Peqqissimissutigisatit kiffartorninnut akornutaateqinagit

1-3. (a) Peqqissimineq suua, uagutsinnullu qanoq sunniuteqartarpa? (b) Paulusimik oqaluttuaq sumik ilinniarfigisinnaavarput?

INUIT peqqissimissuteqartut ima oqarajupput: ‘Imaaliorsimasuugumatoq.’ Taama oqartarput allatut iliorsimasuugunik inuunerup allaanerusimasinnaanera eqqarsaatigigaangamikku. ‘Peqqissimineq’ tassaavoq iliuuserisimanngisaq iliuuserisimasarluunniit pissutigalugu aliasunneq imaluunniit misigissutsikkut anniaateqarneq. Tamatta iliuuseqarsimagunarpugut peqqissimissutigisatsinnik. Illit suna peqqissimissutigaajuk?

² Inoqarpoq ajorluinnartumik iliuuseqarsimasunik allaammi ingasattumik ajortuliorsimasunik. Allat taama kukkussuteqarsimanngikkaluarlutik eqqarsaatigisarpaat inuunerminni pitsaanerpaamik aalajangiisimanerlutik. Inuit ilaasa pereersut isumakuluutigiunnaarsinnaasarpaat, allalli aalajangiinertik anniaatigiuarlugu ima eqqarsartarput: ‘Taamaaliorsimanngitsuugumatoq!’ (Tuss 51:5) Illit qanoq misigivit? Kukkussutigisimasatit ilerasuutigiuaannarunnaarlugit Guutimut kiffartorninni sapinngisannik iliuuseqarusuppit? Taamaaliorsimasumik Biibilimi oqaluttuaqarpa? Aap, apustilimik Paulusimik oqaluttuaq.

³ Paulusi ingasattumik ajortuliortarsimavoq, aammali silatusaartumik aalajangiisarsimavoq. Ajortuliani peqqissimissutigingaaraluarlugit Guutimut kiffartornermini sapinngisaminik iliuuseqarnissami isiginiarnerunissaa ilikkarsimavaa. Taassuminnga oqaluttuaq sumik ilinniarfigisinnaaneripput misissoriartigu.

PAULUSIP PEQQISSIMISSUTIGISAI

4. Apustili Paulusi farisiiariutilluni sua?

⁴ Paulusi inuusuttuulluni farisiiariulluni iliuuseqarpoq kingusinnerusukkut peqqissimissutigisaminik. Assersuutigalugu Jiisusip ajoqersugai peqqarniitsumik malersorpai. Biibilimi oqaluttuarineqarpoq Stefanusi toqutaariitsiartoq Saulusip (kingusinnerusukkut Paulusitut ilisimaneqalersup) ‘ilagiit nungutinniarai, illunut iseqattaarluni angutit arnallu aallaruttarai parnaarutitittarlugillu’. (ApS 8:3) Biibilimik ilisimatooq Albert Barnes nassuiaavoq grækerit oqaasiat ‘nungutinniarai’-mik nutserneqarsimasoq Saulusip “malersuinermi peqataanermini ilungersorneranut kamattorsuuneranullu ersiutaasoq”. Nangillunilu allappoq ‘Saulusi nersutitut qaasuttutut ilagiit sakkortuuliorfigigai’. Saulusip juutiusup aallussilluartup upperilluinnarpaa Guutip kissaatigigaa ilagiit kristumiut nungutinneqassasut. Taamaattumik kristumiut peqqarniitsorujussuarmik malersorlugillu “angutit arnallu” toqunniarlugit sioorasaarpai. — ApS 9:1, 2; 22:4.a

5. Sooq Saulusi Jiisusip ajoqersugaanik malersuiunnaarluni Jiisusi pillugu oqaluussilerpa?

⁵ Kingusinnerusukkut Saulusi Damaskusimukarusuppoq kristumiut angerlarsimaffiannit tigusareriarlugit Jerusalemiliaallugit juutit eqqartuussisoqatigiivisa pingaarnersaanni pillaatissinneqaqqullugit. Jiisusilli, ilagiinnut kristumiunut niaquusup, unitsippaa. (Ef 5:23) Saulusi Damaskusiliartilluni Jiisusimit saqqummerfigineqarluni qaamanermit qilammeersumit tappiillisinneqarpoq. Taava Jiisusip taanna peqquaa Damaskusiliarluni attaveqarfigineqarnissani utaqqissagaa. Qanoq pisoqarnersoq ilisimaneqarluarpoq. — ApS 9:3-22.

6, 7. Sumit erserpa Paulusip ingasattumik ajortuliorsimanini ilisimaarilluaraa?

⁶ Paulusip iliuutsini eqqunngitsuusut paasigamiuk ingerlaannaq Jiisusip ajoqersugaanik malersuiunnaarluni Jiisusi pillugu aallussilluarluni oqaluussisalerpoq. Taamaakkaluartoq iliuuserisimasani suunngitsutut isigitinniarsarinngilai. Kingusinnerusukkut imminut pilluni ima allappoq: “Tusaamavarsi qanoq juutiussusermi inuusimagaluartunga, allaallu Guutip ilagiissai qinugingaartarikka nungutinniarlugillu.” (Gal 1:13) Korinthimiunut, Filippimiunut Timotheusimullu allakkamini iliuuserisimasani eqqartoqqippai. (Atuaruk 1 Korinthimiut 15:9; Fil 3:6; 1 Tim 1:13) Paulusip iliuuserisimasani kanngusuutigigaluarlugit isertuunniarsarinngisaannarpai. Ilisimaarilluarpaa ingasattumik ajortuliorsimalluni. — ApS 26:9-11.

⁷ Biibilimik ilisimatuup Frederic W. Farrarip eqqartorpaa Saulusip “amiilaarnartumik malersuinermut” peqataanera. Aamma eqqaavaa Paulusip inuunerani piffissap alianartup tamatuma qanoq sunniuteqartiginera eqqarsaatigigutsigu aatsaat paasissagipput “pisuusutut misiginini qanoq nanertuutigitigigaa akeqqanillu naakkittaatsunit qanoq mitaatigineqartigisimanersoq”. Paulusip ilagiit tikeraaraangamigit qatanngutit imminik naapitseqqaartut immaqa ima oqartut tusartarpai: ‘Paulusiuit — uagutsinnik malersuisimasoq?’ — ApS 9:21.

8. Paulusip Jehovamit Jiisusimillu saammaanneqarnini asaneqarninilu qanoq isigai, Paulusillu isiginnittaasia sumik ilinniarfigaarput?

⁸ Paulusip nalunngilaa Guutimit ajunngitsuliorfigineqangaarnini pissutigiinnarlugu apustilitut kiffartorsinnaalluni. Allakkamini 14-iusuni Guutip saammaassinera 100-t pallillugit eqqaavaa, Biibilimik allattunit allanit eqqartornerullugu. (Atuaruk 1 Korinthimiut 15:10). Paulusip saammaanneqarnini qujamasuutigingaarpaa, tamannalu pingaartillugu ersersikkusuppaa. Taamaattumik apustilinit allanit tamanit ‘annerusumik sulisimavoq’. Paulusi sumik ilinniarfigaarput? Jiisusip pilliutaa upperigutsigu, ajortuliavut nassuerutigigutsigit ajortuliortarunnaaruttalu allaat ingasattumik ajortuliorsimagaluarutta Jehovap isumakkeerfigiumassavaatigut. Taamaattumik isumaqaruit ajortuliatit ingasappallaarmata Jiisusip utertitsissutitut pilliutaa tunngavigalugu isumakkeerfigineqarsinnaanak Paulusi eqqaamajuk. (Atuakkit 1 Timotheusi 1:15, 16). Paulusi Jiisusimik malersuisuusimagaluarluni ima allappoq: “[Maanna] inuuserisara inuuseraara upperfigalugu Guutip ernera uannik asannittoq uangalu pillunga imminut tunniuttoq.” (Gal 2:20; ApS 9:5) Paulusip paasivaa peqqissimissuteqaraluarluni Guutimut kiffartornermini sapinngisaminik iliortariaqarluni, peqqissimissuteqaqqikkumanani. Tamanna aamma illit ilikkarpiuk?

PEQQISSIMISSUTEQARPIT?

9, 10. (a) Suut peqqissimissutigisinnaavavut? (b) Sooq kukkussutigisimasanik isumakuluutiginnittuarneq iluaqutaanngila?

⁹ Iliuuseqarsimavit maanna peqqissimissutigisannik? Kukkusumik anguniagaqarlutit piffissatsiarsuaq nukitillu atulussinnarsimavigit? Iliuuseqarsimavit allat ajoqutigisaannik? Immaqaluunniit allamik peqqissimissuteqarputit. Taamaappat qanoq iliorsinnaavit?

¹⁰ Inoqarpoq isumakuluttuaannartunik. Kukkussutigisaminnik eqqarsaatiginnittuarnermikkut imminnut nikallungatillutillu isumaalutsittarput. Isumakulunnikkut ajornartorsiummik aaqqiisinnaavit? Naamerluinnaq! Takorlooruk nalunaaquttap-akunnerpassuini qajartortutit, uffa qajaq pitoqqasoq. Nikeriarnak nukippassuit atorpatit. Isumakuluinnarnak ajornartorsiut aaqqinniarlugu sapinngisannik iliuuseqartariaqarputit. Ajuallatsitannut utoqqatserlutit eqqisseqatiginiarsariuk. Kukkuninnut pissutaasoq ajornartorsiutaaleqqeqqunagu iliuuserinaveersaaruk. Ilaannikkulli kukkussutivit kingunipilui naammagalugit atortariaqarpatit. Kukkussutigisimasannilli isumakuluutiginnittuarnerit iluaqutaanavianngilaq, allaammi Guutimut kiffartorninni sapinngisannik iliuuseqarniarninnut ajoqutaaginnassaaq.

11. (a) Jehovamit nallittorneqarumallutalu asaneqarumagutta susariaqarpugut? (b) Siornatigut kukkussutigisavut pillugit pisuusutut misigiunnaarumalluta Biibili naapertorlugu susariaqarpugut?

¹¹ Inuit ilaat misigisarput siornatigut ajortuliarisimasatik ajungaarmata Guutimit nallittorneqarsinnaanatik. Immaqa misigipput kukkussutitik amerlavallaarlutilluunniit ingasappallaartut. Ilumoortorli unaavoq: Siornatigut qanorluunniit iliorsimagaluarunik kukkussutigisimasatik nassuerutigisinnaavaat aamma allannguisinnaallutillu Guutimut isumakkeerfigeqqusinnaapput. (ApS 3:19, 20) Taamaaliortut Jehovap nallittuinermik asanninnermillu ersersitsivigisinnaavai, inuppassuarnut allanut taamaalioreernermisut. Jehovap asannilluni isumakkeerfigissavaa kinaluunniit maniguullunilu unneqqarissoq ajortuliaminillu aliasuutiginnittoq. Guuti taamaaliorpoq Jobimut ima oqartumut: ‘Peqqissiminera takutippara issumi arsanilu issiallunga.’ (Job 42:6) Qamuuna eqqisserusukkutta siunnersuut Biibilimeersoq una maleruartariaqarparput: “Unioqqutitsinerminik isertuisoq pilluaatissaqanngilaq; ajortuliaminilli anngiiaatiginnittoq soraarussisorlu nallittorneqartussaavoq.” (Uss 28:13; Jaak 5:14-16) Ajortuliavut Guutimut nassuerutigisariaqarlugillu isumakkeerfigeqqusariaqarpugut eqqunngitsuliarisallu aaqqinniarlugit iliuuseqartariaqarluta. (2 Kor 7:10, 11) Taava Jehovap ‘isumakkiinertoqisup’ nallittussavaatigut. — Es 55:7, 1900.

12. (a) Ilerasuuteqaraangatta Daavi qanoq ilaarsinnaavarput? (b) Jehova peqqissimisoq qanoq paasisariaqarpa, tamatumalu akissutaata ilisimanera qanoq iluaqutigaarput? (Takuuk ungalusaq).

¹² Qinnut sunniineqqortoqaaq, tamannalu aqqutigalugu Guutimit ikiorneqarsinnaavugut. Daavip qinnummini, Tussiaammi nuannersumi tammatsaalineqartumi, ersersippaa upperigini qinnutini Jehovamit akineqareersut. (Atuakkit Tussiaat 32:1-5). Daavip ajortuliani Guutimut nassuerutiginngikkallaramigit ilerasunnini tujormissutigingaarpaa. Annilaangasutut napparsimasutullu misigalunilu eqqarsaatikkut artorsarpoq. Aatsaat ajortuliani Guutimut nassuerutigigamigit isumakkeerfigineqaramilu iluaallatsitsivoq. Jehovap Daavip qinnutaa akivaa inuunerminilu ingerlaqqinnissaanut ajunngitsuliornissaanullu nakussatsillugu. Taamatulli kukkussutigisimasatit isumakuluutigigukkit ilumoorlutit isumakkeerfigeqqullutit Jehova qinnuigiuk allannguiniarlutillu sapinngisannik iliuuseqarlutit. Taava upperiuk Jehovap tusarnaaqqissaaraatit isumakkeerfigigaatillu. — Tuss 86:5.

SIUNISSAQ ISIGINIARNERUJUK

13, 14. (a) Maannakkut suut isiginiarnerussavavut? (b) Pissutsit maannakkut atukkavut misissorniarlugit imminut qanoq aperisinnaavugut?

¹³ Pereersut ilinniarfigisinnaagaluarlugit isumakuluutigiuaannassanngilavut. Taamaattumik maannakkut pisut siunissarlu isiginiarnerukkit. Imminut ima aperigit: ‘Aalajangiinikka ukiorpaaluit qaangiuppata peqqissimissutigalugit eqqarsassaanga allatut iliorsimasuuguma ajunnginnerusimassagaluartoq? Aalajaallunga Guuti kiffartorfigaara siunissami peqqissimissutissaqannginniassagama?

¹⁴ Annikilliornartussarsuaq qanilliartortillugu silatusaarnerussaaq imminut ima aperigutta: ‘Guutimut kiffartornermi iliuuseqarnerusinnaavunga? Pioneriusinnaavunga? Ilagiinni kiffartortunngornissannut suna akornutigaara? Sapinngisara tamaat inuttut pissuseq nutaaq pissuserilerniarpara? Maanna inuttut qanoq ittuunera Jehovap silarsuassaani nutaami inuusinnaatitaasussatut akuerineqarsinnaassava?’ Iliuuserisimanngisatit isumakuluutigiinnarnagit maannakkut qanoq iliuuseqarsinnaanerit eqqarsaatigiuk, qulakkeerullu Jehovamut kiffartorninni sapinngisannik iliuuseqartutit. Taamaaliunngikkuit taava immaqa peqqissimissutissaqaqqiliinnassaatit. — 2 Tim 2:15.

GUUTIMUT KIFFARTORNERIT PEQQISSIMISSUTIGINNGISAANNARUK

15, 16. (a) Amerlasuut Jehovamut pitsaanerpaamik tunniussiniarlutik suut pilliutigisimavaat? (b) Sooq Guutimut pilliutigisimasarput sunaluunniit peqqissimissutigissanngilarput?

¹⁵ Piffissaq tamaat Jehovamut kiffartorniarlutit pilliuteqarsimavit? Immaqa atorfik qaffakkiartorfigisat suliffiutilluunniit iluatsitsiffiulluartoq asooruppat Jehovamut kiffartornermi piffissaqarnerujumallutit. Immaqaluunniit aalajangerputit aappartaarniarnak qitornartaarniarnalluunniit Betelimi, nunani allani sanaartoqataasutut, nakkutilliisutut angalasartutut ajoqersuiartortitatulluunniit kiffartorumallutit. Taamatut aalajangernerit maanna peqqissimissutigaajuk? Misigivit pilliutigisimasatit pisariaqarsimanngikkaluartut piffissaalluanngitsukkulluunniit taamaaliorsimasutit? Soorunami naamik!

¹⁶ Taamatut aalajangerputit Jehovamik asanningaarnerit allanillu taassumunnga kiffartorusuttunik ikiuerusunnerit pissutigalugit. Isumaqaqinak allatut iliuuseqarsimagaluaruit ingerlalluarnerusimassagaluarlutit. Aalajangiinitit nuannaarutigingaarsinnaavatit! Pissutsit atukkatit naapertorlugit Jehovamut kiffartorninni pitsaanerpaamik aalajangiisimavutit. Jehovap imminik pilluni illit pilliutigisimasatit puiussanngilai. “Inuunivik”, inuuneq naassaanngitsoq naammalluinnartorlu, inuunerilerukku takorloorsinnaasannit pitsaanerungaartumik pilluaqqujumaarpaatit! — Tuss 145:16; 1 Tim 6:19.

PEQQISSIMISSUTIGISATIT KIFFARTORNINNUT AKORNUTAATEQINAGIT

17, 18. (a) Paulusi peqqissimissutigisani nanertuutigiuarumanagit qanoq iliorpa? (b) Paulusi qanoq ilaarsinnaaviuk?

¹⁷ Paulusi peqqissimissutigisani nanertuutigiuarumanagit qanoq iliorpa? Paulusi allappoq iliuuserisimasani isumakuluutigiuarunnaarlugit akissarsiassani ilungersuutigalugu. (Atuakkit Filippimiut 3:13, 14). Paulusip juutiussuseq aallukkallaramiuk kukkussutigisimasani eqqarsaatigiuaannanngilai. Sapinngisanili tamaat aalajaattuarpoq inuunerup naassaanngitsup akissarsiassarititaa piumallugu.

¹⁸ Paulusip allatai qanoq ilinniarfigisinnaavavut? Iliuuserisimasavut allanngortissinnaanngisavut isumakuluutiginagit siunissami pilluaqqusaajumalluta maannakkut susinnaanerluta eqqarsaatigisariaqarparput. Immaqa kukkussutigisimasavut puiorluinnarsinnaanngilavut, pisuusutulli misigiuaannartariaqanngilagut. Iliuuserisimasavut kiffartornitsinnut akornutaatikkunnaarlugit maanna Guuti pitsaanerpaamik tunisinnaavarput siunissarpullu nuanningaartoq eqqarsaatigisinnaallutigu!