Meeraanerminni akiuussinnaassuseqannginnerminni atornerlugaasimasut

MAANNA 40-ngajannik ukioqarpunga, naallu ukiut 30-it sinnerlugit matuma siorna pisimagaluartoq suli anniaatigisarpara,“ Eilene oqaluttuarpoq.a „Suli kamariataassutigisarlugulu imminut pisuutinnermik misigissutigisarlugulu aappariinnitsinni ajornartorsiutinik pilersitsisuusarpoq. Allat paasinniffiginiartaraluarpaannga, saperluinnarpulli!“ Eilenemuna suna anniaatigigaa? Meeraagallarami kinguaassiuutitigut atornerlunneqarsimavoq. Taamanimiilli tamanna naalliuutigiuarsimavaa.

Taamatut misigisaqarsimasutut Eilene kisimeeqqajanngilaq. Misissuinikkut paasineqarsimavoq arnat — aammami angutit — aarleritsannartumik amerlavallaartut meeraanerminni atornerlunneqartarsimasut.b Paasinarpoq meeqqat atornerlunneqartarnerat qaqutigoortuunngitsoq, inuilli atugarisatigut, aningaasatigut, upperisarsiornikkut ammillu qalipaataatigut qanorluunniit inissisimagaluartut akornanni siammarsimaqisoq.

Qujanartumilli angutit arnallu meeqqamik kinguaassiuutitigut atornerluerusuttut ikittuinnaapput. Ikinnerussuteqartulli navianartut ileqqoq maajunnartoq tamanna iliuusereriataartarpaat. Taakkunanngalu ikittuinnaat inummik iluarluanngitsumik pinnguartarfiit eqqaanni meeqqanik ussassaarisartumik eqqarsaammut naapertuupput. Atornerluisartut amerlanersaat qaamikkut ippinnaatsuupput, illigussutsitilli meeqqanut toqqakkaminnut tatigittunut illersortissaqanngitsunullu — nalinginnaasumik namminneq panimminnut — naammassiniartarlugit.c Inuit allat takkuanni niviarsiaqqat qularnanngitsumik inussiarnersumik isumassuerpaluttumillu iliorfigisarpaat, kisimeeqatigileraangamikkilli nakuuserfigisarlugit, sioorasaartarlugit nikanarsaataasumillu kinguaassiuutitigut arneriniarfigisarlugit.

Annilaarnartut tamakkua angerlarsimaffinni ataqqinarpaluttuni amerlasuuni pisarmata paasiuminaatsinneqarsinnaavoq. Bibelilli nalaanili meeqqat atornerlunneqartarsimapput ’illigussutsinik naammassisitsiniaapallannermut’. (The International Critical Commentary; naleqqiuguk Joel 4:3.) Bibelimi ima siulittuuteqarpoq: ’Imaattorli ilisimassavat: ullussani kingullerni ajornartunik nalliuttoqassammat, inuit inuujumaarmata imminnik asasut . . . asanniuitsut . . . imminut naalakkersorsinnaanngitsut, qiningasut, ajunngitsunik uumissuisut.’ Taamaattumik ullumikkut meeqqanik atornerluinerup taama siammarsimatiginera tupaallaatiginngilarput. — 2 Timûtiuse 3:1-3, 13, (NV).

Meeqqat atornerlugaasut tamatiguunngikkaluartoq timikkut isumakkullu ataavartussamik ajoqusigaasarput. Ussatitoqqatulli ippoq: „Inuk illaraluartoq uummataa anniaateqarsinnaasarpoq.“ (Ussatit 14:13) Aap, atornerlugaasimasorpassuit misigissutsikkut innarlerneqarsimasarput anniaatigiuakkaminnik. Sooq meeqqat atornerlunneqartut ilaasa atornerlunneqarnertik annertuumik ajoqutissarsiffigisarpaat? Sooq piffissap ingerlanerata ikit tamatiguunngitsoq mamitittarpai? Ajornartorsiut annertoqimmat ilungersornaqalunilu ilaginnaannarneqarsinnaanngilaq. Tulliuttut atuarlugit nuanniissinnaapput — ingammik illit nammineq meeraagallaravit atornerlunneqarsimaguit. Taamaappalli qularutigissanngilat kingupilui anigorsinnaagakkit. (gD 8/10 91)

[Quppernerup ataani ilanngussat]