Мұсаның 1-жазбасы
7 Содан кейін Ехоба Нұхқа былай деді: “Үй ішіңмен бірге кемеге кір. Өйткені осы ұрпақтың ішінен сені әділ деп таптым+. 2 Өзіңмен бірге адал жануарлардың әрқайсысынан жеті-жетіден*+, бірін еркек, бірін ұрғашы етіп ал. Ал арам жануарлардың әрқайсысынан екі-екіден, бірін еркек, бірін ұрғашы етіп ал. 3 Сондай-ақ әуеде ұшқан қанаттылардың тұқымы жер бетінен құрып кетпес үшін, олардан да жеті-жетіден*, бірін еркек, бірін ұрғашы етіп ал+. 4 Мен жеті күннен кейін 40 күн, 40 түн бойы+ жауын жаудырып+, өзім жаратқан тіршілік атаулыны жер бетінен жоқ қыламын+”. 5 Нұх бәрін Ехоба бұйырғандай істеді.
6 Жер бетін топан су басқанда, Нұх 600 жаста еді+. 7 Нұх ұлдары, әйелі және келіндерімен кемеге топан су басталмай тұрып кірді+. 8 Адал және арам жануарлар, қанаттылар мен жерде жорғалайтындардың әрқайсысы+ 9 жұп-жұбымен, бірі еркек, бірі ұрғашы болып, Нұх кірген кемеге кірді. Бәрі Құдай Нұхқа бұйырғандай болды. 10 Жеті күннен кейін жер бетін топан су ала бастады.
11 Нұх 600 жасқа толғанда, екінші айдың он жетінші күні аспандағы қалың судың қайнар көздері, көк қақпалары айқара ашылды+. 12 Сөйтіп, 40 күн, 40 түн бойы жерге нөсерлеп жауын жауды. 13 Дәл сол күні Нұх кемеге кірді. Онымен бірге ұлдары Шам, Хам, Япші+, әйелі және үш келіні кірді+. 14 Сондай-ақ жабайы аңдар, үй жануарлары, бауырымен жорғалаушылар, құстар мен қанатты жәндіктердің бәрі түр-түрімен кемеге кірді. 15 Кеудесінде демі* бар түрлі мақұлықтар жұп-жұбымен Нұх кірген кемеге кіріп жатты. 16 Осылайша, Құдай бұйырғандай, түрлі мақұлықтар бірі еркек, бірі ұрғашы болып кемеге кірді. Сосын Ехоба сыртынан есікті жауып қойды.
17 Жерге 40 күн бойы нөсер жауды. Содан су көбейіп, кемені жоғары көтеріп әкетті де, ол су бетінде қалқып жүрді. 18 Су тіптен молайып, деңгейі көтерілген үстіне көтерілді, кеме болса қалқып жүзе берді. 19 Судың көбейгені сонша — аспан астындағы биік таулардың бәрін басып қалды+. 20 Тау төбелері 15 шынтақ* судың астында қалды.
21 Сөйтіп, жер бетінде қыбырлаған күллі тіршілік иелері: қанаттылар, үй жануарлары, жабайы аңдар, қаптап жүрген жәндіктер, сондай-ақ барлық адам баласы — жойылды+. 22 Құрлықта мекендейтін кеудесінде демі* бардың бәрі қырылып қалды+. 23 Осылай ол жердегі барша тірі жанды: адамнан бастап жан-жануарға дейін, бауырымен жорғалаушыдан бастап әуеде ұшқан қанаттыға дейін — бәрін жойып жіберді. Бұлардың бәрі жер бетінен құрыды+, тек Нұх және онымен бірге кемеде болғандар ғана аман қалды+. 24 Су деңгейі 150 күн бойы түспеді+.