تىنىشتىق. وعان قالاي قول جەتكىزۋگە بولادى؟
قيىندىققا تولى مىنا دۇنيەدە تىنىشتىققاa قول جەتكىزۋ وتە قيىن. تىنىشتىق تاپقان كۇندە دە، ودان تەز ايىرىلىپ قالامىز. كيەلى كىتاپتا بىزگە ناعىز ٵرى سارقىلمايتىن تىنىشتىققا يە بولۋعا كومەكتەسەتىن قانداي سوزدەر بار؟ وزگەلەرگە دە وسىنداي تىنىشتىققا يە بولۋعا قالاي كومەكتەسە الامىز؟
وعان قول جەتكىزۋ ٷشىن نە ىستەۋىمىز قاجەت؟
ناعىز تىنىشتىققا يە بولۋ ٷشىن ٶزىمىزدى قاۋىپسىز سەزىنگەنىمىز ماڭىزدى. تاعى جاقسى دوستارىمىز بولۋ كەرەك، ەڭ باستىسى، قۇدايمەن تىعىز قارىم-قاتىناسىمىز بولۋى قاجەت. ول ٷشىن نە ىستەي الامىز؟
ەحوبانىڭ زاڭدارى مەن پرينسيپتەرى ٴبىز ٷشىن قاشاندا پايدالى. ولارعا مويىنسۇنعان كەزدە، ەحوباعا سەنىم ارتاتىنىمىزدى جانە ونىمەن تاتۋ قارىم-قاتىناستا بولعىمىز كەلەتىنىن كورسەتەمىز (ەرەميا 17:7، 8؛ جاقىپ 2:22، 23). سوندا ەحوبا دا بىزگە جاقىنداي تۇسەدى، ٵرى بىزگە جانتىنىشتىعىن سىيلايدى. يشايا 32:17-دە بىلاي دەلىنگەن: «شىنايى تۋرالىقتىڭ ناتيجەسى تىنىشتىق، شىنايى تۋرالىقتىڭ جەمىسى ماڭگى جايباراقاتتىق پەن قاۋىپسىزدىك بولادى». ەحوباعا شىن جۇرەكتەن مويىنسۇناتىن بولساق، شىنايى تىنىشتىققا قول جەتكىزە الامىز (يشايا 48:18، 19).
ۋايىم تىنىشتىقتان ايىرادى
سونداي-اق ەحوبا بىزگە تاۋسىلمايتىن تىنىشتىققا يە بولۋعا كومەكتەسەتىن تاماشا ٴبىر سىي بەرگەن. بۇل — ونىڭ كيەلى رۋحى (ەلشىلەردىڭ ىستەرى 9:31).
قۇداي رۋحى تىنىشتىققا يە بولۋعا كومەكتەسەدى
ەلشى پاۋىل تىنىشتىق «كيەلى رۋحتىڭ جەمىسىنە» جاتاتىنىن ايتقان (عالاتتىقتارعا 5:22، 23، سىلتەمە). سوندىقتان تىنىشتىققا يە بولعىمىز كەلسە، كيەلى رۋحتىڭ ٴبىزدى جەتەلەۋىنە جول بەرۋىمىز كەرەك. بۇل ٷشىن نە ىستەي الامىز؟
بىرىنشىدەن، قۇداي ٴسوزىن جۇيەلى تۇردە وقۋىمىز قاجەت (ٴزابۇر 1:2، 3). وقىعاندارىمىز جايلى تەرەڭ وي جۇگىرتكەندە، كيەلى رۋح بىزگە ەحوبانىڭ ٵرتۇرلى جايتتارعا قاتىستى نە ويلايتىنىن تۇسىنۋگە كومەكتەسەدى. مىسالى، قۇدايدىڭ قالاي تىنىشتىق پەن تاتۋلىق ساقتايتىنىن جانە مۇنىڭ ول ٷشىن نەگە ماڭىزدى ەكەنىن كورەمىز. كيەلى كىتاپتان بىلگەندەرىمىزدى ومىرىمىزدە قولدانعان كەزدە، كوبىرەك تىنىشتىققا يە بولامىز (ناقىل سوزدەر 3:1، 2).
ەكىنشىدەن، قۇدايدان كيەلى رۋحىن سۇراپ دۇعا ەتۋىمىز كەرەك (لۇقا 11:13). وزىنەن كومەك ىزدەيتىندەرگە ەحوبا بىلاي دەپ ۋادە ەتەدى: «قۇدايدىڭ ادام اقىلىنان اسقان تىنىشتىعى جۇرەكتەرىڭ مەن وي-سانالارىڭدى ٴماسىح يسا ارقىلى ساقتايدى» (فىلىپىلىكتەرگە 4:6، 7). ەحوبامەن تىعىز قارىم-قاتىناس ساقتاساق جانە رۋحىنا سەنىم ارتساق، ول بىزگە ناعىز جانتىنىشتىعىن سىيلايدى (ريمدىكتەرگە 15:13).
كيەلى كىتاپ كوپتەگەن ادامدارعا ومىرلەرىن وزگەرتۋگە كومەكتەسكەن. قازىر بۇل ادامدار ەحوبامەن جانە وزگەلەرمەن تاتۋ قارىم-قاتىناستا، ٵرى جانتىنىشتىعىنا كەنەلگەن. ولار قالاي وزگەردى؟
ناعىز تىنىشتىققا قول جەتكىزگەندەر
كەيبىر باۋىرلاستارىمىز شىندىققا كەلگەنگە دەيىن اشۋشاڭ، ٴتىپتى قاتىگەز بولعان. ٴبىراق ولار وزگەرۋ ٷشىن كوپ كۇش سالعان. سونىڭ ارقاسىندا قازىر ولار بۇرىنعىعا قاراعاندا مەيىرىمدى، شىدامدى جانە وزگەلەرمەن تاتۋb (ناقىل سوزدەر 29:22). قازىر وسىنداي وزگەرىستەر جاساعان دەيۆيد جانە رەيچەل ەسىمدى باۋىرلاستاردىڭ وقيعالارىن كورەيىك.
كيەلى كىتاپ پرينسيپتەرىن قولدانىپ، قۇدايدان رۋحىن سۇراپ دۇعا ەتسەك، تىنىشتىققا قول جەتكىزە الامىز
دەيۆيد شىندىققا كەلمەس بۇرىن ٴجيى وزگەلەرگە ٴمىن تاعاتىن، ٷي ىشىندەگىلەرمەن دە دورەكى سويلەسەتىن. ٴبىراق كەيىن ول ٶزىن وزگەرتۋ كەرەكتىگىن تۇسىنگەن. ول تىنىشتىققا قالاي قول جەتكىزدى؟ دەيۆيد بىلاي دەيدى: «مەن كيەلى كىتاپتاعى پرينسيپتەردى ومىرىمدە قولدانا باستادىم. سونىڭ ارقاسىندا وتباسىمىزدا سىيلاستىق پايدا بولدى».
رەيچەلگە وسكەن ورتاسى قاتتى اسەر ەتكەن. ول بىلاي دەيدى: «اشۋشاڭ وتباسىندا وسكەندىكتەن، مەن ٵلى كۇنگە دەيىن اشۋمەن كۇرەسىپ كەلەمىن». رەيچەلگە تىنىشتىققا قول جەتكىزۋگە نە كومەكتەستى؟ «دۇعا ەتىپ، ەحوباعا ارقا سۇيەگەنىم»،— دەيدى ول.
دەيۆيد پەن رەيچەل سياقتى كوپتەگەن ادامدار كيەلى كىتاپ پرينسيپتەرىن قولدانىپ، كيەلى رۋحقا ارقا سۇيەۋ ارقىلى تىنىشتىققا كەنەلۋدە. ىزالى دۇنيەدە ٶمىر ٴسۇرىپ جاتساق تا، ٴبىز جانتىنىشتىعىنا يە بولا الامىز. ناتيجەسىندە ٷي ىشىندەگىلەرمەن جانە قاۋىمداعى باۋىرلاستارمەن ٴتىل تابىسۋ وڭايىراق بولادى. ٴبىراق ەحوبا ٴبىزدىڭ «بارلىق ادامدارمەن تاتۋ بولعانىمىزدى» قالايدى (ريمدىكتەرگە 12:18). بۇل شىنىمەن قولىمىزدان كەلە مە؟ ٴبىز نەگە وزگەلەرمەن تاتۋ بولۋعا تىرىسۋىمىز كەرەك؟
وزگەلەرمەن تاتۋ بولۋ ٷشىن كۇش سالىڭىز
ۋاعىزدا ٴبىز ادامدارعا قۇداي پاتشالىعى جايلى تىنىشتىق سىيلايتىن حاباردى جاريالايمىز (يشايا 9:6، 7؛ ماتاي 24:14). كوپ ادام بۇل حاباردى ۇناتىپ، قۇلاق اسادى. ناتيجەسىندە ولار بۇدان بىلاي دۇنيەدە بولىپ جاتقان جاعدايلارعا اشۋلانىپ، شاراسىز كۇي كەشپەيدى. قازىر ولار بولاشاققا زور ۇمىتپەن قارايدى، ٵرى بۇل ولاردى «تاتۋلىق جولىن ىزدەۋگە» تالپىندىرادى (ٴزابۇر 34:14).
ايتسە دە ادامداردىڭ ٴبارى بىردەي حابارىمىزدى، اسىرەسە العاشىندا، ونشا ۇناتا بەرمەيدى (جوحان 3:19). ادامدار حابارىمىزدى قالاي قابىلداماسىن، قۇداي بىزگە وزىنىڭ رۋحىن بەرەدى. بۇل بىزگە ۋاعىز كەزىندە تاتۋ بولۋعا جانە قۇرمەت تانىتۋعا كومەكتەسەدى. وسىلاي ٴبىز يسانىڭ كەلەسى ٴبىر كەڭەسىنە ساي ارەكەت ەتەمىز: «ۇيگە كىرگەندە، ونداعىلارمەن امانداسىپ، تاتۋلىق تىلەڭدەر. ەگەر سول ٷي لايىق بولسا، وعان تىلەگەندەرىڭ ورىندالسىن، ال لايىق بولماسا، وزدەرىڭە قايتسىن» (ماتاي 10:11—13). كوزقاراسىمىز وسىنداي بولسا، وزگەلەردىڭ نە ايتىپ، نە ىستەگەنىنە قاراماستان، جانتىنىشتىعى مەن تاتۋلىقتى ساقتاي الامىز. سونداي-اق سول ادامدار بولاشاقتا ىزگى حابارعا قۇلاق اسىپ قالۋى مۇمكىن ەكەنىن ەستە ۇستايمىز.
ٴبىز ۇكىمەت باسىنداعىلارعا دا قۇرمەت تانىتساق، ٴتىپتى ولار ىسىمىزگە قارسى بولعان كۇندە دە سولاي ەتسەك، تاتۋلىققا ۇمتىلاتىنىمىزدى كورسەتەمىز. مىسالى، افريكانىڭ ٴبىر ەلىندە ۇكىمەت پاتشالىق سارايىن سوعۋعا رۇقسات بەرمەگەن. باۋىرلاستارىمىز بۇل ماسەلەنى تاتۋ جولمەن شەشۋگە تىرىسۋ كەرەكتىگىن تۇسىنگەن. سودان ولار بۇرىن وسى ەلدە ميسسيونەر بولىپ قىزمەت ەتكەن ەر باۋىرلاستى لوندونداعى (انگليا) وسى ەلدىڭ وكىلىنە جىبەرىپ، وعان ەحوبا كۋاگەرلەرىنىڭ ادامداردى تاتۋلىققا شاقىراتىن ىسپەن اينالىساتىنى تۋرالى ايتىپ بەرۋدى تاپسىرعان.
ەر باۋىرلاسىمىز بىلاي دەدى: «قابىلداۋ بولمەسىنە كەلگەندە، سوندا وتىرعان ايەلدىڭ كيىمىنە قاراپ، ونىڭ مەن ۇيرەنگەن تىلدە سويلەيتىن تايپادان شىققانىن ٴتۇسىندىم. ٴسۇيتىپ، مەن ونىمەن انا تىلىندە امانداستىم. قاتتى تاڭعالعان ول: «مۇندا قانداي ماسەلەمەن كەلدىڭىز؟»— دەپ سۇرادى. مەن وكىلمەن سويلەسكىم كەلەتىنىن ىلتيپاتپەن ايتتىم. ول وكىلگە حابارلاسقاندا، وكىل مەنى قارسى الىپ، مەنىمەن جەرگىلىكتى تىلدە امانداستى. سودان كەيىن مەن وعان كۋاگەرلەر ادامداردى تاتۋلىققا شاقىراتىن ىستەرمەن اينالىساتىنىن تۇسىندىرگەندە، ول مەنى مۇقيات تىڭدادى».
ەر باۋىرلاستى تىڭداپ بولعاننان كەيىن، وكىل اينالىساتىن ٸسىمىزدى جاقسىراق ٴتۇسىنىپ، بىزگە بۇرىنعىداي الالاۋشىلىقپەن قارامادى. كوپ ۇزاماي ۇكىمەت ٶز شەشىمىن وزگەرتىپ، ەحوبا كۋاگەرلەرىنە پاتشالىق سارايىن سوعۋعا رۇقسات ەتتى. باۋىرلاستاردىڭ قۋانىشىندا شەك بولمادى! شىنىندا دا، وزگەلەرگە قۇرمەتپەن قاراساق، تاتۋلىق ورناتامىز.
ماڭگىلىك بويى تىنىشتىقتىڭ راقاتىن كورىڭىز
بۇگىندە ەحوبانىڭ حالقى تىنىش ورتادا عيبادات ەتىپ، رۋحاني جۇماقتا ٴجۇر. وسى ورتاداعى تىنىشتىققا ۇلەس قوسا الۋ ٷشىن، ٵرقايسىسىمىز جەكە ومىرىمىزدە تىنىشتىققا يە بولۋعا تىرىسۋىمىز كەرەك. سوندا ەحوبانىڭ كوڭىلىنەن شىعىپ جاتقانىمىزعا سەنىمدى بولا الامىز. ال جاڭا ومىردە ول ٴبىزدى ماڭگىلىككە ۇلاساتىن تىنىشتىققا كەنەلتەدى (پەتىردىڭ 2-حاتى 3:13، 14).
a «تىنىشتىق» دەپ اۋدارىلعان ٴسوز ٴتۇپنۇسقا تىلدە «جانتىنىشتىعىنا»، «بەيبىتشىلىككە»، «تاتۋلىققا» نۇسقايدى. وسى ماقالادا جانتىنىشتىعى مەن تاتۋلىق جايلى قاراستىرىلادى.
b كيەلى رۋحتىڭ جەمىسى تاقىرىبىنداعى ٴبىرقاتار ماقالالاردىڭ بىرىندە مەيىرىمدىلىك قاسيەتىن قاراستىراتىن بولامىز.