Ilagiit atuakkamik atuaqqissaaqatigiittarnerannik aaqqissuussaq
Imm. 4: Immissinnut nakussassaqatigiittuaannaritsi
1 Atuakkamik atuaqqissaaqataasut tamarmik tamanut anersaakkut nakussassaataasinnaapput. Bibelimi peqqussut naalallugu kissaatigaarput ’asanninnermut misissoqatigiinnissarput ajunngitsuliornermullu kajumissaaqatigiinnissarput, annerusumik ullussaq qanillilermat’. — Epr. 10:24, 25.
2 Ikioqatigiigitsi: Atuakkamik atuaqqissaaqataasut tamarmik atuaqqissaarnerup inussiarnerpaluttumik asannippaluttumillu ingerlanissaanut ilasaasinnaapput. Allat inuttut soqutiginninnermik ersersitsivigisarutsigik atuaqqissaaqatigiit ataqatigiinnerannut nukittorsaataassaaq. Assersuutigalugu, napparsimalluni agginngitsoortoqaraangat malugisarpiuk? Immaqa pineqartoq sianerfigisinnaavat pulaarluguluunniit. Taamaaliortarunik atuaqqissaaqatigiittartut imminnut qaninnerulissapput.
3 Ilarsi qiimmassarneqarnissaminik pisariaqartitsiva? Ikiorniarlugu qanoq iliorsinnaavit? Ataatsimiinnerni allat oqaloqatiginiartakkit; ilassiinnarnissaat naammagisassanngilat. Ilaat immaqa ittoortuupput, saaffigineqaraangamilli oqaloqatiginnikkumasarput. (uw, q. 137-8) Napparsimatilluni imaluunniit nikallungatilluni ikinngutinit pulaarneqarneq ikiorneqarnissamillu neqeroorfigineqarneq qiimmaallannartaqaaq. Ilami paasiinnarluguluuniit allanit eqqarsaatigineqarluni qiimmaallannartarpoq.
4 Aammattaaq pingaaruteqarpoq gruppeqatit oqaluussinermi suleqatigisarnissaat. Gruppitsinniittut assigiinngitsut oqaluussinermi suleqatiginiarsarisariaqarpavut. (2 Kor. 6:11-13; 12:15) Immaqa atuakkamik atuaqqissaaqatigiinnermik aqutsisup allanik ikiuinissatsinnik ilaannikkut qinnuigisassavaatigut. Taava qanoq qisuariartassaagut? Oqaluussisartut pionerillu oqaluussinermi suleqatigiittarpata atuakkamik atuaqqissaaqatigiinneq nukittunerulissaaq.
5 Nammineq maligassiuinerput: Tamatta immikkut maligassiuilluarnissarput pingaaruteqarpoq. Assersuutigalugu, atuakkamik atuaqqissaaqatigiinnermi rigssalimi ataatsimiittarnitsitut atisarissaartarnitsigut ataqqinninnermik ersersitsisinnaavugut. Taamaalilluta ulluinnarsiuterpalaarpallaartunik atorlutik aggertartunut maligassiuilluassaagut. Siusinaarluni aggertarneq ileqqorilersimaviuk, ataatsimiinnermi allanut akornusersuiumanak?
6 Ilagiit atuakkamik atuaqqissaaqatigiittarnerannik aaqqissuussaq Jehovamit asannittumik ikiuutaavoq, tamatuminngalu tamakkiisumik tapersersuinissarput pisariaqarpoq. (Jes. 40:11) Tassani inuttut ikiorneqarsinnaavugut allanillu anersaakkut nakussassaaqataasinnaalluta. Taamaattumik aaqqissuussamik tamatuminnga tamakkiisumik uummateqarluta tapersersuinitsigut ’tuppallersaqatigiittuaannarta nukittorsaqatigiittuaannartalu’. — 1 Tás. 5:11, (NV). (km 10/91 Menighedsbogst. 4)