Silarsuarmi eqqissineq sunik nassataqassava?

SILARSUARMI eqqissineq Guutip pilersikkumaagaa tassaaginnarnavianngilaq nunarsuarmi sakkuaakkunnaarneq imaluunniit atomimik sakkussiaateqarnerup oqimaaqatigiilernera. Tamanna erseqqissumik paasineqarsinnaavoq oqaatsip „eqqissinerup“ Bibelimi qanoq atorneqarneratigut.

Oqaaseq „eqqissineq“ Allakkani Hebræerisuuni (Testamentitoqqami) nutsigaavoq hebræerit oqaasiannit sjalōm-imit. Oqaatsip taassuma assipalua Mosesip allagaani siullerni 37:14-imi (nutsikkani pisoqqani) nassaassaavoq, ataataanerpaaq Jakob ernerminut Josefimut oqarmat: ’Aallarit-aat, qatanngutitit takusarlugit ajunnginnersut, savallu ajunnginnersut, kingumullu oqariartorfigalunga.’a Oqaaseq sjalōm Mosesip allagaani siullerni 41:16-imi atorneqaqqippoq, oqaatigineqarmat ”Guutip Farao ajunngitsumik akissagaa.

Tassa eqqissineq ilumoortoq Bibelip isumaqartitsinera naapertorlugu isumaqaannanngilaq akersuunnerit tamarmik unitsinneqarnissaannik, aammali isumaqarluni peqqinnermik, isumannaatsuunermik inuulluarnermillu. Soorluli atuagassiami matumani nassuiarneqareersoq, eqqissinissamik ajornartorsiut pinnguaammut katitertakkamut assersuunneqarsinnaasoq inuit iluarsisinnaanngilaat. Taamaallaat Jesus Kristusip, ’Naalakkap eqqissisitsisup’, katitertagaq inerlugu katitersinnaavaa nunamilu eqqissinermik piviusumik pilersitsilluni. (Jesaja 9:6, 7) Tusaariarullu Tussiaat 72:7, 8-mi siulittuutigineqartoq taassuma qanoq aqutsiumaarnissaa pillugu: „Iluarneq ulluini inerilluarsimassaaq, pigissaarnerlu angeqisoq atugaassaaq qaammat qaamaneerutserlugu. Immamit immap illuanut naalagaassaaq, Eufratimiillu nunarsuup isuinut.“ Eqqarsaatigeriassagit, nunarsuarmi tamarmi peqqissuseq, isumannaatsuuneq atugarissaarnerlu atugaajumaartut! Tamanna politikkikkut isumaqatigiissutip suulluunniit inernerisinnaanngilaa. Guutip naalagaaffia pisinnaasutuaavoq. Naalagaaffillu tamanna naammassisaqarnerujussuujumaarpoq. Bibelip siulittuutitigut kusanartorsuarnik takusassippaatigut siunissami silarsuarmi eqqissineqarnissamut tunngasunik. Tamakku ilaat qimerluulaariartigik.

Nunarsuarmi tamarmi sakkussaajarneq — Guutip periaasia malillugu

Tussiaat 46:9, 10-imi ima allassimavoq: „Qaallusi takuniarsigit [Jehovap] suliai, aseruinersuit nunami pilersitai. Nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai.“ „Pisissit“, „qalugiusat“ „qamussuillu sorsuutit“ assersuutaapput sakkunut sorsuutinut assigiinngitsunut — sorsunnermi atortorissaarutinut tamanut. Tassa sakkussiat killilersorneqarnissaat Jehovap naammaginngilaa, ikilisilluinnarneqarnissaalluunniit naammaginngilaa. Atomimik sakkussiat, qamutillit, qamussuit sorsuutit, raketit qaartartortallit, qaartartut igeriuttakkat, qaartiterutit aallaasillu — silarsuarmi eqqissinermut navianartorsiortitsisinnaasut tamaasa nunarsuarmi nungulluinnartinniarpai!

Kisianni sakkut peerneqarnissaat naammannavianngilaq. Tassami sorsunneq pissuteqarpiarpoq inuit naammalluinnanngitsuusut uumissuiumatunerannik, piumatussusiannik peqqarniissusiannillu. (Naleqqiuguk Jâko 4:1-3) Taamaattumik Guutip naalagaaffiata sorsunnerup sorlaa nusunniarpaa inuit ajorniarumatussusiat peerlugu. Qanoq ililluni? Nunarsuarmi tamarmi ilinniartitsisitsinermigut. „[Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ — Jesaja 11:9.

Nunarsuup inui „Jehovamit ajoqersorneqareersimalerpata“ inuiattut ammillu qalipaataasigut assigiinngissutit pilersitsisinnaajunnaassapput aaqqiagiinnginnernik, akeqqersarnernik asissuinernilluunniit. (Juánase 6:45) ’Guuti kinaassusersiortuunngilaq’, taamaattumillu aamma nunarsuarmi najugaqartut kinaassusersiortuunavianngillat. (apustilit suliáinik agdlagkat 10:34) Naalagaaffinnik saqitsaattuerutissaaq nunat killeqarfii Guutip atorunnaarsikkumaarmagit. ’Immamit immap illuanut nunarsuullu isuinut’ kikkut tamarmik kajumillutik qujamasullutillu Kristusip naalakkersuinera ilumoorfigiumallugu nalunaarumaarput. — Tussiaat 72:8.

Eqqissineq tamanna atajuarsinnaaqqullugu Guutip aammattaaq peersissamaarpaa nunarsuup inuisa oqaluttuarisaaneranni avissaartuutaanerpaasimasoq, tassa eqqunngitsumik upperisarsiorneq. (Sefanja 2:11) Nunarsuarmiut Guutimik ilumoortutuamik pallorfiginninnermi ataasiussuseqalerumaarput. (Jesaja 2:2, 3) Qatanngutigiinnut inuiannit tamanit pisunut kikkut tamarmik atalerumaarput!

Eqqissineq angerlarsimaffimmi

Kisianni silarsuarmi eqqissineq sumut iluaqutaassava angerlarsimaffiit kamaaffiusarpata, oqaatsillu annernartut sioorasaarinerillu aallaasip aqerluisullusooq eqqaassissutigineqarlutik? Ullumikkummi ilaqutariippassuarni pissutsit taamaapput. Ilaqutariinni allani isumaqatigiinngissutit ilungersunartut nipangiutiinnarneqartarput nipaatsumillu anniartitsissutaallutik.

Eqqissineq piviusoq tassaasariaqarportaaq angerlarsimaffimmi eqqissineq. Guutip naalagaaffiata ajoqersuisitsineratigut uiusut nuliaasullu asannittumik ataqqinnittumillu ilioqatigiinnissamik ilinniassapput. (Kulorsamiut 3:18, 19) Meeqqat ilinniarumaarput ’angajoqqaaminnut tamatigut naalannissaminnut’. (Kulorsamiut 3:20) Inuusuttuaqqat angajoqqaamik ilungersuutigeqisaannik naalasseriillisarnerat atugaajunnaassaaq. Naalattuuneq suleqatiginnikkumanerlu sallinngussapput. Angajoqqaat qitornallu nuannersumik inooqatigiissapput.

Aningaasanik amikkisaarneq ullutsinni ilaqutariinni akerleriikujunnernut suli ajornerulersitsigajuttarpoq, tassa angajoqqaat tamarmik suliffeqarajuttarmata aammalu sivisuumik ilungersuallutillu sulisarlutik. Kisianni Jesus naalakkersuisuulerpat ilaqutariit aningaasarsiornikkut artukkerneqaatiminnit tamanit aniguisitaassapput, soorlu inigisamut akileerujussuartarnerminnit, ernianut akilersugarpassuaminnit, akileraarutinit qaffakkaluttuinnartunit aammalu suliffissaaleqinermit. Siunertaqarluartunik soqutiginartunillu suliassaqarlualerumaarpoq. Inissaaleqisoqarunnaassaarlu. Jesajap allagaani 65:21-23 manna siulittuutigineqarpoq: „Illuliorumaarput namminneq inigisassaminnik . . . Illuliussanngillat allamiut inissaannik ikkussuissanatillu takornartat nerisassaannik, . . . qinikkamalu nerissammatigit namminneq suliamik inerititaat. Sulilussinnassanngillat qitorniussanatillu tassanngaannaq toqusussanik, tassaagamik kinguaariit pilluaqqusakka qitornaminnik najorteqartussanngorlugit.“

Takorlooriaruk qanormitaava issanersoq nipiliortorsuaqanngitsumi, tiperujoqanngitsumi aammalu illoqarfissuarmik aseroriartortumik isigisaqarfiunngitsumi najugaqarluni! Takorlooriaruk nunami qorsuusumi najugaqarlutit — nammineq pigisanni — kusanartumik sanarfineqarsimasumi aammalu paarilluarneqartumi. Qanormitaavami issava silaannarimmik najuussuilluni, ullutsinni inuiaqatigiit atugartuunngorsagaasimasut nipiliortuinit qimagulluni pinngortitap nammineq nipii eqqissinartut kisiisa tusaalerlugit. Maannakkummi inuit ilaat ilaatigut paratiisinnguamiittutullusooq inuuneqalereeraluarput. Kisianni Guutip naalagaaffiani kikkut tamarmik eqqissinartumik avatangiiseqarlutik inuulerumaarput. Piitsoqassanngilaq, kaattoqarani missukutaasoqaranilu. — Tussiaat 72:13, 14, 16.

Aammattaaq Bibelimi neriorsuutigineqarpoq ’guutiitsut piiagaajumaartut’. (Ussatit 2:22) Guutiitsut imaluunniit ajortut peerneqarpata pinerluttuliortarneq asuussaaq. Taava meeqqatit pinnguariaqqusinnaalissavatit annilaanngatiginagu meeqqanik atornerluiniartartunit pinerlineqarnissaat, aalakoorlutik biilertunit aporneqarnissaat imaluunniit inuusuttunit tarfillutik ikiaroorniaqatigiittartunit ajortumeerneqarnissaat. Meeqqatit isumannaratik toqqissisimallutillu pinnguarsinnaalissapput.

Eqqissineq inuttullu peqqissutsit

Taava aamma inuttut peqqissuserput eqqaasariaqarpoq. Avatangiisivut paratiiisitut alianaatsorsuugaluarpataluunniit anniaatit kræftimit gigtimilluunniit pisut millisinneqarsinnaanngillat. Taamaattumik eqqissinerup piviusup nassatarisariaqarpaa nappaatit, erloqissutit toqullu peerneqarluinnarnissaat. Taamaattoqarsinnaava? Aap, Jesusip nunamiikkallarami arlaleriarluni takutittarsimavaa inuit innarluuteqartut ajorunnaarsissinnaallugit. (Matîuse 8:14-17) Qilammi atorfigisaminiit nunarsuaq tamaat tupinnartuliorfigisinnaajumaarpaa! Bibelimi ima neriorsuisoqarpoq: „Taava tappiitsut isaat uisitaassapput, tusilartut siutaat ammarneqassapput. Tusiattoq tuttutut pissigarumaarpoq, oqajuitsuugaluaq qiimmattarluni appikkumaarpoq.“ — Jesaja 33:24; 35:5, 6.

Kisianni Kristusip inuit atugarliuutaannut tamanut iliuuseqarfiginninnissaa tassunga killeqassanngilaq. Kristusip kunngiussusia pillugu apustili Paulus ima oqarpoq: „Taanna kunngiussagami qinngarsuisut tamaasa isikkami ataannut ilitserlugit. Qinngarsuisut suujunnaarsitassat nunngutissaat tassa toqu.“ (1 Korintumiut 15:25, 26) Tamanna isumaqarpoq oqaluttuarisaanerup aallartinneraniilli toqup nunarsuup inuinut aliasuutissiuisimanera taamaatitinneqarumaartoq. Jesus nassuiaavoq: ’Ullut nalliukkumaar[put], taava iliverniittut tamarmik [Kristusip] nipaa tusarumaarpaat; anillutillu makissapput.’ (Juánase 5:28, 29) Inuit millionillit pitsaanngeqisunik atugaqarlutik inooreersimallutik toqusimasut taamaalillutik periarfissaqalerumaarput silarsuarmi eqqissineqarnissaani peqataanissaminnut.

Eqqissinerup tamatuma misiginissaanut illit akuerisaasinnaajumaarpit? Jehovap Nalunaajaasuisa kajumissaarusuppaatsit tamanna pillugu Bibeli qanoq nassuiaatissaqarnersoq paasiniaqqullugu.b Silarsuarmi eqqissineqarnissaanik siulittuineq tamanna taama imaannaanngitsigisoq sianiginngitsuusaaginnarneqarsinnaanngilaq. Qularutigissanngilat Guutip oqaasii ilikkarniarlugit maleruarlugillu inuuniarlutit ilungersoruit ’taava Guutip eqqissisaasup najussagaatit’ — naassaanngitsumik! — Filípimiut 4:9. (wD 15/4 90)

[Quppernerup ataani ilanngussat]

[Qupp. 5-mi assiliartaq]

Jehovap „nunarsuarmi tamarmi sorsunnerit soraarsikkumaarpai“

[Suminngaanneernera]

USAF Official Photo

[Qupp. 6-mi assiliartaq]

Aappariit asannittumik eqqissisumillu inooqatigiinnissamik ilinniassapput