Ехоба құтқарылуға ие болуымыз үшін бізді қорғап отыр
“Соңғы уақытта айқын көрінетін құтқарылуға ие болуларың үшін, Құдай өзіне сенуші сендерді өз күшімен қорғап отыр” (ПЕТ. 1-Х. 1:5).
ҚАЛАЙ ЖАУАП БЕРЕР ЕДІҢ?
Ехоба бізді шынайы ғибадатқа қалай жақындатып тартты?
Ехоба бізді кеңесімен жетелеуіне қалай жол бере аламыз?
Ехоба бізге қалай жігер береді?
1, 2. а) Ехобаның адалдығымызды сақтауға көмектесетініне неге сенімді бола аламыз? ә) Ехоба әрқайсымызды қаншалықты жақсы біледі?
“СОҢЫНА дейін табандылық танытқан адам құтқарылады” (Мат. 24:13). Исаның бұл сөздерінен көрінетіндей, Шайтанның дүниесі жойылғанда құтқарылу үшін біз соңына дейін адал болып қалуымыз керек. Алайда Ехоба біз өз ақылымыз бен күшіміздің арқасында табанды болады деп күтпейді. Киелі кітап бізді мынаған сендіреді: “Құдай өз сөзіне адал: ол шамадан тыс сыналуларыңа жол бермейді. Азғырылғанда төтеп бере алуларың үшін, одан шығудың жолын көрсетеді” (Қор. 1-х. 10:13). Бұл сөздер нені білдіреді?
2 Шамадан тыс сыналуымызға жол бермеу үшін Ехоба алдымен біздің кезігетін қиыншылықтарымызды, болмысымызды және шама-шарқымызды жақсы білуі керек. Ехоба бізді соншалықты жақсы тани ма? Иә, Жазбалардан Ехоба әрқайсымызды жақсы білетіні көрінеді. Ол біздің күнделікті істеріміз бен әдеттерімізді, сондай-ақ ойымызды және жүрегімізде не бар екенін біледі (Забур 138:1—6 оқы).
3, 4. а) Ехобаның әрқайсымызға жеке көңіл бөлетіні Дәуіттің мысалынан қалай көрінеді? ә) Ехоба бүгінде қандай тамаша жұмыс атқаруда?
3 Әлемнің Иесі жұмыр басты пенделерге осындай қызығушылық танытатыны рас па? Бұл сұрақтың үстінен ой жүгірткен забур жыршысы Дәуіт Ехобаға былай деген: “Сенің қолыңнан шыққан аспаныңа, Өзің орнатқан ай мен жұлдыздарға Назар аударған әрбір уақытымда Мынадай сұрақтар туады ойымда: Өзің ескеретіндей адам сонша кім, Сен қамқорлайтындай адам баласы кім?” (Заб. 8:4, 5). Бәлкім, бұл сұрақтың туындауына Дәуіттің өз басынан кешіргендері себеп болған шығар. Ехоба Есейдің кенжесі болған Дәуітті өзінің “көңілінен шыққан” адам деп тауып, оны “қой бағып жүрген жайылымнан таңдап алып, халқы Исраилдің басшысы болуға тағайындады” (Пат. 1-ж. 13:14; Пат. 2-ж. 7:8). Өзі сияқты қарапайым қойшы баланың ой дүниесіне Жаратқан Иенің көңіл қоятынын білгені Дәуітті қандай сезімге бөлегенін ойлашы!
4 Бүгінде де Ехобаның әрқайсымызға жеке көңіл қоятыны бізді ерекше сезімге бөлейді. Ол барлық халықтан шыққан “қалаулыларын” шынайы ғибадатқа біріктіруде (Нағ. 2:7). Сондай-ақ ол өз қызметшілеріне адалдықтарын сақтап қалуға көмектесуде. Қалайша? Бұл сұрақтың жауабын алмас бұрын Ехоба адамдарды шынайы ғибадатқа қалай жақындатып тартатынын қарастырайық.
ШЫНДЫҚҚА ЖАҚЫНДАТЫП ТАРТАДЫ
5. Ехоба адамдарды Ұлына қалай жақындатып тартады? Мысал келтір.
5 Иса былай деді: “Мені жіберген Әкем жақындатып тартса ғана, адам маған келе алады. Ал мен оны ақырғы күні қайта тірілтемін” (Жох. 6:44). Бұл сөздерден көрінетіндей, Мәсіхтің шәкірті болу үшін бізге Құдайдың көмегі керек. Ехоба қой тәріздес адамдарды Ұлына қалай жақындатып тартады? Уағыз ісі мен киелі рухының әсері арқылы. Мысалы, елші Пауыл мен оның серіктері уағыз сапарымен Філіпіде болғанда, олар Лүдия есімді әйелді кездестіріп, оған куәлік етеді. Киелі кітапта Лүдия “Пауылды тыңдап отырғанда, айтылғандарды қабыл алуы үшін Ехоба оның жүрегін ашты” делінген. Иә, Құдай киелі рухы арқылы оған ізгі хабарды түсінуге көмектесті. Нәтижесінде Лүдия мен оның үй іші шомылдыру рәсімінен өтті (Ел. іс. 16:13—15).
6. Ехоба барлығымызды шынайы ғибадатқа қалай жақындатып тартты?
6 Лүдияның жағдайында ғана осылай болды ма? Әлбетте, жоқ! Егер сен бағышталған мәсіхші болсаң, Құдай шынайы ғибадатқа сені де жақындатып тартқаны. Көктегі Әкеміз Лүдияның жүрегінен асыл нәрсені тапқаны сияқты, сенің бойыңнан да ол бір жақсылықты көрді. Сен ізгі хабарға құлақ түре бастағанда, Ехоба киелі рухы арқылы оны түсінуіңе көмектесті (Қор. 1-х. 2:11, 12). Оқып-білгендеріңді қолдануға тырысқанда, ол сенің талпынысыңа батасын беріп отырды. Ал өміріңді оған арнағанда, оның жүрегі қуанышқа толды. Иә, сен өмір жолында тәй-тәй басып жүре бастағаннан бері Ехоба қолыңнан жетелеп келеді.
7. Құдай адал болып қалуымызға көмектесетінін қайдан білеміз?
7 Өзінің қызметшісі болуға көмектескен Ехоба өзіне адал болып қалуымызға да көмектеседі. Ол шындыққа өздігімізден келмегенімізді және өз бетімізше шындықта нық тұра алмайтынымызды біледі. Петір майланған мәсіхшілерге: “Соңғы уақытта айқын көрінетін құтқарылуға ие болуларың үшін, Құдай өзіне сенуші сендерді өз күшімен қорғап отыр”,— деп жазды (Пет. 1-х. 1:5). Елшінің бұл сөздері барлық мәсіхшілерге қатысты әрі әрқайсымызды қызықтыру керек. Неге? Өйткені адалдықтың ақ жолында қалу үшін бәріміз де Құдайдың жәрдеміне мұқтажбыз.
ШАЛЫС ҚАДАМ БАСУДАН САҚТАЙДЫ
8. Неліктен біз шалыс қадам басудан абай болуымыз керек?
8 Қиыншылықтар мен кемелсіздігіміз кейде жағдайға Ехобаның көзімен қарауға кедергі жасауы мүмкін. Ал нәтижесінде өзіміз де аңғармай үлкен қателік жасауымыз ықтимал (Ғалаттықтарға 6:1 оқы). Мұны Дәуіттің өмірінде орын алған бір оқиғадан көруге болады.
9, 10. Ехоба Дәуітті шалыс қадам басудан қалай сақтап қалды және осы күнде ол біз үшін не істеп жатыр?
9 Бойын қызғаныш билеген Саул патшадан қашып жүрген кезінде Дәуіт зор ұстамдылық танытты. Мүмкіндігі болса да, ол кек алмады (Пат. 1-ж. 24:2—7). Алайда көп ұзамай Дәуіт қателік жасауға шақ қалды. Бір күні ол Набал есімді исраилдікке жолығып, жігіттері мен өзіне ізетпен ас-су сұрады. Бірақ Набал дөрекі жауап қайтарды. Сонда Дәуіт ашуға мініп, Набалдың үй ішіндегі бүкіл еркек кіндіктілерден өшін алмақ болды. Жазықсыз адамдардың қанын төккені үшін Ехобаның жазасына ұшырайтыны оның ойына да кіріп шықпады. Алайда Набалдың әйелі Әбигел дер кезінде араша түсіп, Дәуітті үлкен қателік жасаудан сақтап қалды. Жағдайға Ехобаның араласқанын түсінген Дәуіт былай деді: “Сені бүгін маған жолықтырып отырған Исраилдің сиынатын Құдай Иесіне шүкіршілік! Керемет ақылыңмен мені қазір қан төгіп, кек алудан сақтап қалғаның үшін саған да көп рақмет!” (Пат. 1-ж. 25:9—13, 21, 22, 32, 33).
10 Бұл оқиғадан не үйрене аламыз? Ехоба Әбигел арқылы Дәуітті шалыс қадам басудан сақтап қалды. Бүгінде Ехоба бізді де осылай қорғай алады. Әрине, біз қателік жасап қоймау үшін Құдай әрдайым біреуді жіберіп отырады деп күтпейміз. Сондай-ақ оның белгілі бір жағдайда қалай әрекет ететінін немесе ниеті орындалу үшін не нәрсеге жол беретінін де білмейміз (Екк. 11:5). Алайда Ехоба біздің жағдайымыздан хабардар екеніне және оған адал болып қалуымыз үшін қол ұшын беретініне сенімді бола аламыз. Ол былай деп уәде етеді: “Мен саған ақыл-кеңес беремін, Жүретін жолыңды көрсетемін. Сені таса қылмай көзімнен, Әрдайым жетелеп жүремін Мен” (Заб. 31:8). Ехоба ақыл-кеңесті қалай береді? Біз оның пайдасын қалай көре аламыз? Қазіргі таңда Құдай өз халқын бастап жүргеніне неге сенімді бола аламыз? Аян кітабы осы сұрақтарға қалай жауап беретінін көрейік.
АҚЫЛ-КЕҢЕСІМЕН ҚОРҒАЙДЫ
11. Ехоба мәсіхшілер қауымдарының жағдайынан қаншалықты хабардар?
11 Аян кітабының 2-ші және 3-ші тарауында ұлылыққа бөленген Иса Мәсіхтің Кіші Азиядағы жеті қауымды тексергені туралы баяндалады. Бұл аяннан көрінетіндей, Мәсіх қауымдардың жалпы күйін ғана емес, нақты бір жағдайларды біледі. Ол тіпті белгілі бір адамдарды мақтаған не кеңес берген. Біз бұдан не білеміз? Аяндағы жеті қауым 1914 жылдан кейінгі майланған мәсіхшілерді бейнелейді. Алайда оларға берілген кеңестер жер бетіндегі барлық қауымдарға қатысты. Ендеше біз Ехобаның өз халқын Ұлы арқылы үнемі жетелеп отыратынына сенімді бола аламыз. Бұл басшылықтың пайдасын көру үшін не істеуіміз керек?
12. Ехобаға қадамдарымызды бағыттауға қалай жол бере аламыз?
12 Ехобаның сүйіспеншілікке толы басшылығының пайдасын көрудің бір жолы — жеке зерттеу жүргізу. Ехоба адал да ақылды құлдың Жазбаларға негізделген басылымдары арқылы көптеген кеңестер береді (Мат. 24:45). Мұның пайдасын көру үшін біз оларды зерттеуге уақыт бөліп, білгенімізді іс жүзінде қолдануымыз керек. Жеке зерттеу — Ехоба бізді “сүрінуден сақтау” үшін қолданатын шаралардың бірі (Яһд. 24). Қандай да бір әдебиетті оқып отырып, “бұл дәл мен үшін жазылған ғой” деп ойлаған кезің болған ба? Мұны Ехобадан келген түзету деп қабылда. Досың назарыңды әлденеге аудару үшін иығыңнан түртетіні сияқты, Ехоба да киелі рухы арқылы жүріс-тұрысыңның не мінезіңнің жақсарту керек тұстарына назарыңды аударуы мүмкін. Киелі рухтың басшылығына мойынсұну арқылы Ехобаға қадамдарымызды бағыттауға жол береміз (Забур 138:23, 24 оқы). Олай болса, жеке зерттеуімізге қаншалықты уақыт пен күш жұмсап жүргенімізді тексергеніміз жөн.
13. Неліктен жеке зерттеуге қанша уақыт пен күш жұмсап жүргенімізді тексергеніміз жөн?
13 Егер біз көңіл көтеруге тым көп уақыт бөлетін болсақ, онда жеке зерттеуге уақытымыз қалмайды. Бір ер бауырлас былай дейді: “Жеке зерттеудің жайына қалуы өте оңай. Көңіл көтеру қазір бұрын-соңды болмағандай қол жетімді әрі арзан. Олар теледидар, компьютер мен телефонның ішінде бар. Қайда қарасаң да, көңіл көтеру түрлері кел мұндалап тұрады”. Егер абай болмасақ, барған сайын көп көңіл көтеріп, ақырында тыңғылықты жеке зерттеуге мүлдем уақыт қалмауы мүмкін (Ефес. 5:15—17). Сондықтан өзіңнен былай деп сұра: “Құдай Сөзін тереңірек түсіну үшін мен қаншалықты жиі күш саламын? Мен тек тапсырма алғанда немесе кездесуге дайындалғанда ғана жеке зерттеу жүргіземін бе?” Олай болса, Киелі кітаптағы Ехобаның даналығын қазынадай іздеу арқылы отбасылық ғибадаттың не жеке зерттеудің сапасын арттырайық. Ехоба беріп отырған бұл даналық бізді қорғап, соңына дейін адал болып қалуымызға көмектеседі (Нақ. с. 2:1—5).
ЖІГЕР БЕРІП НЫҒАЙТАДЫ
14. Ехоба сезімдерімізге көңіл бөлетіні Жазбалардан қалай көрінеді?
14 Дәуіт өмірінде көптеген қиыншылықтарға тап болған (Пат. 1-ж. 30:3—6). Киелі кітаптан көрінетіндей, Ехоба оның не сезінгенін түсінген (Забур 33:19; 55:9 оқы). Құдай біздің де сезімдерімізді біледі. “Жүрегіміз жараланып”, “жанымыз күйрегенде” ол біздің жанымыздан табылады. Мұны білгенінің өзі Дәуітке жұбаныш берді. “Қуанып, шаттанамын рақымыңа Сенің, Байқадың Сен мүшкіл халімді менің, Жанымның азабына көңіл бөлдің”,— деп жырлады ол (Заб. 30:8). Бірақ Ехоба біздің қиыншылығымызды біліп қана қоймайды. Ол бізге жұбаныш пен жігер беру арқылы қолдау көрсетеді. Бізге көмектесу үшін ол қауым кездесулерін қолданады.
15. Асафтың мысалынан қандай сабақ аламыз?
15 Кездесулерге барудың бір пайдасы забур жыршысы Асафтың мысалынан жақсы көрінеді. Айналасындағы әділетсіздікті көрген Асаф, былайша айтқанда: “Құдайға қызмет етудің пайдасы бар ма өзі?”— деп күмәндана бастады. “Жүрегім қызғаныштан күйді, Жан дүнием шүбәдан налып ренжіді”,— деген сөздеріне қарағанда ол қатты түңілгенге ұқсайды. Нәтижесінде ол Ехобаға қызмет етуді доғара жаздады. Асафқа көзқарасын түзетуге не көмектесті? “Соңында мен Құдайдың үйіне кірдім”,— деді ол. Ехобаның қызметшілерімен араласқаны оған ойын дұрыстауға көмектесті. Ол зұлымдардың өркендеуі уақытша екенін және Ехоба түбінде әділдік орнататынын түсінді (Заб. 72:2, 13—22). Кейде біз де Асаф сияқты күй кешеміз. Шайтанның дүниесіндегі әділетсіздікті көргенде, біздің де көңіліміз жүдеп, ұнжырғамыз түсуі мүмкін. Ал бауырластармен бас қосқанда біз сергіп, Ехобаға қуанышпен қызмет ете беруге күш аламыз.
16. Ханнаның мысалы бізге несімен пайдалы?
16 Ал егер қауымда болған қандай да бір жағдайдың кесірінен кездесулерге барудан тартынып жүрсең ше? Бәлкім, саған қауымдағы жауапкершілігіңді қалдыруға тура келгендіктен, өзіңді ыңғайсыз сезінетін шығарсың. Я болмаса бауырластармен келіспеушіліктер туындаған болар. Олай болса, Ханнаның мысалы саған көмек болады (Патшалықтар 1-жазба 1:4—8 оқы). Күндесі Пәнана жиі Ханнаны ренжіте беретін. Ал отбасы жыл сайын Ехобаға құрбандық ұсыну үшін Шилоға барған кезде жағдай одан бетер ушығатын. Бұл Ханнаның жанына батқаны сонша, ол “егіле жылап, астан дәм татпайтын”. Алайда ол осы жағдайға бола Ехобаға ғибадат ету орнына баруды доғармады. Ехоба оның адалдығын көріп, батасын берді (Пат. 1-ж. 1:11, 20).
17, 18. а) Қауым кездесуінде қалай жігер аламыз? ә) Ехобаның сүйіспеншілікке толы қамқорлығы сені қандай сезімге бөлейді?
17 Бүгіндегі мәсіхшілер Ханнаға еліктеп, қауым кездесулеріне үзбей барып тұрулары керек. Бәріміз де қауым кездесулерінің жігер беретінін көріп жүрміз (Евр. 10:24, 25). Бауырластарымыздың сүйіспеншілігі көңілімізге жылу береді. Баяндамада не түсініктемеде айтылған қарапайым ойдың өзі бізге қатты әсер етуі мүмкін. Кездесуге дейін не кейін бауырласымыз бізді мұқият тыңдауы не жұбатуы мүмкін (Нақ. с. 15:23; 17:17). Ехобаны мадақтап бірауыздан ән шырқағанда, бойымызға қанат бітеді. Әсіресе жүрегімізді “уайым-қайғы кернегенде”, біз Ехобаның қауым арқылы беретін “жұбанышы” мен қолдауына мұқтажбыз. Ол бізді нығайтады әрі адалдықтан таймауға көмектеседі (Заб. 93:18, 19).
18 Әкесінің қамқорлығының астында өзін қауіпсіз сезінген Асаф сияқты біз де Ехобаға: “Сен мені ұстап қолдайсың оң қолымнан, Ақыл-кеңесіңмен мені бастайсың”,— дей аламыз (Заб. 72:23, 24). Ехобаның құтқарылуымыз үшін бізді қорғап отырғанына қаншалықты ризамыз десеңші!
[28-беттегі сурет]
Ехоба сені де жақындатып тартты
[30-беттегі суреттер]
Құдай бізді ақыл-кеңесімен қорғап отыр
[31-беттегі сурет]
Ехоба бізді жігер беріп нығайтады