“Осылай істеп тұрыңдар”. Еске алу кеші 5 сәуір күні аталып өтеді
1. Неліктен Еске алу кеші маңызды оқиға болып табылады?
1 “Мені еске алу үшін, осылай істеп тұрыңдар” (Лұқа 22:19). Осы сөздермен Иса ізбасарларына өзінің өлімін еске алуды бұйырған. Төлем құрбандығының арқасында қандай баталарға ие болғанымызды ескерер болсақ, онда Мәсіхтің ізбасарлары ретінде біз үшін жыл сайын аталып өтетін Еске алу кешінен маңызды оқиға жоқ. Биыл бұл кеш 5 сәуір күні өтеді. Осы күн жақындап қалғандықтан, Ехобаға деген ризашылығымызды қалай көрсете аламыз? (Қол. 3:15).
2. Еске алу кешін маңызды деп санайтынымызды жазба орындарын зерттеу және ой жүгірту арқылы қалай көрсете аламыз?
2 Дайындалу. Әдетте біз өмірімізде болатын маңызды оқиғаларға дайындаламыз. Отбасымен бірге Исаның жердегі өмірінің соңғы күндері жайлы оқып, сол жайында ой жүгірту арқылы жүрегімізді Еске алу кешіне дайындай аламыз (Езра 7:10 ЖД). Ал Киелі кітаптағы бұл үзінділер күнтізбеде және “Киелі жазбаларды күнделікті зерттеу” кітапшасында көрсетілген. Сондай-ақ Исаның өмірінің соңғы күндеріне қатысты толығырақ жазба орындары мен “Ең ұлы адам” кітабының тарауларына сілтеме берілген кестені 2011 жылғы сәуір—маусым айларындағы “Күзет мұнарасының” 23, 24-беттерінен табуға болады.
3. Еске алу кешін маңызды деп санайтынымызды уағыздау қызметіне көбірек атсалысу арқылы қалай көрсете аламыз?
3 Уағыздау. Еске алу кешін маңызды деп санайтынымызды уағыздау қызметіне барынша атсалысуымызбен де көрсете аламыз (Лұқа 6:45). 17 наурыз, сенбіден бастап, дүниежүзі бойынша Еске алу кешіне шақыру науқаны жүреді. Қызметке көбірек, бәлкім қосалқы ізашар ретінде, қатысу үшін күнделікті кестеңе өзгерістер енгізе аласың ба? Неге келесі отбасылық ғибадат кешінде осы жайында ақылдасып көрмеске?
4. Еске алу кешін атап өткеніміздің бізге қандай пайдасы бар?
4 Жыл сайын Еске алу кешіне қатысудың біз үшін пайдасы зор. Ехобаның жомарттық танытып, өзінің жалғыз Ұлын төлем ретінде бергені туралы ой жүгірткеніміз бізді қуанышқа бөлеп, Құдайға деген сүйіспеншілігімізді арттыра түседі (Жох. 3:16; Жох. 1-х. 4:9, 10). Бұл бізді енді өзіміз үшін өмір сүрмеуге талпындырады (Қор. 2-х. 5:14, 15). Сондай-ақ бұл Ехобаны ел алдында мадақтауға деген ықыласымызды күшейте түседі (Заб. 101:20—22). Жүректері ризашылыққа толы Ехобаның қызметшілері 5 сәуір күні өтетін Еске алу кешінде “Иеміздің өлімін жариялау” мүмкіндігін асыға күтуде (Қор. 1-х. 11:26).