Jonas aalisagarsuarlu

TAKUUK angut immap iluaniittoq. Ajornartorsiorunarpoq, ilaa? Aalisakkap iinialerpaa! Angut taanna nalunngiliuk? Tassa Jonas. Suna pillugu taama ajornartorsiortigisoq tusassavat.

Jonas Jehovap pruffiitigaa. Pruffiitip Elisap toqunerata kinguninnguagut Jehovap Jonas peqquaa: ’Illorpassuaqarfimmut Ninevemut aallarit. Inuit tassanimiut ajoqaat, tamatuminngalu oqaluttuutissavatit.’

Jonasili Ninevemut aallarumanngilaq. Taava umiarsuarmut killup tungaanut ingerlasussamut ikivoq. Jonas qimaammat Jehovap iluarinngilaa. Taamaattumik anorersualersippaa. Ima anorersuartigaaq umiarsuup umiusinnaanissaa aarleqqutiginarsilluni. Umiartortut annilaangaqaat, guutitillu torlorfigaat ikioqqullutik.

Kiisalu Jonasip oqarfigai: ’Uanga Jehova, Guuti qilammik nunamillu pinngortitsisoq, pallorfigaara. Jehovap uannut iliuusereqqusaa qimarratigaara.’ Taava umiartortut aperipput: ’Qanoq iliussaagut anorersuarunnaaqqullugu?’

’Imaanut igissinga, taava imaq manississaaq,’ Jonas oqarpoq. Umiartortut taamaaliorumanngillat, anorersuarli sakkortusiartuinnarmat kiisa Jonas umiarsuarmit avammut igiinnarpaat. Erniinnarluinnaq anori qatsorpoq, imarlu manissivoq.

Jonas kiviartortoq aalisagarsuup iivaa. Toqunngilarli. Ullut pingasut unnuallu pingasut aalisagarsuup aqajaruaniippoq. Jonas peqqissimeqaaq Jehova naalallugu Ninevemukarsimannginnami. Taava qanoq iliornera nalunngiliuk?

Jonasip Jehova qinnuigaa ikioqqulluni. Taava Jehovap aalisagarsuaq meriartippaa Jonas nunamut panertumut meriaaritillugu. Taava Jonas Ninevemukarpoq. Tamatuma paasitippaatigut qanoq pingaartigisoq Jehova tatigissallugu oqaasiilu tamaasa naalassallugit, ilaa?