10-تاراۋ
قىزمەت اياسىن كەڭەيتۋ جولدارى
يسا شاكىرتتەرىن پاتشالىقتىڭ ۋاعىزداۋشىلارى رەتىندە جىبەرەتىن ۋاقىت كەلگەندە، ولارعا: «جينايتىن ەگىن كوپ، ٴبىراق جۇمىسشىلار از»،— دەدى. اتقارىلاتىن جۇمىس وتە كوپ بولعاندىقتان، ول بىلاي دەپ قوستى: «ەگىننىڭ يەسىنەن ونى جيناۋعا جۇمىسشىلار جىبەرۋىن وتىنىڭدەر» (مات. 9:37، 38). يسا شاكىرتتەرىنە قىزمەتتەرىن قالاي اتقارۋ كەرەكتىگىن ايتتى. بۇل شۇعىل اتقارىلۋ كەرەك ٸس ەكەنى ونىڭ مىنا سوزدەرىنەن بايقالادى: «ادام ۇلى كەلگەنشە، ٴيسرايلدىڭ بارلىق قالالارىن ارالاپ ۇلگەرمەيسىڭدەر» (مات. 10:23).
2 بۇگىندە دە ۋاعىز قىزمەتىندە اتقاراتىن جۇمىس كوپ. پاتشالىق جايلى ىزگى حابار وسى زاماننىڭ سوڭى كەلمەي تۇرىپ ۋاعىزدالۋى ٴتيىس، ال ۋاقىت بولسا زىمىراپ ٶتىپ جاتىر (مار. 13:10). ەگىندىك وسى دۇنيە بولعاندىقتان، كەزىندە يسا مەن شاكىرتتەرى كەزىككەن جاعدايعا ٴبىز دە كەزىگەمىز، تەك ۇلكەنىرەك كولەمدە. دۇنيەجۇزىندەگى ميللياردتاعان ادامنىڭ قاسىندا ٴبىز وتە ازبىز، دەگەنمەن ەحوبانىڭ كومەكتەسەتىنىنە سەنىمدى بولا الامىز. پاتشالىق جايلى ىزگى حابار بۇكىل جەر بەتىندە مىندەتتى تۇردە ۋاعىزدالادى، ال ەحوبا بەلگىلەگەن ۋاقىتتا وسى زاماننىڭ سوڭى كەلەدى. ولاي بولسا، قۇداي پاتشالىعىن ومىرىمىزدە ٴبىرىنشى ورىنعا قويىپ، قىزمەتىمىزدى تولىقتاي اتقارامىز با؟ بۇل ٷشىن قانداي تەوكراتيالىق ماقساتتارعا ۇمتىلا الامىز؟
3 ەحوبا باعىشتالعان قىزمەتشىلەرىنەن نە تالاپ ەتەتىنى جايلى يسا: «قۇدايىڭ ەحوبانى بار جۇرەگىڭمەن، بۇكىل جان-تانىڭمەن، بارلىق اقىل-ويىڭمەن جانە بار كۇش-قۋاتىڭمەن ٴسۇي»،— دەگەن (مار. 12:30). ٴيا، ٴبىز قۇدايعا دەگەن قىزمەتىمىزدى بۇكىل جان-تانىمىزبەن اتقارۋىمىز كەرەك. بۇل — قانشالىقتى شىن بەرىلگەنىمىزدى پاش ەتۋ ٷشىن جانە باعىشتالۋىمىزدىڭ قانشالىقتى شىنايى ەكەنىن كورسەتۋ ٷشىن قولدان كەلگەننىڭ ٴبارىن ىستەۋ قاجەت دەگەن ٴسوز (ٴتىم. 2-ح. 2:15). وسىلاي قىزمەت ەتۋدىڭ مۇمكىندىكتەرى ٵربىرىمىز ٷشىن قولجەتىمدى، ارينە، بۇل ماسەلەدە شاما-شارقىمىز بەن قابىلەتتەرىمىزدى ەسكەرەمىز. قازىر سول مۇمكىندىكتەردىڭ كەيبىرىن قاراستىرىپ، قىزمەتىڭىزدى اتقارۋ ٷشىن قانداي تەوكراتيالىق ماقساتتارعا ۇمتىلاتىنىڭىزدى شەشىپ الىڭىز.
قاۋىم جاريالاۋشىسى
4 شىندىقتى قابىلداعان اركىم ىزگى حاباردى جاريالاۋ مارتەبەسىنە يە. يسا شاكىرتتەرىنە تاپسىرعان ەڭ نەگىزگى ٸس — وسى (مات. 24:14؛ 28:19، 20). ادەتتە يسا ٴماسىحتىڭ شاكىرتى ىزگى حاباردى ەستىگەننەن كەيىن، ونى وزگەلەرگە ايتقىسى كەلەدى. مىسالى، ٵندىر، ٴفىلىپ، كورنەل جانە تاعى باسقالار وسىلاي ەتكەن (جوح. 1:40، 41، 43—45؛ ەل. ٸس. 10:1، 2، 24؛ 16:14، 15، 25—34). سوندا شومىلدىرۋ راسىمىنەن وتپەي تۇرىپ-اق ىزگى حاباردى ۋاعىزداۋعا بولا ما؟ البەتتە! ادام شومىلدىرۋ راسىمىنەن وتپەگەن جاريالاۋشى بولعان سوڭ، وعان ۇيمە-ٷي ٴجۇرىپ ۋاعىزداۋ مۇمكىندىگى اشىلادى. بۇعان قوسا، ول قابىلەتى مەن جاعدايىنا قاراي، ۋاعىز قىزمەتىنىڭ باسقا دا تۇرلەرىنە قاتىسا الادى.
5 شومىلدىرۋ راسىمىنەن وتكەننەن كەيىن دە، جاريالاۋشى ىزگى حاباردى ۋاعىزداۋدا قولدان كەلگەننىڭ ٴبارىن ىستەگىسى كەلەدى. ەرلەردىڭ دە، ايەلدەردىڭ دە ۋاعىز ىسىنە قاتىسۋ مارتەبەسى بار. ٴبىز قۇداي پاتشالىعىنىڭ مۇددەسىن العا جىلجىتۋدا از بولسا دا ٶز ۇلەسىمىزدى قوسۋعا قۋانىشتىمىز. قىزمەتتىڭ باسقا دا تۇرلەرىنە ۇمتىلىپ، قىزمەت اياسىن كەڭەيتە الاتىن اركىم ٴسوزسىز باقىتقا كەنەلەدى.
قاجەتتىلىك بار جەردە قىزمەت ەتۋ
6 ٴسىزدىڭ قاۋىمىڭىزدىڭ اۋماعى ٴجيى وڭدەلىپ، ونداعى ادامدارعا جاقسى كۋالىك بەرىلگەن بولار. مۇنداي كەزدە ۋاعىز ىسىندە قاجەتتىلىك كوبىرەك جەرگە كوشۋ ارقىلى قىزمەت اياسىن كەڭەيتە الاتىن شىعارسىز (ەل. ٸس. 16:9). ەگەر ٴسىز اقساقال يا قىزمەت كومەكشىسى بولساڭىز، كومەگىڭىز باسقا قاۋىمدا قاجەت بولۋى مۇمكىن. اۋداندىق باقىلاۋشىڭىزدىڭ اۋدانداعى باسقا قاۋىمعا قالاي كومەكتەسۋگە بولاتىنىنا قاتىستى ۇسىنىستارى بار شىعار. ال ەلىڭىزدىڭ باسقا ايماعىندا قىزمەت ەتكىڭىز كەلسە، قاجەتتى مالىمەتتى جەرگىلىكتى فيليالدان الۋعا بولادى.
7 شەتەلدە قىزمەت ەتۋدى قالايسىز با؟ قالاساڭىز، كوشىپ-قونۋ ماسەلەسىن مۇقيات قاراستىرىڭىز. بۇنى قاۋىمىڭىزداعى اقساقالدارمەن تالقىلاپ كورىڭىز. كوشىپ-قونۋدىڭ وزىڭىزگە جانە سىزبەن بىرگە كوشەتىن ادامدارعا تيگىزەر اسەرى بار (لۇقا 14:28). ال شەتەلگە از ۋاقىتقا عانا بارۋدى جوسپارلاساڭىز، وندا ٶز ەلىڭىزدىڭ باسقا ايماعىندا قىزمەت ەتۋدى قاراستىرعانىڭىز ٴجون بولار.
8 كەيبىر ەلدەردە باقىلاۋشى مىندەتىن اتقاراتىن ەر باۋىرلاستاردىڭ شىندىقتا جۇرگەندەرىنە كوپ بولعان جوق. مۇندايدا كىشىپەيىل جەرگىلىكتى ەر باۋىرلاستار كوشىپ كەلگەن تاجىريبەلى شەتەلدىك باۋىرلاستارعا جەتەكشىلىكتى تاپسىرىپ جاتادى. ەگەر ٴسىز سونداي ەلگە كوشكەلى جۇرگەن اقساقال بولساڭىز، مىنا جايتتى ەستە ۇستاڭىز: ٴسىزدىڭ ماقساتىڭىز — جەرگىلىكتى ەر باۋىرلاستاردىڭ ورنىن باسۋ ەمەس، ولارمەن بىرگە قىزمەت ەتۋ. ولاردى مىندەتتەرگە ۇمتىلىپ، جاۋاپكەرشىلىكتەر الۋعا تالپىندىرىڭىز (ٴتىم. 1-ح. 3:1). ەگەر قانداي دا ٴبىر ىستەر ٴسىزدىڭ ەلىڭىزدەگىدەي اتقارىلماي جاتسا، شىدامدى بولىڭىز. اقساقالدىق قىزمەتتە جيناقتاعان تاجىريبەڭىزدى ەر باۋىرلاستارعا كومەكتەسۋ ٷشىن قولدانىڭىز. سوندا قانداي دا ٴبىر سەبەپتەرمەن ٶز ەلىڭىزگە ورالۋ كەرەك بولعاندا، جەرگىلىكتى اقساقالدار قاۋىمدى جاقسىلاپ قامقورلاي الادى.
9 فيليال ٴسىزدىڭ كومەگىڭىز تيەدى-اۋ دەگەن قاۋىمداردىڭ ٴتىزىمىن جىبەرمەس بۇرىن، قاۋىمىڭىزدىڭ قىزمەت كوميتەتى مىنەزدەمە حات جازۋى ٴتيىس. قاۋىمدا، مەيلى، اقساقال، قىزمەت كومەكشىسى، ٸزاشار نە جاريالاۋشى بولىپ قىزمەت ەتسەڭىز دە، وسىنداي حات تالاپ ەتىلەدى. سوسىن قىزمەت كوميتەتى بۇل مىنەزدەمە حاتتى ٴسىزدىڭ وتىنىشىڭىزبەن قوسىپ، قىزمەت ەتكىڭىز كەلەتىن ەلدەگى فيليالعا جىبەرەدى.
باسقا تىلدە ۋاعىزداۋ
10 قىزمەتىڭىزدىڭ اياسىن كەڭەيتۋ ٷشىن، ٴسىز باسقا ٴتىلدى نەمەسە ىم ٴتىلىن ۇيرەنۋدى ٴجون كورەرسىز. ەگەر ۋاعىزداۋ ماقساتىندا وزگە ٴتىلدى ۇيرەنۋدى كوزدەپ جۇرسەڭىز، اقساقالدارمەن جانە اۋداندىق باقىلاۋشىمەن اقىلداسىپ كورىڭىز. ولار ٴتيىمدى ۇسىنىستار ايتىپ، ٴسىزدى شابىتتاندىرا الادى. كەيبىر اۋداندار جەرگىلىكتى فيليالدىڭ نۇسقاۋىمەن ٴتىل ۇيرەنۋ سىنىپتارىن ۇيىمداستىرىپ، قابىلەتتى جاريالاۋشىلار مەن ٸزاشارلارعا وزگە تىلدە ۋاعىزداۋدى ۇيرەتەدى.
ىزاشارلىق قىزمەت
11 بارلىق جاريالاۋشىلار قوسالقى، تۇراقتى، ارنايى ىزاشارلىق قىزمەتكە جانە تولىق ۋاقىتتى قىزمەتتىڭ باسقا دا تۇرلەرىنە قويىلاتىن تالاپتارمەن تانىس بولۋلارى كەرەك. ٸزاشار شومىلدىرۋ راسىمىنەن وتكەن ۇلگىلى جاريالاۋشى بولۋ قاجەت، سونداي-اق جەكە باستىڭ جاعدايى ۋاعىز قىزمەتىنە بەلگىلى ٴبىر ساعات مولشەرىن جۇمساي الاتىنداي بولۋ كەرەك. قوسالقى جانە تۇراقتى ىزاشارلىق قىزمەتكە بەرىلگەن وتىنىشتەردى قاۋىمنىڭ قىزمەت كوميتەتى ماقۇلدايدى، ال ارنايى ٸزاشارلاردى فيليال تاعايىندايدى.
12 قوسالقى ٸزاشارلار، كەم دەگەندە، ٴبىر ايعا نە بىرنەشە ايعا تاعايىندالادى، يا بولماسا جاعدايىنا قاراي ۇزدىكسىز قىزمەت ەتە الادى. پاتشالىقتىڭ كوپتەگەن جاريالاۋشىلارى ەرەكشە كەزدە، مىسالى ەسكە الۋ مەزگىلىندە نە اۋداندىق باقىلاۋشىنىڭ ساپارى بولاتىن ايدا، قوسالقى ٸزاشار بولىپ قىزمەت ەتىپ جاتادى. ال كەيبىرەۋلەر ەڭبەك دەمالىسىن العاندا قوسالقى ٸزاشار بولۋدى شەشەدى. شومىلدىرۋ راسىمىنەن وتكەن مەكتەپ جاسىنداعى جاريالاۋشىلار دەمالىسقا شىققاندا قوسالقى ىزاشارلىق قىزمەتتى الادى. جاريالاۋشىلار ٵر ناۋرىز بەن ساۋىردە جانە اۋداندىق باقىلاۋشىنىڭ ساپارى بولاتىن ايلاردا قىسقارتىلعان ساعات مولشەرىمەن قوسالقى ٸزاشار بولا الادى. جاعدايىڭىز قانداي بولماسىن، مورالدىق جاعىنان تازا بولىپ، جاقسى ادەتتەردى ۇستانساڭىز، ٵرى بەلگىلى ٴبىر ساعات مولشەرىن ورىنداي الساڭىز جانە ٴبىر نە بىرنەشە اي بويى قوسالقى ٸزاشار بولا الامىن دەپ ويلاساڭىز، اقساقالدار قىزمەتتىڭ وسى تۇرىنە بەرگەن ٶتىنىشىڭىزدى قۋانا-قۋانا قاراستىرادى.
13 تۇراقتى ٸزاشار بولىپ قىزمەت ەتۋ ٷشىن، جىلدىق ساعات مولشەرىن ورىنداي الۋىڭىز قاجەت. تۇراقتى ٸزاشار بولىپ جاتساڭىز، قاۋىمىڭىزبەن تىعىز قىزمەتتەسۋگە ىقىلاستى بولاسىز. قۇلشىنىستى ٸزاشارلار — قاۋىم ٷشىن باتا. ولاردىڭ ۇلگىسىنە قاراپ، وزگەلەردىڭ دە قىزمەتتە قۇلشىنىسى ارتىپ، ٴتىپتى ىزاشارلىق قىزمەتتى باستاپ جاتادى. ٴبىراق تۇراقتى ىزاشارلىق قىزمەتكە ٶتىنىش تولتىرۋ ٷشىن، شومىلدىرۋ راسىمىنەن وتكەنىڭىزگە، كەم دەگەندە، التى اي بولعان ۇلگىلى جاريالاۋشى بولۋىڭىز كەرەك.
14 ارنايى ٸزاشارلار نەگىزىنەن شەبەر ۋاعىزدايتىن تۇراقتى ٸزاشارلاردىڭ اراسىنان تاڭداپ الىنادى. فيليال قايدا تاعايىنداسا، ولار سوندا قىزمەت ەتۋگە دايىن بولۋلارى كەرەك. ٴجيى ولاردى شالعاي ايماققا تاعايىندايدى، سوندا ولار قىزىعۋشىلاردى تاۋىپ، جاڭا قاۋىمدار قۇرادى. كەيدە ارنايى ٸزاشارلار ۋاعىز اۋماعىن وڭدەۋدە كومەكتى قاجەت ەتەتىن قاۋىمدارعا تاعايىندالىپ جاتادى. ال اقساقال بولىپ قىزمەت ەتەتىن ارنايى ٸزاشارلاردىڭ كەيبىرىن، ۋاعىزداۋشىلار ايتارلىقتاي قاجەت بولماسا دا، كومەك بەرۋ ماقساتىمەن كىشىگىرىم قاۋىمدارعا تاعايىندايدى. ارنايى ٸزاشارلار كۇن كورۋگە قاجەتتى ازىن-اۋلاق جاردەماقى الىپ تۇرادى. ولاردىڭ كەيبىرى ۋاقىتشا مەرزىمگە تاعايىندالادى.
ميسسيونەرلىك قىزمەت
15 باسقارۋشى كەڭەستىڭ قىزمەت كوميتەتى تاناپتا ۋاعىزدايتىن ميسسيونەرلەردى تاعايىندايدى. سوسىن جەرگىلىكتى فيليال كوميتەتى ولاردى حالقى كوپ شوعىرلانعان ايماقتارعا جىبەرەدى. ولار ۋاعىز ٸسى مەن قاۋىمنىڭ ٸس-شارالارىن تۇراقتاندىرۋ مەن نىعايتۋدا كوپ ەڭبەك سىڭىرەدى. ولاردىڭ كوبىسى پاتشالىقتى جاريالاۋشىلارعا ارنالعان مەكتەپتە ٴبىلىم العان. ولار باسپانامەن جانە ازىن-اۋلاق جاردەماقىمەن قامتاماسىز ەتىلەدى.
اۋداندىق قىزمەت
16 اۋداندىق باقىلاۋشىلاردى باسقارۋشى كەڭەس تاعايىندايدى. ولار الدىمەن اۋداندىق باقىلاۋشىنىڭ ورىنباسارى بولىپ ٴجۇرىپ ٴبىلىم الادى جانە تاجىريبە جيناقتايدى. مۇنداي ەر كىسىلەر قىزمەتتى جانە باۋىرلاستاردى جاقسى كورەدى. ولار قۇلشىنىستى ٸزاشارلار، كيەلى كىتاپتىڭ تىڭعىلىقتى زەرتتەۋشىلەرى، شەبەر بايانداماشىلار ٵرى تالىمگەرلەر. كيەلى رۋحتىڭ جەمىسىن تانىتۋدا تاماشا ۇلگى كورسەتەدى، ٵرى ولار بايسالدى، ەستى، پاراساتتى. ەگەر اۋداندىق باقىلاۋشى ۇيلەنگەن بولسا، ونىڭ ٸزاشار ايەلى ٴجۇرىس-تۇرىسىمەن جانە وزگەلەرمەن جاقسى قارىم-قاتىناستا بولۋىمەن ۇلگى كورسەتەدى. شەبەرلىكپەن ۋاعىزدايدى. بۇعان قوسا، كۇيەۋى ٷشىن جاۋاپ بەرمەيدى نەمەسە اڭگىمەدە باسىمدىلىق تانىتپايدى، ٴماسىحشى ايەل رەتىندە مويىنسۇنىپ، ٶز مىندەتىن جاقسى تۇسىنەدى. اۋداندىق باقىلاۋشى مەن ايەلىنىڭ قىزمەت كەستەسى وتە تىعىز كەلەدى، سوندىقتان بۇل قىزمەتكە ۇمتىلاتىن باۋىرلاستاردىڭ دەنساۋلىعى جاقسى بولۋى ٴتيىس. ٸزاشارلار ٶز بەتىنشە اۋداندىق قىزمەتكە قاتىستى ٶتىنىش جازا المايدى. ەگەر اۋداندىق قىزمەتكە ىقىلاستارى بار بولسا، بۇل جايلى اۋداندىق باقىلاۋشىلارىنا ايتىپ، ٴتيىمدى كەڭەستەر الا الادى.
تەوكراتيالىق مەكتەپتەر
17 پاتشالىقتى جاريالاۋشىلارعا ارنالعان مەكتەپ. سيرەك ۋاعىزدالاتىن اۋماقتاردى وڭدەۋ ٷشىن جانە قاۋىمداردى رۋحاني جاعىنان نىعايتۋ ٷشىن جاريالاۋشىلار اۋاداي قاجەت. سوندىقتان بويداق ەر باۋىرلاستار مەن قىز باۋىرلاستار جانە ەرلى-زايىپتىلار پاتشالىقتى جاريالاۋشىلارعا ارنالعان مەكتەپتە ارنايى ٴبىلىم الۋعا ٶتىنىش تولتىرا الادى. بۇل مەكتەپتى تامامداعان سوڭ، تۇلەكتەر ٶز ەلدەرىندەگى قاجەتتىلىك كوبىرەك جەرگە تۇراقتى ٸزاشار رەتىندە جىبەرىلەدى. ال مۇمكىندىگى بار تۇلەكتەر ٶز ەلىندە نە شەتەلدە باسقا مىندەتتەرگە تاعايىندالۋى مۇمكىن. كەيبىرەۋلەرى ۋاقىتشا نە ۇزدىكسىز مەرزىمگە ارنايى ٸزاشار ەتىپ تاعايىندالادى. بۇل مەكتەپتە ٴبىلىم العىسى كەلەتىن ٸزاشارلار ايماقتىق كونگرەستە وسى ماقساتتا وتكىزىلەتىن كەزدەسۋگە قاتىسىپ، قويىلاتىن تالاپتارمەن تانىسسا بولادى.
18 كۇزەت مۇناراسىنىڭ عالاقات كيەلى كىتاپ مەكتەبى. بۇل مەكتەپكە اعىلشىن ٴتىلىن مەڭگەرگەن ارنايى تولىق ۋاقىتتى قىزمەتتەگى بويداق ەر باۋىرلاستار مەن قىز باۋىرلاستار جانە ەرلى-زايىپتىلار شاقىرىلادى. ولاردىڭ تاناپتاعى ۋاعىز ٸسىن نە فيليال ٸسىن تۇراقتاندىرۋعا جانە نىعايتۋعا دەگەن الەۋەتتەرى بار. سونداي-اق باۋىرلاستارعا قۋانا قىزمەت ەتەتىنىن ٵرى وزگەلەرگە جازبالارداعى نۇسقاۋلار مەن تەوكراتيالىق باسشىلىققا مويىنسۇنۋدى مەيىرىممەن ۇيرەتەتىنىن الدەقاشان كورسەتكەن. جەرگىلىكتى فيليال كوميتەتى وسىنداي باۋىرلاستارعا ٶتىنىش قاعازىن بەرىپ، تولتىرۋدى ۇسىنادى. بۇل مەكتەپتىڭ تۇلەكتەرى ٶز ەلدەرىندەگى نە شەتەلدەگى تاناپقا يا فيليالعا تاعايىندالادى.
بەتەلدىك قىزمەت
19 بەتەلدە قىزمەت ەتۋ — ەرەكشە مارتەبە. «بەتەل» دەگەن ٴسوز «قۇداي ٷيى» دەگەندى بىلدىرەدى. بۇل — تەوكراتيالىق ٸس-شارالاردى اتقاراتىن ورتالىقتارعا بەرىلگەن ورىندى اتاۋ. بەتەلدەگى ەر جانە قىز باۋىرلاستار كيەلى كىتاپقا نەگىزدەلگەن ادەبيەتتەردى شىعارۋمەن، اۋدارۋمەن جانە تاراتۋمەن بايلانىستى ماڭىزدى ىستەردى اتقارادى. جەرجۇزىندەگى قاۋىمدارعا باس-كوز بولىپ، باسشىلىق بەرەتىن باسقارۋشى كەڭەس ٷشىن ولاردىڭ قىزمەتى ولشەۋسىز. اۋدارماشى بولىپ ىستەيتىن كوپتەگەن بەتەلدىكتەر وزدەرى اۋداراتىن تىلدە سويلەيتىن فيليال اۋماعىندا تۇرىپ قىزمەت ەتەدى. وسىنىڭ ارقاسىندا ولار ٶز تىلدەرىن كۇنىگە ەستيدى. سونداي-اق اۋدارىلعان باسىلىمدار ادامدارعا تۇسىنىكتى مە، جوق پا — الىسقا بارماي-اق كوز جەتكىزە الادى.
20 بەتەلدە اتقارىلاتىن ىستەردىڭ كوبىسى قارا كۇشتى تالاپ ەتەدى. سول سەبەپتى بەتەلگە نەگىزىنەن شومىلدىرۋ راسىمىنەن وتكەن جاس، دەنساۋلىعى جاقسى ٵرى شىمىر ەر باۋىرلاستار شاقىرىلادى. ٴسىز تۇراتىن ەلگە باس-كوز بولاتىن فيليالدا قاجەتتىلىك بار بولسا جانە بەتەلدە قىزمەت ەتۋگە ىقىلاسىڭىز بولسا، قويىلاتىن تالاپتار جونىندەگى مالىمەتتى ٶز قاۋىمىڭىزداعى اقساقالداردان سۇراستىرساڭىز بولادى.
قۇرىلىس ٸسى
21 سۇلەيمەننىڭ عيباداتحاناسىن سوعۋ قاسيەتتى ٸس بولعانىنداي، بۇگىنگى تەوكراتيالىق عيماراتتاردىڭ قۇرىلىسى دا — قاسيەتتى قىزمەتتىڭ ٴبىر ٴتۇرى (پات. 1-ج. 8:13—18). كوپتەگەن ەر جانە قىز باۋىرلاس وسى ىسكە ٶز ۇلەستەرىن قوسۋ ٷشىن، ۋاقىتتارى مەن وزدەرىندەگى بارىن اياماي تاماشا قۇلشىنىس تانىتادى.
22 ٴسىز وسى ىستە كومەك بەرە الاسىز با؟ ەگەر شومىلدىرۋ راسىمىنەن وتكەن بولساڭىز جانە قۇرىلىس ىسىنە قاتىسقىڭىز كەلسە، ايماعىڭىزداعى قۇرىلىس ٸسىن باقىلايتىن باۋىرلاستار ٴسىزدىڭ كومەگىڭىزگە ريزا بولادى، قاجەت بولسا، كاسىبي قابىلەتتىلىككە ۇيرەتە الادى. ولاي بولسا، جەرگىلىكتى اقساقالدارعا ٶز ىقىلاسىڭىز جايلى نەگە ايتىپ كورمەسكە؟ شومىلدىرۋ راسىمىنەن وتكەن كەيبىر جاريالاۋشىلار ٴتىپتى وزگە ەلدەگى تەوكراتيالىق عيماراتتاردى سوعۋ ىسىندە ەرىكتى بولىپ قىزمەت ەتە العان.
23 قۇرىلىس ىسىنە قاتىسۋدىڭ مۇمكىندىگى كوپ. قۇرىلىس ىسىنەن حابارى بار شومىلدىرۋ راسىمىنەن وتكەن ۇلگىلى جاريالاۋشىلار جاقىن جەردەگى جوبالارعا قاتىسقىسى كەلسە، جەرگىلىكتى جوبالاۋ جانە قۇرىلىس ٸسىنىڭ ەرىكتىلەرى بولىپ قىزمەت ەتە الادى. ال شالعايداعى جوبالارعا قىسقا ۋاقىت ارالىعىندا كومەكتەسە الاتىن كەيبىر باۋىرلاستاردى فيليال ەكى اپتادان ٷش ايعا دەيىن قۇرىلىس ەرىكتىلەرى ەتىپ تاعايىنداي الادى. ال ۇزاق مەرزىمگە تاعايىندالعان باۋىرلاستار قۇرىلىس قىزمەتشىلەرى دەپ اتالادى. ال شەتەلگە تاعايىندالعان قۇرىلىس قىزمەتشىسى حالىقارالىق قۇرىلىس قىزمەتشىسى دەپ اتالادى. قۇرىلىس قىزمەتشىلەرى مەن قۇرىلىس ەرىكتىلەرىنەن قۇرالاتىن قۇرىلىس توبى ٵر جوبادا جەتەكشىلىك ەتەدى. ولارعا جەرگىلىكتى جوبالاۋ جانە قۇرىلىس ٸسىنىڭ ەرىكتىلەرى مەن جوباعا قاتىساتىن قاۋىم ەرىكتىلەرى جاردەم بەرەدى. قۇرىلىس توپتارى فيليال اۋماعىنداعى ٴبىر جوبادان ەكىنشى جوباعا اۋىسىپ وتىرادى.
رۋحاني ماقساتتارىڭىز قانداي؟
24 ٶمىرىڭىزدى ەحوباعا باعىشتاعان بولساڭىز، دەمەك، قالاۋىڭىز ەحوباعا ماڭگىلىك بويى قىزمەت ەتۋ بولعانى. ٴبىراق قازىرگى ماقساتتارىڭىز قانداي؟ رۋحاني ماقساتتارىڭىز بار بولسا، كۇشىڭىز بەن باسقا دا مۇمكىندىكتەرىڭىزدى اقىلمەن جۇمساي الاسىز (قور. 1-ح. 9:26). مۇنداي ماقساتتاردى كوزدەسەڭىز، رۋحاني العا باساسىز، ٵرى قوسىمشا مارتەبەلى قىزمەتكە ۇمتىلا ٴجۇرىپ، ەڭ ماڭىزدى نارسەلەردى نازاردا ۇستايسىز (ٴفىلىپ. 1:10؛ ٴتىم. 1-ح. 4:15، 16).
25 ەلشى پاۋىل قۇدايعا قىزمەت ەتۋ جاعىنان كەرەمەت ۇلگى قالدىرعان (قور. 1-ح. 11:1). ول قىزمەتتى جان-تانىمەن اتقارعان. بۇل ىستە ەحوبا كوپتەگەن مۇمكىندىكتەر اشىپ وتىرعانىن تۇسىنگەن. قورىنتتاعى باۋىرلاستارعا ول: «مەن ٷشىن قىزمەت ەتۋگە ۇلكەن ەسىك اشىلدى»،— دەپ جازعان (قور. 1-ح. 16:9، ٴسىلت.). بۇل سوزدەردىڭ ٴبىز ٷشىن دە جانى بار. قاۋىممەن بىرلەسە ٴجۇرىپ ەحوباعا قىزمەت ەتۋدىڭ مۇمكىندىگى كوپ، اسىرەسە پاتشالىق جايلى ىزگى حاباردى جاريالاۋ ىسىندە. ٴبىراق سول «ۇلكەن ەسىكتەن» كىرگەندە، ەلشى پاۋىل سياقتى، ٴبىز دە كوپ «قارسىلاستاردى» كەزىكتىرەمىز (قور. 1-ح. 16:9، ٴسىلت.). سونداي-اق پاۋىل ٶزىن تارتىپكە سالۋعا دا دايىن بولعان. ونىڭ نە دەگەنىنە قاراڭىزشى: «دەنەمدى ۇرعىلاپ، وزىمە قۇل ىسپەتتى باعىندىرۋدامىن» (قور. 1-ح. 9:24—27). ٴسىزدىڭ دە كوزقاراسىڭىز وسىنداي ما؟
رۋحاني ماقساتتارىڭىز بار بولسا، كۇشىڭىز بەن باسقا دا مۇمكىندىكتەرىڭىزدى اقىلمەن جۇمساي الاسىز
26 ٵربىرىمىز ٶز جاعدايىمىزعا قاراي تەوكراتيالىق ماقساتتارعا ۇمتىلعانىمىز جاقسى. بۇگىندە كوپ باۋىرلاستار تولىق ۋاقىتتى قىزمەتتىڭ قانداي دا ٴبىر تۇرىنە قاتىسىپ ٴجۇر. ويتكەنى ولار ەرتە جاستان تەوكراتيالىق ماقساتتار قويعان. اتا-انالارى نە باسقا باۋىرلاستار ولاردى بالالىق شاعىنان باستاپ رۋحاني ماقساتتارعا تالپىندىرىپ وتىرعان. وسىلايشا ەحوباعا دەگەن قىزمەتتى ومىرلىك جولدارى ەتىپ، مۇنىسىنا ەش وكىنبەي، تولاسسىز قۋانىشقا بولەنىپ ٴجۇر (ناق. س. 10:22). ۇمتىلۋعا تۇرارلىق باسقا دا ماقساتتار بار، مىسالى، اپتا سايىن ۋاعىز قىزمەتىنە قاتىسۋ، كيەلى كىتاپتى زەرتتەۋ ساباعىن باستاۋ جانە ونى جۇرگىزۋ، كەزدەسۋلەرگە دايىندالۋعا كوبىرەك ۋاقىت ٴبولۋ. ەڭ ماڭىزدىسى — تاباندى بولىپ، قىزمەتىمىزدى تولىقتاي اتقارۋ. وسىلاي ەتسەك، ەحوبانى دارىپتەيمىز، ٵرى وعان ماڭگىلىك بويى قىزمەت ەتەمىز دەگەن نەگىزگى ماقساتىمىزعا قول جەتكىزەمىز (لۇقا 13:24؛ ٴتىم. 1-ح. 4:7ا، 8).