Jehovamut kiffartornermi pilluarneq piviusoq
„Pilluarpoq Jaakup Guutianik ikiorteqartoq, [Jehovamut] Guutiminut neriulluartoq.“ — TUSSIAAT 146:5.
1, 2. Pilluarneq qanoq oqaatigineqarsimava, ullumikkullu inuppassuit pilluarneq qanoq isigaat?
PILLUARNEQ sunaava? Qinerlerfissialiortartut, filosoffit upperisarsiornermillu ilisimatuut ukiuni hundredelikkuutaani tamanna nassuiarniartarsimavaat. Nassuiaammili ataatsimik isumaqatigiissutigisaminnik nassaarsimanngillat. Encyclopædia Britannica ima nassuerpoq: „’Pilluarneq’ oqaatsit ’tigujuminaannerpaasa’ ilagaat.“ Inunnut assigiinngitsunut oqaaseq ’pilluarneq’ qularnanngitsumik assigiinngitsunik isumaqartarpoq, inuunermik qanoq isiginninneq apeqqutaasarluni.
2 Inuppassuit pilluarneq peqqissutsimut, pigissaarnermut ikinnguteqarluarnermullu attuumassuteqartippaat. Inoqarporli tamakkuninnga tamanik pigisaqaraluarlutik pilluanngitsunik. Angutilli arnallu Jehova Guutimut tunniulluinnarsimasut Biibili ikiortigalugu pilluarnermut allaalluinnartumik isiginnittaaseqalersimapput.
Pilluarnermut isiginnittaaseq allaalluinnartoq
3, 4. (a) Kikkut Jesusip pilluarnerarpai? (b) Pilluarnartut Jesusip eqqartugai eqqarsaatigalugit suna malugineqartariaqarpa?
3 Qaqqami oqaluutsimini Jesus Kristus oqanngilaq pillualernissamut peqqissuseq, pigissaarneq assigisaallu aalajangiisuusut. Akerlianilli, ’anersaakkut ittunik pisariaqartitaqarnerminnik miserratiginninngitsut’ (NV) aamma ’iluarnermut kaattut imerusuttullu’ piviusumik pilluarnerarpai. Pilluarnissamut pissutissat piviusut tamakku eqqartortillugit Jesusip oqaatsini killormoorpalussinnaasumik ima ilavai: ’Pilluarput aliasuttut, tuppallersarneqassagamik.’ (Matîuse 5:3-6) Soorunami Jesus isumaqanngilaq inuit asasatik annaagunikkik pilluassasut. Pisai tassaapput inuit ajortuliornertik tamatumalu kingunipilui pillugit aliasuttut.
4 Apustili Paulusip eqqartorsimavai inuiaat ajorti pillugu anersaamisut ’aserujasumut kiffaasut kiffaajunnaarsinneqarnissamik neriuut tunngavigalugu.’ (Rûmamiut 8:21, 22) Inuit Jehovap Kristus atorlugu utertitsissummik pilliutaa ajortimut matoorutaasoq akuerigunikku Guutillu piumasaanik iliorlutik, ilumut tuppallersarneqassapput pilluarlersinneqassallutillu. (Rûmamiut 4:6-8) Qaqqami oqaluutsimini Jesusip pilluarnerarpaattaaq ’qanilaartut’, ’nallittuisut’, ’minguitsumik uummatillit’ aamma ’eqqissisitsisut’. Neriorsueqqissaarpoq malersorneqaraluarlutik allaat maniguuttut taakku pilluartuassasut. (Matîuse 5:5-11) Soqutiginarporlu pilluarnissamut pissutissat qutsissut tamakkua piitsunik pisuunillu naligiisitsimmata.
Pilluarnerup piviusup tunngavia
5. Guutip kiffaasa tunniulluinnarsimasut pilluarnerannut suna tunngaviua?
5 Pigissaarneq pilluarnermut piviusumut tunngaviunngilaq. Kunngi ilisimasoq Salomon ima allassimavoq: ’Jehovap pilluaqqusinera pisuunngortitsisaraaq, erloqinartumillu ilasarinngilaa.’ (ússatit 10:22, nutsigaq nutaanngitsoq) Jehovap qilammi nunamilu oqartussaanera akuerigaanni paasinarsissaaq pilluarneq Guutip pilluaqqusineranut atalluinnartoq. Kristumiu tunniulluinnarsimasoq Jehovap pilluaqqusineranik misiginnittoq ilumut pilluassaaq. Biibili naapertussagaanni pilluarneq Jehovamut kiffaartornermi nalerisimaarnermik angusaqarnermillu misiginermik ilaqarpoq.
6. Jehovap innuttaasa pilluarnissaannut suna pisariaqarpa?
6 Pilluaatit piviusut tamarmik Jehovamut ajunngitsumik attaveqarnermik pissuteqarput. Pilluarneq piviusoq Guutimik asanninnermik taassumunngalu aalajaannermik tunngaveqarpoq. Apustili Paulusip oqaasii Jehovap kiffaasa tunniulluinnarsimasut iluunngarlutik isumaqatigisinnaavaat: ’Imminut inuusumik ilaqanngilagut . . . Jehovamut inuuvugut . . . Jehovap pigaatigut.’ (Rûmamiut 14:7, 8) Taamaattumik Jehovamut naalanneq nuannaarlunilu piumasaanik naammassinninneq pilluassagaanni pisariaqavipput. Jesus oqarsimavoq: ’Pilluarput Guutip oqaasianik tusartut toqqorlugulu.’ — Lúkarse 11:28.
Pilluarnermut pissutissat assigiinngitsut
7, 8. (a) Pilluarnermut pissutissat qanoq immikkoortiterneqarsinnaappat? (b) Aappariinneq meeqqiornerlu pillugit qanoq oqarsinnaavugut?
7 Pilluarnermut pissutissat eqqartorneqareersut ’tunngaviusunik’ imaluunniit ’ataavartunik’ taaneqarsinnaapput, Jehovap kiffaanut tunniulluinnarsimasunut tamatigut atortuusaramik. Aammalu pilluarnermut pissutissaqarpoq ’allanngujasunik’ taaneqarsinnaasunik, tassa ilaannikkut pilluarnermik kinguneqarsinnaasut, tamatiguunngitsorli. Ataataanerpaat nalaanni Kristusilu sioqqullugu aappariinneq meeqqiornerlu pilluassagaanni pisariaqavissutut isigineqarsimapput. Tamanna ersarippoq Rakelip Jakob sukannersumik ima oqarfigisimammagu: „Qitornartaartinnga, taamaaliunngikkuit toqussaanga.“ (1 Moses 30:1) Piffissami tamatumani meeqqiornermut isiginnittaaseq tamanna Jehovap siunertaanut naleqqulluartuusimavoq. — 1 Moses 13:14-16; 22:17.
8 Jehovap innuttaasa itsarsuaq inuusut aappariinneq meeqqiornerlu pilluaqqussutitut Guutimeersutut isigisimavaat. Piffissanili annikilliornartuni tamakku allallu alianartunik nassataqarsinnaapput. (Naleqqiukkit Tussiaat 127 128-lu ukununnga: Jeremia 6:12; 11:22; Upputit 2:19; 4:4, 5.) Taamaattumik ersarippoq aappariinneq meeqqiornerlu tamatiguunngitsoq pilluarnartuusut.
Itsaq aappaqaratik pilluartut
9. Sooq Jeftap pania ukiut tamaasa erinarsorfigineqartarsimava?
9 Guutip kiffaasa ilarpassuisa aappaqanngitsuunertik piviusumik pilluaatissarsiffigisimavaat. Jeftap paniata ataatami neriorsuutaanut ataqqinnilluni aappaqanngitsuulluni inuuneq qinersimavaa. Ikinngutini arnat ilagalugit aappaqarsinnaannginnini sivikitsumik qissatigisimavaa. Jehovalli illuani, immaqa ’arnat toqqup naapeqatigiittarfiup isertariaani kiffartuuteqarlutik suliaqartut’ ilagalugit, tamakkiisumik kiffartorsinnaanini nuannaarutigisimassaqaa! (2 Moses 38:8) Tamanna pissutigalugu ukiut tamaasa erinarsorfigineqartarsimavoq. — Eqqartuussisut 11:37-40.
10. Jeremias Jehovamit qanoq peqquneqarsimava, tamannalu pilluannginneranik kinguneqarsimava?
10 Pruffiiti Jeremias Jehovamit peqquneqarsimavoq katissanngitsoq meerartaassanngitsorlu piffissami naalliunnangaartumi inuugami. (Jeremia 16:1-4) Jehovalli oqaasiisa allassimasut ilumuussusiat Jeremiasip misigisimavaa: ’Pilluaqqunarsili angut Jehovamik tatiginnittoq, Jehovamik tatigisatualik.’ (Jeremia 17:7, nutsigaq nutaanngitsoq) Ukiuni 40-nit amerlanerusuni pruffiititut kiffartornermini Jeremias aappaqarani aalajaalluni Jehovamut kiffartorsimavoq. Nalunngisarput naapertorlugu katinngisaannarlunilu meerartaanngisaannarsimavoq. Kiali qularutigissavaa ’Jehovap ajunngissusia’ Jeremiasip pilluaatigalugulu qiimmattaatigiumaaraa, soorlu siulittuutaasumik juutit sinneruttut aalajaatsut pillugit nammineq oqarsimasoq? — Jeremia 31:12.
11. Jehovap kiffaasa aalajaatsut aappaqanngikkaluarlutik pilluartut ilaat kikkut Biibilimi eqqartorneqarpat?
11 Allarpassuit aappaqanngikkaluarlutik, imaluunniit uillarnerugaluarlutik nuleernerugaluarlutilluunniit, nuannaarlutik Jehovamik kiffartuussisimapput. Akornanni taasinnaavavut pruffiiti arnaq Anna, qularnanngitsumik Dorkas (Tabitamittaaq taaneqartartoq), apustili Paulus taakkunanngalu tamanit maligassaalluarnerpaaq — Kristus Jesus.
Ullumikkut aappaqaratik pilluartut
12. Jehovap kiffaasa tunniulluinnarsimasut pilluartullu ilaasa suna qinersimavaat, sooq?
12 Ullumikkut arnat angutillu Jehovamut nalunaajaasuusut tunniulluinnarsimasut tuusintilikkuutaat aappaqanngikkaluarlutik aalajaallutik taassumunnga kiffartorput. Ilaasa Jesusip kajumissaarutaa malissinnaasimavaat: ’Siunersisaqarsinnaasup [tassa aappaqanngitsuusinnaasup] siunersiliuk.’ Taamaaliorsimapput ’qilammiup naalagaaffia pillugu’. (Matîuse 19:11, 12) Tassa piffissaq nukiillu annerusut Naalagaaffiup soqutigisaanut atornerisigut kiffaanngissusertik Guutimit pisoq tamakkiisumik atorpaat. Taakku ilarpassui pioneritut ajoqersuiartortitalluunniit kiffartorput, imaluunniit Betelimi qullersaqarfimmiittumi ilaqutariinnut ilaallutik imaluunniit Peqatigiiffiup immikkoortortaqarfiisa ilaanni kiffartorlutik.
13. Maligassaalluartut kikkut uppernarsarpaat kristumiut aappaqanngikkaluarlutik pilluarsinnaasut?
13 Qatanngutip arnap utoqqaap inuunini pillugu oqaluttuani qulequtserluarsimavaa: „Pioneriuvunga aappaqarnanga pilluarlungalu.“ (Vagttårnet, 1. december 1985, qup. 27-30) Qatanngut arnaq aappaqanngitsoq alla ukiut 50-it sinnerlugit Betelimi sulisimasoq, oqarsimavoq: „Inuunera suliaralu naammagisimaarluinnarpakka. Suliaq nuannarilluinnagara aatsaat taama ulapputigitigaara. Peqqissiminngeqaanga. Aalajangeeqqissagaluaruma assinganik aalajangiissagaluarpunga.“ — Vagttårnet, 15. september 1982, qupperneq 15.
14, 15. (a) Apustili Paulusip oqarneratut aappaqarani inuuniaraanni suna pisariaqarpa? (b) Sooq Paulus oqarpa aappaqanngitsoq ’ajunnginnerusumik iliortoq’ ’pilluarnerullunilu’?
14 Malugiuk oqaaseq „aalajangerneq“. Paulus ima allappoq: „Uummammigulli aalajangersimalluinnartoq, pisariaqartitsinngitsutut misigisoq imminullu naalakkersorsinnaasoq aalajangeruni niviarsiaassutsini attatiinnarumallugu, ajunngitsumik iliorpoq. Tassa niviarsiaassutsiminik aappariinnermut tunniussisortaaq ajunngitsumik iliorpoq, taamaaliunngitsorli ajunnginnerusumik iliorpoq.“ (1 Korintumiut 7:37, 38, NV) Sooq Paulus oqarpa ’taamaaliunngitsoq ajunnginnerusumik iliortoq’? Paulus ima nassuiaavoq: ’Isumakuloqqunngikkaluarpassi. Aappaqanngitsup Naalakkap pii isumakuluutigisarpai qanoq ililluni Naalakkamut iluaritissalluni. . . . Tamakkuli oqaaseraakka ilissi iluaqutissassinnik, . . . ippinnaatsooqqullusi [allamut saasarnasi Naalagaq kiffartuuttuaannaqqullugu, NV].’ — 1 Korintumiut 7:32-35.
15 ’Naalakkamut iluaritinniarluni’ ’allamut saasarnani Naalakkamik kiffartuussiuaannarneq’ pilluarnermut attuumassuteqarpa? Nalunanngitsumik Paulus taama isumaqarpoq. Uillarneq kristumiuusoq oqaatigalugu ima allassimavoq: ’Piumasaminik uinissinnaanngorpoq, kisianni Naalakkami piguni. Pilluarnerussaarli taamaaginnaruni, tassa isumaga. Isumaqarpungali uangattaaq Guutip anersaa pigigiga. — 1 Korintumiut 7:39, 40.
Aappaqannginnerup iluaqutissartai
16. Jehovap nalunaajaasuisa aappaqanngitsut aappaqannginnerat sunik iluaqutissartaqarpa?
16 Nammineq aalajangerneq pissutigalugu aappaqanngitsuuneq imaluunniit pissutsit atukkat pissutigalugit aappaqanngitsuuneq inummut namminermut iluaqutissartarpassuaqarpoq. Aappanngitsut atuaqqissaarnissamut eqqarsaqqissaarnissamullu piffissaqarnerupput. Tamanna atorluarunikku anersaakkut ineriartuutigissavaat. Ajornartorsiutiminnik nammaqatigisinnaasaminnik aappaqannginnamik Jehovamik tunaartarinninnerunissartik sutigullu tamatigut taassuminnga siulersortinnissartik ilarpassuisa ilikkartarpaat. (Tussiaat 37:5) Taamaattumillu Jehova qaninnerusumik attaveqarfigilertarpaat.
17, 18. (a) Jehovap kiffai aappaqanngitsut kiffartornissamut sunik immikkut pisinnaatitaaffeqarsinnaasarpat? (b) Jehovap kiffaasa aappaqanngitsut ilaasa qanoq pilluarnertik oqaatigisimavaat?
17 Kristumiut aappaqanngitsut Jehovap nersornaatissaanut suliassanik annerusunik immikkut pisinnaatitaaffiusunik suliakkerneqarnissaminnut periarfissaqarput. Kiffartortunut Toqqakkanut Ilinniarfimmi immikkut ilinniartinneqarnissamik Peqatigiiffiup neqeroorutaa qatanngutinut angutinut aappanngitsunut nuleernernullu tunngatinneqarneruvoq. Aammattaaq qatanngutit arnat aappaqanngitsut suliassanik immikkut pisinnaatitaaffiusunik suliaqalernissaminnut periarfissaqarnerupput. Qatanngut arnaq utoqqaq inuunini pillugu oqaluttuarsimasoq siusinnerusukkut taaneqareersoq, nammineq oqarnera naapertorlugu, ’50-it sinnilaarlugit ukioqarluni timikkut qajannarluni’ Afrikap ilaani kiffartulersimavoq. Allaat inerteqquteqarfiup nalaani ajoqersuiartortitat tamarmik nunamit anisitaagaluarmata tasamaniiginnarsimavoq. Tasamani suli pioneritut kiffartorpoq, naak 80-it sinnerlugit ukioqaraluarluni. Pilluarluni inuua? Inuunini pillugu oqaluttuarnermini allappoq: „Aappaqarnanga kiffaanngissuseqarnera kiffartorninni ulapinnissannut atorluarsinnaasimavara, tamannalu pilluaatissarsiffigisimaqaara. . . . Jehovamut attaveqarnera ukiut ingerlaneranni aalajaannerujartuinnarsimavoq. Aappaqarnanga, nunami Afrikap ilaani, taanna Sernissortittut misigisimavara.“
18 Aamma qatanngutip angutip ukiut qulillit arlallit qullersaqarfimmi Betelimi sulisimasup oqaasii malugisariaqartuupput. Naak katissimanngikkaluarluni qilammilu aappaqarani inuunermik neriugisaqaraluarluni pilluarpoq. 79-nik ukioqarluni ima allappoq: „Ullut tamaasa Ataatarput qilammiusoq asannittoq qinnuigisarpara ikioqqullunga ilisimassummillu tuneqqullunga anersaakkut timikkullu peqqittuaannarsinnaaqqullunga nukissaqartuaannarsinnaaqqullungalu taassuma piumasaanik illernartumik iliortuarsinnaaqqullunga. Ukiut 49-it kingulliit Jehovamut kiffartorninni ilumut inuuneq pilluarnartoq iluanaarnartorlu nuannaarutigisimavara. Jehovallu ajunngissusia pisassarinngisaraluarput iluaqutigalugu taassuma ataqqinaatissaanut naalannaatissaanullu innuttaanullu pilluaqqusaassutaasumik siunissami kiffartortuaannarnissara qilanaaraara. . . . Nuannaarneq Jehovameersoq ikiortigalugu uppernikkut sorsunneq ajunngitsoq ingerlattuaannarsinnaavara, Jehovap akeraasa nungutitaanissaat taassumalu naalannassusiata nunarsuarmik tamakkiinissaa qilanaaralugit. — 4 Moses 14:21; Nehemja 8:10; The Watchtower, 15. november 1968, quppernerit 699-702.
Pilluarnermut piviusumut suna aalajangiisuua?
19. Suna pilluarnissatsinnut tamatigut aalajangiisuua?
19 Jehovamut attaveqarnitta erlinnartup, taassuma iluarinninnerata pilluaqqusineratalu naassaanngitsumik piviusumik pilluartissavaatigut. Pilluarnartut tamakku pillugit eqqortumik isumaqarfigalugit Jehovap kiffaasa katissimasut allaat paasivaat aappariinnertik inuunerminni pingaarnerpaajunngitsoq. Apustili Paulusip unnersuussutaa eqqumaffigaat: ’Imannali oqarpunga, qatanngutikka: ullussat sivikipput; kingorna nuliaqaraluartut nuliaqanngitsutut issapput.’ (1 Korintumiut 7:29) Ima paasisariaqanngilaq nuliatik sumiginnassagaat. Uiusut kristumiut inersimalluartut Jehovamik kiffartuussineq salliutittarpaat, nuliaallu Guutimik-mianerinnittut, asannittut tapersersuisullu taamaaliorputtaaq, ilaat uitik ilagalugit tamakkiisumik kiffartortutut. — Ussatit 31:10-12, 28; Matîuse 6:33.
20. Kristumiorpassuit qanoq aappariinnermi immikkut pisinnaatitaaffitik eqqortumik isigisarpaat?
20 Qatanngutit angutit katissimasut angalallutik nakkutilliisut, Betelimi kiffartortut, ilagiinni utoqqaanertat — aap, kristumiut katissimasut Naalagaaffimmik salliutitsisut tamarmik — ’silap matuma piinik tamakkiisumik atuinngillat’; aappariinnermi pisinnaatitaaffitik Jehovamut kiffartortutut tunniulluinnarsimasutut inuunerminnut naleqqussarniartarpaat. (1 Korintumiut 7:31) Pilluarpullu. Sooq? Pilluarnerannut aappariinnerat pinnani Jehovamulli kiffartornerat tunngaviunerpaammat. Uiusut nuliaasullu aalajaatsut amerlasuut — meeraasalu — taamaannera pilluaatigaat.
21, 22. (a) Jeremia 9:22, 23 naapertorlugu, suup pilluartissavaatigut? (b) Pilluarnermut pissutissat suut Ussatit 3:13-18-imi eqqartorneqarpat?
21 Pruffiiti Jeremias ima allassimavoq: „Ima oqarpoq [Jehova]: ’Ilisimasup usorsitsaatiginaveerliuk ilisimassutsi, nakuusullu nakuussutsi, pisuullu pisuussutsi. Kisianni usorsitsaarumasup usorsitsaatigiliuk ima silaqassuseqarami uanga ilisarisinnaallunga, uanga [Jehova] tassaasunga nunami unneqqarissoq innarluitsorlu naapertuilluartumillu iliortoq, tamakku iluarigakkit,’ oqarpoq [Jehova]. — Jeremia 9:22, 23.
22 Katissimanngikkaluarutta katissimagaluaruttaluunniit pilluarnitta pissutiginerpaasariaqarpai Jehovamik ilisarisimanninnerput taassumalu piumasaanik ilioratta pilluaqqusaanitsinnik qularinninnginnerput. Aamma piviusumik nalillit, tassa Jehovap iluarisai, nalunnginnatsigik pilluarpugut. Kunngi Salomon nuliarpassualik isumaqarsimanngilaq aappariinneq pilluarnartutuaasoq. Ima allassimavoq: „Pilluarpoq ilisimassummik nassaartoq, inuk siuneqarluarnermik pissarsiaqartoq. Ilisimassutsip pissarsiarinissaa sølvip pissarsiarinissaanit pingaarneruvoq, iluanaarutissartaalu kuultimit anneruvoq. Ilisimassut sapanngarissunit erlinnarneruvoq, pilerinartitavillu suugaluartulluunniit allat nallersinnaanngilaat. Tigumiarai talerpimmini inuunertussuseq, saamimminilu pisuussutit ataqqinaallu. Ilisimassutsip aqqutai aqqutaapput alianaatsut, ingerlavii tamarmik eqqissinermut sammipput. Aalajangiussisiminut tamanut orpiuvoq inuunartoq, pilluarput taassuminnga iperaanaveersaartut.“ — Ussatit 3:13-18.
23, 24. Sooq qularisariaqanngilarput pissutsinik aaqqissuussinissami nutaami Jehovap kiffai tamarmik pilluassasut?
23 Katissimagutta qanortoq Guutip piumasaanik iliorluta naassaanngitsumik pilluarta. Qanortorlu qatanngutivut angutit arnallu namminneq piumasaminnik imaluunniit pissutsit atukkatik pissutigalugit aappaqanngitsut misilinneqarnitik tamaasa anigorilisigik aammalu maannakkut naassaanngitsumillu Jehova kiffartorfigalugu pilluartillutillu nalerisimaarilik. (Lúkarse 18:29, 30; 2 Pîtruse 3:11-13) Guutip silarsuassaani nutaami ’mappersakkat’, malittarisassanik inatsisinillu pissanganartunik imallit, mapperneqarumaarput. (sarĸúmersitat 20:12) Guuti ima neriorsuivoq: ’Ata, suut tamaasa nutaanngortippakka.’ — sarĸúmersitat 21:5.
24 Aap, tatigilluarsinnaavarput ’Guutitta pilluartup’ pilluarluinnarnissatsinnut ajunngitsorpassuit uatsinnut piareersimatikkai. (1 Timûtiuse 1:11) Guutip tamatigut ’assani ammartarpai pinngortitallu tamaasa ajunngitsuutinik qaarsillartittarlugit’. (Tussiaat 145:16) Tupinnanngilaq Jehovamik kiffartuussineq pilluarnartuassammat. (wD 15/5 92)
Qanoq akissavit?
□ Guutip kiffaasa tunniulluinnarsimasut pilluarnerannut suna tunngaviua?
□ Jehovap kiffaasa aalajaatsut aappaqanngikkaluarlutik pilluartut ilaat kikkut Biibilimi eqqartorneqarpat?
□ Sooq Paulusip aappaqannginneq nersorsimavaa, kristumiullu ilaasa inooriaaseq tamanna qanoq pilluaatigaat?
□ Suna pilluarnissatsinnut tamatigut aalajangiisuusarpa?
□ Sooq qularisariaqanngilarput pissutsinik aaqqissuussinissami nutaami aalajaatsut tamarmik pilluassasut?
[Qupp. 16-mi assiliartaq]
Qatanngutit arnat aappaqanngitsut amerlasuut pilluarlutik aalajaallutillu Jehova tamakkiisumik kiffartorfigaat
[Qupp. 18-mi assiliartaq]
Jehovap soqutigisaanik kiffartuussineq pilluarnissamut tunngavippiaavoq