Rahab alapernaarsuisullu

ANGUTIT uku navianartorsiorput. Qimaasariaqarput toqutaajumanatik. Tassaaku Israelikkut alapernaarsuisuutitaat, arnarlu ikiortigisaat tassaavoq Rahab. Rahab illumi illoqarfiup Jerikop qarmarsuaniittumi najugaqarpoq. Angutit taakku suna pissutigalugu navianartorsiortut paasiniariartigu.

Israelikkut Jordanip kuussua ikaartussanngulerpaat Kana’anip nunaanut isissallutik. Taamaaliortinnagilli Josuap alapernaarsuisut marluk aallartippai. Oqarfigai: ’Nuna illoqarfillu Jeriko alapernaarsoriartorsigik.’

Alapernaarsuisut Jerikomut iseramik Rahabip illuanukarput. Jerikolli kunngia oqarfigineqarpoq: ’Israelikkut marluk unnuaq maanga iserput nuna alapernaarsoriartorlugu.’ Tamanna tusaramiuk kunngi Rahabimut angutinik aallartitsivoq, taakkualu Rahab peqquaat: ’Angutit illunnut isersimasut anisikkit!’ Rahabilli alapernaarsuisut illumi qaavanut toqqortippai. Taava oqarpoq: ’Angutit illunnut iseraluarput, suminngaanneersulli naluakka. Taarsilernerani anipput, illoqarfiup isaaffia suli parnaanngitsoq. Tuaviorussi angusinnaavasi!’ Taava angutit aallappallapput.

Animmata Rahab illup qaavanut majuarasuarpoq. ’Nalunngilara Jehovap nuna manna ilissinnut tunniutissagaa,’ alapernaarsuisut oqarfigai. ’Tusaamavugut qanoq Immap Aappalaartup erngi tissortikkai Egyptenimit aallarassi, qanorlu kunngit Sihon Ogilu toqukkisi. Uanga ajunngitsuliorfigaassi, taava neriorsorsinga aamma uanga ajunngitsuliorfigiumallunga. Ataataga anaanagalu qatanngutikkalu asattuunneqartissigit.’

Alapernaarsuisut taamaaliorumallutik neriorsuipput, Rahabili iliuuseqartariaqarpoq. ’Una allunaasaq aappallarissoq tiguuk igalaamullu qilerlugu,’ alapernaarsuisut oqarput, ’qanigisatillu tamaasa illunnut katersukkit. Jeriko tiguassallugu uterutta, allunaasaq taanna igalaanniittoq takussavarput illunniittunillu toqutsissanata.’ Alapernaarsuisut Josuamut uteramik pisimasunik tamanik oqaluttuuppaat.