Silarsuarmi eqqissinissamik takorluugaq neriuut piviusorsiortuunngitsoq
ASSUT neriulluaatigineqarpoq ungasinngitsukkut silarsuarmi eqqissineqarumaarnera. Aaqqissuisoq Carol Goar aviisimi The Toronto Star-imi ima allappoq: „Eqqisseqatigiinnissamik isumaqatigiissutit sumi tamaani atsiorneqaqattaarput, pavani Afghanistanimiit qavani Angolamut. Nunarsuup ilaani saqitsaannerit qaammatialunnguaannaat matuma siornatigut iluarsineqarsinnaanngitsutut isikkoqarsimagaluartut maanna iluarsineqalerunarput. Aammalu Naalagaaffiit Peqatigiit (FN) soorlu nuannaajallannartumik ’makeqqilersullusooq’“. Tamanna, Carol Goarip oqarneratut, „nunarsuaq tamakkerlugu neriunnersuarmik“ pilersitsisimavoq. Atuagassiami USA Today-imi allaaserisat pingaarnersaanni aammattaaq ima allassimasoqarpoq: „Silarsuarmi tamarmi eqqissineqalerpoq.“
Atuagassiami UN Chronicle-mi assut soqutiginartumik allaaserineqarpoq „Sovjetunionip USA-llu imminnut qanilliartuinnarnerat“. Sakkutuunik angerlakaatitsineq, Europap kangiani pissutsit allanngoriartupiloornerat, sakkutuunik sakkussanillu ikililerinissanik isumaqatigiinniarnerit — tamakku tamarmik neriulersitsipput naalagaaffissuit sakkussaqarneqqisaannerminnik kiisami unikaallatsitsinialernerannik. Tamannalumi assut qujarunnarpoq, oqaatigineqartarmammi sakkutooqarneq naalagaaffiit ukiumut koruunit 5600 milliardit missaannik aningaasartuutigisaraat.
Qanorli ilimanaateqartigaa silarsuarmi eqqissineqarumaarnissaanik inuit takorloortagaasa piviusunngorumaarnissaat? Alaatsinaattut isumalluarnerpaagaluilluunniit nassuerutigaat sakkussanik ikililerinermiit sakkuerulluinnarnermut ungasissorujussuusoq. Atomimik sakkussiat tamarmik peerneqassappata tatigeqatigiittoqartariaqarpoq siornatigut asseqanngitsumik. Ajoraluartumilli naalagaaffissuit imminnut pissusiat tunngaveqartuarsimavoq tatigeqatigiinnginnermik peeruminaalluinnartumik. Bibelimi siulittuutigineqartutut nalitsinni inuit ’saammajuitsuupput’ (Bibelimik nutsigaq tuluttooq King James naapertorlugu: ’isumaqatigiissutinik unioqqutitsisuupput’). — 2 Timûtiuse 3:3.
Kikkulli tamakkeratik upperaat atomimik sakkussiat tamaasa piiginnaraanni silarsuarmi eqqissineqalerumaartoq. Naalagaaffiit atomimik sakkussiaatitik tamaasa peeraluarpatigilluunniit sakkunik nalinginnaasunik naammattorsuarnik toqoraatikkuminaqisunillu suli peqartuassaaq — sorsunnersuit marluk eqqaaginnarneqarsinnaapput. Aammattaaq teknikkikkut atortorissaarutit pioreersut atorlugit atomimik sakkussialioqqinnissaq ajornaateqanngivippoq, naalakkersuinikkut najummassimanartoqaleqqissagaluarpat. Inuit ilaat, soorlu politikikkut pissutsinik ilisimatooq Richard Ned Lebow, allaat ima tunngavilersortarput: „Atomimik sakkussianik amerlanngitsunilluunniit nunarsuup ilaanut inissititerigaanni immaqa inuit mianersornerulissagaluarput.“
Kisianni tissinaannassaarluunniit eqqissineq oqaluuserissallugu nalunngikkaanni atomimik sakkussiat atorlugit sorsuttoqaleriaannaasoq aammalu nalunngikkaanni inuit millionilippassuit ajornartorsiutit allarpassuit kingunerisaannik eqqissillutik inuusinnaanngitsut. FN-ip generalsekretæriata Javier Pérez de Cuéllar-ip oqaluuserisimavaa „innuttaaqataasut millionilippassuit angerlarsimaffeqanngitsut imaluunniit ajorluinnartunik inigisaqartut ikiorneqartariaqarnerat. Ajornartorsiut tamanna alliartuinnarmat“. Atuagassiami UN Chronicle-mi allaaserineqarpoq aningaasaqarnikkut ingerlanerliornerup „nunarsuup inuisa 2/3-ii eqqortarai, allaat ilaatigut piitsorujussuanngortittarlugit sorsunnermi atugarliuutinit allaanerungaanngitsunik atugaqalersittarlugit.“ Nunarsuatsinnimi qimaasut 12 millionit missaanniittut qanoq atugaqarpat? Sakkussakillisarnerup imaluunniimmi allaat sakkuerutivinnerup eqqissinartumik inuuneqalersissanerpai?
Silarsuarmi eqqissineqalersinnaaneranik inuit neriuutaat takorluuinerinnaapput, uungaannaq isiginerullutik piviusorsiortuunatillu. Taavami eqqissinissamik piviusorsiornerusumik neriuutissaqarpa? Aap, soorlu atuagassiami matumani takutinneqartareersoq Bibeli imaqarpoq eqqissinissamik neriuummik qularnaatsumik. Jesus Kristus Guutip naalagaaffiani kunngiussutsi naapertorlugu erniinnaq eqqissineqalersitsiumaarpoq takorloorsinnaasarput akimorujussuarlugu annertussuseqartussamik. Tamanna nunarsuup inuinut qanoq sunniuteqassava? Tamanna allaaserisami tulliuttumi akineqassaaq.