىن تانىپ-بىلگەن سايىن ونىمەن دوس بولۋعا دەگەن ىقىلاسىمىز دا ارتا بەرەدى. مىسالى، ەحوبا — وتە شىدامدى قۇداي. يسرايلدىكتەر مويىنسۇنباي كەتكەن كەزدە ول: «وتىنەم،.. جامان جولدارىڭنان قايتىڭدارشى»،— دەپ جالىنىپ سۇراعان (ەرم. 18:11). ەحوبا ادامنىڭ كەمەلسىز، توپىراق ەكەنىن ەشقاشان ەستەن شىعارمايدى (ٴزابۇر 103:13، 14 وقىڭىز). وسىنداي شىدامدى، ٵردايىم كەشىرۋگە دايىن قۇدايعا ماڭگىلىك بويى قىزمەت ەتكىڭىز كەلەرى ٴسوزسىز.
11. ەحوباعا قىزمەت ەتۋدى تاڭداعانىمىزدىڭ تاعى ٴبىر سەبەبى نەدە؟
11 ەحوباعا قىزمەت ەتەتىنىمىزدىڭ تاعى ٴبىر سەبەبى — ٴبىز بۇنىڭ دۇرىس ەكەنىن بىلەمىز (مات. 4:10). ونىڭ ۇستىنە، ادال قىزمەتىمىز قانداي تاماشا ناتيجە اكەلەتىنىن تۇسىنەمىز. ادال بولىپ قالساق، ەحوبانىڭ ەسىمىنىڭ كيەلى بولۋىنا ۇلەس قوسامىز، شايتاننىڭ وتىرىكشى ەكەنىن دالەلدەيمىز جانە كوكتەگى اكەمىزدىڭ جۇرەگىن قۋانتامىز. ەحوباعا قىزمەت ەتۋدى تاڭداعانداردى تاماشا بولاشاق كۇتىپ تۇر. ولار ەحوبا قۇدايعا ماڭگى باقي عيبادات ەتەتىن بولادى! (جوح. 17:3).
12، 13. دجەين مەن پامنىڭ وقيعاسىنان قانداي وي تۇيەمىز؟
12 ەحوباعا قىزمەت ەتۋدى كىشكەنتاي بالالار دا تاڭداي الادى. وسكەن سايىن ولاردىڭ ەحوباعا دەگەن سۇيىسپەنشىلىكتەرى دە وسە بەرەدى. مىسالى، دجەين مەن پامa دەگەن اپكەلى-ٴسىڭلىلى باۋىرلاستاردى الايىق. ولار كيەلى كىتاپتى زەرتتەي باستاعاندا جاستارى نەبارى 11 دە جانە 10 دا ەدى. اتا-انالارى وزدەرى زەرتتەمەسە دە، قىزدارىنا زەرتتەۋگە رۇقسات ەتكەن. ٴبىراق ولاردى ٴبارىبىر اپتا سايىن وزدەرىمەن بىرگە شىركەۋگە اپارىپ جۇرگەن. دجەين بىلاي دەيدى: «كۋاگەرلەر ماعان كيەلى كىتاپتان كوپ نارسە ۇيرەتتى. سول بىلگەندەرىم ەسىرتكى قابىلداپ، ازعىن ٶمىر كەشىپ جۇرگەن قۇرداستارىمنىڭ قىسىمىنا قارسى تۇرۋعا كومەكتەستى».
13 بىرنەشە جىلدان كەيىن بۇل ەكى قىز جاريالاۋشى بولدى. تاعى ٴسال ۋاقىتتان كەيىن ەكەۋى ىزاشارلىق قىزمەتتى باستادى. كەيىن قارتايعان اتا-اناسىنا قاراپ جۇرگەندە دە ولار بۇل قىزمەتتەرىن توقتاتپادى. وتكەنگە كوز تاستاپ دجەين بىلاي دەيدى: «ەحوبا ٶز دوستارىنا شەكسىز ادال ەكەنىنە كوزىم جەتتى. ول قىزمەتشىلەرىن ەشقاشان تاستامايدى، ويتكەنى تىموتەگە 2-حات 2:19 دا ايتىلعانداي، «ەحوبا ٶز مەنشىگىندەگىلەردى بىلەدى». راسىندا دا، ەحوباعا قىزمەت ەتۋدى تاڭداپ، ونى شىن سۇيەتىندەر ەحوبانىڭ قامقورلىعىندا جۇرەدى.
14. سوزىمىزبەن جانە ىسىمىزبەن ەحوبانىڭ ەسىمىن جالادان قالاي تازارتا الامىز؟ (سۋرەتتى دە قاراڭىز.)
14 ٴبىز ەحوبانىڭ ەسىمى بار جالادان تازارسا ەكەن دەيمىز. سول ٷشىن دە ادامدارعا ونىڭ شىن مانىندە قانداي قۇداي ەكەنىن ايتقىمىز كەلەدى. مىناداي جاعدايدى ەلەستەتىڭىزشى: بىرەۋ ٴسىزدىڭ مەيىرىمدى، جومارت دوسىڭىزدى جامانداسا، ونى مەيىرىمسىز، وتىرىكشى دەپ ايىپتاسا، نە ىستەر ەدىڭىز؟ دوسىڭىزدى بىردەن جاقتاپ شىعارىڭىز انىق. بۇگىندە شايتان مەن ونىڭ جاقتاستارى نەبىر وتىرىك تاراتىپ، ەحوبانىڭ اتىنا كىر كەلتىرىپ ٴجۇر. ەندەشە، ٴبىز دە دوسىمىز ەحوبانى قىزعىشتاي قورعاپ، ول جايلى شىندىقتاردى جاريا ەتەيىك (ٴزاب. 34:1؛ يشايا 43:10). ەحوباعا جان-تانىمىزبەن قىزمەت ەتكىمىز كەلگەندىكتەن، ٴبىز ونى سوزىمىزبەن دە، ىسىمىزبەن دە قورعاۋعا دايىنبىز.
ٴسىز ەحوبانىڭ ەسىمىن قورعاپ ٴجۇرسىز بە؟ (14-ابزاستى قاراڭىز)b
15. ەحوبا ٷشىن ٶمىرىن وزگەرتكەن ەلشى پاۋىل قانداي باتالارعا كەنەلدى؟ (فىلىپىلىكتەرگە 3:7، 8)
15 ەحوباعا قىزمەت ەتۋدى باستاۋ ٷشىن، يا بولماسا بۇرىنعىدان كوبىرەك قىزمەت ەتۋ ٷشىن ٴبىز ٶمىرىمىزدى وزگەرتۋىمىز كەرەك. مىسالى، ەلشى پاۋىل ەحوبا ٷشىن ٶمىرىن تۇبەگەيلى وزگەرتكەن. ول ٴماسىحتىڭ سوڭىنان ەرۋ ٷشىن جۇرت الدىنداعى دارەجەسىنەن دە، لاۋازىمىنان دا باس تارتتى (عال. 1:14). ەحوباعا قىزمەت ەتۋدى تاڭداعانىنىڭ ارقاسىندا پاۋىلدىڭ ٶمىرى ٴمان-ماعىناعا تولى بولدى. بۇدان دا كەرەمەتى — ول ماسىحپەن بىرگە كوكتە بيلىك ەتەدى. پاۋىل ەحوباعا قىزمەت ەتۋدى تاڭداعانى ٷشىن ەشقاشان وكىنبەگەن. دەمەك، ٴبىز دە وكىنبەيمىز (فىلىپىلىكتەرگە 3:7، 8 وقىڭىز).
16. دجۋليا باۋىرلاستىڭ وقيعاسىنان نە ٴتۇيدىڭىز؟ (سۋرەتتەردى دە قاراڭىز.)
16 ەحوباعا قىزمەت ەتۋدى بارىنەن جوعارى قويساق، ٶمىرىمىز قازىر دە، بولاشاقتا دا ٴمان-ماعىنالى بولادى. دجۋليا باۋىرلاسىمىزدىڭ وقيعاسىن قاراستىرايىق. ول كىشكەنتاي كەزىنەن شىركەۋدە حور ايتىپ جۇرگەن. دجۋليانىڭ ەرەكشە داۋسىن ٴبىر كاسىبي وپەرا ٵنشىسى بايقاپ، وعان ۇستازدىق ەتەدى. كوپ ۇزاماي دجۋليا تانىمال بولىپ، ٴزاۋلىم كونسەرت زالدارىندا ٵن ايتا باستادى. مۋزىكالىق اكادەميادا وقىپ جۇرگەن كەزىندە ٴبىر ستۋدەنت وعان قۇداي جايلى شىندىقتى، ونىڭ ەسىمى ەحوبا ەكەنىن ايتادى. ٴسۇيتىپ، دجۋليا اپتاسىنا ەكى رەت كيەلى كىتاپتى زەرتتەي باستايدى. اقىرىندا، ول ەحوباعا قىزمەت ەتۋدى تاڭداپ، اتاقتان دا، مانساپتان دا باس تارتادى. بۇنداي شەشىمگە كەلۋ وڭاي بولماعانىن ايتىپ دجۋليا بىلاي دەيدى: «قۇداي بەرگەن دارىنىڭدى قور قىلما دەپ جاتقاندار كوپ بولدى. ٴبىراق مەن ٶمىرىمدى ەحوباعا قىزمەت ەتۋگە ارناعىم كەلدى». 30-جىل بۇرىن جاساعان وسى تاڭداۋى ٷشىن دجۋليا وكىنە مە؟ «ەحوباعا قىزمەت ەتۋدى تاڭداعانىما قاتتى قۋانامىن، بولاشاقتا ول مەنىڭ بار جۇرەك قالاۋىمدى ورىندايتىنىنا ەش كۇمانىم جوق»،— دەيدى ول (ٴزاب. 37:4).
ەحوباعا قىزمەت ەتۋدى بارىنەن جوعارى قويساق، ٶمىرىمىز ٴماندى دە ماعىنالى بولادى (16-ابزاستى قاراڭىز)c
ەحوباعا قىزمەت ەتۋدى توقتاتپاڭىز
17. ۋاقىتتىڭ از قالعانى ەحوباعا قىزمەت ەتۋدى تاڭداعاندار مەن تاڭداماعاندار ٷشىن نەنى بىلدىرەدى؟
17 ٴبىز قىسىلتاياڭ ۋاقىتتا ٶمىر ٴسۇرىپ جاتىرمىز. ەلشى پاۋىل بىلاي دەپ جازعان: «ازعانا ۋاقىت» قالدى، «كەلە جاتقان ول كەلىپ جەتەدى، ەش كەشىكپەيدى» (ەۆر. 10:37). ونىڭ بۇل سوزدەرى نەنى بىلدىرەدى؟ ەحوباعا قىزمەت ەتۋدى ٵلى تاڭداماعاندار تەزىرەك ارەكەت ەتۋ كەرەك، ويتكەنى بەلگىلەنگەن ۋاقىت تاياپ قالدى (قور. 1-ح. 7:29). ال ەحوباعا قىزمەت ەتۋدى تاڭداپ قويعاندار ٷشىن پاۋىلدىڭ سوزدەرى جۇبانىش بەرەدى، ويتكەنى ولاردىڭ كورىپ جۇرگەن ازابى «ازعانا ۋاقىتتان» سوڭ بىتەدى.
18. ەحوبا مەن يسا ٴبىزدىڭ نە ىستەگەنىمىزدى قالايدى؟
18 يسا شاكىرتتەرىن ۇدايى سوڭىنان ەرىپ جۇرۋگە شاقىرعان (مات. 16:24). ەحوبا دا شىندىقتا ٴبىرتالاي جىل جۇرگەندەردىڭ ەش بەرىلمەي، ٵرى قاراي دا تالماي قىزمەت ەتە بەرگەنىن قالايدى. راس، ەحوباعا قىزمەت ەتەمىن دەگەن تاڭداۋىمىزعا ادال بولۋ وڭاي ەمەس. ٴبىراق ادالدىعىمىزدىڭ اكەلەر جەمىسى مول ەكەنىن ۇمىتپايىق. ەحوباعا تالماي قىزمەت ەتە بەرسەك، قازىر دە، بولاشاقتا دا ٴمان-ماعىناعا تولى ٶمىر كەشەمىز (ٴزاب. 35:27).
19. دجەن باۋىرلاستىڭ وقيعاسىنان قانداي وي ٴتۇيدىڭىز؟
19 ەحوباعا قىزمەت ەتۋ ٷشىن كوپ نارسەدەن باس تارتۋ كەرەك دەپ ويلايتىندار كوپ. جاستار، سەندەر دە سولاي ويلايسىڭدار ما؟ سەندەرگە ەحوباعا قىزمەت ەتۋدى تاڭداعان ادام بار قىزىقتان قۇر قالاتىنداي كورىنە مە؟ دجەن ەسىمدى جاس ەر باۋىرلاس بىلاي دەيدى: «بۇرىن ماعان ەحوبا كۋاگەرى بولساڭ ەركىندىگىڭ شەكتەلەتىندەي كورىنەتىن. سىنىپتاستارىم قىدىرىپ، قىزدارمەن ٴجۇرىپ، اتىس ويىندارىن ويناپ جۇرگەندە، مەن قاۋىمدا يا قىزمەتتە جۇرەتىنمىن. ولارعا قاراپ قاتتى قىزىعاتىن ەدىم». بۇنداي كوزقاراسى دجەنگە قالاي اسەر ەتتى؟ ول بىلاي دەيدى: «مەن ەكىجاقتى ٶمىر كەشە باستادىم. باسىندا ٴبارى قىزىق بولدى. ٴبىراق قىزىقتىڭ ٴبارى كوپ ۇزاماي-اق قىزىق بولۋدان قالدى، ويتكەنى ىستەپ جۇرگەن نارسەلەرىم ماعان شىن باقىت سيلامادى. ٴسۇيتىپ، «ماعان كەرەك ەمەس» دەپ ويلاعان كيەلى كىتاپ شىندىقتارى جايلى قايتادان ويلانا باستادىم. ٴسۇيتىپ، ەحوباعا بار جۇرەگىممەن بەرىلىپ قىزمەت ەتىپ كورەيىن دەدىم. سودان بەرى ەحوبا ٵربىر ايتقان دۇعاما جاۋاپ بەرىپ كەلەدى».
20. ٴبىز نە نارسەگە بەكىنۋىمىز كەرەك؟
20 ٴزابۇر جىرشىسى ەحوباعا بىلاي دەگەن: «اۋلالارىڭدا مەكەندەسىن دەپ، ٶزىڭ تاڭداپ العان، ٶزىڭ جاقىنداتقان ادام نەتكەن باقىتتى!» (ٴزاب. 65:4). «مەن بولسام ٷي ىشىممەن ەحوباعا قىزمەت ەتەمىن» دەگەن ەشۋاعا ەلىكتەپ، ٴبىز دە ەحوباعا عيبادات ەتە بەرۋگە نىق بەكىنەيىك (ەشۋا 24:15).
28-ٵن ەحوبانىڭ دوسى بولايىق
a كەيبىر ەسىمدەر وزگەرتىلگەن.
b سۋرەت سيپاتتاماسى: ٴبىر توپ ادام كونگرەسس سارايىنىڭ الدىندا كۋاگەرلەردى جامانداپ، ايقايلاپ تۇر. قاستارىنان ٴبىر ايەل ٶتىپ بارا جاتىر. كەيىن ول ادەبيەت ارباسىنىڭ قاسىنا كەلىپ، باۋىرلاستاردان شىندىق جايلى ٴبىلىپ جاتىر.
c سۋرەت سيپاتتاماسى: قويىلىم رەتىندە تۇسىرىلگەن سۋرەتتەردە دجۋليا باۋىرلاستىڭ مانساپتان باس تارتىپ، ەحوباعا قىزمەت ەتۋدى تاڭداعانى بەينەلەنگەن.