Jordanip kuussua ikaaraat

TAKUUK! Israelikkut Jordanip kuussua ikaarpaat! Naalli kuussuaq? Ukiup taamaalinerani siallerajoqimmat aatsaanngummat kuussuaq ulikkaaqqagaluarpoq. Maannali tissorsimavoq! Israelikkullu panertukkut ikaarput soorlu Immami Aappalaartumi taamaaliorsimasut! Imersuaq sumununa pisimasoq? Paasiniariartigu.

Israelikkut Jordanip kuussua ikaartariaqalermassuk Jehovap Josua inunnut imaattumik oqaqquaa: ’Palasit angerutsip illerfia tigussavaat siulliussallutillu. Isigaasa Jordanip ernga attorpassuk, taava kuukkunnaassaaq.’

Taava palasit angerutsip illerfia ersukkiuppaat, inuillu siornatigut ingerlalerlutik. Jordanimut pigamik palasit kuummut aterput. Kuussuaq itisoorujussuuvoq sarfaqalunilu. Isikkatilli imermut misunniariaraat kuussuaq unippoq! Tupinnartuliaavoq! Pavani kuup qulaa-tungaani imeq kuuttoq Jehovap unitsippaa. Sivitsunngitsoq kuussuaq imaarulluni tissorpoq!

Palasit angerutsip illerfianik ersuttut kuussuup tissorsimasup qeqqanut unipput. Assilissami takusinnaavigit? Tassani qeqartillugit Israelikkut tamarmik Jordanip kuussuatigut panertukkut ikaarput!

Tamarmik ikaareermata Jehovap Josua angutinut nukittuunut aqqaneq-marlunnut oqaqquaa: ’Kuussuarmut palasit angerutsip illerfia ersullugu qeqarfigisaannut ateritsi. Ujaqqanik aqqaneq-marlunnik tamaani tigusigitsi, unnuarulu unnuiffissassinnut inissillugit. Siunissami qitornassi ujaqqat taakku apeqqutigigaangatigik oqarfigisassavasi kuussuaq unissimasoq Jehovap angerusiata illerfia Jordanikkut ikaarunneqarmat. Ujaqqat tupinnartuliamik tamatuminnga eqqaasittassavaasi!’ Aamma Josua kuussuup kuuffigigaluani palasit qeqarfigisimasaanni ujaqqanik aqqaneq-marlunnik inissiivoq.

Taava Josuap palasit angerutsip illerfianik ersuttut oqarfigai: ’Jordanimit majuaritsi.’ Majuarmata kuussuaq kuuleqqippoq.