Адамдарға азаттық төлемінің пайдасын көруге көмектес.
Еске алу кеші 12 Сәуір күні өтеді
1. Азаттық төлемі үшін ризашылығымызды білдірудің бір жолы қандай?
1 “Бізге берген баға жетпес сыйы үшін Құдайға шүкіршілік етейік!” (Қор. 2-х. 9:15) Бұл сөздер Құдайдың өз халқына Ұлы Иса Мәсіх арқылы көрсеткен ізгілігі мен рақымына деген ризашылығымызды жақсы суреттейді. Осы ризашылығымыз 12 Сәуір күні Исаның өлімін еске алу үшін бас қосқанда ерекше көрінеді.
2. Еске алу кешіне Ехоба Куәгерлерінен басқа тағы кімдер келеді және азаттық төлемінің пайдасын көру үшін олар не істеулері керек?
2 Ехобаның қызметшілерінен басқа да 10 миллионға жуық адам жылда Еске алу кешіне келеді. Осылайша олар қандай да бір шамада Исаның құрбандығына деген ризашылықтарының бар екенін көрсетеді. Алайда олар бұл құрбандықтың пайдасын көрулері үшін, оған сенім білдірулері керек (Жох. 3:16, 36). Олардың мұндай сенім дамытуларына қалай көмектесуімізге болады? Еске алу кеші кезеңінде оларды Киелі кітапты жеке зерттеуге және апта сайын өтетін қауым кездесулеріне келуге талпындыруымызға болады. Қалайша?
3. Еске алу кешіне шақырған адамдармен Киелі кітап зерттеу сабағын қалай бастауға болады?
3 Киелі кітап зерттеу сабақтары. Қызығушыларды Еске алу кешіне шақырғанда неге олармен “Білім” кітабы бойынша зерттеу сабағын бастауға тырысып көрмеске? 127-беттегі 18-абзацты қарастыру арқылы Еске алу кеші туралы айтып беруді ұсын. Қосымша мәлімет ретінде 2004 жылғы “Күзет мұнарасының” 1 сәуірдегі санының 3—7 дейінгі беттеріндегі мәліметті қолдануға болады. Мүмкін, бұл мәліметті бір не екі барғанда есік алдында тұрып, зерттеу сабағы сияқты өте алатын шығарсыңдар. Оны талқылап біткен соң, үй иесі “Құдайдың адамзатты құтқару үшін қолданған шарасы” деп аталатын 7-тарауды талқылауға қарсы болмауы мүмкін. Киелі кітап зерттеу сабағы тұрақтанған соң, кітапты бірінші тараудан бастап қарастырыңдар.
4. Биылғы еске алу кеші кезеңінде зерттеу сабағын кімдермен бастауға болады?
4 Осындай тәсілді қолданып, зерттеу сабағын тағы кімдермен бастауға болады? Мүмкін, жұмысыңдағы, мектебіңдегі адамдардың немесе көршілеріңнің бірі бұған қарсы болмайтын шығар. Ер бауырластар қауымдағы әйел бауырластардың күйеулеріне ұсыныс жасаса жақсы болар еді. Өз туыстарымызды да ұмытпайық. Сондай-ақ кезінде қауыммен жақын араласқан адамдарды Еске алу кешіне шақыруға ерекше күш салғымыз келеді (Лұқ. 15:3—7). Осы адамдардың бәрі азаттық төлемінің пайдасын көре алулары үшін көмегімізді аямайық.
5. Киелі кітап зерттеп жүрген адамдарды және басқа да қызығушыларды апта сайын өтіп тұратын кездесулерге келуге қалай талпындыруға болады?
5 Қауым кездесулері. Көптеген Киелі кітап зерттеп жүрген адамдар мен басқа да қызығушылар кездесулерге келуді Еске алу кешінен бастаған. Алайда оларды басқа да кездесулерге келуге қалай талпындыруға болады? 2005 жылдың сәуір айындағы “Біздің патшалық қызметіміздің” 8-бетінде мынадай кеңес берілген болатын: “Келесі аптада айтылатын баяндаманың қалай аталатынын айт. “Күзет мұнарасы” журналында және қауымның кітап зерттеу кездесуінде талқыланатын мақаланы көрсет. Теократиялық қызмет мектебі мен қызмет кездесуі қалай өтетінін айтып бер. Мектепте берілген тапсырмаң болса, бәлкім, бірге жаттығарсыңдар. Кездесулерде айтылған ойлармен бөліс. Ол жерде не болатындығын көз алдына елестетуге жәрдемдесу үшін әдебиеттердегі суреттерді қолдан. Алғашқы Киелі кітап зерттеу сабағы кезінде-ақ оларды кездесуге қатысуға шақыр”.
6. Ақ жүректі адамдарға азаттық төлемінің пайдасын көруге қандай екі жолмен көмектесе аламыз?
6 Ақ жүректі адамдар жүйелі түрде Киелі кітап зерттеп және қауым кездесулеріне келіп тұратын болса, рухани тез өседі. Олай болса, адамдарды осы рухани шаралардың және Құдайдың ең үлкен сыйының, азаттық төлемінің, пайдасын көруге талпындыра берейік.