Guutip naalagaaffianik oqaluussissutiginninnermit nutaarsiassat
Nutaarsiassaq nuannersoq oqaluussissutiginngitsuunngilaat
EUROPAMIUT ilisimasassarsiortut siullerpaamik Golfo de Venezuelamut Maracaibollu tasianut tikimmata sineriak illuararpassuaqarpoq ivikkanik qallersimasunik qisunnut nappagaasunik immamit ikkattumit qangatasunik. Venedigimi (Veneziami), ikerasaat sinerlugit illuliorfiusartumi, takuneqarsinnaasunut assingupput. Taamaattumik ilisimasassarsiortut Spaniamiutut oqaasillit tamanna Venezuelamik atserpaat, isumaqartumik „Veneziaaraq“.
Ullumikkut nunami alianaatsumi tamaani sanaartorneq allatut ittoq ingerlanneqarpoq, anersaakkut sanaartorneq. Tassani Jehovap nalunaajaasuisa Guutip naalagaaffiata naatsiiassartaanik periarfissani naleqqutuni tamani siaruarterineq ulapputigaat. Anersaakkut katersuineq ’katersuisut inuannut’, Jehova Guutimut, ataqqinaataavoq. — Matîuse 9:37, 38.
Nakkutilliisup angalasartup Venezuelap avannaata kitaani naalagaaffimmi Zuliami ilagiit ataatsit tikeraarmagit tamaani nalunaajaasut nakkutilliisup angalasartup nuliatalu qeqertamut qanittumiittumut Toasimut tikeraarnissaat aaqqissorsimavaat. Toasimut ikaartaatip ullaakkut aallarnissaa utaqqitillugu nakkutilliisup angalasartup nuliata, Meryp, oqaluussiartoqatini, qatanngut arnaq piffissaq tamaat oqaluussisartoq, kajumissaarpaa ikaartaammi sulisunut oqaluussinissamik. Qatanngutip pioneerip isuma nuannaraa.
Mery teknikkerimut saaffiginnippoq atuagarlu Ilisarsineq inuunermut naassaanngitsumut sammisoq saqqummiullugu. Kapitali „Ilaqutariit Guutimik ataqqinartitsisut“ takutippaa, tamatumalu angut soqutiginnilersippaa. Meryp nassuiarpaa teknikkeri nammineq angerlarsimaffimmini atuagaq taanna tunngavigalugu Biibilimik atuaqqissaarsinnaasoq. Atuagaq pivaa, pulaarneqarnissaalu isumaqatigiissutigaat.
Tamatuma kingunitsianngua tamaani immikkut ittumik ataatsimeersuaarartoqarpoq. Tassani Meryp tupaallaatigisaminik teknikkeri, señor Nava, nulia paniilu marluk naapippai. Meryp Navap nulia ilaqutariittut Biibilimik atuaqqissaartarnertik qanoq igineraa aperaa. Akissutaa assut tupaallannarpoq.
„Sallusuissut ilikkarsimagatsigu Jehova qutsavigaara,“ oqarpoq nangillunilu nassuiaalluni: „Arnaq alla pillugu uima qimakkaangalu oqaluussimavat. Aamma taamani imerpallaarpoq. Ilaannikkut aalakoortilluni illoqarfeeqqatsinni inuit allat peqqarniiserfigisarpai, soorunamilu tamanna nuannarineq ajorpaat. Aamma anersaarsiortarpoq. Atuaqqissaarnikkulli Biibilimik ilisarsinerata inuunermini annertuumik allanguisissimavaa. Ileqquni mingunnartut tamaasa asoorussimavai. Allannguinerit tamakkua angajoqqaavisa, katuuliusut, malugisimavaat. Maanna uiusutut ataataasutullu akisussaassusermik misigisimasunngorsimanera nuannaarutigaat.“
1996-imi señor Nava kuisippoq maannalu piffissaq tamaat oqaluussisartuulluni. Nulia, Jenny, 1997-imi kuisippoq. Illoqarfiup borgmesteriata angutip taassuma allanngorsimanera tupigusuutiginermik aamma nammineq Biibilimik atuaqqissaaqateqarumasimavoq. Qatanngutit arnat nuannaarutigaat ullaaq taanna ikaartaammut utaqqitillutik oqaluussinngitsoorsimannginnamik. (wE 1/10 98)
[Qupp. 32-mi assiliartaq]
Nutaarsiassaq nuannersoq pillugu angummut ikaartaammi sulisumut oqaluussineq kinguneqarluarpoq