Siunnersuut 5
Anersaakkut pisariaqartitatit isumagikkit
BIIBILIMI QANOQ ALLASSIMAVA? “Pilluarput anersaakkut pisariaqartitaqarnerminnik miserratiginninngitsut.” — Matthæusi 5:3, NV.
SOOQ AJORNAKUSOORPA? Upperisarsioqatigiit tusindilippassuupput, ilarpassuisalu anersaakkut pisariaqartitaqarnermik qanoq isumaginnittoqarsinnaanera pillugu ajoqersuutaat imminnut akerliupput. Upperisarsioqatigiit sorliit ilumoortuunersut Guutimillu iluarisaanersut qanoq ilisimaneqarsinnaava? Atuakkiortut nuimanerusut ilaasa Guutimik upperinninneq taassumunngalu tunniusimaneq sianiilliornerunerarpaat, allaallu ajoqutaanerarlugu. Guuteqannginneraasup tusaamasap isumaa atuagassiami Maclean’s-imi ima eqikkarneqarpoq: “Kristumiussutsimik, ilisimatuussutsimit misigissutsitsinnillu qutsinnerusoqarneranik, isuma . . . inuunituatsinnik nalikillisitsivoq, nakuuseqqajaanerulersillutalu.”
QANOQ ILIORSINNAAVIT? Guutip piuneranut uppernarsaatit misissukkit. (Romamiut 1:20; Hebræerit 3:4) Apeqqutit pingaarutillit makkua akissutissarsiornerani kimilluunniit akornuserteqinak: Sooq maaniippugut? Toqup kingorna inuuneqarpa? Sooq taama naalliunnartoqartigaa? Guutip uanga sumik piumaffigaanga? Apeqqutit taakkua naammaginartumik akineqarnissaat ataavartumik nalerisimaalernissannut aalajangiisuupput.
Tusakkatilli tamaasa upperiinnarniaqinagit. Guutip oqaasiani kajumissaarneqarputit siuneqassutsit, imaluunniit silaqassutsit, atorlugu Guutip suna akuerisinnaanera qulakkiissagit. (Romamiut 12:1, 2, 1936) Ilungersornerit iluaqutigiumaarpat. Biibilimik atuaqqissaarneq piffissaqarfigisarukku tassanilu siunnersuutigineqartut maleruartarukkit ajornartorsiutissaagaluit isumakuluutissaagaluillu pinngitsuussavatit inuunerillu nuannaarutiginerussallugu. Oqaasiinnaanngillat. Inuit millionillit assigiinngitsunik tunuliaqutallit Guuti taassumalu siunertaa pillugit ilinniarnertik iluaqutigisimavaat. Assersuutigalugu oqaluttuat pisimasuiit Napasuliaq Alapernaarsuiffik 1. septembari 2010-moortumi quppernerni 10-13-imiittut atuakkit.
Siunnersuutit pitsaasut Biibilimeersut maleruarneri iluaqutiginerujartortillugit Guutimik asanninnerulissaatit. Soormi Jehovap Nalunaajaasuisa Biibilimik atuaqqissaaqatigiinnissamik neqeroorutaat akuerigukku? Taamaalioruit qularnanngitsumik apustilip Paulusip isummerneratut isummissaatit. Ima allappoq: “[Nalunanngilaq] Guutimik mianerinninneq naammagittarnermik ilaqartoq taamaalluni immini iluanaarnaraluartoq.” — 1 Timotheusi 6:6.
[Qupp. 8-mi assiliartaq]
Guutip suna akuerisinnaanera qulakkeeruk