’Naalattumik uummateqarpit’?

SALOMON Israelimut kunnginngorami imminut assut annikigisimavoq. Taamaattumik Guutimut qinusimavoq ilisimassuteqarteqqulluni silatussuseqarteqqullunilu. (1 Israelikkut 1:10) Aamma ima qinusimavoq: „Qinnuigaakkit uummateqarteqqullunga naalattumik illit innuttannik eqqartuussisinnaatillunga.“ (2 Kunngit 3:9, NV) Tassami Salomonip ’naalattumik uummateqaruni’ Guutip inatsisai najoqqutassiaalu malissinnaassavai Jehovamillu pilluaqqusaassalluni.

Uummat naalattoq nanertuisuunngilaq nuannaarutissiisarlunili. Apustili Johannes ima allassimavoq: ’Guutimik asanninneq tassaavoq inassutai maleruarutsigik, inassutaalu artornanngillat.’ (1 Juánase 5:3) Jehova Guuti Pinngortitsisorsuarigatsigu soorunami naalattariaqarparput. Taassuma nunarsuaq tassaniittullu tamaasa, siilvit guultillu ilanngullugit, pigai. Taamaattumik iluamik oqassagaanni Guuti timikkut pigisanik tunisinnaanngilarput, timikkulli pigisatta imminut asanninnitsinnut ersersitsissutitut atornissaat akueraa. (1 Israelikkut 29:14) Jehovap naatsorsuutigaa asassagitsinni, makitajuilluta saqeqatigissagitsinni piumasanilu malissagipput. — Mika 6:8.

Jesus Kristus aperineqarami Inatsisini sorleq annerpaanersoq, ima akisimavoq: ’„Jehova Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ Tassa inassut siulleq annerusorlu.’ (Matîuse 22:36-38) Guutimut asanninnermik ersersitsissutaasinnaasut ilaat tassaavoq taassumunnga naalanneq. Taamaattumik tamatta Jehova qinnuigisariaqarparput naalattumik uummateqarteqqulluta.

Naalattumik uummatillit

Naalattumik uummatilinnik Biibilimi assersuutissarpassuaqarpoq. Taakkua ilagaat Noa. Jehovap taanna peqqusimavaa annattoqarniassammat umiarsualiussasoq. Tamanna suliassaavoq annertoorujussuaq, ukiullu 40-t 50-illuunniit ingerlaneranni suliarineqarpoq. Ullumikkut nutaaliaasunik atortorissaaruteqaraluaraanniluunniit sanaassamik taama angitigisumik puttasinnaasumik naammassinninneq suliarujussuussaaq. Tamatumalu saniatigut Noap nalimini inuusut pisussamik mianersoqqusussaavai, taamaaliornerminilu qularnanngitsumik illaruaatigineqarlunilu mitaatigineqartarpoq. Minnerpaannguilli angullugit Guutimut naalappoq. Biibilimi ima allassimasoqarpoq: „Noa Guutip peqqusineratorluinnaq iliorpoq.“ (1 Mosebog 6:9, 22; 2 Pîtruse 2:5) Noap Jehovamut asanninnini ukiorpassuarni aalajaalluni naalannermigut ersersissimavaa. Tassa ullumikkut maligassarput pitsassuaq!

Aamma ataataalluartoq Abraham taamaassimavoq. Taanna Guutimit peqquneqarsimavoq Kaldeami illoqarfik pigissaarfiusoq Ur qimallugu nunamut ilisimaneqanngitsumut aallassasoq. Abraham apeqqusiinani taamaaliorpoq. (Eprîarit 11:8) Inuunermi sinnera tamaat ilaquttanilu tupermi najugaqarput. Ukiorpassuarni nunami takornartatut inooreerlutik nulianilu naalattoq, Sara, pilluaqqusaapput ernertaarlutik Isakimik atsikkaminnik. Abrahamip 100-nik ukiullip utoqqalinermini ernertaani taanna ila asasimassaqaa! Taamaattorli ukiualuit qaangiummata Jehovap Abraham peqquaa Isak ikikkagassatut pilliutigissagaa. (1 Moses 22:1, 2) Tamanna eqqarsaatigiinnarluguluunniit Abrahamimut annernarsimassaqaaq. Taamaakkaluartorli taamaaliornissaminut piareersalerpoq, Jehova asagamiuk upperigamiullu kinguaassaq neriorsuutigisaasoq Isak aqqutigalugu takkutissasoq, Guutip Isak toqusunit makitippagu. (Eprîarit 11:17-19) Abrahamilli ernini toqunnialeruttoraa Jehovap unitsippaa oqarlunilu: „Maanna paasivara uanga mianerigimma, ernituannilluunniit erliguukkumananga.“ (1 Moses 22:12) Naalannini tamanna pillugu Abraham Guutimik mianerinnittoq ’Jehovap ikinngutaanik’ taaneqarsimavoq. — Jâko 2:23, NV; naleqqiuguk Jesaja 41:8.

Jesus Kristus naalanneq eqqarsaatigalugu maligassat annersaraat. Inuttut inuunngikkallarami qilammi anersaatut inuunermini Ataataminut naalalluni kiffartornini nuannaarutigisimavaa. (Ussatit 8:22-31) Nunarsuarmilu maani inuunermini Jehovamut sutigut tamatigut naalattuuvoq taassumalu piumasaatut iliornini nuannaarutigalugu. (Tussiaat 40:9; Eprîarit 10:9) Taamaattumik Jesus ilumoortumik ima oqarsinnaasimavoq: ’Isumannik qanoq-iliunngilanga; kisianni soorlu Ataatama ajoqersoraanga taama oqaluppunga. Aallartitsisimalu najorpaanga; kisimiitinngilaanga iluarisaanik pisarsinnarama.’ (Juánase 8:28, 29) Jehovap kisimi oqartussaassusia qutsissisinniarlugu inuillu naalattut utertinniarlugit Jesusip inuunini naggataatigut tunniuppaa nikanarsagaangaarluni naalliunnaqisumik toqutaalluni. Aap, ’inuttut pissuseqarluni malunnarsigami imminik nikanarsarpoq naalaannarluni toqumut allaat’ nappakkami naalliutsitsivimmi. (Filípimiut 2:8) Naalattumik uummateqarnermigut ilumut maligassiuilluarsimaqaaq!

Ilaannakuusumik naalanneq naammanngilaq

Inuit ilaat Guutimut naalattuunerartarsimapput taamaavinngikkaluarlutik. Israelitoqqami kunngi Saul eqqarsaatigeriaruk. Taanna Guutimit peqquneqarsimavoq Amalekikkut ajortut nungutissagai. (1 Samuel 15:1-3) Saulip naggueqatigiit taakku nungutikkaluarpaami, kunngialli savaataasalu nersutaataasalu allat pitsaanersaat asattuuppai. Taamaattumik Samuelip ima aperaa: ’Sooq Jehova naalanngiliuk?’ Saul akivoq: „[Jehova] naalallugu ingerlavigeqqusaagut ingerlavunga . . . Inuilli savaatit nersutaatillu piuneerussassanngortitaagaluartut pitsaanersaat tiguarpaat [Jehovamut] . . . pilliutigiumallugit.’“ Tamatumunnga Samuelip akissutaa tamakkiisumik naalannissap pisariaqassusianik erseqqissaavoq: „[Jehovap] pilliutissat ikikkagassat toqutassallu naalanneqarnissamisut pingaartitsiginerpai? Naaggali, naalanneq pilliutinit pitsaanernit pingaarnerungaarpoq, [Jehovamullu] naalaarneq pingaarneruvoq savat angutivissat tunnuannit. Naalasseriinneq ajortigaaq angakkuartartut ajortuliaattut; oqaatseriinnerup assigaa guutipilussiortut ajortuliaat. Illit [Jehovap] oqaasia sussarinnginnakku [Jehovattaaq] sussarinatit kunngiusussaajunnaarsippaatit!’“ (1 Samuel 15:17-23) Saulip naalattumik uummateqannginnini pissutigalugu annaasaa annertoqaaq!

Allaat kunngi ilisimasoq Salomon, naalattumik uummateqarteqqulluni ilaanni qinusimasoq, Jehovamut naalattuarsimanngilaq. Jehovap piumasaanut akerliulluinnartumik iliorluni allamiunik nuliartaartorpoq, taakkualu Guutimut naalanngitsuliortippaat. (Nehemja 13:23, 26) Salomon naalattumik uummateqartuannginnini pissutigalugu Guutimit iluarisaajunnaarpoq. Tamanna uagutsinnut mianersoqqussutaavoq!

Tamanna ima paasisariaqanngilaq Jehovap kiffami naammalluinnartuunissaat piumasarigaa. Tassami „eqqaamavaa pujualaannaasugut“. (Tussiaat 103:14) Tamatta ilaannikkooriarluta kukkusassaagut, Guutilli takusinnaavaa uummatitsinnit ilumoorluta iluarisaminik iliorusunnersugut. (2 Israelikkut 16:9) Inuttut naammalluinnanngitsuunerput pissutigalugu kukkuluttorutta peqqissimiguttalu Kristusip pilliutaa utertitsissutaasoq tunngavigalugu isumakkeerfigineqarnissarput qinnutigisinnaavarput, tatigalugu Jehova ’isumakkeerfiginnittuartartoq’. (Jesaja 55:7; 1 Juánase 2:1, 2) Pisariaqarsinnaavortaaq utoqqaanertanut asannittunut ikiortissarsiornissarput anersaakkut iluarseqqissinnaaqqulluta, uppernikkut peqqisseqqulluta uummatikkullu naalattooqulluta. — Títuse 2:2; Jâko 5:13-15.

Qanoq tamakkiitigisumik naalappit?

Qularnanngitsumik amerlanersavut misigipput Jehovap kiffaatut naalattumik uummateqarlutik. Immaqa ima eqqarsartarpugut: Oqaluusseqataasannginnerpunga? Aalajaattuaannannginnerpunga inuunermi apeqqutit annertuut pineqaraangata, soorlu kalluunnaveersaarnissaq pineqaraangat? Apustili Paulusip kajumissaarisimaneratut ataatsimiinnernut aggertuaannannginnerpunga? (Matîuse 24:14; 28:19, 20; Juánase 17:16; Eprîarit 10:24, 25) Ilumoorpoq Jehovap innuttai ataatsitut isigalugit pingaartutigut tamakkunatigut uummatikkut naalannermik ersersitsisarmata.

Ulluinnarnili iliuuserisartakkavut immaqa soqutaanngitsutut isikkoqaraluartut eqqarsaatigalugit qanoq ippugut? Jesus ima oqarsimavoq: ’Minnikkut ilumoortoq amerlasuutiguttaaq ilumoorpoq, minnikkullu ilumuunngitsoq amerlasuutiguttaaq ilumuunngilaq.’ (Lúkarse 16:10) Taamaattumik pitsaassaaq imminut ima aperissagutta: Annikitsutigut allatigulluunniit allat nalusaasigut naalattumik uummateqarpunga?

Tussiaasiortup oqaatigisimavaa allaat nammineq illumini, allanit isigineqartinnani, ’uummatikkut assuarnaalluni inuulluni’. (Tussiaat 101:2) Immaqa angerlarfimaffitsinni TV-kkut filmimik isiginnaartarpugut. Tassani naalannerput misilinneqarsinnaavoq. Kanngunartunik saqqummersoqaraangat isiginnaaginnartarnerpugut, patsisissarsiorluta oqarluta ’tassa ullumikkut filmit taamaakkamik’? Imaluunniit uummatitta naalattup killissanerpaatigut oqaaqqissaarutip matuma malinnissaanut: ’Uersaanerli mingunnartullu nalinginnaat piumatuunerlu taaneqassanngillalluunniit ilissinni, iluartut taama ileqqussaqarmata’? (Evfisumiut 5:3-5) TV qamissanerparput, imaa tiguartinnaraluarpalluunniit? Nakuusersunillu saqqummersoqaraangat qamittarnerparput? Tussiaasiortoq ima oqarsimavoq: „[Jehovap] iluartoq guutiitsorlu misissuiffigai, nakuusernermillu nuannarisaqartoq uumigaa.“ — Tussiaat 11:5.

Naalattumik uummateqarneq pilluaqqusaanarpoq

Allarpassuartiguttaaq iluaqutaasumik imminut misissorsinnaavugut paasiniarlugu ilumut uummatitsigut Guutimut naalannerluta. Jehovamik asanninnitta taassuma iluarisaanik oqaasianilu allassimasutut iliornissatsinnut kajumissisittariaqarpaatigut. Uummatip naalattup ikiussavaatigut Jehovamut ajunngitsumik attaveqarnissatsinnut. Guuti sutigut tamatigut naalakkutsigu ’qanitta oqaasii uummatittalu eqqarsaatai Jehovami iluarinassapput’. — Tussiaat 19:15.

Jehovap asagamisigut iluaqutissarput eqqarsaatigalugu naalannermik ilinniartittarpaatigut. Tassa Guutip uagutsinnut ilinniartitsissutigisaanik maleruaanitsigut immitsinnut annertuumik iluaqusissaagut. (Jesaja 48:17, 18) Taamaattumik Ataatatta qilammiusup oqaatsini, anersaani peqatigiissortanilu aqqutigalugit ikiuiniarneri nuannaarluta ilassisarniartigik. Ima pitsaatigisumik ilinniartinneqarpugut soorlulusooq tunutsinnit ima oqaluunneqarluta: „Aqqut aana ingerlavigisassarsi.“ (Jesaja 30:21) Biibili, kristumiut atuagassiaataat ilagiillu ataatsimiittarneri ikiortigalugit Jehovap ilinniartikkaangatigut silatusaassaagut tusarnaartassagutta, maleruaalluta ’tamatigullu naalalluta’. — 2 Korintumiut 2:9.

Naalattumik uummateqarneq nuannaarnermik annertuumik pilluaqqusaanerpassuarnillu nassataqassaaq. Isumakkut eqqissinermik tunissavaatigut, nalussannginnatsigumi Jehova Guutip iluarisaanik iliorluta uummataanillu nuannaartitsilluta. (Ussatit 27:11) Eqqunngitsumik iliornissamut ussernartorsiuleraangatta uummat naalattoq sernissortigissavarput. Taamaattumik Ataatarput qilammiusoq naalattariaqarparput imalu qinulluta: ’Kiffat naalattumik uummateqartiguk.’ (wE 15/7 98)

[Suminngaanneernera]

Self-Pronouncing Edition of the Holy Bible-mit, King James Versionimik Revised Versionimillu imalimmit